1, 2. (a) Hana abua khöda wokhalaigö wa sindruhu-ndruhu so Waradaiso? (b) Hadia zi tola manolo yaʼita enaʼö aro wamatida ba nifabuʼu Lowalangi?

 OFETA samösa dalifusöda ba gangowuloa, erege dödönia wanaögö abula dödö ba zi maʼökhö daʼö. Fawea-wea manö gafalonia khönia, abu dödönia wangalui soguna ba nomo, ba mofökhö göi woʼomonia ira alawe. Me tebörögö musik, ahono dödönia, omasi ia wefao khö ndra talifusöda ba Balai Mbanua Lowalangi. Sinunö andrö sanandrösa ba dötönafö faʼauri ba Waradaiso, moroi ba ngawua zinunö andrö ikhalaigö wa so ia ba daʼö. Omasi ia zinunö daʼa, ba terara dödönia me manunö ia fao ba nösi nomonia.

² Hadia no irai örasoi zimanö? Ato ba gotaluada zi no irai morasoi. Hizaʼi, abua khöda wokhalaigö wa sindruhu-ndruhu so Waradaiso andrö dania, börö me ba gulidanö si lö sökhi so ita iadaʼa. Daʼa ”mbaŵa si lö sökhi”, ba tenga simane faradaiso gulidanö andre. (II Tim. 3:1) Hadia zanolo yaʼita enaʼö taʼila wa sindruhu-ndruhu alua dötönafö andrö? Hewisa wa taʼila lö aratö mamatörö Mbanua Lowalangi ba niha gulidanö? Datafaigi ösa wamaʼeleʼö si no ifalua Yehowa, niʼila nono mbanuania me föna. Ba, tafaigi hewisa wa no sahöli-höli dödöda waʼalua wamaʼeleʼö iadaʼa hegöi famaʼeleʼö tanö böʼö si fagölö. Ba gafuriata, taʼila hewisa waʼaluania ba zi so föna si fao famati saro.

3. Hadia mbuʼusa li si möi fondrara dödö niha Yehuda me latiboʼö ira ba Mbabilona?

³ Khalaigö hewisa waʼauri niha Yehuda me mutiboʼö ira ba Mbabilona me abad si önö SM. Ato ba gotaluara niʼebuaʼö ba daʼö, simane satuara, ba afökhö waʼaurira ba daʼö. Laʼoʼaya ira niha Mbabilona börö wamatira khö Yehowa. (Zin. 137:1-3) Barö zi hauga wulu fakhe, lö faröi niha Yehuda ba dötönaföra sebua: No ifabuʼu Yehowa ba wangowuloi ono mbanuania enaʼö mangawuli ira ba mbanuara sindruhu. Iwaʼö khöra Yehowa wa sökhi sibai wangagö daʼö. Ifagölösi danö Yehuda si no muhaogö andrö simane  kabu Edena—faradaiso! (Baso Yesaya 51:3.) Terara dödö nono mbanua Lowalangi ba zi no ifabuʼu andrö, lö saʼae faʼaombö-aombö dödö khöra. Hewisa lalania? Datafaigi.

4. Hewisa Yehowa wamaduhuʼö ba dödö niha Yehuda wa lö ametaʼuö ba mbanuara?

⁴ Lö ametaʼuö. Tenga ba waradaiso sindruhu mangawuli niha nitiboʼö andrö, hizaʼi ba mbanua saröu si no muröi ba zi 70 fakhe. Ato zi lö irai mangila banua daʼa. Ba mbanua si tesura ba Zura Niʼamoniʼö, oya zingo me luo daʼö, asu gatua, harimo, ba utu ndruʼu safaito. Te manofu-nofu samösa ndra matua si no mongambatö, ’Hewisa ndraʼo wondrorogö foʼomogu hegöi iraonogu? Hewisa mbiri-biri ba urifögu, hadia tola urorogö ira? No sinangea abu dödöda ba zimanö. Hizaʼi, angeraigö nifabuʼu Lowalangi ba Yesaya 11:6-9 ba hewisa wa möi fondrara dödö daʼö. (Baso.) Ifaduhuʼö ba dödö niha nitiboʼö andrö Yehowa si fao fehede puitis wa teʼorifi ira hegöi uriföra. Iʼa ndruʼu singo, eluahania lö iʼa gurifö niha Yehuda singo. Lö ataʼu niha si lö faröi, ba gutu ndruʼu safaito. Ifabuʼu Yehowa wa lö hadia ia zi göna ono mbanuania ba danö Yehuda niʼehaogö andrö, simanö göi ba danö si mate hegöi ba dalu gatua.​—Hez. 34:25.

5. Hadia wamaʼeleʼö samaduhuʼö ba dödö niha sangawuli ba mbanuara wa ibönökhi zoguna khöra Yehowa?

⁵ Lö moʼamböta. So gabula dödö tanö böʼö, ’Hadia tola ubeʼe gö nösi nomogu ba mbanua daʼö? Hezo toröiga dania? Hadia halöwögu ba daʼö, ba hadia abölö sökhi moroi ba waʼerege dödögu wohalöwö ba mbanua nitiboʼö, barö mbawa zangosawuyu yaʼaga?’ Ihaogö wameʼe fanema li Yehowa ba wamaʼeleʼö si no iʼehehaini. Ifabuʼu Yehowa ba nono mbanuania si lö faröi, ibeʼe khöra deu irege ”moʼösi” gö niʼasogö danö (mazui ”ami ba oya”). (Yes. 30:23) Sanandrösa ba nomo hegöi halöwö nono mbanuania, ifabuʼu Yehowa, ”Ba lalau nomo, ba laʼonahia göi; lafazökhi kabu nagu ba laʼa mbua. Tenga solau omo ira, ba tanö böʼö zi onahia ba tenga sananö sinanö, ba tanö böʼö zi manga mbua.” (Yes. 65:21, 22) Gofu hezo manö, ha ba zohahau dödö niha sangagö banua daʼö moroi na toröi ia ba Mbabilona, tanö niha baero. Hizaʼi, hewisa gabula dödö sabölö ebua, si tobali börö wa tetiboʼö ira?

6. Hadia gabula dödö si no ara larasoi ono mbanua Lowalangi, ba hadia zi no ifabuʼu Yehowa ba niha sangawuli?

⁶ Lö fökhö wamati. Ara fatua lö tetiboʼö nono mbanua Lowalangi, no mofökhö wamatira. Imane Yehowa khö Yesaya sanandrösa ba nono mbanuania, ”No falawu fökhö högö ba no erege sibai dödö maʼasambua.” (Yes. 1:5) Auʼa ba afiso ira ba wamati, börö me lö lafondro-ndrongo saʼae mene-mene Yehowa ba laduhö höröra ba waʼaboto ba dödö nibeʼenia. (Yes. 6:10; Yer. 5:21; Hez. 12:2) Na alua zimane daʼö ba niha nitiboʼö sangawuli, hadia dötönafö  niʼokhögöra? Hadia taya waʼomasi Yehowa khöra? Hawaʼomuso dödöra ba nifabuʼu Yehowa andre, ”Na luo daʼö, ba larongo safiso daromali si so ba zura, ba iʼila niha hörö zauʼa, moroi ba waʼatebalu, moroi ba zogömi-gömi.” (Yes. 29:18) Sindruhu, ifadöhö ba wamati nono mbanuania Yehowa si no tebohouni ba si no mamalalini era-era. Na laʼameʼegö tödö ba laʼoʼö, ibeʼe khöra wanuturu lala Yehowa ba faʼaboto ba dödö si bohou si tola mangorifi yaʼira.

7. Hewisa waʼalua zi no ifaʼeleʼö Lowalangi ba nono mbanuania, ba hana wa möi fangaro wamatida?

⁷ Hadia ifalua zi no ifabuʼu Yehowa? So wanema linia ba waö-waö sejarah. Niha Yehuda sangawuli ba mbanuara, tefahowuʼö ira, lö ametaʼuö, lö moʼamböta, ba lö mofökhö wamatira. Duma-dumania, ilumöʼö ira Yehowa moroi ba mbanua si fasui yaʼira, sabölö moroi khöra ba sato ono mbanua. Lö iʼa gurifö niha Yehuda utu ndruʼu safaito. Atulö wa lö oya wamaʼeleʼö salua niʼilara sanandrösa ba waradaiso nisura Yesaya, Yeremia, hegöi Hezekieli. Hizaʼi, faʼalua niʼila nono mbanua Lowalangi me luo daʼö no sahöli-höli dödö, ba daʼö zoguna khöra. Na taʼangerönusi zi no ifalua Yehowa ba nono mbanuania me luo daʼö, itugu aro wamatida. Na sahöli-höli dödöda waʼalua zi no mufaʼeleʼö ba wamobörö, hewisa dania waʼaluania zabölö ebua? Datafaigi hadia zi no ifalua Yehowa khöda ba ginötö andre.

8. Hadia ’danö’ nibeʼe ba nono mbanua Lowalangi ba ginötö andre?

⁸ Ba ginötö andre, lö nifasindro nono mbanua Yehowa sambua soi ba laʼiagö zi sambua banua. Tobali, niha Keriso nibayoini lafasindro soi ba wamati, ’iraono Gizaraʼeli khö Lowalangi’. (Gal. 6:16) Fao awöra ”mbiri-biri böʼö” ba ’danö’ wamati, yaʼia daʼö nahia sangosambuaʼö yaʼira ba wamosumange Lowalangi Yehowa. Famosumange Lowalangi andrö lala waʼaurira. (Yoh. 10:16; Yes. 66:8) ”Tanö” hadia nibeʼe Yehowa khöda? Faradaiso ba wamati. Ba daʼa alua mbuʼusa li Lowalangi hulö Gedena, faʼalua ba wamati sahöli-höli dödöda. Datafaigi duma-dumania.

9, 10. (a) Hewisa waʼalua wamaʼeleʼö Yesaya 11:6-9 ba ginötö andre? (b) Hadia zangoromaʼö wa so waʼatulö ba nono mbanua Lowalangi?

⁹ Lö ametaʼuö. So khili-khili si sökhi si no tesura ba wamaʼeleʼö Yesaya 11:6-9, sanandrösa ba wahasara dödö hegöi faʼatulö—ba gotalua gurifö faoma urifö hegöi niha. Hadia so khili-khlinia ba ginötö andre ba wamati? So! Ba ayati 9, taʼila hadia mbörö wa lö samakao awönia ba lö samakiko, ”Anönö saʼae danö waʼaboto ba dödö niha Yehowa, simane faʼanönö doyo nasi andrö asi.” Hadia tola ifalalini gamuata gurifö ’faʼaboto ba dödö khö Yehowa’? Löʼö. Niha zi faböʼö, börö me aboto ba dödöra Lowalangi Fondrege Zalawa ba lö labato wamahaʼö yaʼira ba woloʼö lalania safönu faʼatulö. Daʼö mbörö wa tola taʼila waʼalua  wamaʼeleʼö andrö ba waradaiso wamati ba ginötö andre. Barö wamatörö Mbanua Lowalangi, niha soloʼö khö Keriso lafahaʼö ira ba wamöhöli amuata faʼafaito, amuata simane urifö, ba so khöra waʼatulö hegöi fasahara dödö khö ndra talifusöra ba wamati.

¹⁰ Duma-dumania, no mututunö ba publikasida walöʼebua zambuana dödö niha Keriso—goi-goi Zura Niʼamoniʼö hegöi famakao si göna ono mbanua Lowalangi börö me lö faʼawö ira ba gulidanö. Hadia tenga sahöli-höli dödöda daʼö me so ”soi” sebua ba gulidanö safönu faʼalösökhi andre, me lö fao ira ba ngawalö waʼalösökhi hewaʼae faʼamate hukumara? Daʼa dandra wa larasoi waʼatulö ono mbanua Razo Mesia, simane nifaʼeleʼö Yesaya! Iwaʼö Yesu wa aboto ba dödö niha fefu zoloʼö khönia börö me laʼomasiʼö nawöra. (Yoh. 13:34, 35) Ba mbanua niha Keriso, iʼogunaʼö ’zawuyu si lö faröi ba satua-tua’ ba wamahaʼö niha soloʼö khönia Keriso si fao faʼebolo dödö enaʼö omasi ira atulö, so waʼomasi, ba faʼohau-hau.​—Mat. 24:45-47.

11, 12. Lofo hadia nirasoi niha iadaʼa, tobali hewisa Yehowa wombönökhi soguna ba nono mbanuania?

¹¹ Lö moʼamböta. Ato niha solofo ba wamati ba gulidanö andre. Ifangelama ita Sura Niʼamoniʼö, ”Hiza, irugi  baŵa dania—iwaʼö Soʼaya Yehowa—ba ufatörö ba danö lofo mbanua, tenga faʼolofo ba gö, ba tenga faʼowökhi dödö ba nidanö, faʼolofo ba wamondrongo li Yehowa aʼine.” (Gamo. 8:11) Hadia olofo göi nono mbanua Lowalangi? Ifaʼeleʼö Yehowa wa faböʼö nono mbanuania moroi ba nudunia, ”Hiza, si manga-manga genonigu andrö, ba yaʼami, bo solofo! Hiza, samadu-madu hadia ia genonigu, ba yaʼami ba sowökhi tödö! Hiza, somuso tödö genonigu, ba yaʼami, ba saila!” (Yes. 65:13) Hadia no öʼila waʼalua nifaʼeleʼö andrö?

¹² Lö mubato wangaʼasogö gö wamati hulö nidanö, itugu ebolo ba abakha. Publikasida si teʼodane-dane ba Zura Niʼamoniʼö, rekaman audio ba video, angowuloa, kebaktian, hegöi si no lafaʼanö ba situs Web khöda, hulö simane idanö sangele-ngele ba sabölö-bölö wangaʼasogö gö wamati ba gulidanö solofo ba wamati andre. (Hez. 47:1-12; Yoe. 3:18) Hadia lö omuso dödöu ba waʼalua nifabuʼu Yehowa sanandrösa ba waʼafahöna? Hadia lö öbato wemanga ba meza Yehowa?

13. Hewisa waʼalua nifabuʼu Lowalangi wa teboka hörö zauʼa ba larongo li safiso?

¹³ Lö fökhö wamati. No tobali waba ba ginötö andre me auʼa ba afiso niha ba wamati. (II Kor. 4:4) Hizaʼi, no ifadöhö Keriso waʼatekiko hegöi fökhö ba zi sagörö ulidanö. Hadia no irai öʼila me teboka hörö zauʼa ba talinga zafiso? Na no irai öʼila niha sanöndra faʼaboto ba dödö Daromali Lowalangi ba iröi agamania so faya, sameʼe yaʼira auʼa ba afiso ba zindruhu, no öʼila waʼalua zi no mufabuʼu andre, ”Na luo daʼö, ba larongo safiso daromali si so ba zura, ba iʼila niha hörö zauʼa, moroi ba waʼatebalu, moroi ba zogömi-gömi.” (Yes. 29:18) Ba zi sagörö ulidanö, ngaotu ribu niha nifadöhö ba wamati ero röfi. Fefu zondröi Babilona Sebua ba si fao khöda ba wamosumange Lowalangi ba waradaiso ba wamati, tobali tandra si toʼele wa alua zi no ifabuʼu Yehowa!

14. Hadia zinangea taʼangerönusi enaʼö aro wamatida?

¹⁴ Ero sambua faza ba mbuku daʼa, so dandra si tefaudu wa no iʼohe niha soloʼö khönia Keriso ba waradaiso wamati ba ngaluo safuria andre. Dataʼangerönusi hawaʼoya howu-howu nitemada ba waradaiso andrö. Na tafalua daʼö, itugu aro wamatida ba nifabuʼu Yehowa ba zi so föna.

15. Hana faduhu dödöda wa tobali faradaiso fefu gulidanö?

¹⁵ Iʼotarai ba mböröta, ohitö dödö Yehowa yaʼia daʼö ibaliʼö faradaiso zi sagörö ulidanö. Ifaʼaso ba kabu faradaiso Gadamo ba Khawa ba ibeʼe khöra fareta enaʼö moʼono ba lanönöi gulidanö hegöi fondrorogö fefu si no iwöwöi. (I Moz. 1:28) Lö laʼoʼö daʼö ira Adamo ba Khawa, laʼoʼö wamadaö Zatana irege lö moʼahonoa fefu ngaʼötöra,  laluʼi horö, ba mate ira. Hizaʼi, lö irai tebulö gohitö dödö Yehowa. Ha sakali iwaʼö, ba hasambalö alua. (Baso Yesaya 55:10, 11.) Börö daʼö, faduhu dödöda wa tola lafoʼösi gulidanö andre ngaʼötö Gadamo ba Khawa, ba labeʼe barö mbawara, larorogö fefu niwöwöi Yehowa ba waradaiso sagörö ulidanö si fao faʼomasi. Ba luo daʼö, moʼahonoa waʼalua wamaʼeleʼö nibeʼe ba niha Yehuda me mböröta, sanandrösa faʼauri ba nahia simane faradaiso! Datafaigi duma-dumania.

16. Hewisa wangumaʼö Zura Niʼamoniʼö wa lö ametaʼuö ba gulidanö Faradaiso?

¹⁶ Lö ametaʼuö. Ba gafuriata, sindruhu-ndruhu moʼahonoa waʼalua wamaʼeleʼö sondrara tödö nisura ba Yesaya 11:6-9. Ira matua, ira alawe, hegöi iraono, lö samangiwa tödöra gofu hezo möi ira ba gulidanö andre. Lö niha mazui urifö sametaʼu yaʼira. Khalaigö atö na tobali omou fefu zi sagörö ulidanö daʼa, tola molangi ndraʼugö ba nidanö, hegöi ba nasi; öʼanöröi hili; lö sametaʼu yaʼugö ba woʼanöröi tanö soduʼu. Na ba zi bongi, lö so so dödöu. Alua nisura ba Hezekieli 34:25, tola laʼiagö ono mbanua Lowalangi ”danö si mate, lö hadia ia, ba tola mörö ba dalu gatua”.

17. Hana faduhu dödöda wa ibönökhi zoguna khöda Yehowa irege lö moʼamböta na mamatörö Mbanuania ba gulidanö?

¹⁷ Lö moʼamböta. Khalaigö atö, lö hadöi saʼae faʼanumana, faʼambö gizi, faʼolofo, mazui fanolo moroi khö ndra samatörö. Ba waʼoya gö wamati nitema nono mbanua Lowalangi iadaʼa, faduhu dödöda wa ibönökhi zoguna ba nono mbanuania Razoda Mesia. Me so ia ba gulidanö, no iforomaʼö wa ifalua zi no ifabuʼu hewaʼae no ide-ide. Ibeʼe gö niha solofo si hauga ribu faʼato, mato hauga ngaʼörö roti hegöi iʼa. (Mat. 14:17, 18; 15:34-36; Mrk. 8:19, 20) Na mamatörö Mbanua Lowalangi ba zi sagörö ulidanö, sindruhu-ndruhu alua ba daʼö wamaʼeleʼö simane daʼa, ”Ibeʼe dania deu ba zinanömi ba nowimi, ba ömi andrö, bua nowi, ba fangabeʼemi, moʼösi. Ba mangalui gö gurifömi, na luo daʼö, ba mbenua sebolo.”​—Yes. 30:23.

18, 19. (a) Hadia nirasoimö na alua wamaʼeleʼö Yesaya 65:20-22? (b) Hadia geluahania faʼanau nosoda simane ”faʼara döla geu”?

¹⁸ Ba ginötö andre, ato niha zi lö mangila mokhalaigö wa so nomora si sökhi hegöi halöwöra si tefaudu. Ba gulidanö si no tekiko andre, ato zangumaʼö wa no laforege wohalöwö ero maʼökhö, hizaʼi ha maʼifu nisöndrara. Tobalisa niha si kayo ba soluʼa-luʼa zanöndra fefu. Khalaigö atö na alua wamaʼeleʼö daʼa ba zi sagörö ulidanö, ”Ba lalau nomo, ba laʼonahia göi; lafazökhi kabu nagu ba laʼa mbua. Tenga solau omo ira, ba tanö böʼö zi onahia ba tenga sananö sinanö, ba tanö böʼö zi manga mbua; faʼara döla geu saʼae waʼanau noso mbanuagu andrö, ba ölö dangara, ba nitutuyugu andrö zi ogunaʼö.”​—Yes. 65:20-22.

 ¹⁹ Hadia geluahania faʼanau nosoda simane ”faʼara döla geu”? Na mozizioʼö ba narö geu sebua, hadia ahöli-höli dödöu me öʼangerönusi wa no ara geu daʼö, te fatua lö tumbu duamö? Te ömane tödöu, börö me lö soʼahonoa nasa ndraʼugö iadaʼa, abölö anau gölö geu daʼö moroi khöu, lö sogadu-gadu ba samakiko yaʼia, ba hewaʼae no mate ndraʼugö, anau nasa gölönia waʼauri. Sökhi sibai dödö Yehowa börö me ifaduhuʼö ba dödöda wa anau nosoda ba Waradaiso dania ba so waʼohahau dödö! (Zin. 37:11, 29) Lö aratö, alua ginötö hulö simane duʼu salio aleu geu sanau ölö, tumbu ba mate, hizaʼi auri ita irugi zi lö aetu!

20. Hewisa nono Mbanua Lowalangi si lö faröi larasoi waʼamoʼahonoa walöfökhö?

²⁰ Moʼahonoa walöfökhö. Iadaʼa, fefu niha ba gulidanö andre no so ba waʼogömi-gömi börö me göna ira fökhö ba faʼamate. Sindruhunia, fefu ita göna fökhö nifotöi horö, fökhö si tola mamunu yaʼita. Ha sambua zi tola mangefaʼö yaita, yaʼia daʼö höli moroi khö Keriso. (Rom. 3:23; 6:23) Sagötö Wamatörö si Saribu Fakhe, iʼogunaʼö höli andrö Yesu hegöi awönia samatörö, ba lazara-zara wangohori fefu horö ba niha si lö faröi. Sindruhu-ndruhu alua dania nifaʼeleʼö Yesaya, ”Samösa lö ba mbanua sangumaʼö: No gönado safökhö khögu. Niha si so ba daʼö, ba no si falukha fengefa horö.” (Yes. 33:24) Khalaigö atö, lö hadöi saʼae sauʼa, safiso, mazui sombuyu-mbuyu töla. (Baso Yesaya 35:5, 6.) Lö fökhö si tebai ifadöhö Yesu, he fökhö ba mboto, amuata, mazui fangera-ngera. Moʼahonoa saʼae nono Mbanua Lowalangi si lö faröi!

21. Hadia zalua dania ba waʼamate, ba hana wa möi fondrara dödö nifabuʼu andrö?

²¹ Tobali, hewisa göi zasese alua börö wökhö si tobali lua-lua horö yaʼia daʼö faʼamate? Daʼö ’udu safuria’, ba lö niha si tola molawa yaʼia. (I Kor. 15:26) Hizaʼi, hadia faʼamate andrö udu sataʼu Yehowa? Faigi hadia nifaʼeleʼö Yesaya, ’Ifakiko waʼamate, si lö mamalö-malö; ba iʼosi Soʼaya Yehowa daŵa hörö ba mbawa niha.’ (Yes. 25:8) Hadia tola ökhalaigö daʼö? Lö saʼae takoʼo niha, lö hadöi lewatö, lö tawa hörö faʼabu dödö! So daŵa hörö faʼomuso dödö na ifalua zi no ifabuʼu Yehowa ba ginötö tesusugi niha si no mate! (Baso Yesaya 26:19.) Ba gafuriata, tefadöhö fefu ngawalö gabula dödö salua börö waʼamate.

22. Hadia zalua na no awai mamatörö Mesia ba wamalua ohitö dödö Lowalangi ba gulidanö?

²² Ba gafuriata zi Saribu Fakhe, awai ifalua gohitö dödö Lowalangi ba gulidanö Banuania, aefa daʼö ibeʼe Keriso wamatörö khö Namania. (I Kor. 15:25-28) Niha gulidanö si no moʼahonoa, tola lataögö wanandraigö safuria na laʼefasi Zatana moroi ba nahiania si lö iʼila ifalua hadia ia, yaʼia daʼö ba ”gawuwukha”. Aefa daʼö, ibunu gulö si  lö sökhi andrö Keriso hegöi si fao khönia. (I Moz. 3:15; Fam. 20:3, 7-10) Hizaʼi, so dötönafö ba niha sangomasiʼö Yehowa si lö faröi. Te lö hadöi ngawua wehede ba wokhalaigö yaʼia simane faʼasökhi ngawua wehede ba zi no iʼehehaini Lowalangi. No ifabuʼu ba niha si lö faröi wa lasöndra ʼwangefa ono Lowalangi andrö, si so lakhömi’.​—Rom. 8:21.

23, 24. (a) Hana wa hasambalö alua nifabuʼu Lowalangi? (b) Hadia gangetula nihalömö?

²³ Si no mufabuʼu andrö tenga teʼodane-dane ba dötönafö, somasi-masi dödö, mazui fangifi. Hasambalö alua zi no ifabuʼu Yehowa! Hadia mbörö? Törö tödöu wehede Yesu ba wamobörö faza mbuku daʼa, ’Yatohare Mbanuau. Yaʼitörö zomasi ndraʼugö, hulö ba zorugo, yasimanö göi ba gulidanö.’ (Mat. 6:9, 10) Banua Lowalangi andrö tenga anga-anga niha. Sindruhu-ndruhu alua ia! Ba no mamatörö ia ba zorugo iadaʼa. Barö zi otu fakhe andre, no ifalua Banua Lowalangi zi no ifabuʼu Yehowa; oroma daʼa ba mbanua niha Keriso. Börö daʼö, tola faduhu dödöda wa fefu zi no ifabuʼu Yehowa ha ba zalua na tohare wamatörö Mbanua Lowalangi ba gulidanö!

²⁴ Aboto ba dödöda wa lö aratö tohare Mbanua Lowalangi. Taʼila wa alua fefu nifabuʼu Yehowa. Hadia mbörö? Börö me no MAMATÖRÖ MBANUA LOWALANGI! Fanofunia iadaʼa, ’Hadia no mamatörö Mbanua Lowalangi andrö khögu?’ Dataforege enaʼö tobali ita ono Mbanua Lowalangi si lö faröi iadaʼa, enaʼö tarasoi wamatörönia soʼahonoa ba satulö irugi zi lö aetu!