Ken tiiteixpantijkauan Jehová tokojtiliaj tikchiuaskej tlen Jesús otemachti niman tlen inomachtijkauan okichiujkej. Ipan yejuin tlamachtijli notetomilia seki itech tlen tikneltokaj.

1.   ToTajtsin. Tikueyichiuaj toTajtsin akin melauak, akin ueyixtika niman akin nochi okichijchiuj, yejua itoka Jehová (Salmo 83:18; Apocalipsis 4:11). Yejua inTajtsin Abrahán, Moisés niman Jesús (Éxodo 3:6; 32:11; Juan 20:17).

2.   Biblia. Tikneltokaj ika Biblia itlajtol toTajtsin niman ika kijtoua tlen melauak (Juan 17:17; 2 Timoteo 3:16). Tejuamej tikneltokaj tlen uajlauj ipan yejon 66 libros tlen kipiya Biblia, sekimej kimixmatij ken Antiguo Testamento niman Nuevo Testamento. Tlamachtijketl Jason BeDuhn noijki ijkon okijto, ijkuak okijkuilo ika iteixpantijkauan Jehová “kichiuaj niman kineltokaj tlen Biblia kijtoua. Noijki xkipatlaj nion kikixtiliaj tlen ompa ijkuiliujtika”. a

    Maski tikneltokaj nochi tlen Biblia kijtoua, kuajli tikmatstokej ika seki tlen ompa noteneua nochiua niman nasikamati ijkon ken ijkuiliujtika. San ika, okseki san tikasikamatiskej tla tikpouaj okseki tlaxeloltin, pampa seki tlen ompa noteneua san itlaj kineskayotiaj (Apocalipsis 1:1).

3.   Jesús. Tikchiuaj tlen yejua otemachti niman tlen yejua okichiuj, noijki tikueyiteneuaj pampa otechmakixti niman pampa iKoneuj toTajtsin (Mateo 20:28; Hechos 5:31). Yejuin kiteititia ika tikchiuaj ijkon ken Cristo (Hechos 11:26). San ika, Biblia xtemachtia ika Jesús yejua akin más kojtik nion xkiteneua trinidad (Juan 14:28).

4.   ITekiuajyo toTajtsin. Yejuin se tekiuajyotl tlen onka iluikak niman xonka ipan inyojlo akin kichiuaj ken Cristo. Kitekipatlas nochi tekiuajyomej tlen onka ipan tlaltikpaktli niman kichiuas tlen toTajtsin kinekiya manochiua ipan yejuin tlaltikpaktli (Daniel 2:​44; Mateo 6:​9, 10). San achijtsin poliui ijkuak nochiuas yejuin, pampa teotlajtoltin tlen uajlauej ipan Biblia kijtouaj ika itinemij ipan itlamiyan tonaltin (2 Timoteo 3:1-5; Mateo 24:3-14).

    Jesús yejua tekiuaj itech iTekiuajyo toTajtsin tlen onka ne iluikak niman opeuj tekiuajti ipan 1914 (Apocalipsis 11:15).

5.   Temakixtilistli. Tlaltikpakchanejkej uelis xok kipiyaskej tlajtlakojli niman xok mikiskej ipampa tlen Jesús okichiuj (Mateo 20:28; Hechos 4:​12). Tla tiknekij tikpiyaskej yejuin noneki titlaneltokaskej itech Jesús, tikpatlaskej tonemilis niman toapolaktiskej (Mateo 28:19, 20; Juan 3:​16; Hechos 3:​19, 20). Tlen tikchiuaj kiteititia tla yemelak titlaneltokaj (Santiago 2:​24, 26). San ika, xtimakisaskej san pampa tejuamej tiknekij, timakisaskej ipampa “iueyitetlajsojtlalis Dios” (Gálatas 2:​16, 21).

6.   Iluikak. Jehová, Jesús niman ángeles yolmelajkej nemij ne iluikak (Salmo 103:19-​21; Hechos 7:​55). b San 144, 000 tlaltikpakchanejkej yoliuiskej ne iluikak niman tekiuajtiskej iuan Jesús ipan iTekiuajyo toTajtsin (Daniel 7:​27; 2 Timoteo 2:​12; Apocalipsis 5:​9, 10; 14:​1, 3).

7.   Tlaltikpaktli. ToTajtsin okichijchiuj tlaltikpaktli niman ijkon tlaltikpakchanejkej ompa nochipa machantikan (Salmo 104:5; 115:16; Eclesiastés 1:4). ToTajtsin kinteochiuas akin kitlakamatij niman kichiuas kuajli manemikan ipan se kualtsin xochitlalpan (Salmo 37:11, 34).

8.   Tlen xkuajli niman tlajyouilistli. Biblia techijlia ika se ángel okixnamik toTajtsin, ipampa yejon, panoua tlen xkuajli niman titlajyouiyaj (Juan 8:​44). Yejuin ángel sakin ika okixnamik toTajtsin onoixmat ken Diablo niman Satanás. Okichiuj ika Adán niman Eva makichiuakan tlen yejua kinekiya, ipampa yejon ikoneuan melak tlajyouiyaj (Génesis 3:​1-6; Romanos 5:​12). Pampa toTajtsin kineki teititis ika xmelauak tlen satanás okijto, okitekauili manochiua tlen xkuajli niman maonia tlajyouilistli, san ika, yejuin xuejkauis pampa yejua xkitekauilis nochipa ijkon manochiua.

9.   Mikilistli. Ijkuak yakaj miki xok kanaj yauj (Salmo 146:4; Eclesiastés 9:​5, 10). Akin yomijkej xtlajyouijtokej ipan infierno kampa onka tlitl.

    Miyekej akin yomijkej uelis oksejpa yoliuiskej ijkuak toTajtsin teyolitis (Hechos 24:15). San ika, tla xkintlakamatij itlanauatiluan toTajtsin kinpopoloskej niman xok keman nemiskej (Apocalipsis 20:14, 15).

10.   Familia. Tejuamej kuajli tikmatstokej ika se tlakatl san uelis nonamiktis iuan se siuatl pampa toTajtsin ijkon okijto yeuejkaui, niman san uelis noxeloskej tla yakaj auilnemi (Mateo 19:​4-9). Kuajli tikmatstokej ika tlen kijtoua Biblia melak kuajli niman uelis kichiuas ika familias mayolpakikan (Efesios 5:22–​6:1).

11.   Ken tikueyichiuaj toTajtsin. Tejuamej xtikueyichiuaj cruz nion okse tlamachijchiuajli (Deuteronomio 4:​15-​19; 1 Juan 5:​21). Tejuamej ijkin tikueyichiuaj toTajtsin:

    •   Tikchiuiliaj teoyotl toTajtsin (Filipenses 4:6).

    •   Tikpouaj niman tomachtiaj Biblia (Salmo 1:​1-3).

    •   Titlanemiliaj itech tlen tikpouaj ipan Biblia (Salmo 77:12).

    •   Tosentlaliaj niman ijkon tikchiuaj teoyotl, tomachtiaj Biblia, san sekan tokuikatiaj niman toyolchikauaj (Colosenses 3:​16; Hebreos 10:23-​25).

    •   Titenojnotsaj itech kuajli tlajtoltin itech iTekiuajyo toTajtsin (Mateo 24:14).

    •   Tikinpaleuiyaj oksekimej (Santiago 2:​14-​17).

    •   Tikinchijchiuaj niman tikintlajpiyaj Kaltin kampa tosentlaliaj niman okseki kaltin kampa tikueyichiuaj Jehová (Salmo 127:1).

    •   Titlapaleuiyaj kampa tlaixpoliui (Hechos 11:27-​30).

12.   Akin techyekanaj. Tosentlaliaj ipan tlanechikoltin, ipan se tlanechikojli nemij akin techyekanaj, tikimixmatij ken tlayekankej niman yejuamej xkintlaxtlauiliaj (Mateo 10:8; 23:8). Xtiktemakaj diezmo niman xnotlajtlani tomintsin (2 Corintios 9:7). Tlen nochiua, notlaxtlaua ika tomintsin tlen kitemakaj ika nochi inyojlo akin ompa yauej.

     Akin techyekanaj noixmatij ken Grupo akin Tlayekana ipan nochi tlanechikoltin, ompa nemij san achijtsitsintin tlakamej, yejuamej kichiuaj ken cristo niman chikauak intlaneltok kipiyaj (Mateo 24:45).

13.   Ken touikaj imiuan tokniuan. Maski san kanon matiualeuakan, tinochimej san noijki tlen tikneltokaj (1 Corintios 1:​10). Tokojtiliaj maka matechxelo ken sejneka titlajtouaj niman ken titlachiaj (Hechos 10:34, 35; Santiago 2:4). Maski ijkon, cada se kitlapejpenia tlenon kichiuas ipan inemilis ika tlen yonomachti ipan Biblia (Romanos 14:​1-4; Hebreos 5:​14).

14.   Ken toyekanaj. Tokojtiliaj tikteititiskej ika titetlasojtlaj ika nochi tlen tikchiuaj (Juan 13:34, 35). Xtiknekij tikchiuaskej itlaj tlen toTajtsin xkuelita, ika yejon, xtotlaliliaj yestli (Hechos 15:28, 29; Gálatas 5:​19-​21). Tejuamej tiyolseujkej niman xtiauej ipan guerra (Mateo 5:9; Isaías 2:4). Tikintlakaitaj tekiuajkej niman tikintlakamatij itlanauatiluan ijkuak xtechtlajtlaniliaj matikchiuakan itlaj tlen toTajtsin xkuelita (Mateo 22:21; Hechos 5:​29).

15.   Ken touikaj imiuan oksekimej. Jesús okijto: “Xkintlajsojtla oksekimej no ijki ken tejua timotlajsojtla”, noijki okijto ika akin kichiuaj ken Cristo “xnouikaj ken on tlaltikpaktlakamej” (Mateo 22:39; Juan 17:16). Ika yejon, maski xtokalaktiaj ipan política niman xtonelouaj iuan okseki tlaneltokiltin, kuajli touikaj imiuan oksekimej (Gálatas 6:​10; 2 Corintios 6:​14). Maski ijkon, tiktlakaitaj tlen oksekimej kitlapejpeniaj kichiuaskej (Romanos 14:12).

 Tla tikneki okseki tikmatis itech tlen tikneltokaj, uelis tikalakis ipan topágina de internet. Noijki uelis tontlajkuilouilis sucursal, touan timosentlalis ipan Kajli kampa tosentlaliaj noso tiktlajtoltis se iteixpantijkauj Jehová.