Ato ndraono iada’a samaha’ö ya’ira moroi ba nomo tenga ba zekola. Na da’ö zalua khöu, hewisa ena’ö sökhi wamaha’öu ya’ugö moroi ba nomo? So tips si tola manolo ya’ugö. *

•  So lima ngawua tips na öfaha’ö ndra’ugö ba nomo

•  Niwa’ö ndra awö-awöu

•   Fazökhi jadwal. Si to’ölönia na ba zekola, ö’o’ö jadwal si no mutatugöi. Falua göi zimane da’ö ba ginötö öfaha’ö ndra’ugö ba nomo. Fazökhi jadwal ba wamalua halöwö nibe’e ba zekola, ba wolului halöwö ba nomo hegöi ba wamalua halöwö tanö bö’ö. Hiza’i na moguna, tola öfaudugö jadwalmö mangawuli.

   Niwa’ö Zura Ni’amoni’ö: ”Fefu hadia ia enaʼö oi sökhi ba toföfö.”—1 Korindro 14:40.

   ”Tatugöi ginötö simane me so ndra’ugö ba zekola. Asiwai halöwömö molo’ö jadwal si no öfazökhi.”—Katie.

   Angeragö: Hadia mbuania na no öfazökhi jadwal ba öbe’e da’ö ba nahia salio ö’ila?

•   Forege wamalua si no ötatugöi. Böi taha-taha wamalua halöwömö. Na öforege ba wangasiwai halöwömö hewa’ae so khöu wa’areu, tola möi fanolomö da’ö ena’ö tobali ndra’ugö niha si tola mufaduhusi tödö!

   Niwa’ö Zura Ni’amoni’ö: ”Yaʼowölö-ölö ami, ba böi areu.”—Roma 12:11.

   ”Sindruhu sa, abua ba wolo’ö jadwal si no mufazökhi, börö me ta’alu-alui mbörö ena’ö lö tafalua da’ö. Te tamane tödöda, ’Dania manö ubabaya halöwö da’a.’ Hiza’i, lua-luania lö a’ozu tafalua ba itugu monönö wa’oya halöwöda.”—Alexandra.

   Angeragö: Hana wa tola tobali ndra’ugö niha sonekhe ba wombagi inötö na asese öbabaya halöwö nibe’e ba zekola ba nahia hegöi ba ginötö si fagölö ero ma’ökhö.

•   Alui nahia si tefaudu ba wamaha’ö ya’ugö. Hatö’ö fefu ba ngaimö fakake ni’oguna’öu ba wamaha’ö ya’ugö. Faigi nahia si baga si lö nini-nini hiza’i böi talafo lö nini-nini börö me tola manö alau hörömö! Na lö hadöi nahia si no mutatugöi, tola ö’oguna’ö mbate’emö ba wamaha’ö ya’ugö.

   Niwa’ö Zura Ni’amoni’ö: ”Tobali hare lua-lua nikhoi dödö zowölö-ölö.”—Amaedola 21:5.

   ”Be’e yawa ua sakali bola basket, game hegöi gitarmö. Bunu li HP-mö ena’ö lö moli. Na lö hadöi fondrönisi dödö ba zi fasuimö, tola ohahau dödöu ba wamaha’ö ya’ugö.”—Elizabeth.

   Angeragö: Ena’ö lö mangoloi dödöu ba wamaha’ö ya’ugö, hadia zinangea öfabö’öni ba nahia wamaha’ö ya’ugö?

•   Forege ba wangosambua’ö tödöu. Osambua’ö dödöu ba wamalua si sambua halöwö. Böi samuzaigö wamalua ngawalö halöwö, börö me lö baga lua-luania ba ara awai.

   Niwa’ö Zura Ni’amoni’ö: ”Haogö wangogunaʼö inötö.”—Efeso 5:16.

   ”Tebai u’osambua’ö wangera-ngeragu na so HP ba zingagu, börö me tola manö uhorigö ginötögu ba zi lö karua.”—Olivia.

   Angeragö: Hadia tola ödou’ö wa’atua-tuamö ba wangosambua’ö tödömö ba wangohalöwögöigö halöwömö?

•   Olombase sabata. Tola möi fanolomö da’a ba wangokhögö fa’aterou dödö. Duma-dumania, tola ölau mowaö-waö sabata, fakureta mazui öfalua olahraga tanö bö’ö. Tola göi öfalua hobi-mö. Hiza’i, imane buku School Power, ”Asiwai fefu halöwömö fatua lö öfalua da’ö irege omuso dödömö wangoguna’ö inötö wolombase andrö.”

   Niwa’ö Zura Ni’amoni’ö: ”Sökhi zi sagokhö fa’ahono dödö moroi na dua gokhö wa’erege dödö ba famorege ba wolohi angi.”—Sangombakha 4:6.

   ”Si to’ölönia ba zekola, so kelas musik mazui kelas seni. Me no aefa ufomahado moroi ba nomo, urasoi wa möi fangomuso dödö na fao ndra’o ba kelas simane da’a. Börö da’ö, ba ginötö tafaha’ö ita ba nomo, moguna kreatif ita wangalui hadia zi tola tafalua.”—Taylor.

   Angeragö: Hadia manö halöwö si tola öfalua ena’ö terou dödöu ba wamaha’ö ya’ugö?