Ero ma’ökhö, tarongo duria si lö sökhi ba sata’u ita. Tola ta’ila da’ö ba TV, HP, tablet mazui ba komputer. Ba sasesenia, laforoma’ö manö fefu zalua ba video nibe’era ba berita.

 Fao göi ndraono ba wamaigi ya’ia.

 Turia nirongora andrö zame’e khöra fa’aombö-aombö dödö ba fa’ata’u. Na simanö, hewisa ndra’ugö ba wanolo iraonomö?

•  Hadia lua-lua duria si lö sökhi andrö ba ndraonomö?

•  Hadia zinangea öfalua ba wanolo iraonomö?

•  Hewisa na i’ila samösa onomö zalua andrö?

•   Ato ndraono sabu tödö hegöi sata’u. Ba ginötö lafaigi duria si lö sökhi, tola manö so ndraono si lö mangoroma’ö hadia nirasoinia. Hiza’i sindruhunia, turia simane da’ö tola manö so lua-luania ba ndraono. a Na ebua wa’aombö-aombö dödö khö zatua, tola manö göi abölö ebua wa’aombö-aombö dödö ndraono.

•   Tola fasala wangera-ngera ndraono. Duma-dumania, so ösa ndraono sorasoi wa salua ni’ilara ba berita tola manö alua da’ö ba nösi nomora. Na so ndraono side-ide samaigi berita si fagölö ba zi hauga kali, tola manö tumbu ba wangera-ngerania wa sindruhu-ndruhu alua da’ö ba zi hauga kali.

•   Tola manö so ba wangera-ngera ndraono wa sindruhu-ndruhu alua fefu niforoma’ö ba media andrö. Lö la’ila wa so hare sebua ba media na ato niha samaigi. Da’ö mbörö wa lahöni-höni wame’e si sambua berita ena’ö adöni dödö niha wombaso ba lö laböhöli wamaigi berita andrö.

•   Böi tehegö ba ndraonomö na lafaigi fefu berita si lö sökhi. Tenga da’ö geluahania wa tebai sa’ae mamaigi berita ndraonomö. Hiza’i, na lö laböhöli wamaigi mazui ba wamondrondrongo turia si lö sökhi, tola manö so lua-luania ba ndraono.

   ”Itaria, ya’o hegöi fo’omogu ira matua omasiga na madunö-dunö sanandrösa ba berita. Hiza’i, lö aboto ba dödöma wa so lua-luania ba ndraonoma na lafondrondrongo huhuoma.”—Maria.

   Niwa’ö Zura Ni’amoni’ö: ’Fa’aombö dödö tobali fangöhöndrögö dödö.’—Amaedola 12:25, nisura ba gahe zura.

•   Haogö fondrondrongo ndraonomö si fao fa’ebolo dödö ba foroma’ö wa ö’ame’egö tödö nirasoinia. Na abua ba ndraonomö wanutunö ösi dödönia börö me ifaigi berita, andrö khönia ena’ö igambaraini hadia zi so ba dödönia. Si fao fehede salio mu’ila eluaha, tutunö hadia zaombö dödönia. Böi talafo oya ötutunö sanandrösa ba berita nifaiginia.

   ”Awena ahono dödö nonoma me no mafondrondrongo ba fahuhuo ndra’aga khönia. Tenga itugu ahono dödö ndraono na tamane khönia, ’No si to’ölö alua da’ö. Moguna tafaudugö wa’aurida ba zimane da’ö.”—Sarahi.

   Niwa’ö Zura Ni’amoni’ö: ”Dozi niha yamuʼalioʼö wamondrongo, böi yamufahulö wehede.”—Yakobo 1:19.

•   Tolo ndraonomö ba wangokhögö fangera-ngera si sökhi sanandrösa ba berita nirongora. Duma-dumania, na so berita sangombakha wa so zanagö niha, si to’ölönia lamane niha wa no asese alua zimane da’ö. Na da’ö nirasoi ndraonomö, tutunö khöra hadia zi no öfalua ba wolumö’ö ya’ira. Törö tödöu, mufaehagö zi sambua berita andrö tenga börö me asese alua hiza’i börö me fawaraö alua ia.

   ”Tolo ndraonomö ba wangokhögö fa’ahono dödö. Si to’ölönia, moroi ba wangera-ngera tumbu hadia nirasoinia. Börö da’ö, na tatolo ndraonoda ba wangosambua’ö fangera-ngerara ba zi sökhi, tola manö lasöndra wa’ahono dödö.”—Lourdes.

   Niwa’ö Zura Ni’amoni’ö: ”Tödö niha satua-tua fahuhuo ia si fao faʼaboto ba dödö, ba abölö faduhu dödö niha ba wehedenia.”—Amaedola 16:23.