HP andrö hulö simane rosö. Tola so gunania ba tola göi möi fama’ala molo’ö lalada ba wangoguna’ö ya’ia. Börö da’ö, hadia lala nifaluamö ba wanolo iraonomö ba wangoguna’ö fakake si sökhi andre si fao fa’atua-tua? Duma-dumania, hawa’oya ginötö ni’oguna’ö ndraonomö ba wangoguna’ö HP ero ma’ökhö? a

•  Sinangea ö’ila

•  Si tola öfalua

•  ”Amakhoita no tandra wa’omasi zatua”

•   Tola tedönisi dödö niha sangoguna’ö HP ba ngawalö zi möi fama’ala. Simane si no mututunö ba artikel ”Fangoguna’ö HP ba Ndraono—Faosatö 1: Hadia No Tola I’okhögö HP Iraonogu?”, ira sangoguna’ö HP tola labokai Internet, ösinia tola si sökhi ba si lö sökhi.

   ”Asese olifu ita wa tola la’ila ngawalö zi lö sökhi iraonoda bakha ba HP ba tola falukha ira niha si lö sökhi.”—Brenda.

•   Moguna wanuturu lala ba ndraono. Tenga simane niha si no atua, abölö ogonekhe ndraono si bohou ebua ba wangoguna’ö teknologi börö me no to’ölö ira i’otarai ba wa’ide-ide. Hiza’i, tenga da’ö geluahania wa lö la’ila ira satua sanandrösa ba teknologi. Ba tenga göi da’ö geluahania wa abölö la’ila iraono lala wangoguna’ö HP si fao fa’atua-tua ba hawa’ara tola mu’oguna’ö HP andrö.

   Sindruhu sa, abölö onekhe ndraonomö wangoguna’ö HP moroi khöu. Hiza’i, tenga da’ö geluahania wa abölö la’ila lala wangoguna’ö HP si fao fa’atua-tua. Hewa’ae ahori i’ila si samösa iraono sanandrösa ba teknologi, moguna nasa khönia wanuturu lala moroi khö zatua ena’ö lö fasala wangoguna’önia HP.

   ”Na tabe’e HP ba ndraonoda, moguna tafaha’ö ia lala ba wangoguna’ö HP si fao fa’atua-tua. Na lö tafalua da’ö, fagölö simane na tatehegö khönia wolohe moto ba tamane, ’Da’i-da’i he,’ sindruhunia sa lö mufomahada ia ba wolohe moto.”—Seth.

•   Faha’ö ndra’ugö ba fitur HP si so khö ndraonomö. Alui lala hewisa wangoguna’ö fitur HP si tola manolo iraonomö ena’ö sökhi wangoguna’öra HP. Duma-dumania:

   Hadia fitur si tola ö’oguna’ö ena’ö lö fefu informasi tola ifaigi onomö, ba hawa’oya ginötö ni’oguna’önia ba wangoguna’ö HP?

   Hadia aboto ba dödöu wa so zo’amböta ba fitur ni’oguna’ömö andrö?

   Na aboto ba dödöu ngawalö fitur HP ni’oguna’ö ndraonomö, tola itugu aoha khöu wanolo ya’ia ba wangoguna’ö HP si fao fa’atua-tua.

   Niwa’ö Zura Ni’amoni’ö: ”Monönö waʼabölö zi samösa niha ibeʼe faʼaboto ba dödö.”—Amaedola 24:5.

•   Be’e gamakhoita. Tatugöi hadia zi tola ba si tebai lafalua iraonomö. Duma-dumania:

   Hadia tola la’oguna’ö HP iraonomö ba ginötö fao ami manga mazui na owulo ami ba nösi nomo hegöi khö zi fahuwu khömi?

   Hadia tola la’oguna’ö HP iraonomö na ba mbate’e so ira ba zi bongi?

   Hadia manö aplikasi si tola la’oguna’ö iraonomö?

   Hawa’oya ginötö nibe’eu ba ndraonomö ba wangoguna’ö HP ba zi sahari?

   Hadia no ötatugöi ginötö hawa’ara tola la’oguna’ö HP iraonomö?

   Moguna la’ila iraonomö gamakhoita si no ötatugöi. Ba na lasawö zi no mufakhoi andrö, moguna öhuku ira.

   Niwa’ö Zura Ni’amoni’ö: ”Böi taha wameʼe fotu ba ndraonou.”—Amaedola 23:13.

•   Fareso HP ndraonomö. Moguna ö’ila password (kata sandi) HP ndraonomö. Na tola, fareso hadia nösi HP-nia duma-dumania pesan singkat, aplikasi, gambara mazui situs web nibokainia.

   ”Mafatunö ba ndraonoma wa tola gofu hawa’ara mafareso HP-nia. Na ma’ila wa tenga si fao fa’atua-tua wangoguna’önia HP, tola manö lö matehegö khönia ba wangoguna’ö HP simane si to’ölö.”—Lorraine.

   Ya’ami satua, moguna aboto ba dödömi hewisa ndraonomi ba wangoguna’ö HP.

   Niwa’ö Zura Ni’amoni’ö: ”Tola aboto ba dödöda ndraono side-ide moroi ba gamuatania, hadia atulö gamuatania andrö ba ohau-hau.”—Amaedola 20:11.

•   Faha’ö ndraonomö ba zabölö moguna. Tatu omasi ita na lafalua zatulö iraonoda börö me omasi ira wamalua da’ö, tenga börö me ni’o’ou. Hadia mbörö? Na tenga soroi ba dödönia wamalua da’ö, tola manö i’alui lala ba wolimo satuania na so nibini’önia. b

   Börö da’ö, faha’ö ndraonomö ba wangokhögö bua-bua si sökhi simane lö falimo, so khöra wanaha tödö ba tola mufaduhusi tödö. Si to’ölönia, iraono sangokhögö bua-bua si sökhi andre, tola la’oguna’ö HP si fao fa’atua-tua.

   Niwa’ö Zura Ni’amoni’ö: ’Niha si no aro fa’aboto ba dödö, tola i’oguna’ö wangera-ngerania si no tefomaha ba wamaehusi satulö ba si lö atulö’.—Heberai’o 5:14.