Dios kijliá nochi tajta̱gamej wan siwa̱tkej iga matajto̱kan wan yéj, iní̱n se̱ tejté̱ yej pux pati̱yoj (o patka̱yoj). Siga kichi̱waj iní̱n welij onoskej ina̱ de Dios (Salmo 65:2). Pero iní̱n ayá̱ kijtojneki iga Dios kikaki nochimej yej kino̱tsaj. Se̱ tane̱xtilis, Itajto̱l Dios kijtowa iga si se̱ ta̱gaʼ akiye̱ʼita isiwa̱, Jehová akikaki ioración (1 Pedro 3:7). Ikia kua̱ sekin israelitajmej kichi̱wayaj miak tejté̱ yej aye̱kti, Dios akikakiá ioración yej kichi̱wayaj. Jehová kijlij: «Aunke xine̱notsakan komati biáj, nej ayá̱ nimitskakij, iga anmoma̱ tentoʼ de esti» (Isaías 1:15). Pero Dios kena kikaki yej kichi̱waj yej aye̱kti siga moyo̱lpataj. Tajto̱lti Isaías 55:7.

Kua̱ tiora̱rowaj tikweymakaj Dios, inó̱n iga kua̱ tiora̱rowaj matikno̱tsakansan Jehová (Mateo 4:10; 6:9). Wan iga tejeme̱n tikchi̱waj yej aye̱kti moneki iga kua̱ titajtowaj wan Dios, matikchi̱wakan pan ito̱ka̱ Jesús iga yéj mik iga tejeme̱n (Juan 14:6). Jehová akineki matikijtojtokan nochipa se̱ oración yej tikpiajya pan totajla̱mikilis o yej ijkuilijtoʼ pan se̱ a̱maʼ. Yéj kineki iga matikijli̱kan yej onoʼ pan toyo̱loj. Jesús kijtoj: «Kua̱ xiora̱ro, amo xikijto komati biáj ino̱nsan tejté̱, ijkó̱n ken kichi̱waj tajta̱gamej yej akitajto̱lkakij Dios» (Mateo 6:7). Tajto̱lti Filipenses 4:6, 7.

Totaj Jehová te̱kaki hasta kua̱ tikno̱tsaj pan san totajla̱mikilis (1 Samuel 1:12, 13). Wan yéj te̱ijliá iga matitajto̱kan nochipa iwan, kua̱ tane̱si wan kua̱ tayowati, wan kua̱ tiawij titakua̱tij o kua̱ tikpiáj yo̱lmiktilis. Pan Biblia kijtowa: «Xikpanoltili Jehová yej tikxi̱kojtoʼ [o motama̱mal], wan yéj mitsmakas tajpal» (Salmo 55:22). Tajto̱lti Mateo 15:36.

Pan iní̱n Ta̱jli onokej komati tajta̱gamej yej akipiáj fe pan Dios, wan sekin te̱pinajtiáj kua̱ tikijliáj iga Dios yawi kiwajligati yo̱lsewilis pan Ta̱jli. Iní̱n welij kichi̱wa iga amo matimotekitili̱kan  iga matimona̱techokan (o matimoaxilti̱gan) ka̱n Dios (2 Timoteo 3:1, 4; 2 Pedro 3:3, 13). Inó̱n iga moneki matimonechko̱kan wan yej kinekij makitajto̱lkakikan Dios iga mate̱yo̱lketsakan. Yejeme̱n no̱ kinekij matikyo̱lketsakan. Pan Biblia kijtowa: «Matimosen-ejla̱mikikan wan ijkó̱n matimoyo̱lketsakan iga matimonekikan wan matikchi̱wakan yej ye̱kti, amo matike̱lka̱wakan iga matimonechko̱kan, ken sekin nochipa kichi̱waj, sinoke nochipa matimosenyo̱lketsakan, ma̱j iga anmejeme̱n ankitaj iga iní̱n día yáwiya asiti» (Hebreos 10:24, 25).

Siga timonechkowa wan yej kinekij Dios, mitspale̱wiskej iga ximomachi̱li ina̱ de Dios. Si tiá ka̱n monechkowaj yej tajto̱lmoya̱waj de Jehová timomachti̱s kén seuʼmej kine̱xtiáj fe. Tajto̱lti Romanos 1:11, 12.

Welij timomachi̱liá iga tonoʼ ina̱ de Dios kua̱ titajla̱miki kén xikchi̱wa yej timomachtij pan Biblia. Xitajla̱miki pan tejté̱ yej Jehová kichi̱wa, pan yej te̱ijliá wan pan tejté̱ yej yawigoʼ (o yawi-oʼ) kichi̱wati. Pan Biblia kijtowa: «Iní̱n tajto̱lmej yej onoʼ pan a̱matajkuilo̱l de la ley amo xikajte̱wa iga xitajto de iní̱n, wan pan día wan pan tayo̱wa xiktajto̱lti wan xitajla̱miki pan iní̱n, iga welij xikchi̱wa nochi ken ijkuilijtoʼ ompa wan ijkó̱n tiás ye̱kti pan mo-ojti wan tikmatis kén tinemis» (Josué 1:8). Siga titajla̱miki pan yej Dios mitsijliá pan Itajto̱l wan titajtowa wan yéj, tikojasis iga Dios pux te̱neki wan pux tamati. Tajto̱lti Salmo 1:1-3.

Welij timomachi̱liá iga tonoʼ ina̱ de Dios si tikpiá fe wan si tikta̱liá nochi moyo̱loj pan yéj. Pero la fe iní̱n ken tejeme̱n, iga matisatokan moneki matitakua̱kan, ijko̱nsan no̱ iga tofé maisato wan maweya moneki iga nochipa matitajla̱mikikan té íga tiktajto̱lkakij yej kijtowa Biblia. Tajto̱lti Mateo 4:4 wan Hebreos 11:1, 6.

Siga tiknekij Dios yéj no̱ yawi te̱nekiti. Jehová welij te̱ma̱nawiá de nochi tejté̱ yej welij kichi̱wa iga matikpolo̱kan tofé. Wan no̱ te̱ma̱nawiá iga amo matikpolo̱kan isatolis iga nochipa (Salmo 91:1, 2, 7-10). Wan no̱ te̱ijliá iga amo matikchi̱wakan tejté̱ yej ate̱ye̱chi̱wa wan yej ate̱yo̱lpaktiá, wan te̱nextiliá kén matinemikan ye̱kti. Pan Biblia kijtowa: «Yej onokej wejka de téj yawij mikitij [...]. Pero, ye̱kti iga nej manimona̱techo ka̱n Dios. Pan Jehová yej Note̱ko wan Tekiwaj nimoma̱nawiá» (Salmo 73:27, 28). Tajto̱lti Santiago 4:8.