FAOSATÖ 4
Fokalaisi Nifalua Mbanua Lowalangi—Ifaduhuʼö Duria Somuso Dödö Moloʼö Huku
ME MÖIʼÖ manuriaigö ba nomo-omo, örongo li sirene moroi ba zaröu. Itugu ara ba itugu ebua linia. Me fahuhuo ndraʼugö ba nomo tanö böʼö, ilekeʼö moto wolisi solombase awöu ba wanuriaigö. Möi baero samösa zohalöwö, ifahatö ia khöu ba manofu ia, ”Hadia yaʼami andre zi fahuhuo ba nomo-omo misa sanandrösa ba Zura Niʼamoniʼö? No laʼombakhaʼö khöma!” Öhaogö wanema linia ba öfatunö wa yaʼugö samösa Samaduhuʼö Yehowa. Hadia zalua aefa daʼö?
Sejarah zotatugöi. Hewisa dödö ndra samatörö ba soi si toröi yaʼugö khö ndra Samaduhuʼö Yehowa? Hadia tola tatatugöi agama somasi ita zamösana? Moʼamakhaita daʼa ba niforege ndra talifusöda ba wamati ba zi hauga wulu fakhe, ba ’wamaduhuʼö turia somuso dödö ba ba wangaʼaroʼö yaʼia moloʼö huku’. (Fil. 1:7) Gofu hezo toröi ndraʼugö, tola aro wamatimö na öʼosisiʼö waö-waö waʼamöna ndra Samaduhuʼö Yehowa moloʼö huku. Ba faosatö daʼa, tafareso waö-waö huku sahöli-höli dödöda. Faʼamönada andrö zangoromaʼö wa sindruhu-ndruhu toʼele Mbanua Lowalangi, börö me tenga faʼabölöda samösa wa tola takhamö zimane daʼö!
SO BA DA'A
FAZA 13
Laʼohe Farakarora Ira Sanuriaigö Föna Zanguhuku
Era-era ndra hakim ba gödo zanguhuku fagölö simane era-era Gamalieli, samahaʼö ba Goroisa me föna.
FAZA 14
Lö Faröi ba Wotuhini Famatörö Lowalangi Tenga Tanö Böʼö
’Idanö’ fanandraigö no iʼohe ndra Samaduhuʼö Yehowa börö me lö fao ira ba politik ba itölö ira salua si lö mudöna-döna.
FAZA 15
Laforege Enaʼö Lö Taha-tahara ba Wamosumange Lowalangi
Laforege ono mbanua Lowalangi enaʼö so khöra hak ba woloʼö huku—huku Mbanua Lowalangi.
