1. Hadia wanolo nitema ndra nifahaʼö me owulo ira, ba hana wa moguna khöra daʼö?

 LÖ ARA me no tesusugi Yesu, owulo nifahaʼönia ba wamarou tödöra zamösana. Hizaʼi, laduhö mbawandruhö börö waʼataʼura nudu. Tatu taya waʼataʼura me tohare Yesu ba gotaluara ba imane, ”Mitema geheha niʼamoniʼö”! (Baso Yohane 20:19-22.) Lö ara aefa daʼö, owulo zui ndra nifahaʼö ba ibeʼe gehehania khöra Yehowa. Sindruhu-ndruhu ebua waʼabölö nitemara ba wamalua fanuriaigö si so fönara!​—Hal. 2:1-7.

2. (a) Hewisa wameʼe Yehowa khöda faʼabölö, ba hana wa moguna khöda? (b) Hana wa moguna sibai wamalua Famahaʼö zi Sambua Omo? (Faigi nisura ba gahe zura hegöi kotak ” Famahaʼö zi Sambua Omo”, ngaʼörö 175.)

² Fagölö wanandraigöda simane ira talifusöda me döfi siföföna. (I Fet. 5:9) Itaria, so ba gotaluada zataʼu ba niha. Ba, moguna waʼabölö moroi khö Yehowa enaʼö lö faröi ita ba wamalua halöwö fanuriaigö. (Ef. 6:10) Sabölö oyania tatema waʼabölö moroi khö Yehowa ba gangowuloa. Iadaʼa so khöda ginötö wangondrasi dombua gangowuloa si möi famahaʼö ero migu—Perhimpunan Umum, Famahaʼö ba mbuku Manuriaigö, ba angowuloa barö migu nifotöi Faʼauri Niha Keriso ba Fanuriaigö. a Tatema göi öfa ngawalö gangowuloa sebua ero röfi—kebaktian regional, dombua kebaktian wilayah, ba Fanörö Tödö faʼamate Yesu. Hana moguna taʼondrasi fefu gangowuloa andrö? Hewisa waʼatedou gangowuloa iadaʼa? Ba, hadia zoroma moroi ba lagu weʼamöida ba gangowuloa?

3, 4. Hadia niʼandrö Yehowa ba nono mbanuania? Beʼe duma-duma.

³ No ara iʼandrö Yehowa ba nono mbanuania enaʼö owulo ira wamosumange yaʼia. Duma-dumania me 1513 SM, ibeʼe Goroisania Yehowa ba ndraono Gizaraʼeli, ba Goroisa andrö farahu luo Sabato ero migu enaʼö sambu-sambua omo lafosumange Lowalangi ba lafahaʼö ira ba Goroisa. (V Moz. 5:12; 6:4-9) Me laʼoʼö fareta daʼö, tebohouni ira ba so khöra wamati saro yaʼira si sambua omo hegöi si sambua soi. Me lö laʼoʼö Huku andrö, lö möi ira ba gangowuloa ba wamosumange Yehowa, ba teʼero  dödö Lowalangi khöra.​—III Moz. 10:11; 26:31-35; II Nga. 36:20, 21.

⁴ Faigi tulada nibeʼe Yesu. Möi ia ero migu ba sinagoga na luo Sabato. (Luk. 4:16) Me no mate Yesu ba tesusugi ia, latohugö ira nifahaʼönia waʼowulo hewaʼae tenga barö mbawa goroisa Sabato so ira. (Hal. 1:6, 12-14; 2:1-4; Rom. 14:5; Kol. 2:13, 14) Ba gangowuloa andrö, tenga ha latema wamahaʼö ba famarou dödö niha Keriso siföföna, tobali ba wameʼe sumange khö Lowalangi simane fangandrö, fameʼe bua gera-era, ba fanunö.​—Kol. 3:16; Heb. 13:15.

5. Hana wa möi ita ba gangowuloa ero migu hegöi ba kebaktian ero röfi? (Faigi kotak ” Angowuloa Ero Röfi Sangosambuaʼö Ono Mbanua Lowalangi”, ngaʼörö 176.)

⁵ Simanö göi na möiʼö ba gangowuloa ero migu hegöi kebaktian ero röfi, no taʼoromaʼö wa tatuhini Mbanua Lowalangi, tatema waʼabölö geheha niʼamoniʼö, ba tafarou niha böʼö ba wamati. Sabölö moguna, tebeʼe khöda ginötö ba wamosumange Yehowa simane fangandrö, fameʼe bua gera-era, hegöi fanunö. Faböʼö-böʼö lala wamalua angowuloa ba ndraono Gizaraʼeli hegöi ba niha Keriso siföföna, hizaʼi fagölö-gölö moguna. Hewisa waʼatedou gangowuloa iadaʼa?

6, 7. (a) Hadia mbörö wa mufalua gangowuloa? (b) Hewisa waʼafaböʼö-böʼö wamalua angowuloa ba zi sambu-sambua ngawawa?

⁶ Me ibörögö Charles Taze Russell wangalui sindruhu ba Daromali Lowalangi, iʼila wa moguna owulo niha si fagölö ohitö dödö. Imane Russell me 1879, ”Yaʼodo, hegöi si fao khögu ba Pittsburgh, mafaʼanö ba mafalua kelas Zura Niʼamoniʼö ero hari Migu ba wamareso ösi Mbuku  Niʼamoniʼö. Lafarou zombaso Zionʼs Watch Tower enaʼö owulo ira. Me 1881, labörögö gangowuloa-gangowuloa ba Pittsburgh, Pennsylvania, ero hari Migu ba hari Rabu. Imane Watch Tower baŵa si Felezara 1895, ohitö dödö gangowuloa yaʼia daʼö ba wondrouʼö ”faʼafatalifusötada, faʼomasi ba fahasara dödö niha Keriso” ba tebeʼe ginötö ba zangondrasi wamarou tödö nawöra zamösana.​—Baso Heberaiʼo 10:24, 25.

⁷ Ba zi hauga fakhe, waö-waö halöwö ba gangowuloa ba faʼasese wamalua, faböʼö-böʼö ero sambua ngawawa Ono Zekola Zura Niʼamoniʼö. Duma-dumania, sura moroi ba ngawawa si lö atoto ba Amerika Serikat me 1911 imane, ”Si löʼö-löʼönia mafalua gangowuloa lima kali samigu.” Lafalua hari Sinaya, Rabu, Zumaha, ba dua kali hari Migu. Sura böʼö moroi ba ngawawa si lö atoto ba Afrika nifazökhi me 1914 imane, ”Mafalua gangowuloa dua kali sara waŵa, mabörögö hari Zumaha irugi hari Migu.” Ba gafuriata, tebörögö gangowuloa simane nifaluada iadaʼa. Faigi sejarah sadogo-dogo ero sambua angowuloa.

8. Hadia duho huhuo sebua ba wamobörö?

⁸ Perhimpunan Umum. Döfi me no ifazökhi Russell Zionʼs Watch Tower me 1880, ifalua duma-duma nibeʼe Yesu ba wamalua fanuriaigö. (Luk. 4:43) Aefa daʼö, ihonogöi talifusöda Russell duma-duma gangowuloa nifaluada iadaʼa ba Perhimpunan Umum. Me iʼombakhaʼö zalua andre imane Watch Tower wa ”omasi [Russell] wamaʼema huhuo ba pertemuan umum ’Soʼamakhaita ba mbanua Lowalangi’”. Me 1911, me no labokai kelas mazui banua niha Keriso ba ngawalö soi, lafarou ero sambua kelas ba wamatenge si fahuhuo sahatö ba mbanua andrö ba lafaʼema önö ngawalö huhuo simane tuho sanandrösa ba wanguhuku hegöi höli. Ba gafuriata huhuo nifaʼema, laʼombakhaʼö döi zi fahuhuo hegöi tuho nifaʼema ba migu ganetenia.

9. Hadia manö zi no labohouni ba Perhimpunan Umum, ba hadia dandra wa fao dödöu?

⁹ Iʼombakhaʼö The Watchtower me 1945 wa tebörögö kampanye Perhimpunan Umum ba zi sagörö ulidanö ba tefarahu walu ngawua huhuo Zura Niʼamoniʼö sanandrösa ba ”gabula dödö saösö iadaʼa”. Ba zi hauga wulu fakhe, tenga ha tuho huhuo si no itatugöi sawuyu si lö faröi niʼogunaʼö zi fahuhuo, tobali lafaʼema huhuo nifaʼanöra samösa. Hizaʼi me 1981, labeʼe wanuturu lala ba zangai huhuo enaʼö nifaʼemara teʼodane-dane ba döla huhuo si no labeʼe ba mbanua niha Keriso. b Irugi 1990, ba döla huhuo nifaʼema lafaogö göi mbua gera-era zangondrasi mazui famadumaisi; hizaʼi, so wamohouni ba ndröfi daʼö. Iʼotarai daʼö ha huhuo sebua nifaʼema. Me baŵa si Sara 2008, so  wamohouni, laʼalösi ginötö wamaʼema huhuo sebua moroi ba zi 45 menit tobali 30 menit. Hewaʼae faböʼö-böʼö, huhuo sebua si no lafaʼanö andrö möi fondrouʼö wamati ba Daromali Lowalangi ba ifahaʼö ita ba ngawalö zoʼamakhaita ba Mbanua Lowalangi. (I Tim. 4:13, 16) Hadia terou dödöu ba wogaoni niha si no irai öfalukhaisi hegöi niha böʼö ba wamondro-ndrongo huhuo ba Zura Niʼamoniʼö?

10-12. (a) Hadia manö nibohouni ba Wamahaʼö Manuriaigö? (b) Hadia manö zinangea ösofu?

¹⁰ Famahaʼö ba mbuku Manuriaigö. Me 1922, ira talifusöda nifotöi musafir—sanuriaigö nifatenge Lembaga Menara Pengawal ba wamaʼema huhuo ba mbanua niha Keriso ba sondröniaʼö halöwö fanuriaigö—labeʼe mbua gera-erara enaʼö so gangowuloa nitatugöi ba wamahaʼö buku Manuriaigö. Laʼoʼö daʼa ba wamobörö, lafalua wamahaʼö mbuku Manuriaigö barö migu mazui hari Migu.

¹¹ Ibeʼe wanuturu lala Watchtower 15 mbaŵa si Önö 1932 sanandrösa ba wamalua angowuloa daʼa. Laʼogunaʼö duma-duma wamahaʼö nifalua ba Nomo Mbetieli, imane artikel andrö enaʼö samösa dalifusöda ira matua zondröniaʼö angowuloa daʼa. Datölu dalifusöda si dadao tanö föna ba lafalali-lali wombaso ngenoli. Me luo daʼö lö hadöi fanofu si no lahenaigö ba artikel-artikel. Börö daʼö, laʼombakhaʼö khö zondröniaʼö enaʼö iʼandrö ba zangondrasi wameʼe fanofu sanandrösa ba nifatunö. Aefa daʼö iʼandrö zato wameʼe fanema li. Na so gonönöta sinangea, laʼandrö ba zondröniaʼö enaʼö ”iʼadogoiʼö wamaʼema”.

¹² Ba wamobörö, ero sambua banua niha Keriso, lafili majalah sinangea laʼogunaʼö ba wamahaʼö moloʼö sato. Hizaʼi, ibeʼe mbua gera-era Watchtower 15 mbaŵa si Öfa 1933  enaʼö fefu mbanua niha Keriso laʼogunaʼö majalah si bohou. Labeʼe wanuturu lala me 1937 enaʼö lafalua wamahaʼö ba hari Migu. Famohouni tanö böʼö irege simane daʼa gangowuloada ba ginötö andre, no mufazökhi ba Watchtower 1 mbaŵa si Fulu 1942. Si oföna, iʼombakhaʼö majalah andrö wanofu si so ba artikel tesöndra tanö tou ba gahe mbuku ba muʼogunaʼö wanofu daʼö. Itohugö majalah daʼö wangumaʼö, abölö sökhi sambua za na mufalua gangowuloa daʼa. Lafarou dödö enaʼö labeʼe wanema li ”moroi ba mbua gera-erara samösa”, tenga ha asala labaso ngenoli. Lö aetu-aetu Wamahaʼö ba mbuku Manuriaigö andre tobali tuho wamahaʼö ba gangowuloa niʼogunaʼö zawuyu si lö faröi ba wangaʼasogö ö wamati ba ginötö si tefaudu. (Mat. 24:45) Manofu ita, ’Hadia no ufaʼanödo ba wamahaʼö mbuku Manuriaigö ero migu? Hadia uʼodödögö wameʼe bua gera-era ndrohu-ndrohu zi tola ndraʼo?’

13, 14. Hewisa waʼatedou Wamahaʼö Zura Niʼamoniʼö ba Gangowuloa, ba hadia zomasiʼö ba gangowuloa daʼa?

¹³ Famahaʼö Zura Niʼamoniʼö ba Gangowuloa. Ba dalu ndröfi 1890-an, me no laʼombakhaʼö ngawalö jilid Millennial Dawn, ibeʼe mbua gera-erania talifusöda H.N. Rahn, samösa ba gotalua Nono Zekola Zura Niʼamoniʼö si toröi ba Baltimore Maryland, AS, enaʼö lafalua ”Kelas-Kelas Fajar” (Dawn Circles) ba wamahaʼö Sura Niʼamoniʼö. Ba wamobörö, latandraigö lafalua gangowuloa daʼa ba nomo-omo. Hizaʼi me baŵa si Siwa 1895, aʼozu tefalua Kelas Fajar ba kota-kota Amerika Serikat. Iʼandrö Watch Tower ba mbaŵa daʼö enaʼö fefu nono zekola zindruhu, lafalua gangowuloa. Laʼandrö enaʼö sonekhe mombaso zondröniaʼö. Ibaso sambua fehede ba ibaloi naso zameʼe bua gera-era. Me no ibaso sambua fehede ba ngenoli aefa daʼö itutunö, moguna ibokai ba ibaso ayati si no tesura. Ba gafuriata faza, fefu zangondrasi laʼadogoiʼö wanutunö tuho wamahaʼö andrö.

¹⁴ No hauga kali faböʼö döi gangowuloada. No irai lafotöi Kelas Berea ba Wamahaʼö Sura Niʼamoniʼö, tandra wa niha Berea me döfi siföföna zi oföna mangosisiʼö ösi Mbuku Niʼamoniʼö. (Hal. 17:11) Aefa daʼö lagati döinia tobali Pelajaran Buku Sidang. Iadaʼa, Famahaʼö Zura Niʼamoniʼö ba Gangowuloa, ba owulo fefu mbanua niha Keriso ba Balai Mbanua Lowalangi, tenga ba nomo-omo. Ba zi hauga wulu fakhe, oya mbuku, brosur, hegöi artikel Manuriaigö niʼogunaʼö tobali tuho wamahaʼö. Iʼotarai ba wamobörö, lafarou dödö zangondrasi enaʼö faoma labeʼe mbua gera-erara ba gangowuloa. Daʼa zangabakhaiʼö faʼaboto ba dödöda ösi Zura Niʼamoniʼö. Hadia lö aetu-aetu  öfaʼanö ndraʼugö ba gangowuloa andre ba öʼodödögö wameʼe bua gera-eramö?

15. Hadia mbörö wa lafalua Sekolah Pelayanan Teokratis?

¹⁵ Sekolah Pelayanan Teokratis. Itörö tödö Carey Barber, sohalöwö ba Brooklyn, New York, me luo daʼö, ”Ba zi bongi hari Sinaya me 16 mbaŵa si Dua 1942, fefu ndra matua ösi nomo Mbetieli Brooklyn lakaoni enaʼö lafasuraʼö döira, töinia iadaʼa Sekolah Pelayanan Teokratis.” Talifusöda Barber si tobali anggota Mboto Solohe ba gafuriatania, iʼamaedolagö sekola daʼa ”sambua faʼatedou nifalua Yehowa ba nono mbanuania iadaʼa”. Sindruhu fanolo dalifusöda sekola andre ba wondrouʼö faʼatua-tuara ba wamahaʼö hegöi ba wanuriaigö irege me 1943 tezara-zara muʼasogö mbuku side-ide ”Course in Theocratic Ministry” (Kursus Pelayanan Teokratis) ba mbanua niha Keriso ba zi sagörö ulidanö. Imane Watchtower 1 mbaŵa si Önö 1943 wa lafaʼanö  Sekolah Pelayanan Teokratis andre enaʼö ’lafahaʼö ira ono mbanua Lowalangi tobali samaduhuʼö si sökhi ba wangombakha Banua Lowalangi’.​—II Tim. 2:15.

16, 17. Hadia ha asala onekhe fahuhuo wa mufalua Sekolah Pelayanan Teokratis? Tutunö.

¹⁶ Ba wamobörö, ato dalifusöda hulö nifakao börö me lö tola löʼö fahuhuo ira föna zato. Itörö tödö Clayton Woodworth, Jr., nirasoinia me awena fao ia ba zekola andre me 1943, ba no irai lakuru namania awö dalifusöda Rutherford hegöi tanö böʼö ba zi tenga salara me 1918. Imane Woodworth, ”Abua sibai khögu wamaʼema huhuo, hulö zadöni lelagu, oköli mbawagu, ba ligu hulö zoʼao si no tolazi bagi.” Hizaʼi, monönö waʼonekhenia, ba oya halöwö nibeʼe khönia ba wamaʼema huhuo föna zato. Tenga ha asala onekhe ia wamaʼema huhuo ba zekola daʼa. Lafahaʼö ia wa moguna wangide-ngideʼö hegöi fangodaligö Yehowa. Imane, ”Aboto ba dödögu saʼae, wa tenga si  fahuhuo zabölö moguna. Tobali, na ihaogö wamaʼanö si sökhi ba iʼodaligö Yehowa, omuso dödö zangondrasi ba tola lahalö khöra wamahaʼö.”

¹⁷ Me 1959, laʼandrö khö ndra talifusöda ira alawe enaʼö lafasuraʼö döira ba zekola andre. Itörö tödö dalifusöda Edna Bauer gangombakhata ba kebaktian niʼondrasinia. Imane, ”Hawaʼomuso dödö ndra talifusöda ira alawe. Iadaʼa, oya zinangea lafalua.” Ba zi hauga fakhe, ato dalifusöda samasuraʼö töira ba Sekolah Pelayanan Teokratis enaʼö ifahaʼö ira Yehowa. Iadaʼa, lö aetu tatema wamahaʼö simane daʼö ba gangowuloa barö migu.​—Baso Yesaya 54:13.

18, 19. (a) Hewisa ita iadaʼa wanema fanuturu lala ba wamalua halöwö fanuriaigö? (b) Hana wa manunö ita ba gangowuloa? (Faigi kotak ” Moʼanunöisi Sindruhu”.)

¹⁸ Angowuloa ba Wanuriaigö. Iʼotarai me 1919, no lafaʼanö gangowuloa ba wamöföʼö fanuriaigö. Me luo daʼö, lö fefu mbanua niha Keriso laʼondrasi gangowuloa andre, ha si no fao ba wanuriaigö lektur. Sagötö döfi 1923, Angowuloa ba Wanuriaigö lafalua sakali sara waŵa, möi fefu kelas, mazui banua niha Keriso. Me 1928, lafarou mbanua niha Keriso enaʼö lafalua Gangowuloa ba Wanuriaigö ero migu, ba me 1935, ifarou The Watchtower fefu mbanua niha Keriso enaʼö teʼodane-dane Gangowuloa ba Wanuriaigö simane nifaʼanö ba Director (ba gafuriata lafotöi ia Informant, aefa daʼö, Halöwöda khö Lowalangi). Angowuloa daʼa no tobali waö-waö halöwö ba mbanua niha Keriso.

¹⁹ Iadaʼa tatema wanuturu lala si tefaudu ba wamalua halöwö fanuriaigö ba gangowuloa barö migu. (Mat. 10:5-13) Na no sinangea ndraʼugö ötema waö-waö halöwö ba gangowuloa, hadia no öfahaʼö ndraʼugö ba öfalua wanuturu lala nibeʼenia andrö na möiʼö manuriaigö?

20-22. (a) Hana wa tafalua wanörö tödö faʼamate Yesu? (b) Hadia guna me no möiʼö ba wönörö tödö faʼamate Yesu ero röfi?

²⁰ Ifarou nifahaʼönia Yesu ba wamalua fanörö tödö faʼamatenia irugi tohare ia. Simane owasa Fasa, Fanörö Tödö faʼamate Keriso no waö-waö halöwö nifalua ero röfi. (I Kor. 11:23-26) Zuta niha si möi ba gangowuloa ero röfi. Daʼa zamasugi ba dödö zawuyu si lö faröi wa no töi sebua khöra tobali awönia sanema ondröita ba Mbanua Lowalangi. (Rom. 8:17) Ba mbiri-biri böʼö, daʼa zangabakhaiʼö fangosinangegöra hegöi falöfaröira khö Razo Mbanua Lowalangi.​—Yoh. 10:16.

²¹ Aboto ba dödö Russell hegöi ira awönia wa moguna wanörö tödö Bongi Watomesa Zoʼaya ba mufalua ia ha sakali döfi. Imane Watch Tower baŵa si Öfa 1880, ”Ato moroi ba gotaluama zi so ba Pittsburgh no hauga fakhe mafalua . . . ba wanörö tödö owasa Fasa [Fanörö Tödö] ba  wemanga si no amaedola mboto ba do Zoʼaya yaʼita.” Lö ara aefa daʼö, lafalua kebaktian-kebaktian si fendronga ba Wanörö Tödö. Waö-waö si oföna ba halöwö andrö tesura me 1889, me so 225 zangondrasi ba 22 nibayagö idanö.

²² Iadaʼa, lö fendronga wamalua Fanörö Tödö ba kebaktian, hizaʼi takaoni niha si so ba mbanuada enaʼö fao ira khöda ba Balai Mbanua Lowalangi mazui ba nahia si no musewa. Me 2013, töra 19 zuta zangondrasi fanörö tödö faʼamate Yesu. Taʼokhögö döi sebua tenga ha me möi ita ba Wanörö Tödö, tobali tafarou dödö niha böʼö enaʼö fao ira ba mbongi niʼamoniʼö andrö! Hadia terou dödöu ba wogaoni niha ba Wanörö Tödö nifalua ero röfi?

23. Hewisa dödöu ba gangowuloa nifaluada?

²³ Ono mbanua Yehowa si lö faröi lö lamane tödöra noro sebua weʼamöi ba gangowuloa. (Heb. 10:24, 25; I Yoh. 5:3) Duma-dumania, omasi Dawido wameʼe sumange ba nomo Yehowa. (Zin. 27:4) Omasi ia wamalua daʼa si fao awönia tanö böʼö sangomasiʼö Lowalangi. (Zin. 35:18) Ba, angeraigö duma-duma nibeʼe Yesu. Me awuyu-wuyu ia, omasi ia wangiagö omo Namania.​—Luk. 2:41-49.

24. Hadia zinangea tafalua ba ginötö möi ita ba gangowuloa?

²⁴ Na möi ita ba gongowuloa, taʼoromaʼö waʼomasida khö Yehowa hegöi faʼedönada ba wamarou tödö ira talifusöda ba wamati. Taforomaʼö göi wa omasi ita lala waʼauri barö wamatörö Lowalangi börö me ba gangowuloa hegöi ba kebaktian tatema wamahaʼö simane daʼö. Baero daʼö, tebeʼe khöda wamahaʼö ba faʼabölö sinangea taʼokhögö enaʼö lö faröi ita ba halöwö sabölö moguna nifalua Mbanua Lowalangi iadaʼa—mombaliʼö hegöi ba wamahaʼö niha nifahaʼö Razo Yesu Keriso. (Baso Mataiʼo 28:19, 20.) Faʼaterou dödöda weʼamöi ba gangowuloa, daʼö zangoromaʼö wa sindruhu-ndruhu toʼele khöda Mbanua Lowalangi ero samösa. Yaterou dödöda weʼamöi ba gangowuloa!