ÖTETEU mbua apel sami. Fatua lö öbeʼe bakha ba ndraga, öʼago ua sakali hawaʼomuhua. Iʼotarai mege mohalöwö ndraʼugö, lö nasa maraseʼö ba ötohugö manö wohalöwö. So mamamö ba zinga döla apel tanö sisa, omuso-muso dödönia wohalöwö ba fahuo-huo ia ba nösi nomo hegöi awönia tanö böʼö solului maneteu bua apel. Na tafaigi ia ba no awuyu-wuyu, simane hauga fakhe si lalö me ide-ideʼö nasa. Hulö lö farisayo ndraʼugö wa no irai öʼila waʼatuania me so ia ba gulidanö satua si no numalö. Me luo daʼö tebai ia börö wökhö, ögogohe dangania me aetu nosonia, ba mege-ege ndraʼugö ba lewatönia. Iadaʼa, no so ia ba daʼa, so göi niha böʼö sauri si lö fökhö!

Faduhu dödöda wa alua daʼö fefu. Hasambalö itörö nifabuʼu Lowalangi. Ba faosatö daʼa, tafatunö hewisa waʼalua mbuʼusa li Mbanua Lowalangi ba zi lö aratö irugi wasuwöta ba Hamagedo. Tafaigi göi hewisa mbuʼusa li sahöli-höli dödöda salua aefa daʼö. Hawaʼomuso dödöda ba luo daʼö me taʼila mamatörö Mbanua Lowalangi ba zi sagörö ulidanö, ibohouni maʼafeu!