1, 2. (a) Hadia halöwö somasi lafalua ono mbanua Yehowa? (b) Hadia niʼosinangegö Yehowa?

 OMASI nono mbanua Yehowa wamalua halöwö fangotomosi si möi famolakhömi döinia. Duma-dumania, iraono Gizaraʼeli, terou sibai dödöra ba wamazökhi tabernakel ba oböwö ira wohenaigö soguna ba daʼö.​—II Moz. 35:30-35; 36:1, 4-7.

² Ba wamaigi Yehowa, famosumange döinia sabölö iʼosinangegö, tenga soguna ba wangotomosi mazui tomosa nifazökhi. (Mat. 23:16, 17) Nibeʼeda khö Yehowa sabölö iʼosinangegö ba si möi famosumange döinia yaʼia daʼö sumange si fao faʼaoha gölö hegöi faʼowölö-ölö genoninia. (II Moz. 35:21; Mrk. 12:41-44; I Tim. 6:17-19) Daʼö zabölö moguna. Hadia mbörö? Tenga sagötö faʼara so domosa. Duma-dumania, lö hadöi saʼae tabernakel hegöi osalinia. Tola adudu domosa-domosa si no mufasindro, hizaʼi lö olifu Yehowa waʼoböwö hegöi famorege niforomaʼö ndra enoninia si lö faröi ba wotuhini famazökhi tomosa.​—Baso I Korindro 15:58; Heberaiʼo 6:10.

3. Hadia nifatunöda ba faza daʼa?

³ No laʼodödögö ira enoni Yehowa ba ginötö andre wamazökhi nahia-nahia gangowuloa. Ba, ahöli-höli dödöda zi no takhamö börö wanuturu lala nibeʼe Razoda Yesu Keriso! Oroma wa ifahowuʼö nifaluada Yehowa. (Zin. 127:1) Ba faza daʼa, tafaigi ösa halöwö fangotomosi si no mufalua ba hewisa wa tefolakhömi döi Yehowa ba daʼö. Tafondro-ndrongo göi ösa niwaʼö ndra talifusöda si no fao ba wangotomosi andrö.

4. (a) Hana wa oya muʼoguna nahia gangowuloa? (b) Hana wa oya gödo ndraha niʼosambuaʼö? (Faigi kotak ” Famazökhi Gödo Ndraha—Lafaudugö Moloʼö Niʼogunaʼö”.)

⁴ Simane si no tatutunö ba Faza 16, omasi Yehowa na owulo ita ba wamosumange yaʼia. (Heb. 10:25) Tenga ha möi fangaro wamati gangowuloa, tobali monönö göi waʼaterou dödöda ba halöwö fanuriaigö. Ba ngaluo safuria andre, ifangaösö halöwö daʼa Yehowa. Buania, ngaotu ribu niha zi faböbö ba organisasinia ero röfi. (Yes. 60:22)  Börö me itugu ato nono Mbanua Lowalangi, moguna so nahia sabölö ebua ba wamazökhi lektur Zura Niʼamoniʼö. Moguna göi oya nahia wamosumange Lowalangi.

5. Hana wa tefaudu wamotöi Balai Mbanua Lowalangi? (Faigi kotak ” Gereja Haga si Bohou”.)

⁵ Ba wamobörö sejarah nono mbanua Yehowa ba ginötö daʼa, aboto ba dödö Nono Zekola Zura Niʼamoniʼö wa moguna so nahia waʼowuloda samösa. Sambua moroi ba gotalua nahia wamosumange Lowalangi si oföna mufazökhi, yaʼia daʼö te ba Virginia Barat, AS, me 1890. Ono mbanua Yehowa me 1930-an, lafasindro mazui lafuli lafazökhi hauga ngawua balai, hizaʼi lö nibeʼera töi. Me 1935, möi dalifusöda Rutherford ba Hawaii, no mufazökhi balai ba daʼö sahatö ba gödo ndraha si bohou. Me lasofu hadia döi domosa daʼö, imane talifusöda Rutherford, ”Hadia fao dödömi na tafotöi ia ’Balai Mbanua Lowalangi’, börö me daʼö nifaluada, taturiaigö duria somuso dödö sanandrösa ba Mbanua Lowalangi?” (Mat. 24:14) Töi si tefaudu  andre, labeʼe ia tenga ha ba balai andrö, labeʼe göi ba zi hauga ngawua nahia gangowuloa niʼogunaʼö nono mbanua Yehowa ba zi sagörö ulidanö.

6, 7. Hadia lua-luania wangotomosi salio?

⁶ Me 1970-an, monönö waʼoya Balai Mbanua Lowalangi sinangea mufazökhi. Börö daʼö, ira talifusöda ba Amerika Serikat laʼalui lala sabölö sökhi enaʼö ha ba zi hauga hari, no musindro balai si sökhi ba si tefaudu. Me 1983, so mato 200 Balai Mbanua Lowalangi nifazökhi ba Amerika Serikat hegöi Kanada. Enaʼö tola awai halöwö daʼö, lafasindro panitia pembangunan regional ira talifusöda. Tefaudu sibai nifaluara andre irege me 1986, ifaduhuʼö panitia daʼa Boto Solohe. Me 1987, so 60 Panitia Pembangunan Regional (RBC) ba Amerika Serikat. a Me 1992, lafasindro göi RBC ba Afrika Selatan, Argentina, Australia, Jepang, Jerman, Meksiko, Prancis, ba Spanyol. Tatu manö sinangea na tatuhini ndra talifusöda sohalöwö ba wamazökhi Balai Mbanua Lowalangi hegöi Balai Kebaktian, börö me halöwöra andrö no halöwö niʼamoniʼö.

⁷ Sambua famaduhuʼö daʼa ba niha sato me alio wamazökhi Balai-Balai Mbanua Lowalangi. Duma-dumania, so duho si oföna ba koran Spanyol, ”Famati Zamawuʼa Hili”. Me itutunö wamazökhi Balai Mbanua Lowalangi ba kota Martos, manofu koran daʼö, ”Hewisa wa tola so ba gulidanö safönu fakhögusa andre zohalöwö si lö lagazi moroi  ba mbanua böʼö ba [Spanyol], möi ira ba Martos ba wamazökhi tomosa salio famazökhi moroi ba danö böʼö, soʼahonoa, ba si toföfö?” Ibeʼe wanema li artikel andrö, isura wehede samösa zohalöwö Samaduhuʼö si lö mugazi, ”Fefu daʼa tola makhamö börö me ono mbanua nifahaʼö Yehowa ndraʼaga.”

8. Me 1999, hadia program si bohou si fao dödö Mboto Solohe, ba hadia mbörö?

⁸ Lö ara tö me angohorita abad si-20, ato niha ba soi soʼamböta si möi ba organisasi Yehowa. Banua niha Keriso ba mbanua daʼö, laʼodödögö wamazökhi nahia gangowuloa. Hizaʼi ba zi hawaʼoya soi, laʼoʼaya ira ba manahö dödö niha khöra börö me si toʼölö manö Balai Mbanua Lowalangi moroi ba nahia tanö böʼö. Hizaʼi, ibörögö me 1999, fao dödö Mboto Solohe ba program fangalioʼö famazökhi Balai Mbanua Lowalangi ba soi sawena tedou. Soi si lö moʼamböta labeʼe dolo-tolo enaʼö ”fagölö-gölö”. (Baso II Korindro 8:13-15.) Ira talifusöda moroi ba soi böʼö laʼaohasi gölörö ba wotuhini halöwö daʼa.

9. Hadia halöwö sabua ba wamaigida, tobali hadia mbuania?

⁹ Ba wamobörö, hulö abua sibai halöwö daʼa. So laporan me 2001, töra 18.300 Balai Mbanua Lowalangi sinangea mufazökhi ba zi 88 soi sawena tedou. Lö si tebai na fao khöda geheha Lowalangi hegöi Razoda Yesu Keriso. (Mat. 19:26) Barö zi 15 fakhe, iʼotarai 1999 irugi 2013, no lafazökhi ono mbanua Lowalangi 26.849 Balai  Mbanua Lowalangi börö program daʼa. b Lö ibato wamahowuʼö halöwö fanuriaigö Yehowa, irege me 2013, moguna mufazökhi mato 6.500 Balai Mbanua Lowalangi ba soi andrö, ba iadaʼa moguna mufazökhi ngaotu ero röfi.

10-12. Hewisa wa tefolakhömi döi Yehowa ba wamazökhi Balai Mbanua Lowalangi?

¹⁰ Hewisa wa tefolakhömi döi Yehowa ba wamazökhi Balai Mbanua Lowalangi? So gangombakhata moroi ba gödo ndraha Zimbabwe. Imane, ”Sara waŵa me no mufazökhi Balai Mbanua Lowalangi, tedou waʼato zangondrasi, dua winaeta.” Ba ngawalö soi, awena omasi niha fao khöda na no so nahia waʼowulo si tefaudu. Lö ara me no tefazökhi Balai Mbanua Lowalangi, izumaigö ato zangondrasi irege ambö naha ba moguna muʼasogö Balai si bohou. Hizaʼi, tenga ha tomosania zondrönisi tödö niha khö Yehowa. Faʼomasi soroi ba dödö niforomaʼö ndra talifusöda sohalöwö ba wamazökhi balai andrö, daʼö zamaböʼöni ba wamaigi niha organisasi Yehowa. Datafaigi duma-dumania.

¹¹ Indonesia. Samösa ndra matua samaigi-maigi famazökhi sambua Balai Mbanua Lowalangi, no irongo wa lö lagazi fefu zohalöwö. Imane, ”Ahöli-höli dödögu ami andre! Omuso-muso dödömi wohalöwö ba miʼodödögö sibai hewaʼae lö lagazi ami. Hulö lö hadöi agama böʼö simane yaʼami daʼa!”

¹² Ukraina. So samösa ndra alawe, ero maʼökhö itörö föna Balai Mbanua Lowalangi. Iʼila wa ira Samaduhuʼö Yehowa zamazökhi daʼa ba nifazökhira Balai Mbanua Lowalangi. Imane, ”Moroi khö nakhigu ono alawe si no tobali Samaduhuʼö urongo ndra Samaduhuʼö Yehowa. Me no ufaigi halöwöra, omasido na fao ndraʼo ösi nomo wamati khöra. Oroma ba daʼa wa so waʼomasi.” Itema wamahaʼö ba Zura Niʼamoniʼö ira alawe andre ba tebayagö ia idanö me 2010.

13, 14. (a) Hadia zinangea öhalö famahaʼö ba zi sambua ngambatö samaigi-maigi famazökhi Balai Mbanua Lowalangi? (b) Hadia zinangea öfalua ba nahia gangowuloa enaʼö möi famolakhömi döi Yehowa?

¹³ Argentina. So sambua fongambatö zi fahuhuo khö dalifusöda samaigi-maigi halöwö famazökhi Balai Mbanua Lowalangi. Imane foʼomonia ira matua, ”No ara mafaigi-faigi fefu nifaluami ba wamazökhi tomosa daʼa, ba . . . omasiga mafahaʼö ndraʼaga khö Lowalangi ba nahia daʼa.” Aefa daʼö manofu ia, ”Hadia zinangea mafalua enaʼö tola möiga ba gangowuloa?” Latema wamahaʼö moroi ba Zura Niʼamoniʼö, asala tola fao fefu nösi nomora. Omuso dödö ndra talifusöda wanemaʼö yaʼira.

¹⁴ Te lö si fao ndraʼugö ba halöwö si sökhi andrö ba wamazökhi Balai Mbanua Lowalangi, nahia gangowuloa si möiʼö. Hizaʼi, oya nasa zi tola öfalua enaʼö nahia wamosumangemö khö Yehowa möi famolakhömi döinia.  Duma-dumania, tola terou dödöu ba wogaoni niha nifahaʼöu ba Zura Niʼamoniʼö, niha si no irai falukha khöu, mazui niha böʼö enaʼö möi ira ba Balai Mbanua Lowalangi. Tola göi faoʼö ba wangehao hegöi ba wondrorogö nahia wamosumange Lowalangi. Na no öhaogö öʼera-era, tola öbeʼe dolo-tolo si no aoha gölö fameʼe ba wotuhini fondrorogö Balai Mbanua Lowalangi mazui famazökhi nahia-nahia famosumange Lowalangi ba soi böʼö. (Baso I Korindro 16:2.) Fefu halöwö daʼa möi famosumange döi Yehowa.

15-17. (a) Haniha zabölö monorogö tödö halöwö fangotomosi? (b) Hadia wamahaʼö si tola öhalö moroi ba mbua gera-era ndra talifusöda sohalöwö ba wamazökhi tomosa ba zi sagörö ulidanö?

¹⁵ Soyania, ira talifusöda si toröi ba mbanua andrö zamazökhi Balai Mbanua Lowalangi, Balai Kebaktian, hegöi fasilitas gödo ndraha. Hizaʼi, asese so ndra talifusöda sanolo yaʼira moroi ba soi böʼö, sonekhe ba wamazökhi tomosa. So zohalöwö si no mamöföʼö faʼaurira enaʼö tola mohalöwö ira ba wamazökhi tomosa ba zi sagörö ulidanö mato hauga migu. Tanö böʼö, omasi ira mohalöwö ba zi hauga fakhe, findra ira moroi ba domosa si sambua numalö ba domosa tanö böʼö.

¹⁶ So gabula dödö ba wamazökhi tomosa ba zi sagörö ulidanö ba so göi waʼohahau dödö. Duma-dumania, Timo hegöi Lina, no möi ira ba Amerika Selatan, Asia, hegöi ba Eropa wamazökhi Balai Mbanua Lowalangi, Balai Kebaktian, hegöi fasilitas gödo ndraha. Imane Timo, ”Ero-ero dua fakhe, labeʼe khögu halöwö si bohou barö zi 30 fakhe andre.” Imane Lina, si no mangowalu khö Timo 25 fakhe si lalö, ”No faoga wohalöwö Timo ba zi fulu soi si faböʼö. Oya  waʼabölö niʼogunaʼöma hegöi inötö ba wamaudugö faʼaurima ba gö, iklim, li, nahia wanuriaigö, hegöi awö-awöma si bohou.” c Hadia zaya-zaya gölö fefu niʼodödögöra? Imane Lina, ”Fefu gabula dödöma andrö iʼasogö howu-howu sebua. Marasoi waʼomasi ba fahuwusa niha Keriso ba wanemaʼö tome hegöi faʼomasi Yehowa khöma. Maʼila göi waʼalua zi no ifabuʼu Yesu khö ndra nifahaʼönia nisura ba Mareko 10:29, 30. Masöndra otu winaeta dalifusöma ira alawe, ira matua, hegöi inama ba wamati.” Imane Timo, ”Ohahau sibai dödöma börö me maʼogunaʼö waʼatua-tuama ba wotuhini ohitö dödö solakhömi khö Razoda, yaʼia daʼö ba wonönö haratonia.”

¹⁷ Darren hegöi Sarah, sanolo ba wamazökhi tomosa ba Afrika, Amerika Selatan, Amerika Tengah, Asia, Eropa, hegöi Pasifik Selatan, larasoi wa abölö oya nitemara moroi ba zi no labeʼe. Hewaʼae oya zi tobali abula dödöra, imane Darren, ”No sambua töi sebua wefao wohalöwö khö ndra talifusöda moroi ba ngawalö soi. No uʼila samösa wa faʼomasi khö Yehowa hulö amaedola mböbö samasui ulidanö, iböbö ita fefu.” Imane Sarah, ”Ufahaʼö ndraʼo moroi khö ndra talifusöda börö me faböʼö-böʼö zi toʼölö lafalua! Lua-luania, omasido ubeʼe zabölö sökhi börö me uʼila zi no lafalua ira talifusöda ba wangai halöwö khö Yehowa.”

18. Hewisa waʼalua nifaʼeleʼö ba zura Zinunö 110:1-3?

¹⁸ No ifaʼeleʼö Razo Dawido, hewaʼae göna folohi nono Mbanua Lowalangi, ’lalulu waʼaurira moroi siʼaikö ba dödö’ ba wangai halöwö ba Mbanua Lowalangi. (Baso Zinunö 110:1-3.) Alua zi no mufaʼeleʼö andrö ba niha fefu, si fao ba wotuhini Banua Lowalangi. (I Kor. 3:9) Faʼoya gödo ndraha si no mufazökhi, ngaotu Balai Kebaktian, ba ngafulu ribu Balai Mbanua Lowalangi ba zi sagörö ulidanö tobali tandra wa toʼele ba no mamatörö Mbanua Lowalangi. No sambua töi sebua khöda ba wangai halöwö khö Razoda Yesu Keriso si tobali famolakhömi töi Yehowa, me no sinangea itema daʼö!