1, 2. (a) Hadia dandra wa ono mbanua Lowalangi ndraʼugö? (b) Hadia mbörö wa laforege ira Samaduhuʼö Yehowa enaʼö lö sanaisi yaʼira ba agama?

 HADIA ono mbanua Lowalangi ndraʼugö? Na Samaduhuʼö Yehowa, fanema li, yaʼia! Ba, hadia dandra wa ono mbanuania ndraʼugö? Tenga paspor, mazui sura-sura tanö böʼö. Oroma ia ba lagu wamosumangemö Lowalangi Yehowa. Nifotöi famosumange satulö, tenga ha nifaduhusimö tödö. Hizaʼi, fefu nifaluau—foloʼöu ba goroisa Mbanua Lowalangi. Famosumangeda Lowalangi so lua-luania ba lala waʼaurida, simanö göi ba nösi nomoda hegöi ba nifaluada na göna ita fökhö.

² Hizaʼi, niha ba zi fasui yaʼita lö laʼosinangegö wa ono mbanua Lowalangi ita hegöi goi-goinia. So zamatörö sanaisi famosumangeda Lowalangi mazui lahori moroi ba gulidanö. Itaria, laforege ono mbanua Keriso ba wanöndra fangefa enaʼö auri ira moloʼö oroisa Razo Mesia. Hadia ahöli-höli dödöda? Löʼö. Ono mbanua Yehowa ba götö Zura Niʼamoniʼö asese laforege enaʼö lö taha-tahara ba wamosumange Yehowa.

3. Hadia niforege nono mbanua Lowalangi ba götö Razo Gesitera?

³ Duma-dumania, ba götö Razo Gesitera, laforege ono mbanua Lowalangi enaʼö lö mate ira. Hadia mbörö? Lö sökhi Perdana Menteri Hamano, iwaʼö khö Ahasiwero, razo ndrawa Weresia, enaʼö labunu fefu niha Yehuda si toröi ba daʼö börö ”huku khöra, ba no faehu ba huku niha böʼö fefu”. (Gesi. 3:8, 9, 13) Hadia iröi nono mbanuania Yehowa? Löʼö, ifahowuʼö nifalua Gesitera hegöi Morodokhai me naik banding ira khö razo ndrawa Weresia ba wolumöʼö ono mbanua Lowalangi.—Gesi. 9:20-22.

4. Hadia nifatunöda ba faza daʼa?

⁴ Hewisa ba ginötö andre? Simane niʼilada ba faza si no tataluʼi, itaria so ndra samatörö solawa ira Samaduhuʼö Yehowa. Ba faza daʼa, taʼila hewisa wanaisira famosumangeda Lowalangi. So tölu ngawalö nifatunöda: (1) hak weʼasoda ba zi sambua organisasi hegöi ba wamosumange Lowalangi moloʼö nifilida, (2) falöʼaiwöda ba wamili dalu-dalu si tefaudu ba goi-goi Zura Niʼamoniʼö, ba (3) hak zatua ba  wangebuaʼö iraono moloʼö goi-goi Yehowa. Ero sambua faosatö, taʼila hewisa nono Mbanua Mesia si lö faröi, lö ataʼu ira wangodödögö enaʼö telumöʼö wa ono mbanua Lowalangi sebua böli ira ba hewisa wa tefahowuʼö nifaluara andrö.

5. Hadia guna ba niha Keriso sindruhu me tefaduhuʼö ira moloʼö huku?

⁵ Hadia moguna lafaduhuʼö ita moloʼö huku ndra samatörö ba gulidanö ba wamosumange Yehowa? Löʼö, hizaʼi na lafaduhu ita moloʼö huku—duma-dumania, lö tabini-biniʼö ita weʼamöi ba Balai Mbanua Lowalangi hegöi ba Balai Kebaktian, tola tafazökhi ba tafaʼoheʼö lektur Zura Niʼamoniʼö, ba tola tafaʼema duria somuso dödö ba niha fefu. Ba zi hawaʼoya soi, no tefasuraʼö döi ndra Samaduhuʼö Yehowa ba lö taha-tahara ba wamosumange Lowalangi simane agama böʼö. Hizaʼi, hadia zalua na lö ifaduhuʼö ita famareta moloʼö huku mazui isaisi kebebasan asasida?

6. Hadia wangabu dödö salua khö ndra Samaduhuʼö Yehowa ba Australia me böröta 1940-an?

⁶ Australia. Me böröta 1940-an, moloʼö gubernur jenderal Australia, nifaduhusida tödö möi ”famawukaisi wasuwöta”. Lasaisi halöwöda. Tebai möi ita ba gangowuloa, manuriaigö ba niʼila-ila niha, laduhö Mbetieli, ba lasita Balai-Balai Mbanua Lowalangi. Lö latehe so lektur Zura Niʼamoniʼö. Me no hauga fakhe tabiniʼö wamalua halöwöda, ba gafuriata omuso dödö ndra Samaduhuʼö ba Australia. Me 14 mbaŵa si Önö 1943, itehegö Mahkamah Agung Australia tafalua halöwöda.

7, 8. Ba zi hauga fakhe, hadia niforege ndra talifusöda ba Rusia enaʼö lö taha-tahara ba wamosumange Lowalangi?

⁷ Rusia. Ba zi hauga wulu fakhe, lö latehegö ira Komunis ndra Samaduhuʼö Yehowa, hizaʼi ba gafuriatania tefasuraʼö döira me 1991. Me no aboto Uni Soviet si oföna, tefaduhuʼö ita moloʼö huku ba Federasi Rusia me 1992. Hizaʼi, lö ara aefa daʼö, so niha solohi yaʼita—töra-töra zi fao ba Gereja Ortodoks Rusia börö me tedou waʼatoda. So lima ngawalö niböbögöra khö ndra Samaduhuʼö Yehowa iʼotarai 1995 ba 1998. Lö isöndra zalada jaksa. Niha solohi yaʼita sagabeʼe tandro andrö lafaʼema gugatan perdata me 1998. Ba wamobörö, möna ndra Samaduhuʼö, hizaʼi lö fatema ba dödö niha solohi yaʼita gangetula si no muhalö. Lua-luania, kala ndra Samaduhuʼö me naik banding ira me baŵa si Lima 2001. Ba mbaŵa si Fulunia, lafuli möi ba gödo zanguhuku irege so gangetula me 2004 ba wangeheta badan hukum niʼogunaʼö ndra Samaduhuʼö ba Moskwa ba lasaisi halöwöda.

⁸ Izumaigö so wolohi. (Baso II Timoteo 3:12.) Laʼailasi ba lasuwö ndra Samaduhuʼö Yehowa. Lasita lektur agama;  lö latehe-tehe manö wosewa hegöi ba wamazökhi omo wamosumange Lowalangi. Khalaigö ndra talifusöda ba ngawalö gabula dödö salua andrö! Naik banding ira ba Mahkamah Eropa untuk Hak Asasi Manusia (ECHR) me 2001, ba lanönö wameʼe angombakhata khö Mahkamah andrö me 2004. Me 2010, ihalö gangetulania ECHR. Aboto ba dödö Mahkamah hana wa lasaisi halöwö ndra Samaduhuʼö ba Rusia, yaʼia daʼö lö fangosinangegö agama. Angetulania, lö dane-dane ba wotuhini angetula nihalö pengadilan-pengadilan rendah börö lö hadöi tandra wa fasala ndra Samaduhuʼö. Imane nasa Mahkamah andrö wa teʼasogö wanaisi börö me no muheta hak ndra Samaduhuʼö moloʼö huku. Angetula Mahkamah andrö iʼalawaʼö hak ndra Samaduhuʼö ba wofili agamara. Hewaʼae so ösa ndra samatörö si lö mamalua angetula ECHR, lö faʼataʼu ba nono mbanua Lowalangi ba soi daʼö börö me no möna ira.

9-11. Hewisa wasöndrata nono mbanua Yehowa ba Yunani enaʼö lö taha-tahara ba wamosumange Lowalangi, ba hadia mbuania?

⁹ Yunani. Me 1983, isewa sambua nahia Titos Manoussakis ba Heraklion, Kreta, enaʼö tola owulo ndra Samaduhuʼö ba daʼö ba wamosumange Yehowa. (Heb. 10:24, 25) Hizaʼi, fatimba khö pastor Ortodoks ba ifaʼema khö ndra samatörö wa lö fao dödönia na laʼogunaʼö nahia daʼö ira Samaduhuʼö Yehowa ba wamosumange Lowalangi. Hadia mbörö? Ha börö me faböʼö zi faduhu dödö Zamaduhuʼö moroi ba Gereja Ortodoks! Lasidang Titos Manoussakis ba datölu ndra Samaduhuʼö tanö böʼö. Ladandro ba laʼetuʼö hukumara dua waŵa ba gurunga. Börö me ono Mbanua Lowalangi si lö faröi ndra Samaduhuʼö, lamane tödöra wa angetula gödo zanguhuku andrö ifawukaisi wamosumangera Lowalangi; börö daʼö laʼohe farakaro daʼa ba gödo zanguhuku ba soi daʼö irege ba gafuriatania laʼohe ba ECHR.

¹⁰ Afuriata me 1996, iʼailasi niha solawa famosumange satulö ECHR. Imane Mahkamah wa ”farahu ndra Samaduhuʼö Yehowa ba ’agama nifaduhuʼö’ simane nifakhoi ba undang-undang Yunani” ba fefu gangetula pengadilan-pengadilan rendah ”iʼanemai so lua-luania ba kebebasan beragama niha nidaʼawaini”. Ihalö gangetula Mahkamah wa tenga sinangea ndra samatörö ba Yunani ”zangetuʼö hadia sah ma löʼö nifaduhusi tödö niha zamösana mazui nahia niʼogunaʼöra ba wamalua agamara”. Lafuli laheta hukuma ndra Samaduhuʼö, ba latehegö ba niha wofili agamara zamösana!

¹¹ Hadia teʼasiwai gabula dödö ba Yunani me no möna ira? Löʼö. Me 2012, ba Kassandreia, Yunani, so farakaro simane daʼö, ba awena awai arakhagö 12 fakhe fasuwö ba huku. Ba farakaro daʼa, uskup Ortodoks zondröniaʼö  folohi. Dewan Negara, lembaga pengadilan tertinggi ba Yunani, ifemöna nono mbanua Lowalangi. Ba gangetula daʼö, so huku Yunani samaduhuʼö wa tola lafili samösa agamara niha, ba itimba wanandrawa si lö aetu-aetu sangumaʼö wa lö nifaduhuʼö agama ndra Samaduhuʼö Yehowa. Imane gödo zanguhuku, ”Lö si tobini wamahaʼö ndra Samaduhuʼö Yehowa, börö daʼö, no tefaduhuʼö agamara.” Omuso dödö mbanua niha Keriso si lö atoto ba Kassandreia börö me tola lafosumange Yehowa ba Balai Mbanua Lowalangi niʼokhögöra.

12, 13. Ba Prancis, hewisa nudu ba wangalui busi-busi dödö hegöi ba wamuyuʼö huku, ba hadia mbuania?

¹² Prancis. So ösa niha solohi ono mbanua Lowalangi sangogunaʼö tandrawa sangalui busi-busi dödö, samuyuʼö huku. (Baso Zinunö 94:20.) Duma-dumania, me talu ndröfi 1990-an, ira sohalöwö ba pajak Prancis, labörögö lafareso gefe Association Les Témoins de Jéhovah (ATJ), daʼa sambua badan hukum niʼogunaʼö ndra Samaduhuʼö ba Prancis. Iʼombakhaʼö menteri anggaran hadia gohitö dödöra wamalua daʼa: ”Famareso daʼa tola idudugö moloʼö huku mazui ifalua proses pidana . . . , ifawukaisi wamöföʼö angowuloa mazui ifaso enaʼö mubato halöwö ba mbanuada.” Hewaʼae lö lasöndra zala, iwaʼö sohalöwö ba pajak enaʼö mubuʼa pajak si tola mamakiko halöwö ATJ. Na aʼozu dandrawa daʼa, lö hadöi saʼae si tola lafalua ira talifusöda, laduhö gödo ndraha ba lafamawa fefu gödonia ba wamuʼa pajak sebua sibai. Afökhö sibai nifaluara, hizaʼi lö awuwu nono mbanua Lowalangi. Lö fao dödö ndra Samaduhuʼö ba niböbögö khöra, irege ba gafuriatania laʼohe farakaro daʼa föna ECHR me 2005.

¹³ Iʼombakhaʼö gangetulania Mahkamah me 30 mbaŵa si Önö 2011. Imane Mahkamah, me no mutehe ba niha lafili samösa agamara, tebai itatugöi Negara hadia sah ma löʼö nifaduhusi tödö niha ba agamania zamösana mazui lala ba wamalua yaʼia, awena tola na moʼamakhaita ba zi lö sökhi. Imane nasa Mahkamah andrö, ”Pajak . . . ahori gölö soguna ba zi sambua angowuloa irege fefu zi faböbö ba daʼö, lö laʼila lafalua ngawalö zoʼamakhaita ba agamara.” Ifaduhuʼö Mahkamah andrö wa möna ndra Samaduhuʼö Yehowa! Omuso sibai dödö nono mbanua Yehowa me lafangawuli pajak si no lahalö ba ATJ hegöi ono gefenia ira samatörö ba Prancis, ba ifaretakö ira Mahkamah enaʼö lö lafoʼömö gödo ndraha saʼae.

14. Hadia zi tola öfalua enaʼö lö sanaisi ba wamosumange Lowalangi?

¹⁴ Simane Esitera ba Morodokhai me föna, laforege ono mbanua Yehowa ba ginötö andre enaʼö lö lataha ira ba wamosumange Yehowa moloʼö lala si no ifakhoi. (Gesi. 4:13-16) Hadia tola fao ndraʼugö? Tatu manö. Tola öʼohe ba  wangandrö ndra talifusöda nihuku ba zi lö atulö. Fangandrö daʼö ebua kuasonia ba wanolo ira talifusöda si göna abula dödö hegöi famakao. (Baso Yakobo 5:16.) Hadia ifondro-ndrongo Yehowa wangandrö daʼö? Faʼamönada ba gödo zanguhuku zangoromaʼö wa ifondro-ndrongo wangandröda!—Heb. 13:18, 19.

15. Hadia zinangea latörö tödöra ono mbanua Lowalangi sanandrösa ba wangogunaʼö do?

¹⁵ Simane niʼilada ba Faza 11, latema wanuturu lala ono Mbanua Lowalangi ba Zura Niʼamoniʼö enaʼö lö fasala ira wangogunaʼö do me no toʼölö lafalua niha ba ginötö andre. (I Moz. 9:5, 6; III Moz. 17:11; baso Halöwö Zinenge 15:28, 29.) Hewaʼae lö tatema transfusi darah, hizaʼi omasi ita tatema dalu-dalu si tefaudu, simanö göi ba niha niʼomasiʼöda, sagötö lö fatimba ba goroisa Lowalangi. Gödo zanguhuku sabölö alawa ba ngawalö soi, no lafaduhuʼö wa fefu niha tola laʼetuʼö samösa ba wofili mazui ba wanimbagö dalu-dalu moloʼö tödöra side-ide hegöi agamara. Hizaʼi, ba zi hauga soi, so gabula dödö nono mbanua Lowalangi sanandrösa ba daʼa. Datafaigi duma-dumania.

16, 17. Hadia zalua si tokea talifusöda ira alawe ba Jepang, ba hewisa wangandrönia no tefondro-ndrongo?

¹⁶ Jepang. Samösa woʼomo ira alawe sotöi Misae Takeda ba Jepang, döfinia 63 fakhe. Börö me ono Mbanua Lowalangi si lö faröi ia, iʼombakhaʼö khö doto wa lö omasi ia labeʼe ndro ba dalu-dalunia. Hizaʼi, hauga waŵa aefa daʼö tokea sibai ia me iʼila wa no mubeʼe transfusi darah khönia sagötö operasi. Börö me no lasawö zi no itatugöi talifusöda Takeda ba lalimo ia, iʼangadugö ba gödo huku ndra doto hegöi ruma saki me baŵa si Önö 1993. Ira alawe si sökhi amuata andre no ihaogö-haogö na muhede börö me aro wamatinia. Lö ataʼu ia wamaduhuʼö föna niha sato ba gödo zanguhuku, muzizio ia sambua za waʼara hewaʼae tebai ia. Afuriata möi ia ba gödo zanguhuku ha sara waŵa fatua lö mate ia. Ahöli-höli dödöda waʼabarani ba famatinia andrö! Imane talifusöda Takeda wa lö ibato wangandrö khö Yehowa enaʼö ifahowuʼö nifaluania. Faduhu dödönia wa tefondro-ndrongo wangandrönia. Hadia atulö daʼö?

¹⁷ Tölu fakhe me no mate dalifusöda Takeda, iʼombakhaʼö gangetulania Mahkamah Agung Jepang, möna ia—ifaduhuʼö wa fasala wameʼe transfusi darah andrö börö me lö tefaudu ba zomasi dödönia. Angetula me 29 mbaŵa si Dua 2000 imane ”na ihalö gangetula niha” sanandrösa ba daʼa ”moguna muʼosinangegö börö me angetulania samösa”. Börö me lö atage dalifusöda Takeda wamorege enaʼö tola tafili dalu-dalu si tefaudu ba dödöda side-ide si no ifahaʼö Sura Niʼamoniʼö, tola lasöndra dalu-dalu ira  Samaduhuʼö ba Jepang iadaʼa, ba lö lafaso ira wanemaʼö transfusi darah.

18-20. (a) Hewisa pengadilan banding ba Argentina wotuhini hak zi samösa niha enaʼö lö labeʼe khönia transfusi darah simane si no tesura ba kartu keterangan medis? (b) Sanandrösa ba wangogunaʼö do si fasala, hewisa wangoromaʼöda wa taʼoʼö wamatörö Keriso?

¹⁸ Argentina. Hewisa wamaʼanö ono Mbanua Lowalangi na lahalö gangetula ira doto ba zi lö laʼila? Tola taʼohe-ohe dokumen hukum si tola fahuhuo salahida, simane nifalua Pablo Albarracini. Me baŵa si Lima 2012, no irai larabu ba lafana ia mato hauga kali. Laʼohe ia ba ruma saki ba zi lö iʼila-ila irege tebai itutunö gangetulania sanandrösa ba transfusi darah. Hizaʼi, no iʼohe kartu keterangan medis si no muteka töra öfa fakhe ba zi lalö. Hewaʼae arakhagö mate ia ba so ösa doto sangumaʼö wa moguna latransfusi ia enaʼö anau nosonia, laʼosinangegö zomasi ia. Hizaʼi, ama Pablo si tenga Samaduhuʼö Yehowa, iʼandrö ba gödo zanguhuku enaʼö lö laʼoʼö zomasi nononia.

¹⁹ Iʼanemai naik banding pengacara salahi woʼomo Pablo. Barö zi hauga za, pengadilan banding lö iʼoʼozui fareta pengadilan rendah ba ihalö gangetula wa moguna muʼosinangegö hadia zomasi zofökhö simane nisura ba kartu medis daʼö. Naik banding nama Pablo ba Mahkamah Agung Argentina. Hizaʼi, lö isöndra Mahkamah Agung dani ”ba woʼaombösi tödö wa [angetula falömanemaʼö transfusi darah ba kartu medis Pablo] mufazökhi börö me so waʼaboto ba dödö, ohitö dödönia samösa, ba lö samaso yaʼia”. Imane Mahkamah, ”Fefu niha si lö mofökhö ba satua fangera-ngera, tola ihenaigö wameʼe fangombakha hadia itema dalu-dalu daʼö mazui löʼö . . . Angombakhata daʼa moguna iʼoʼö doto samareso yaʼia.”

²⁰ No döhö saʼae dalifusöda Albarracini. Omuso dödönia hegöi foʼomonia ira alawe börö me no lahenaigö khöra kartu medis. Hewaʼae no ide-ide nifaluara andrö, hizaʼi moguna iforomaʼö wa so khönia woloʼö barö wamatörö Keriso ba Mbanua Lowalangi. Hadia no öfalua daʼö hegöi ösi nomou?

21-24. (a) Hewisa Mahkamah Agung Kanada ba gafuriatania ibeʼe gangetula sahöli-höli dödö sanandrösa ba ndraono si lö ibönö döfi hegöi fangogunaʼö do? (b) Hewisa zalua andre möi fangabeʼe wamati nono mbanua Yehowa si bohou ebua?

²¹ Kanada. Si toʼölönia, ifaduhuʼö gödo zanguhuku wa sinangea lafili ira satua dalu-dalu si sökhi ba ndraonora. Itaria, ihalö gangetula gödo zanguhuku wa iraono si lö ibönö döfi si no atua fangera-ngera, moguna muʼosinangegö gangetula nihalöra. Simane daʼö zalua khö April Cadoreth. Me 14 fakhe ndröfinia, laʼohe ia ba ruma saki börö perdarahan sabölö-bölö. Hauga waŵa fatua lö mofökhö ia, no ihenaigö ifoʼösi Kartu Keterangan Medis, sangombakha wa tebai labeʼe khönia transfusi darah hewaʼae arakhagö mate ia. Doto samareso yaʼia lö iʼosinangegö gangetula April ba iforege wameʼe fareta ba gödo zanguhuku enaʼö labeʼe ndro. Lafaso wameʼe khönia tölu  katonga sel darah merah. Ba gafuriata, ifaomagö daʼa April famaso ba wamalua fohorö.

²² Möi April hegöi satuania ba gödo zanguhuku. Me no numalö zi dua fakhe, laʼohe farakaro daʼa föna Mahkamah Agung Kanada. Hewaʼae kala April ba wodaʼawaini huku, ibuʼa gefe farakaronia Mahkamah ba ihalö gangetula wa möna ia hegöi iraono tanö böʼö si lö ibönö döfi, somasi mangai angetula ba wofili dalu-dalu mbotora samösa. Imane Mahkamah, ”Sanandrösa ba dalu-dalu, iraono si bohou ebua si lö ikhamö 16 fakhe, moguna latehegö khöra ba wanutunö hadia zomasi ira börö daʼa zangoromaʼö wa mosatua ira ba wangera-ngerara.”

²³ Moguna sibai farakaro daʼa börö me ifaduhuʼö Mahkamah Agung hak konstitusional ndraono si lö ikhamö döfi, si no mufotöi atua wangera-ngera. Me mböröta, tola itatugöi gödo zanguhuku ba Kanada hadia dalu-dalu nibeʼe ba ndraono si lö ikhamö 16 fakhe, asala ba zi sökhi. Hizaʼi, börö gangetula daʼö, tebai itatugöi gödo zanguhuku  saʼae gofu hadia dalu-dalu si fatimba ba zomasi dödö ndraono si lö ikhamö 16 fakhe. Siföföna, moguna labeʼe ginötö ba ndraono andrö enaʼö tola laforomaʼö wa no atua wangera-ngerara ba wangai angetula.

²⁴ Hadia zaya-zaya gölö zi no laforege andrö ba zi tölu fakhe? Moloʼö April, ”Löʼö!” Iadaʼa, imane perintis biasa si lö mofökhö andrö saʼae, ”Omuso dödögu me uʼila wa so maʼifu zi no ufalua ba wamolakhömi töi Lowalangi hegöi ba wangoromaʼö wa sofaya Zatana.” Si no alua khö April andre zangoromaʼö wa lö faʼataʼu ba ndraono si bohou ebua ba wotatugöi angetulara, laforomaʼö wa ono Mbanua Lowalangi si lö faröi ira.—Mat. 21:16.

25, 26. Hadia manö zi tola alua na fabali zi no mangowalu?

²⁵ Ibeʼe Yehowa noro dödö zatua ba wangebuaʼö iraonora moloʼö goi-goinia. (V Moz. 6:6-8; Ef. 6:4) Abua halöwö daʼö, ba tola manö abölö abua nasa na no fabali zatua. Tola manö faböʼö lala wangebuaʼöra iraono. Duma-dumania, satua si no tobali Samaduhuʼö omasi ira wangebuaʼö iraono moloʼö goi-goi niha Keriso, hizaʼi tola manö lö fao dödö zatua si tenga Samaduhuʼö. Tatu manö, moguna aboto ba dödö zatua si no tobali Samaduhuʼö wa lö tebulö gamakhaita zatua ba ndraono, hewaʼae no fabali zatuara.

²⁶ Te iʼandrö satua si tenga Samaduhuʼö ba gödo zanguhuku ba wangebuaʼö ononia samösa mazui fefu, enaʼö ifili ama mazui ina hewisa wangebuaʼö yaʼira moloʼö agamania. So zangumaʼö wa mosikho na muʼebuaʼö ndraono tobali Samaduhuʼö Yehowa. Tola manö lamane wa lö laʼowasaini iraono mbaŵa waʼatumbura, ngaluo sebua ba, na so zi göna ira ba zi lö mudöna-döna, tebai mubeʼe transfusi darah si tola ”mangorifi yaʼira”. Taʼandrö saohagölö me oya gödo zanguhuku soʼangeraigö hadia zabölö sökhi ba ndraono moroi na ilau rörönia ba wamadöni hadia atulö agama zatua andrö mazui löʼö. Datafaigi duma-dumania.

27, 28. Hewisa Pengadilan Tinggi Ohio me so wangadu, möi famaʼala ndraono na Samaduhuʼö Yehowa zangebuaʼö yaʼira?

²⁷ Amerika Serikat. Me 1992, so farakaro nifareso Pengadilan Tinggi Ohio. So samösa nama si tenga Samaduhuʼö sangumaʼö wa mosikho na laʼebuaʼö nononia ono matua si bohou ebua tobali Samaduhuʼö Yehowa. Fao dödö pengadilan rendah ba itehegö khönia ba wangebuaʼö ononia. Inania, Jennifer Pater, latehegö khönia wamaigi ononia, hizaʼi tebai ”ifahaʼö mazui ifatunö hadia nifaduhusi tödö Zamaduhuʼö Yehowa gofu hewisa ia”. Ebua geluaha fareta pengadilan rendah andre, tola manö tawaʼö tebai fahuhuo dalifusöda Pater khö nononia, Bobby, sanandrösa ba Zura Niʼamoniʼö mazui goi-goinia! Hadia tola ökhalaigö dödö  Jennifer? Afatö sibai dödönia, hizaʼi ihöna khönia waʼebolo dödö ba ibaloi hawara ginötö nitehegö Yehowa. Itörö tödönia, ”Lö irai faröi khögu Yehowa.” Naik banding pengacarania ba Pengadilan Tinggi Ohio, ba itolo ira organisasi Yehowa.

²⁸ Lö fao dödö gödo zanguhuku ba gangetula nihalö pengadilan rendah, imane wa ”sinangea zatua na ifahaʼö ndraononia ba iʼombakhaʼö khöra gamuata si sökhi hegöi agamara”. Imane pengadilan, awena tebai na famahaʼö moroi khö Zamaduhuʼö Yehowa andrö möi famakiko mboto hegöi fangera-ngera ndraono. Tebai itaha hak zatua gödo zanguhuku ha börö agama. Lö hadöi tandra nisöndra gödo zanguhuku wa famahaʼö agama Zamaduhuʼö Yehowa möi famakiko mboto hegöi fangera-ngera ndraono.

29-31. Taya hak dalifusöda ira alawe ba Denmark ba wangebuaʼö ononia alawe. Hadia mbörö ba hadia gangetula Mahkamah Agung Denmark ba zalua andre?

²⁹ Denmark. Simanö göi zalua khö Anita Hansen. Ira matua si no irai tobali foʼomonia, iʼandrö ba gödo zanguhuku enaʼö yaʼia zangebuaʼö ononia Amanda si fitu fakhe. Hewaʼae no itehegö me döfi 2000 pengadilan distrik khö dalifusöda Hansen ba wangebuaʼö ononia, naik banding nama Amanda ba pengadilan tinggi, si lö mamaduhuʼö angetula pengadilan distrik ba itehegö khönia wangebuaʼö ononia. Imane pengadilan tinggi, börö me faböʼö wangera-ngera  zatua Amanda ba goi-goi sanandrösa ba waʼauri moloʼö nifaduhusira tödö ba agama, amania zinangea mangebuaʼö yaʼia. Börö daʼö, taya hak dalifusöda Hansen ba wangebuaʼö ononia börö me Samaduhuʼö Yehowa ia!

³⁰ Abu sibai dödö dalifusöda Hansen ba zalua andre irege lö iʼila hadia niʼangandröinia. Imane, ”Hizaʼi, terara dödögu ba niwaʼö Roma 8:26 ba 27. Urasoi wa aboto ba dödö Yehowa nösi dödögu. Ifaigi-faigi ndraʼo ba lö iröido.”—Baso Zinunö 32:8; Yesaya 41:10.

³¹ Naik banding dalifusöda Hansen ba Mahkamah Agung Denmark. Imane Mahkamah me iʼombakhaʼö gangetulania, ”Fanofu sanandrösa haniha zinangea mangebuaʼö iraono, muʼetuʼö moloʼö famareso satulö ba sabölö sökhi ba ndraono.” Aefa daʼö, imane Mahkamah andrö wa angetula haniha zinangea mangebuaʼö iraono teʼodane-dane khö zatua ba wangasiwai abula dödö, tenga moloʼö ”famahaʼö ba faʼaro dödö” Zamaduhuʼö Yehowa. Omuso sibai dödö dalifusöda Hansen me ifaduhuʼö Mahkamah wa sinangea na yaʼia zangebuaʼö Amanda, ba mangawuli khönia hak ba wangebuaʼö ononia.

32. Hewisa Mahkamah Eropa untuk Hak Asasi Manusia wolumöʼö satua Samaduhuʼö moroi ba diskriminasi?

³² Ngawalö soi ba Eropa. Ba zi hauga farakaro, amadöniwa huku sanandrösa ba wangebuaʼö iraono muʼohe ba pengadilan-pengadilan tertinggi nasional. Ihaogö ifatimbaisi daʼa Mahkamah Eropa untuk Hak Asasi Manusia (ECHR). Ba zi dombua farakaro, ifaduhuʼö ECHR wa faböʼö dödö pengadilan-pengadilan rendah tingkat nasional khö zatua si no tobali Samaduhuʼö hegöi si löʼö, ha börö me faböʼö agamara. Ifotöi daʼö ECHR diskriminasi, ba ihalö gangetula wa ”tebai so wamaehusi ha börö agama”. Omuso dödö zi samösa ina si no tobali Samaduhuʼö ba gangetula ECHR andrö ba imane, ”Afökhö sibai na lafobahulu ndraʼo wamaʼala iraono, hewaʼae no ubeʼe khöra zabölö sökhi, uʼebuaʼö ira moloʼö lala niha Keriso.”

33. Hewisa zatua Samaduhuʼö wamalua goi-goi ba Filifi 4:5?

³³ Tatu manö, ebolo dödö ndra satua Samaduhuʼö hewaʼae so wanaisi moroi ba huku ba hak wananögö goi-goi Zura Niʼamoniʼö ba dödö ndraonora. (Baso Filipi 4:5.) Börö me laʼandrö saohagölö hak si no tebeʼe khöra ba wamahaʼö iraono moloʼö lala Lowalangi, lafaduhuʼö göi wa moʼömö nama mazui ina ba wondrorogö iraono hewaʼae tenga Samaduhuʼö ia, na omasi ia. Hawaʼebua noro dödö zatua Samaduhuʼö ba wamahaʼö iraono?

34. Hewisa zatua ba mbanua niha Keriso iadaʼa, tola lahalö khöra wamahaʼö moroi ba duma-duma niha Yehuda ba götö Nehemia?

³⁴ So duma-duma si sökhi ba götö Nehemia. Laʼodödögö niha Yehuda ba wangehaogö hegöi ba wangaʼazökhi mangawuli göli Yeruzalema. Aboto ba dödöra, na lafalua daʼö, tola telumöʼö ira hegöi ösi nomora ba nudu ba zi fasui yaʼira.  Börö daʼö, iʼoʼou ira Nehemia, ”Milau fasöndra, ba wangorifi talifusömi ba iraonomi, matua ba alawe, ba foʼomomi; ba omomi.” (Neh. 4:14) Ba niha Yehuda, tenga zaya-zaya gölö wasöndratara andrö. Simane daʼö göi ba ginötö andre, laʼodödögö ira satua Samaduhuʼö ba wangebuaʼö iraonora ba zindruhu. Aboto ba dödöra wa lö aetu so wondrönisi si lö baga ba ndraonora moroi ba zekola hegöi ba zi fahatö khöra. Tola manö tedönisi dödö ndraono ba media si so ba nomo. Yaʼami satua, böi olifu ami wa tenga zaya-zaya gölö zi no miforege ba wasöndrata, ba wangaʼasogö nahia si lö famakiko ba ndraonomi enaʼö tedou ira ba wamati.

35, 36. Hadia manö mbuania ba gafuriata khö ndra Samaduhuʼö Yehowa me no laʼodödögö wolohi hak hukum, ba hadia gohitö dödöu?

³⁵ Ifahowuʼö halöwö niʼodödögö organisasinia Yehowa ba ginötö andre enaʼö lö lasaisi ira ba wamosumange yaʼia. Me lafalua daʼö ono mbanua Lowalangi, asese labeʼe wamaduhuʼö si sökhi ba gödo zanguhuku hegöi föna niha sato. (Rom. 1:8) Bua tanö böʼö ba waʼamönara ba huku yaʼia daʼö no laʼaʼaroʼö hak-hak sipil niha si tenga Samaduhuʼö. Hizaʼi, yaʼita ono mbanua Lowalangi tenga reformis sosial; lö göi taʼosatulö ita. Siföföna, ira Samaduhuʼö Yehowa laforege enaʼö so khöra hak ba gödo zanghuku enaʼö tefaduhuʼö ba tedou wamosumange satulö.—Baso Filifi 1:7.

³⁶ Böi taʼaohasi ba dödö wamahaʼö sanandrösa ba wamati nihalöda ba niha si no mamorege enaʼö lö taha-tahada ba wamosumange Yehowa! Böi faröi ita göi, yafaduhu dödöda wa lö aetu ituhini halöwöda Yehowa ba ibeʼe waʼabölö ba wamalua ohitö dödönia.—Yes. 54:17.