Dios kineki iga nochi tejeme̱n matiyo̱lpa̱kikan. Yéj kijtowa: «Nikneki xikpiakan yo̱lsewilis wan amo xikpano̱lti̱kan tejté̱ yej aye̱kti» (Jeremías 29:11). Iga Dios te̱neki, kichij Ta̱jli wan nochi yej nigaj onoʼ. Wan yéj te̱ijliá iga poliwi áchisan tiempoj, iga yawi kitami̱ti nochi tejté̱ yej te̱yo̱lmiktiá. Kua̱ mapoliwi iní̱n, nochimej tiawij tiyo̱lpa̱kitij.

Nise̱ gobiernoj awelij kitamiá tamijmiktilis, kokolis wan mikilis. Pero wi̱ts tejté̱ yej ye̱kti, poliwi áchisan tiempoj iga Irreinoj Dios «yawi kita̱taksati wan kipolo̱ti nochi ini̱nmej gobiernoj» (Daniel 2:44). Yáwisan goberna̱ro̱ti Irreinoj Dios. Nochi yej kitajto̱lkakij Dios yawij yo̱lpa̱kitij wan ayá̱ kipiaskej kokolis. Pan Biblia kijtowa: «Jehová yawi kipojpowili̱ti nochi iyi̱xa̱mej», «wan niágaj yej ompa onos yawi kijto̱ti: Nikpiá kokolis» (Isaías 25:8 wan 33:24).

Iga mapoliwi nochi kualo̱lis wan yo̱lmiktilis, Dios yawi kipolo̱ti nochi tajta̱gamej yej kichi̱waj yej aye̱kti (Sofonías 2:3). ¿Ke̱man yawi kichi̱wati iní̱n? Itajto̱l Dios kijtoj iga «pan tamilis de ini̱nmej días» panoskiá nochi tejté̱ yej aye̱kti, yej a̱man kichi̱wa iga matimoyo̱lmikti̱kan. Iní̱n kine̱xtiá iga poliwi áchisan tiempoj iga Dios yawi kipolo̱ti nochi iní̱n tejté̱ yej aye̱kti. Tajto̱lti 2 Timoteo 3:1-5.

Moneki matiki̱xmatikan Dios, iní̱n welij tikchi̱waj kua̱ timomachtiáj pan Biblia, iga iní̱n ken se̱ a̱maʼ yej se̱ te̱taj kijkuilo̱wiliá ipilowa̱n. Biblia te̱ijliá te̱ matikchi̱wakan iga matipa̱kikan a̱man, wan te̱ijliá te̱ matikchi̱wakan iga matisatokan nochipa nigaj pan Ta̱jli. Ayá̱ nochi kitaskej ye̱kti iga téj ximomachti pan Biblia. Pero amo xikajte̱wa iga ximomachti de Dios, iga Biblia kijtowa: «Yej kita̱liá nochi iyo̱loj pan Jehová, yéj kima̱na̱wis» (Proverbios 29:25). Dios yawi mitsmakati tejté̱ yej puxsan ye̱kti. Tajto̱lti Revelación (Apocalipsis) 14:6, 7.