Na lö hadöi halöwö ndraonomö ba nomo mazui na lö la’ila hadia zinangea lafalua, tola manö lamane, ”Afölido da’a sa’ae!” Te tumbu ba gera-eramö ba wango’ou ya’ia ba wamaigi TV mazui famai game. Hiza’i, fatua lö öfalua da’ö, angeragö wanuturu lala hegöi mene-mene si so ba artikel da’a.

•   Abölö alio aföli niha börö hiburan. Imane si samösa ama sotöi Robert, ”So ösa ndraono sanguma’ö wa alio aföli ira wamalua halöwö ba nomo. Abölö omasi ira ba omuso dödöra na lafaigi TV mazui famai game.”

   Fao dödö wo’omonia sotöi Barbara ba niwa’önia andrö. Imane, ”Ba wa’aurida sero ma’ökhö, moguna ta’oguna’ö wangera-ngera hegöi fa’abölöda, ba itaria ara awena mofozu da’ö. Da’ö mbörö wa alio aföli ndraono ba wamalua halöwö sero ma’ökhö moroi na lafaigi TV mazui famai game.”

•   Niha sasese mamaigi media sosial alio afatö dödönia ba wa’aurinia. Iraono si bohou ebua tola manö lö adöni dödönia ba wa’aurinia me no aefa ifaigi koda mazui video nibe’e ndra awönia ba media sosial. Imane si samösa ono alawe sotöi Beth, ”Sasese tumbu ba wangera-ngerada, ’Fefu ndra awö-awögu, ohahau sibai dödöra. Hiza’i, ha ba nomo manö so ndra’o.’”

   Baero da’ö, na no hauga za ihorigö ginötönia si samösa niha ba wangoguna’ö media sosial, lö tebulö irasoi wa’aföli ba hulö zi lö eluaha wa’aurinia. Imane si samösa ono matua sotöi Chris, ”Tola möi fangaröröda media sosial ena’ö lö aföli ita. Hiza’i, na no aefa ta’oguna’ö ia, lö hadöi buania khöda.”

•   So mbua’ania na aföli ita. Imane si samösa ina sotöi Katherine na no aföli ndraononia, da’ö zamarou ya’ira ena’ö la’oguna’ö wa’atua-tuara. Duma-dumania imane, ”Na so sambua karton, tola lafazökhi da’ö tobali moto, tundraha, köfa sihombo, mazui tobali nahia ba wangirö’ö gama-gama somasi ira latörö tödö. Baero da’ö, ambala si no mubologö, tola labali’ö tendra.”

   Simane da’ö göi niwa’ö zi samösa psikolog sotöi Sherry Turkle. Ba zi sambua buku nifazökhinia, i’amaedolagö wa’aföli andrö inötö si sökhi ba wamazökhi hadia zi so ba wangera-ngerada. a Tobali, fa’aföli andrö so gunania. Molo’ö buku Disconnected, ”tola tefomaha gutoda ena’ö kreatif na ta’oguna’ö imajinasi ba ginötö aföli ita. Tola mufaomagö ia simane otot si no mufomaha ba wamazawa noro sabua”.

 Rahu-rahunia: Na aföli nonomö, oguna’ö ginötö da’ö ba wanolo ya’ia ena’ö itugu kreatif.

•   Na tola, tehegö ba ndraonomö famai-mai baero ba nomo. Imane Barbara si no mutötöi moroi yawa, ”Haga luo hegöi angi sihoho-hoho, tola iheta wa’aföli. Hawa’asökhi sibai da’ö! Na famai-mai ira baero ba nomo, abölö kreatif nasa gutora.”

   Niwa’ö Zura Ni’amoni’ö: ’So ginötö si no mutatugöi ba ngawalö hadia ia: inötö wa’iki ba inötö wanaoka-naoka.’—Sangombakha 3:1, 4, nisura ba gahe zura.

   Angeragö: Hewisa ena’ö asese famai-mai nonogu baero ba nomo? Na tebai atö famai-mai ia baero, hadia danö bö’ö si tola ifalua onogu yomo ba nomo?

•   Tolo nonomö ena’ö i’ame’egö tödö niha bö’ö. Imane si samösa ina sotöi Lillian, ”Sindruhu-ndruhu tasöndra wa’omuso dödö na tafalua zi sökhi ba niha bö’ö. Tola ta’owi mazui tahaogö newali nomo zi fahuwu khöda. Tola göi molombase ita ba nomora ba tabe’e öra nirinoda.”

   Niwa’ö Zura Ni’amoni’ö: ”Te’abusoi’ö dania niha soböwö, ba te’okafui dödö niha sangokafui tödö niha bö’ö.”—Amaedola 11:25.

   Angeragö: Hewisa ena’ö irasoi wa’omuso dödö onogu ba ginötö ifalua zi sökhi ba niha bö’ö?

•   Be’e duma-duma. Lagu wahuhuosada ba ginötö tafadunö-dunöisi halöwöda sero ma’ökhö, tola molua-lua da’ö ba ndraonoda. Imane si samösa ina sotöi Sarah, ”Na asese mokökö-kökö ita, tola manö lawa’ö iraonoda wa no saföli ita wa’auri andre. Hiza’i, na so khöda wa’aterou dödö, tola göi la’okhögö zimane da’ö iraonoda.”

   Niwa’ö Zura Ni’amoni’ö: ”Lö tebulö mangowasa niha somuso tödö.”—Amaedola 15:15.

   Angeragö: Hewisa ndra’odo ba ginötö ututunö halöwögu sero ma’ökhö föna ndraonogu? Hadia nitöngöni ndraonogu ba lala nifiligu ena’ö lö aföli ndra’o?

 Tips: Tolo ndraonomö ena’ö la’angeragö ngawalö zi sökhi si tola lafalua. Imane si samösa ina sotöi Allison, ”Ba nomoma so kotak saran. Gofu haniha manö, tola labe’e mbua gera-erara.”