”Lö omasido we’amöi ba sekola!” Na örasoi göi zimane da’ö, te adöni dödöu ba wombato sekola. Hiza’i, hadia angetula si sökhi da’ö?

•  Hana wa so zombato sekola?

•  Angeragö lua-luania

•  Si tola öfalua

•  Niwa’ö ndra awö-awöu

 Molo’ö ira sagatua-tua, so mbörö wa labato sekola:

•   Abua khöra ba wolo’ö nifaha’ö. ’Lö irai baga nilaigu, oi tawa soyo manö.’

•   Lö lalau röröra. ’Urasoi tödögu, lö hadöi gunania khögu nifaha’ö ba zekola.’

•   Abua ba wangalui soguna. ’Moguna u’alui gefe ba wanolo ira satuagu.’

 Imane Sura Ni’amoni’ö, ”Niha satua-tua ihaogö ifatimbaisi mbekania.” (Amaedola 14:15) Hadia wamaha’önia? Na omasi’ö öbato sekola, angeragö ua sakali lua-luania.

 Angeragö:

•   ’Na ubato sekola, hadia aoha khögu wanöndra halöwö?’

   ”Samuza inötö dania moguna mohalöwö ndra’ugö ba wombönökhi soguna ba nösi nomo. Hiza’i, na öbato sekola te abua khöu ba wanöndra halöwö börö me oya halöwö lö latema niha si lö tamat SMA.”—Julia.

•   ’Na ubato sekola, hadia tola utaögö dania gabula dödö salua ba wa’aurigu?’

   ”Tola tefomaha ndra’ugö ba wangasiwai abula dödö na no möi’ö sekola. Samuza inötö dania, niha nifalukhaisimö, abula dödö salua hegöi halöwö nifaluamö, arakhagö fakhili-khili ia simane me sekola ndra’ugö.”—Daniel.

•   ’Na ubato sekola, hadia tola u’alui zoguna khögu samösa?’

   ”Tola manö ömane tödöu wa lö moguna wamaha’ö nitemau ba zekola iada’a. Hiza’i, na no irugi 23 fakhe ndröfimö ba moguna toföfö wombagimö kefe, tatu ömane tödöu, ’Harazaki wa no ufaha’ö ndra’o ba matematika me luo da’ö.’”—Anna.

•   Alui wanolo. Imane Sura Ni’amoni’ö, ”Na ato zanuturu lala, ba mofozu gohitö dödö.” (Amaedola 11:14) Na lö baga nilaimö, andrö wanolo khö ndra satuamö, gurumö mazui ba niha salawa döfi si tola öfaduhusi tödö.

   ”Na abua khöu wanöndra nilai si baga, fahuhuosi da’ö khö gurumö. Itaria tamane tödöda börö guru wa lö baga nilaida. Hiza’i, na ta’andrö wanolo moroi khönia, tola itolo ita ba wanöndra nilai si baga.”—Edward.

•   Angeragö lua-luania ba zi so miföna. Imane Sura Ni’amoni’ö, ”Sökhi wozu hadia ia moroi ba wamobörö.” (Sangombakha 7:8) Na no tamat ndra’ugö sekola, tenga ha teori ni’ilamö, hiza’i oya gamuata hegöi nekhe-nekhe danga si tola ö’oguna’ö.

   ”Me no tamat ita sekola, lö moguna sa’ae ta’ohalöwögöigö tugas sekola mazui tafo’ösi garate ujian. Hiza’i, fa’atua-tuada ba wangasiwai abula dödöda ba zekola, tola möi fanoloda ba wangasiwai abula dödö ba wa’auri.”—Vera.

•   Fatimbaisi lala tanö bö’ö si tola öfalua. Imane Sura Ni’amoni’ö, ”Sangai angetula ba waʼaösö, aekhu dania ba waʼanumana.” (Amaedola 21:5) Böi ömane tödöu wa lö hadöi lala tanö bö’ö baero na öbato sekola. Te tola ö’ozui sekolamö na belajar online ndra’ugö mazui fao’ö ba program homeschooling.

   ”Moroi ba zekola tafaha’ö ita lala ena’ö tola taforege wohalöwö, mangasiwai abula dödö hegöi falulu fohalöwö ita ba danö bö’ö. Moguna fefu da’ö ba wa’aurida. Tobali, tenga zaya-zaya gölö na ö’ozui zekolamö.”—Benjamin.

 Rahu-rahunia: Na no tamat ndra’ugö sekola, tola tefa’anö ndra’ugö ba wangai angetula samösa ba ö’onorogö tödö halöwömö.