ME MÖIʼÖ ba Balai Mbanua Lowalangi, izumaigö ambö öʼila nahia daʼö. Me mböröta, omuso dödöu ba domosa daʼa. Lö olifu ndraʼugö fefu zi sökhi salua me faoʼö ba wamazökhi yaʼia hauga fakhe si lalö. Hizaʼi, abölö omuso dödöu iadaʼa börö me no lafaböʼöni gasa-gasa Balai Mbanua Lowalangi tobali nahia wameʼe fanolo. Me no aefa nangi sabölö-bölö barö daʼa sangaʼasogö molö ba sanudugö banua si toröi yaʼugö, iʼanemai lafaʼanö ira Panitia Ndraha ba wameʼe fanolo simane ö, nukha, idanö, ba tanö böʼönia. No lahaogö wamaʼanö fanolo. Oi zara tohare ndra talifusöda, lahalö hadia zoguna khöra ba sasesenia meʼe ira börö waʼomuso dödö.

Imane Yesu wa tandra nifahaʼönia yaʼia daʼö faʼomasi ba gotalua nono mbanuania zamösana. (Yoh 13:34, 35) Ba duho daʼa, tafatunö hewisa ndra Samaduhuʼö Yehowa wangoromaʼö faʼomasi niha Keriso ba halöwö fangotomosi ba fangodödögö wameʼe fanolo ba niha. Faʼomasi simane daʼö sambua tandra sebua wa no so ita barö wamatörö Yesu.