1, 2. (a) Hadia dandra wa no mamatörö Razoda iʼotarai 1914? (b) Hadia nifatunöda ba faza daʼa?

 TEʼABEʼEʼÖ wamatida ba wamaigi si no ifalua Banua Lowalangi ba gotalua zi faʼudu khönia. (Zin. 110:2) No iʼowuloi Razoda zaradadu si no aoha ölö ba wanuriaigö. No ihaogö ba ibohouni zoloʼö khönia, he ba wamati hegöi ba gamuata. Hewaʼae iforege udu Mbanua Lowalangi ba wamabali yaʼita, tarasoi wahasara dödö ba zi sagörö ulidanö iadaʼa. Fefu daʼa ba oya nasa danö böʼönia si no ikhamö Banua Lowalangi tobali tandra waʼafaduhu dödöda wa iʼotarai 1914 no mamatörö Razoda ba gotalua nudu Mbanua Lowalangi.

² Lö aratö, ifalua zahöli-höli dödö Banua Lowalangi. ”Tohare” ia ba ’wamufu’ hegöi ’ba wangohori’ si faʼudu khönia. (Mat. 6:10; Dan. 2:44) Hizaʼi, fatua lö alua daʼö, oya ngawalö zinangea alua. Hadia manö? Nifaʼeleʼö Zura Niʼamoniʼö daʼö zameʼe fanema li. Datafareso hadia manö zedöna alua.

3. Hadia zi oföna sibai alua nidöna-dönada?

³ Fangombakha faʼatulö. Ba zurania khö ndra niha Tesalonika, no ifatunö Faulo hadia nibalo-baloida si oföna alua. (Baso I Tesalonika 5:2, 3.) Ba zura daʼa, imane Faulo tebörögö ngaluo Yehowa faoma fanuwö ”Babilona Sebua”. (Fam. 17:5) Hizaʼi, fatua lö tebörögö ngaluo Yehowa fefu soi lamane, ”No atulö, no ahono.” Fehede daʼa tola daʼö geluahania sambua angombakhata mazui ngawalö wehede si tehöngö. Hadia fao ndra sondröniaʼö ba agama? Börö me awö niha gulidanö ira, tola manö fao ira ba soi sangumaʼö, ”No atulö.” (Yer. 6:14; 23:16, 17; Fam. 17:1, 2) Angombakhata waʼatulö ba faʼahono andre tobali tandra wa lö aratö tebörögö ngaluo Yehowa. Udu Mbanua Lowalangi ”tebai moloi ira”.

4. Hadia gunania na aboto ba dödöda wamaʼeleʼö Waulo sanandrösa ba ngawua wehede no atulö, no ahono?

 ⁴ Hadia gunania me no aboto ba dödöda wamaʼeleʼö daʼa? Imane Faulo, ”Ba yaʼami, ira talifusö, ba tenga si so ba zogömi-gömi, faʼikhamö ami baŵa andrö hulö zanagö.” (I Tes. 5:3, 4) Tenga simane niha sato, aboto ba dödöda hadia geluaha fefu zalua iadaʼa. Hewisa zindruhunia waʼalua zi no tefaʼeleʼö sanandrösa ba waʼatulö ba faʼahono andre? Tabaloi ba tafaigi hadia zalua ba gulidanö. Andrö, ’böi mörö ita’.​—I Tes. 5:6; Zef. 3:8.

5. Hadia zi oföna alua si möi börö ”wamakao sabölö-bölö”?

⁵ Fasuwöta ba agama. Törö tödöu me imane Faulo, ”Na lawaʼö saʼae dania: No atulö, no ahono; awena dania iʼozumagö ikhamö ira faʼatekiko.” Simane na so garimbanua ba itete feʼugu mbanua, simanö göi gangombakhata ”No atulö, no ahono”, ba zi lö arara ”izumagö ikhamö ira faʼatekiko”. Hadia nihori? Si oföna, ”Babilona Sebua” yaʼia daʼö angorudua agama-agama sofaya ba zi sagörö ulidanö, mazui ”ina zohorö ba ina hokha andrö”. (Fam. 17:5, 6, 15) Fangohori Agama-Agama Niha Keriso ba fefu organisasi agama faya, daʼö mböröta ”wamakao sabölö-bölö”. (Mat. 24:21; II Tes. 2:8) Ato niha zi tokea. Hadia mbörö? Ba ginötö daʼö, ina zohorö andrö iwalingagö ”razo ira alawe” ia nasa, si ’lö irai göna faʼabu dödö’. Hizaʼi, lö idöna-döna ba awena aboto ba dödönia wa sala ia. Tehori ia ba zi lö arara, hulö ”ha maʼökhö”.​—Fam. 18:7, 8.

6. Hadia mazui haniha zanuwö ”Babilona Sebua”?

⁶ Hadia mazui haniha zanuwö ”Babilona Sebua”? ”Saliwa-liwa ba danö andrö” si ”fulu rozi dandru”. Ifatunö buku wamaʼeleʼö wa saliwa-liwa ba danö andrö eluahania Perserikatan Bangsa-Bangsa (PBB). Si fulu rozi tandru eluahania fefu waʼabölö politik sotuhini ”zaliŵa-liŵa ba danö, soyo kirimisi” andre. (Fam. 17:3, 5, 11, 12) Hawaʼabölö-bölö wanuwö yaʼia? Fefu soi ba PBB larabu gokhöta nina zohorö andrö, laʼa nösinia, ”ba latunu ia, ba galitö”.​—Baso Famaʼeleʼö 17:16. a

7. Hewisa wa alua me döfi si föföna M wehede Yesu ba Mataiʼo 24:21, 22, ba hadia zalua ba zi so föna?

⁷ Muʼönaigö ginötönia. Ifatunö hadia zalua Razoda sagötö famakao sabölö-bölö. Imane Yesu, ”Ba börö nitutuyu andrö, wa teʼönaigö luo andrö.” (Baso Mataiʼo 24:21, 22.) Alua wehede Yesu andre me 66 M hewaʼae lö abölö-bölö, me ”iʼönaigö ginötö” Yehowa ba wanudugö Yeruzalema nifalua zaradadu Romawi. (Mrk. 13:20) Daʼa mbörö wa tola auri niha Keriso ba Yeruzalema hegöi ba Yudaia. Hewisa waʼalua daʼö dania na tohare wamakao sabölö-bölö ba zi so föna? Iʼogunaʼö Razoda Yehowa, ba  ”iʼönaigö ginötö” wanuwö nifalua Perserikatan Bangsa-Bangsa ba agama, enaʼö lö fao waʼatekiko agama sindruhu ba agama faya. Börö daʼö, hasambalö mufakiko fefu organisasi agama faya, ba lö irai tebulö agama sindruhu. (Zin. 96:5) Iadaʼa, datafatunö ngawalö zalua na no awai wamakao sabölö-bölö.

8, 9. Hadia tandra-tandra niwaʼö Yesu, ba hewisa niha sangila salua andre?

⁸ Nifaʼeleʼö Yesu sanandrösa ba ngaluo safuria, daʼö zangoromaʼö wa so ngawalö zalua fatua lö tohare Hamagedo. Dombua zalua si oföna tafatunö tesura ba Injil Mataiʼo, Mareko, ba Luka.​—Baso Mataiʼo 24:29-31; Mrk. 13:23-27; Luk. 21:25-28.

⁹ Tandra-tandra moroi ba mbanua. No ifaʼeleʼö Yesu, ”Taya haga luo, ba löʼö saʼae humaga mbaŵa, ba atoru ndröfi moroi ba mbanua si yawa.” Sondröniaʼö ba agama lö saʼae tobali ira haga, umbu wanuturu lala. Hadia daʼö göi geluaha niwaʼö Yesu, so dandra sahöli-höli dödö ba dalu mbanua? Tola manö. (Yes. 13:9-11; Yoe. 2:1; 3:3, 4) Hewisa niha sangila salua andre? Ataʼu sibai ira börö me lö laʼila hadia zinangea lafalua. (Luk. 21:25; Zef. 1:17) Atulö, udu Mbanua Lowalangi, iʼotarai ’razo numalö ba zawuyu’, mate zagötö ira ”waʼataʼu ba wombaloi si göna ulidanö andre” lalau moloi ba waminiʼö yaʼira. Hizaʼi, lö lasöndra nahia sahono dödö me moloi ira moroi ba wönu Razoda.​—Luk. 21:26; 23:30; Fam. 6:15-17.

10. Hadia gangetula wanguhuku nifalua Yesu, ba hewisa dödö niha sotuhini Banua Lowalangi hegöi si faʼudu?

¹⁰ Mufaʼema gangetula wanguhuku. Fefu nudu Mbanua Lowalangi mufaso ira wamaigi sambua zalua si möi nönö waʼataʼura. Imane Yesu, ”Ba laʼila dania Nono niha, si so moroi sa ba lawuo, aʼoi so waʼabölö, awö lakhömi.” (Mrk. 13:26) Famaehagö kuaso si tebai ikhamö faʼabölö niha andre, no tobali tandra wa tohare Yesu ba wamaʼema angetula wanguhuku. Ba faosatö tanö böʼö si fagölö moroi ba wamaʼeleʼö sanandrösa ba ngaluo safuria, no izara-zara wangombakha Yesu hadia dania gangetula nifaluania ba luo daʼö. Tesöndra ia ba duma-duma nibeʼe Yesu sanandrösa ba mbiri-biri ba nambi. (Baso Mataiʼo 25:31-33, 46.) Niha sotuhini Banua Lowalangi si lö faröi lafotöi ira ’biri-biri’ ba ’lafaöga mbawara’ börö me laʼila ”no ahatö wangefaʼö”. (Luk. 21:28) Hizaʼi, fefu nudu Mbanua Lowalangi lafotöi ira nambi ba ”mege-ege dania ba khönia fefu soi niha ba gulidanö” börö me laʼila lö aratö tehori ira irugi zi lö aetu.​—Mat. 24:30; Fam. 1:7.

11. Hadia zinangea tatörö tödöda sagötö mufatunö ngawalö zi lö aratö alua?

 ¹¹ Me no aefa ifatunö gangetulania Yesu ba wanguhuku ”fefu soi”, so nasa zinangea alua sabölö moguna fatua lö tebörögö Hamagedo. (Mat. 25:32) Datafatunö dombua ngawalö ba gotaluania: Fanuwö moroi khö Gogi ba fangowuloi niha nibayoini. Sagötö famaresoda si dombua ngawalö andre, böi olifu ita wa lö ifatunö Taromali Lowalangi hawaʼara alua fefu daʼa. Tola manö fendronga waʼalua zi dua ngawalö andre.

12. Hadia wanuwö sabölö-bölö nifalua Zatana ba Mbanua Lowalangi?

¹² Fanuwö sabölö-bölö. Gogi moroi ba danö Magogi isuwö niha nibayoini si toröi ba gulidanö hegöi biri-biri tanö böʼö. (Baso Hezekieli 38:2, 11.) Fanuwö salua ba Mbanua Lowalangi si no tefasindro tobali fasuwöta safuria nifalua Zatana ba niha nibayoini iʼotarai me tetiboʼö ia moroi ba zorugo. (Fam. 12:7-9, 17) Iʼotarai me tebörögö teʼowuloi niha nibayoini ba mbanua niha Keriso si no mubohouni, oya nifalua Zatana enaʼö lö ohahau dödöra ba wamati, hizaʼi lö aʼozu. (Mat. 13:30) Hewaʼae simanö, ba ginötö tehori fefu organisasi agama faya, ba ono mbanua Lowalangi hulö zi ”lö muʼöli nahiara, lö bawa göli ba lö lazi”. Iʼila Satana wa daʼa ginötö si tefaudu. Andrö, idöniaʼö fefu zaradadunia si lö sökhi ba wanuwö niha sotuhini Banua Lowalangi.

13. Hewisa Yehowa ba wanolo ono mbanuania?

¹³ Ifatunö Hezekieli hadia zedöna alua. Sanandrösa khö Gogi, imane famaʼeleʼö andrö, ”Maoso ndraʼugö, ba soʼö moroi sa ba nahiamö ba wondrege yöu, yaʼugö ba soi soya andrö, awöu, oi si fakudo, ato sibai, ato zabölö, ba möiʼö musuwö mbanuagu iraono Gizaraʼeli, hulö lawuo, ba wangahawui tanö.” (Hez. 38:15, 16) Hewisa dödö Yehowa wamaigi fanuwö si tebai mutimbagö andre na dali wamaigi niha? Imane Yehowa, ”Ba humola wönugu ba nikhugu.” Ba ”muhededo ba ziʼöli”. (Hez. 38:18, 21; baso Zakharia 2:8.) Tohare Yehowa ba wanolo ono mbanuania ba gulidanö. Daʼa nifotöi fasuwöta Hamagedo.

14, 15. Hadia zalua aefa daʼö me no ibörögö Satana wanuwö sabölö-bölö?

¹⁴ Fatua lö taʼila hewisa Yehowa ba wangoʼawögö ono mbanuania ba wasuwöta Hamagedo, datafaigi sabata zalua tanö böʼönia. Alua daʼa ba gotalua wanuwö sabölö-bölö nibörötaigö Zatana ba faʼatohare Yehowa ba Hamagedo. Simane nifatunöda ba ngenoli 11, salua si dua yaʼia daʼö teʼowuloi niha nibayoini si toröi ba gulidanö.

¹⁵ Fangowuloi niha nibayoini. Isura Mataiʼo hegöi Mareko wehede Yesu sanandrösa ba ”nitutuyunia”—niha Keriso nibayoini geheha—si tobali faosatö ba ngawalö zalua fatua lö tohare Hamagedo. (Faigi ngenoli si-7.) Me  fahuhuo Yesu sanandrösa ba waʼarazonia, no ifaʼeleʼö, ”Ba ifatenge dania malaʼikania andrö, ba iʼowuloi nitutuyu andrö, moroi ba zi fasui, iʼotarai wondrege danö, irugi gahe mbanua ba wondrege tanö sa.” (Mrk. 13:27; Mat. 24:31) Fangowuloi hadia niwaʼö Yesu? Tenga daʼö huhuonia sanandrösa ba wamotandro safuria niha Keriso nibayoini, salua fatua lö tohare wamakao sabölö-bölö. (Fam. 7:1-3) Hizaʼi, eluaha nifatunö Yesu yaʼia daʼö ngawalö zalua sagötö famakao sabölö-bölö ba zi so föna. Tobali, me no tebörögö wanuwö sabölö-bölö moroi khö Zatana nifaluania ba nono mbanua Lowalangi, niha-niha nibayoini si toröi ba gulidanö teʼowuloi ira ba zorugo.

16. Hadia nifalua niha nibayoini si no tesusugi na alua wasuwöta ba Hamagedo?

¹⁶ Hewisa wangowuloi niha nibayoini andre moʼamakhaita ba zalua aefa daʼö, yaʼia daʼö Hamagedo? Iʼotarai me alua wangowuloi andrö, aboto ba dödöda wa no teʼowuloi fefu niha nibayoini ba zorugo fatua lö tebörögö wasuwöta Lowalangi ba Hamagedo. Ba zorugo, 144.000 si tobali awö Keriso ba wamatörö, latema kuaso wefao khö Yesu ba wamazaule ”siʼo siʼöli” ba wamakiko fefu nudu Mbanua Lowalangi. (Fam. 2:26, 27) Aefa daʼö, fao niha nibayoini nisusugi khö ndra malaʼika sagabölö ba woloʼö Yesu, Razo ba wanuwö, ba wamaondragö ngawawa zaradadu sebua sanekhegö udunia—ono mbanua Yehowa. (Hez. 38:15) Me ibörögö fasuwö ira, ba daʼö alua wasuwöta Hamagedo!​—Fam. 16:16.

17. Hadia zalua ba ”nambi” na alua Hamagedo?

¹⁷ Tefalua wanguhuku. Fozu wamakao sabölö-bölö yaʼia wasuwöta ba Hamagedo. Ba luo daʼö, ifalua gonönöta halöwönia Yesu. Tenga ha Sanguhuku ”fefu soi ia”, hizaʼi tobali Samalua fanguhuku soi niha gulidanö, yaʼia daʼö fefu niha si no ifotöi ”nambi” ba zi lalö. (Mat. 25:32, 33, Terjemahan Dunia Baru) ’Ibözi fefu soi’ Razoda faoma ’föda sanau ba satarö’ si so ba danga. Fefu niha si no amaedola nambi, iʼotarai ”razo” irugi ’zawuyu’ tefakiko ira irugi zi lö aetu.​—Fam. 19:15, 18; Mat. 25:46.

18. (a) Hadia göi zalua ba ”mbiri-biri”? (b) Hewisa Yesu ba wangasiwai faʼamönania?

¹⁸ Faböʼö zalua ba niha-niha nifotöi Yesu ”biri-biri”! Hewaʼae arakhagö ihundra-hundra ira ngawawa zaradadu sebua nifotöi ”nambi” okhöta Zatana, ”zato sibai” si no amaedola ”mbiri-biri” si lö faʼabölö, teʼorifi ira moroi ba danga nudu ba aefa ira ba ”wamakao sabölö-bölö”. (Fam. 7:9, 14) Aefa daʼö, me no ikalaisi ira Yesu ba ihori fefu zi faʼudu ba Mbanua Lowalangi, itiboʼö Zatana awö malaʼikania ba gawuwukha fondrege zabakha. Amaedola zi  no mate ira ba lö hadöi nifaluara sagötö zi hönö fakhe.​—Baso Famaʼeleʼö 6:2; 20:1-3.

19, 20. Hewisa enaʼö tafalua wamahaʼö nisura ba Yesaya 26:20 ba 30:21?

¹⁹ Hewisa wamaʼanöda yaʼita ba ngawalö zalua andre samadögö ulidanö? No ara ba zi lalö imane The Watchtower, ”Foloʼö mbörö wa tola tasöndra waʼauri.” Hadia mbörö? Fanema linia tesöndra ba wamangelama nibeʼe Yehowa khö ndra niha Yehuda niʼoloiʼö ba Mbabilona me föna. No ifaʼeleʼö Yehowa wa tedudugö Mbabilona, hizaʼi hadia zinangea lafalua ono mbanua Lowalangi ba wamaʼanö yaʼira ba zalua andrö? Imane Yehowa, ”Ba miʼae si bakha, yaʼami banuagu, ba mbateʼe andrö khömi, ba milazi mbawandruhö furimi! Mibiniʼö ami, ha mamöʼi hörö waʼara, irege alö wönu andrö.” (Yes. 26:20) Haogö nehesi ngawua wehede daʼö: ”miʼae”, ”milazi”, ”mibinöʼö ami”—fefu daʼa oi fareta. Niha Yehuda soloʼö fareta daʼa laʼiagö nomora, lafandröndröu ira moroi khö zaradadu si fasuwö ba lala. Andrö wa tola auri ira börö me laʼoʼö wanuturu lala moroi khö Yehowa. b

²⁰ Hadia wamahaʼönia khöda? Simane ono mbanua Lowalangi me föna, wa tola tasöndra waʼauri moroi ba ngawalö zalua dania, börö woloʼöda fanuturu lala moroi khö Yehowa. (Yes. 30:21) Iʼogunaʼö mbanua niha Keriso ba wameʼe fanuturu lala. Andrö, yamonönö waʼomasida woloʼö fanuturu lala nitemada soroi ba dödö. (I Yoh. 5:3) Na taʼoʼö iadaʼa, aoha göi khöda dania woloʼö ba ilumöʼö ita Amada Yehowa hegöi Yesu, Razoda. (Zef. 2:3) Börö wolumöʼö moroi khö Lowalangi andrö, taʼila samösa hewisa Mbanua Lowalangi wangohorinia si faʼudu khönia. Lö irai olifu ita zalua andrö dania!