Kema. Tinochimej iteixpantijkauan Jehová titemachtiaj itech Biblia, noso titenojnotsaj, niman nemij melak miyekej siuamej akin kichiuaj yejuin tekitl. Ipan Biblia kijtoua ika “siuamej akin kiteijlitokej kuajli tlajtoltin melak miyekej” (Salmo 68:11).

 Siuamej akin iteixpantijkauan Jehová noijki kichiuaj ken siuamej akin oyolmelaujkanenkej tlen Biblia kinteneua (Proverbios 31:10-​31). Maski xkintlaliaj matlayekanakan niman matlamachtikan ipan tlanechikojli, ika inyojlo tenojnotsaj itech Biblia niman kinpaleuiyaj inkoneuan makintlakamatikan tlajtolyekanalistin tlen uajlauej ipan Biblia (Proverbios 1:8). Itech tlen kichiuaj niman tlen kijtouaj kinpaleuiyaj oksekimej kuajli matlanemilikan (Tito 2:​3-5).