Tumbu ndra’o ba Acul, banua side-ide si so ba hili-hili tanö ba gaekhula Guatemala. Ösi nomogu niha Ixil, nga’ötö suku Maya. U’ila li Spanyol hegöi li sasese mu’oguna’ö ba mbanuama. Me ide-ide ndra’o, 36 fakhe silalö, alua wasuwöta sebua ba Guatemala. Faoma fasuwö niha ba zi sambua banua khöra. Ato niha Ixil si mate ba wasuwöta da’ö.

Me öfa fakhe ndröfigu, famai-mai ga’agu ba granat ba mamoka da’ö ba zi lö mudöna-döna. Fitu fakhe ndröfinia me luo da’ö. Lua-luania, lö u’ila sa’ae niha ba mate ga’agu. I’otarai da’ö, labe’edo ba zekola nihenaigö ba niha si lö hörö ba Guatemala City ena’ö ufaha’ödo Braille. Lö aboto ba dödögu hana wa lö omasi niha sohalöwö ba da’ö na fahuhuo khögu ndraono tanö bö’ö. Lö göi omasi fahuwu khögu ndraono tanö bö’ö. Urasoi wa ha ya’o-ya’o ba ubalo-baloi ginötö wangawuli ba nomo ena’ö falukhado mamagu, sangomasi’ö ya’o. Ha dua waŵa ero röfi mangawulido ba nomo. Hiza’i, me 10 fakhe ndröfigu, mate Mamagu. Abu sibai dödögu ba hulö zi lö eluaha wa’aurigu. Lö hadöi sa’ae niha sangomasi’ö ya’o.

Me 11 fakhe ndröfigu, mangawulido ba mbanuama ba toröido khö dalifusögu tiri hegöi ösi nomonia. La’asogö zoguna khögu bongi ma’ökhö, hiza’i lö aboto sibai ba dödöra hadia nirasoigu. Itaria mu’aodo khö Lowalangi, ”Hana wa mate Mamagu? Hana wa balunö hörögu?” Lawa’ö niha wa no ohitö dödö Lowalangi da’ö. Lua-luania so ba wangera-ngeragu wa lö i’ame’egö tödö ndra’o Lowalangi ba lö khönia fa’atulö. Omasido ubunudo, hiza’i lö u’ila hewisa lalania.

Börö me lö hörögu, andrö wa tebai mbotogu ba lö sökhi-sökhi dödögu. Me ide-idedo, no hauga kali lafalua khögu pelecehan seksual. Lö irai ufatunö da’ö börö me uwa’ö tödögu wa lö hadöi niha so’ame’egö tödö ya’o. Ha fataria sibai fahuhuo khögu niha ba lö göi omasido fahuhuo khöra. Lö omasido fahuwu ba niha ba lö faduhu dödögu khöra. Abua sibai noro dödögu.

Me 13 fakhe ndröfigu, so samösa gurugu ba zekola so’ame’egö tödö ya’o. I’andrö khö darua Zamaduhu’ö Yehowa si no mangowalu ena’ö möi ira la’ondrasi ndra’o na libur zekola. Latutunö mbu’usa li moroi ba Zura Ni’amoni’ö wa hasambalö mususugi niha si no mate ba niha si lö hörö, tola ifuli la’ila niha. (Yesaya 35:5; Yohane 5:28, 29) Omasido hadia nifaha’öra, hiza’i börö me lö to’ölö ndra’o fahuwu ba niha, abua khögu fahuhuo khöra. Hewa’ae na niha si lö hede-hede ndra’o, no lahaogö-haogö fahuhuo ba la’odödögö sibai ba wangondrasi ya’o ba wamaha’ö ba Zura Ni’amoni’ö. Ena’ö tola larugi mbanua si toröi ya’o, latörö tanö töra fulu kilo wa’aröu ba latörö nasa hili.

Iwa’ö ga’agu tiri wa sökhi sibai lagu wonukhara. Hewa’ae na niha si öna-öna ira, laforoma’ö wa la’ame’egö tödö sibai ndra’o ba la’ohe khögu mbuala. Uwa’ö tödögu wa ha niha Keriso sindruhu zamalua simane da’ö.

Ufaha’ödo ba Zura Ni’amoni’ö, u’oguna’ö mbuku Braille. Hewa’ae na aboto ba dödögu hadia zi no ufaha’ö ya’o, hiza’i abua khögu wanema’ö da’ö. Duma-dumania, abua khögu wamaduhusi tödö wa i’ame’egö tödö sibai ndra’o Lowalangi hegöi niha bö’ö. Aboto ba dödögu hadia mbörö wa itehegö Yehowa ngawalö zi lö sökhi iada’a, hiza’i abua khögu wamaigi wa Yehowa andrö ama sebua fa’omasi. a

Arara manö, tebulö lala wangera-ngeragu börö zi no ufaha’ö ya’o ba Zura Ni’amoni’ö. Duma-dumania, ufaha’ö ndra’o wa i’ame’egö tödö sibai Lowalangi niha nifakao. Sanandrösa khö ndra samosumange ya’ia si göna famakao, imane Lowalangi, ”No uʼila hewisa me tefakao nono mbanuagu . . . No aboto ba dödögu wamakao si göna khöra.” (2 Moze 3:7) Me no u’ame’egö tödö gamuata Yehowa sebua fa’omasi, uhalö gangetula ba wolulu fa’aurigu khönia. Me döfi 1998, tebayagö ndra’o idanö tobali Samaduhu’ö Yehowa.

Te arakhagö döfi me no tebayagö idanö ndra’o, faodo pelatihan ba niha si lö hörö ahatö ba mbanua Escuintla. Börö me ba mbanua si tumbu ya’o toröido, so samösa zatua sokubaloi sangila hadia data-tahagu ba we’amöi ba gangowuloa. Ba we’amöi ba mbanua niha Keriso sahatö ba nomoma, moguna usösö hili simane nifalua zi darua Samaduhu’ö Yehowa samaha’ö ya’o ba Zura Ni’amoni’ö. Abua khögu wamalua da’ö. Börö da’ö ba wanolo ya’o, i’andrö tolo khö zi sambua fongambatö Samaduhu’ö Yehowa ba Escuintla somasi manema’ö ya’o toröi ba khöra ba sanolo ya’o we’amöi ba gangowuloa. Irugi iada’a, la’ame’egö tödö sibai ndra’o ba no amaedola nösi nomora ndra’odo.

Oya nasa duma-duma tanö bö’ö sanandrösa ba wa’omasi soroi ba dödö niforoma’ö ndra talifusö ba mbanua niha Keriso. Da’ö fefu zamaduhu’ö tödögu wa ya’odo andre samösa Samaduhu’ö Yehowa ba so ndra’o ba gotalua niha Keriso sindruhu.—Yohane 13:34, 35.

Hewa’ae na urasoi mböröta wa lö eluaha wa’aurigu ba lö tötönafögu, hiza’i iada’a u’ila hadia geluaha wa’aurigu. Börö me no uhalö halöwö safönu inötö ba wamaha’ö niha ba Zura Ni’amoni’ö nifalua ndra Samaduhu’ö Yehowa, u’osambua’ö dödögu ba wamaha’ö sindruhu, lö u’osambua’ö dödögu ba zi tebai ufalua. Tebe’e göi khögu halöwö tobali satua sokubaloi hegöi ba wama’ema huhuo sebua. Tola göi ufa’ema huhuo si te’odane-dane ba Zura Ni’amoni’ö ba gangowuloa sebua ba zi sambua regional. So ribu niha sangondrasi angowuloa da’ö.

Me 2010, lulus ndra’o ba Sekolah Pelatihan Pelayanan (mufotöi iada’a Sekolah bagi Penginjil Kerajaan) nifalua ba El Salvador. Sekolah da’a zama’anö ya’o ba wamalua halöwögu ba mbanua niha Keriso. Famaha’ö nitemagu zanolo ya’o ba worasoi wa i’omasi’ö ba i’ame’egö sibai tödö ndra’o Lowalangi Yehowa, ba tola i’oguna’ö gofu haniha ba wamalua halöwönia.

Imane Yesu, ”Ohahau dödö ba wameʼe moroi ba wanema.” (Halöwö Zinenge 20:35) Iada’a, sindruhu-ndruhu usöndra wa’omuso dödö. Tola göi utolo niha bö’ö hewa’ae na hulö zi tebai ufalua da’ö ba zilalö.