OMUSO dödöu ba öboho mbawa khö zi fahuhuo ba mimbar. Yaʼia talifusöda si bohou ebua ba mbanua niha Keriso si faböbö yaʼugö, ba daʼa huhuonia si oföna sibai ifaʼema ba kebaktian. Me örongo huhuonia, ahöli dödöu wamahaʼö nitema nono mbanua Lowalangi. Itörö tödöu hewisa me awena sibai möi ba mimbar dalifusöda andre—ba öʼila waʼatedounia iadaʼa! Tefahaʼö ia ba Sekolah Dinas Perintis. Barö-barö daʼa, fao ira woʼomonia ba Sekolah bagi Penginjil Kerajaan. Me öbözi tawo-tawo ba huhuo si sökhi nifaʼemania, öfaigi ba zi fasuimö ba öʼangeraigö wamahaʼö nitema nono mbanua Lowalangi.

No ifaʼeleʼö Sura Niʼamoniʼö wa samuza inötö dania fefu nono mbanua Lowalangi ’ifahaʼö Yehowa’. (Yes. 54:13) Ba götö daʼö so ita iadaʼa. Tatema wamahaʼö tenga ha ba publikasida, tobali ba gangowuloa, kebaktian, ba ngawalö sekola si no lafaʼanö ba wanemaʼö halöwö nibeʼe organisasi Yehowa. Ba faosatö daʼa, datafatunö hewisa wamahaʼö andre tobali tandra wa mamatörö Mbanua Lowalangi ba ginötö daʼa.