Ipan 1 de septiembre de 2024, tokniuj Massimiliano Bricconi, itech Grupo akin kiyekana isucursal Italia, okijto ika ionkatka nochi Traducción del Nuevo Mundo ika señas italiana. Yejuin onoteijli ipan ueyi tlanechikojli yeyi tonajli “¡Xteijlikan on kuajli tlajtojli!” ipan Kajli kampa tikinpiyaj toueyitlanechikoluan ne Roma (Italia). Yejon 854 akin onosentlalijkej ouel nimantsin okitemoltijkej Biblia desde jw.org niman ipan JW Library Sign Language.

Yejuin kachtopa Biblia ika señas italiana tlen nochi yonotlajtolkuep. Iteixpantijkauan Jehová opeuj kinkixtiaj amatlajkuiloltin ika señas italiana ipan 1998. Aman, ne Italia nemij 845 tokniuan akin tlapaleuiyaj ipan 15 tlanechikoltin, 12 grupos niman 10 pregrupos ika señas italiana.

Ipan 6 de septiembre de 2024, tokniuj Frederick Nyende, itech Grupo akin kiyekana isucursal Uganda, okijto ika libros de Mateo, Marcos, Lucas niman Juan, yokiskaj ika tlajtojli tooro. Niman yejuin onoteijli ipan ueyi tlanechikojli yeyi tonajli “¡Xteijlikan on kuajli tlajtojli!” ipan Kajli kampa tikinpiyaj toueyitlanechikoluan ne Hoima, (Uganda). Yejon 928 akin oyajkej ouel okiselijkej ika amatl La Biblia: Las Buenas Noticias según Mateo. Noijki, yejuin naui Evangelios nimantsin ouel okitemoltijkej desde jw.org niman ipan JW Library.

Ipan Uganda nemij 2.2 millones akin tlajtouaj tooro niman ñoro (tlen san noijki kakisti). Biblias tlen onkatij ika yejuin tlajtoltin xkipiyaj itoka toTajtsin, Jehová. Ne Uganda nemij 374 iteixpantijkauan Jehová niman onka ome tlanechikoltin ika tooro niman naui ika ñoro. Yejuamej melak yolpakij ika aman ikipiyaj naui Evangelios ika intlajtol tlen kuajli kasikamatij, tlen uelis kitekitiltiskej ipan tlanechikojli niman ijkuak ontenojnotsaskej.

Ipan 8 de septiembre de 2024, ipan se tlanechikojli tlen onopanolti kampa isucursal Kazajistán, tlen onka Almaty, onoijto ika okis libro de Mateo ika uigur (ika letra árabe niman ika letra cirílico). Niman onosentlalijkej 483. Libro de Mateo nimantsin ouel okitemoltijkej desde jw.org niman ipan JW Library.

Miyek Biblias tlen onka ika uigur kitekitiltiaj tlajtoltin tlen xnasikamatij. Nemij 11 millones akin tlajtouaj yejuin tlajtojli, niman miyekej chantij Asia. San ika, sekimej noijki chantij África, Europa niman Norteamérica.

Ipan 13 de septiembre de 2024, tokniuj Moses Oundo, itech Grupo akin kiyekana isucursal Uganda, okijto ika libros de Mateo, Marcos, Lucas niman Juan, yokiskaj ika konjo. Yejuin onoijto ipan ueyi tlanechikojli yeyi tonajli “¡Xteijlikan on kuajli tlajtojli!” tlen onochiuj ne Bwera (Uganda). Yejon 925 akin oyajkej ouel okiselijkej ika amatl La Biblia: Las Buenas Noticias según Mateo. Noijki, yejuin naui Evangelios nimantsin ouel okitemoltijkej desde jw.org niman ipan JW Library.

Ne Uganda, nemij kanaj se millón akin tlajtouaj konjo. Iteixpantijkauan Jehová opeuj kintlajtolkuepaj amatlajkuiloltin ika yejuin tlajtojli ipan 2001. Aman, nemij 324 tokniuan akin tlapaleuiyaj ipan chikuasen tlanechikoltin ika konjo.

Ipan 15 de septiembre de 2024, tokniuj Jethro Barclay, itech Grupo akin kiyekana isucursal Liberia, okijto ika libros de Mateo niman Marcos yokiskaj ika tlajtojli inglés de Liberia. Yejuin okijto ipan se tlanechikojli tlen onopanolti ipan Kajli kampa tikinpiyaj toueyitlanechikoluan ne Johnsonville (Liberia). Ipan yejon tlanechikojli onosentlalijkej 1,176. Noijki, nochi tlanechikoltin akin tlajtouaj inglés de Liberia ipan yejon país ouel okitakej yejuin programa ika videoconferencia. Yejuin ome Evangelios ouel nimantsin okitemoltijkej ipan incelular noso tableta niman noijki ika audio, desde jw.org niman ipan JW Library. Sakin kisas ika amatl La Biblia: Las Buenas Noticias según Mateo.

Ne Liberia tlajtouaj inglés. San ika, kanaj 1.6 millones tlajtouaj se variante tlen itoka inglés de Liberia, de yejon ompa nemij 7,034 tokniuan akin tlapaleuiyaj ipan 120 tlanechikoltin. Ionkatkaj seki libros itech Biblia ika ingles de Liberia, pero san ika audio. Kemach hasta aman onoijkuilojkej seki libros itech iTlajtol toTajtsin tlen onotlajtolkuepkej.

Ipan 20 de septiembre de 2024, tokniuj Lázaro González, itech Grupo akin kiyekana isucursal Centroamérica, okijto ika libros de Mateo, Marcos, Lucas niman Juan, yokiskaj ika náhuatl de Guerrero. Yejuin onoijto ipan kachtopa tonajli itech toueyitlanechikol yeyi tonajli “¡Xteijlikan on kuajli tlajtojli!” tlen onopanolti ipan Kajli kampa tikinpiyaj toueyitlanechikoluan ne Chilpancingo, Guerrero (México). Ompa onosentlalijkej 769, niman 742 san okitakej ika videoconferencia desde Tlapa de Comonfort. Nochimej okiselijkej ika amatl Biblia. ITlajtol toTajtsin. Mateo. Yejuin naui Evangelios nimantsin ouel okitemoltijkej desde jw.org niman ipan JW Library.

Ne México, nemij 250,000 akin tlajtouaj náhuatl de Guerrero. Kachtopa tlanechikojli opeuj ipan 1987. Aman, nemij 1,216 tokniuan akin tlapaleuiyaj ipan 37 tlanechikoltin niman ome grupos ipan yejuin país.