Börö wa’atedou teknologi iada’a, te omasi gafaloda, klien hegöi awöda wohalöwö ena’ö tola lahubungi ita gofu hawa’ara manö. Lua-luania, abua khöda ba wotatugöi hadia zabölö ta’ofönai’ö, fombagi inötö ba halöwö hegöi tanö bö’önia, farahu ba da’ö wongambatöu.

•  Sinangea ö’ila

•  Si tola öfalua

•  Niwa’ö wongambatö tanö bö’ö

•  Sinangea mufatunöisi

•   Börö teknologi, tola abua khöu wombagi inötö sanandrösa ba halöwö hegöi fongambatöu. Lua-luania, hulö nifaso ndra’ugö ba wanema telefo, e-mail, mazui pesan ba zi tenga inötö wohalöwö hulö galitö si lö tola lö’ö mubunu.

   ”Na meföna, na no mangawuli niha wohalöwö, si to’ölönia la’oguna’ö ginötöra wefao ba nösi nomora. Hiza’i iada’a, abua sibai ba wamalua da’ö. Na so e-mail mazui telefo sanandrösa ba halöwö na no ofeta ita ba nomo, si to’ölönia abölö ta’osambua’ö dödöda ba da’ö ba olifu ita khö ngambatöda.”—Jeanette.

•   Ena’ö tola öbagi ginötöu ba halöwö hegöi ba nösi nomou, moguna öbörögö da’ö moroi khöu samösa. Fatunöisi da’ö khö ngambatöu. Na öfalua da’ö, lö ö’oguna’ö ginötö sinangea öbe’e khö ngambatöu ba wamalua halöwömö.

   ”Si to’ölönia, sasese lö ta’ame’egö tödö ya’ia da’ö fongambatöda. Tola manö so ba wangera-ngerada, ’Tatu aboto ba dödönia ndra’o. Tola ebolo dödönia khögu. Tatu so nasa ginötö tanö bö’ö si tola ube’e khönia.’”—Holly.

•   Ofönai’ö wongambatöu. Imane Sura Ni’amoni’ö, ”Hadia niʼosambuaʼö Lowalangi tebai ifabali niha.” (Matai’o 19:6) Tatu lö omasi ndra’ugö na so niha ”samabali” ya’ugö khö ngambatöu. Börö da’ö, böi tobali famakiko wongambatöu halöwömö sero ma’ökhö.

   ”So klien sanguma’ö wa tola latelefo ita gofu hawa’ara manö börö me no oföna labayar ita. Hiza’i, aboto ba dödögu wa abölö tohude wongambatögu moroi ba halöwögu. Andrö wa ufatunö khöra wa lö mohalöwö ndra’o ba ginötö libur, ba utelefo ira na so ginötögu.”—Mark.

   Angeragö, ’Hadia oroma moroi ba nifaluagu wa abölö u’ofönai’ö ngambatögu moroi ba halöwögu? Hadia simane da’ö göi nirasoi ngambatögu?’

•   Na tola timbagö halöwö andrö. Imane Sura Ni’amoni’ö, ”So waʼatua-tua ba niha sangide-ngideʼö.” (Amaedola 11:2) Aboto ba dödö niha si so fangide-ngide’ö hawa’ara zinangeania itimbagö zi sambua halöwö mazui ibe’e ösa halöwönia andrö ba niha bö’ö.

   ”Samazökhi pipa halöwögu. Na so zokaoni ya’o ba wamazökhi pipa, si to’ölönia hasambalö mu’anemai’ö wamalua ya’ia. Hiza’i na lö molalado, ube’e khöra numero telefo zamazökhi pipa tanö bö’ö.”—Christopher.

   Angeragö: ’Na halöwö da’ö möi fanaisi ginötögu wefao khö ngambatögu, hadia aoha gölögu ba wanimbagö halöwö da’ö? Hadia fao dödö ngambatögu ba gangetula nihalögu?’

•   Be’e ginötöu wefao khö ngambatöu. Imane Sura Ni’amoni’ö, ”So ginötö si no mutatugöi ba ngawalö hadia ia.” (Sangombakha 3:1) Na oya sibai halöwömö, moguna ötatugöi ginötöu wefao khö ngambatöu.

   ”Na oya sibai halöwöma, si to’ölönia mafatunöisi ginötöma wefao, hewa’ae na ha inötö wemanga ba zibongi mazui möi manörö-nörö ba zinga nasi.”—Deborah.

   Angeragö: ’Hadia so ginötögu wefao khö wo’omogu? Hadia fao dödö wo’omogu ba da’ö?’

•   Bunu perangkat elektronik si so khöu. Imane Sura Ni’amoni’ö, ”Mitatugöi hadia zabölö moguna.” (Filifi 1:10) Hadia tola öbunu HP hegöi tabletmö ena’ö lö mangoloi dödömö na so pesan mazui telefo so’amakhaita ba halöwömö?

   ”Uforege ena’ö lö mohalöwödo ba zi tenga inötö wohalöwögu. Ba ginötö lö mohalöwödö, ubunu notifikasi ba HP-gu ena’ö lö moli.”—Jeremy.

   Angeragö: ’Hadia so ba dödögu wa lö tola lö’ö utema telefo na lahubungi ndra’o ira kafalogu mazui klien-gu? Hadia fao dödö ngambatögu ba mbua gera-eragu andrö?’

•    Böi fatandro. Imane Sura Ni’amoni’ö, ”Böi fatandro ami ba niha.” (Filifi 4:5) Itaria so halöwö si tebai muröi. Duma-dumania, so halöwö sinangea ifalua fo’omomö ba zi tenga inötö wohalöwönia. Börö da’ö, böi fatandro ndra’ugö ba böi talafo ö’andrö ginötö ngambatöu.

   ”No ide-ide lala wangalui wo’omogu ira matua ba asese so halöwönia tanö bö’ö ba zi lö mudöna-döna ba zi tenga inötö wohalöwönia. Itaria abao dödögu. Hiza’i, börö me asese so ginötöma wefao, andrö wa lö salania khögu.”—Beverly.

   Angeragö: ’Hadia uforege ena’ö aboto ba dödögu hadia lala halöwö wo’omogu irege lö talafo u’andrö ginötönia khögu? Hadia fao dödö ngambatögu ba mbua gera-eragu andrö?’

 So ösa wanofu-nofu ba da’a: Si oföna, tola mibe’e samösa wanema linia. Aefa da’ö, mifatunöisi wanema li si no mibe’e.

•   Hadia no irai lö fao dödö ngambatöu me ö’ohe halöwömö ba nomo? Na no irai, hadia fao dödöu ba nifaluania andrö?

•   Molo’ö ya’ugö, hadia zinangea öbulö’ö ena’ö tola öbagi ginötömö ba halöwö hegöi ba nösi nomou?

•   Hadia no irai örasoi wa asese i’ohe halöwönia ba nomo fo’omomö? Na no irai, tandraigö tutunö.

•   Na so zinangea mubulö’ö, hadia wombulö’ö nitötönamö khö ngambatöu?