Ato wo’omo ira matua mazui fo’omo ira alawe sorasoi wa abua khöra wahuhuosa khö ngambatöra hewa’ae ba ginötö fao ira. Hadia mbörö wa tola alua zimane da’ö?

•  Ahatö hiza’i hulö zi fandröndröu—Hadia mbörö?

•  Si tola öfalua

•  Niwa’ö wongambatö tanö bö’ö

•  Si tola mitutunö

•   Talafo marase

   ”Ba ginötö so ginötöma ba wahuhuosa, sasesenia ya’o hegöi fo’omogu no sa’ae talafo marase ndra’aga. Si to’ölönia, na no marasedo alio sibai mofönudo. Börö da’ö abölö sökhi na mafaigi manö TV.”—Anna.

•   Arörö ba HP mazui tablet

   ”Tola ahori ginötöda börö media sosial mazui hiburan si so ba Internet. Tola tahorigö ginötöda ba zi hauga za ha ba wamaigi da’ö ba lö fahuhuo ita khö ngambatöda hewa’ae na so ia ba zingada.”—Katherine.

•   Fabö’ö Hobi

   ”Me no mangawuli wo’omogu ira matua moroi ba halöwönia, si to’ölönia ifalua hobinia. Sindruhu sa moguna khönia da’ö me no marase ia wohalöwö ba zi ma’ökhö andrö. Hiza’i, omasido na oya ginötöma wefao.”—Jane.

•   Halöwö

   ”Börö teknologi, tola manö tafalua halöwöda gofu hawa’ara hewa’ae ba ginötö fao ita ba nösi nomoda. Tobali, inötö sinangea ube’e khö wo’omogu asese u’oguna’ö da’ö ba wo balas e-mail mazui sms moroi ba nahia wohalöwögu.”—Mark.

•   Törö tödöu wa moguna sibai öbe’e ginötöu khö ngambatöu.

   Niwa’ö Zura Ni’amoni’ö: ’Tatugöi hadia zabölö moguna.’—Filifi 1:10.

   Angeragö: Moroi ba nifaluamö, hadia no öforoma’ö wa abölö tohude ngambatöu moroi ba halöwö mazui hobi-mö. Hadia ha si toröi inötöu nibe’emö khö ngambatöu mazui ha ma’ifu öforoma’ö wa ö’ame’egö tödö ia?

   Tips: Böi balo-baloi ginötö si tefaudu. Hiza’i fazökhi jadwal ba mitatugöi ginötö hawa’ara fao ami ba zi darua ami.

   ”Omuso sibai dödögu me itatugöi ginötö fo’omogu ira matua wefao khögu. Urasoi wa tohude ndra’o ba wa’aurinia. Ba aboto göi ba dödögu wa sindruhu-ndruhu i’omasi’ö ndra’o. Andrö tedou wa’omasigu khönia.”—Anna.

•   Böi oguna’ö ua HP mazui tablet-mö.

   Niwa’ö Zura Ni’amoni’ö: ”So ginötö si no mutatugöi ba ngawalö hadia ia.”—Sangombakha 3:1.

   Angeragö: Hawa’asese ahori ginötömö ha börö notifikasi sofeta ba HP-mö ba ginötö fao ndra’ugö khö ngambatöu?

   Tips: Tandraigö mifao manga fo’omou si lö’ö-lö’önia sakali ba zi sahari, ba böi hatö’ö HP ba zingamö. Si to’ölönia, inötö wemanga no inötö si tefaudu ba wanutunö hadia manö halöwö nifaluami ba zi ma’ökhö da’ö.

•   Na tefaudu, tola fao ami ba wowöli soguna sero ma’ökhö mazui ba wangasiwai halöwö ba nomo.

   Niwa’ö Zura Ni’amoni’ö: ”Sökhi zi darua moroi na ha samösa, börö me so dania mböli gölöra si sökhi ba wa’erege dödöra.”—Sangombakha 4:9, nisura ba gahe zura.

   Angeragö: Ba wamalua halöwö sero ma’ökhö, hadia asese fao ami ba wangasiwai da’ö?

   Tips: Tandraigö mifao ba wamalua halöwö da’ö hewa’ae na sindruhunia tola mifalua samösa.

   ”Böi wa’ö tödöu wa aföli ndra’ugö ba wamalua halöwö simane fe’amöi ba wowöli soguna, fanasa figa, famurui nukha mazui ba wangehaogö ewali. Hiza’i bali’ö da’ö inötö si sökhi wefao khö ngambatöu?”—Nina.

•    Böi fatandro

   Niwa’ö Zura Ni’amoni’ö: ”Böi fatandro ami.”—Filifi 4:5.

   Angeragö: Hewisa wangoroma’öu wa lö fatandro ndra’ugö khö ngambatöu?

   Tips: Mitutunö hadia nösi dödömi ba faoma mibologö dödömi ba zo’amböta nawömi. Mihalö wahasara dödö ba wombagi inötö.

   ”Lö khögu fa’abölö simane fo’omogu börö me so wökhögu. Hiza’i, lö göi fasala khögu na möi ia fa’olahraga mazui ba wamalua somasi dödönia, ba na ya’o ulau molombase ba nomo. Faoma omuso dödöma börö me tola mafalua zomasi dödöma.”—Daniela.

 So ösa wanofu-nofu si no mufa’anö ba da’a. Si oföna, tola mibe’e samösa wanema linia. Aefa da’ö, tola fao ami ba wanutunö fanema linia.

•    Hadia asese öbe’e ginötöu khö ngambatöu?

•   Irugi iada’a, hadia manö nifalua ngambatöu ena’ö so ginötömi wefao?

•   Hadia nasa nifalua ngambatöu ena’ö abölö oya ginötömi wefao?

•   Hawa’asese mangoloi wangera-ngerau börö HP mazui tablet ba ginötö fahuhuo’ö khö ngambatöu?

•   Hewisa ena’ö lö faoma fatandro ami?

•   Hadia nifaluamö ena’ö so ginötömi wefao barö migu da’a?