1. Hadia gangilata niʼila Hezekieli sahöli dödöda?

 HEWISA na örasoi zalua khö zinenge sotöi Hezekieli mato 25 abad si lalö? Khalaigö: Möi ndraʼugö ba gosali sebua ba si baga-baga. So malaʼika sabölö solohe yaʼugö ba wamaigi nahia sahöli-höli dödö andre! Möiʼö ba nora si fitu bosi ba weʼamöi bakha, ötörö fazambua moroi ba zi tölu mbawa göli. Faʼalawa mbawa göli daʼö töra 30 meter. Tanö bakha öʼila zi hulö mbateʼe side-ide. So gambara famaedo nohi si baga-baga ba gehomonia.—Hez. 40:1-4, 10, 14, 16, 22; 41:20.

2. (a) Hadia zi no amaedola gosali ba gangilata andrö? (Faigi nisura ba gahe zura.) (b) Hadia wamahaʼö khöda ba ngawalö zi so ba lala bakha ba gosali?

² Daʼö gangilata sanandrösa ba gosali wamati. No izara-zara Hezekieli wanutunö famaʼeleʼö andrö irege afönu faza 40 irugi 48. Osali daʼa amaedola nifakhoi Yehowa ba wamosumange satulö. Ero sambua faosatö moʼeluaha ba wamosumangeda Lowalangi ba ngaluo safuria andre. a Hadia zi no amaedola mbawa göli salawa? Daʼa zamasugi ba dödöda wa moguna laʼoʼö goi-goi salawa ba sadölö moroi khö Lowalangi motöi niha si möi mamosumange Yehowa. Gambara wamaedo nohi göi so geluahania, börö me itaria muʼogunaʼö ia ba Zura Niʼamoniʼö ba wamoʼeluaha faʼadölö dödö. (Zin. 92:13) Hewisa zi hulö mbateʼe side-ide? Atulö, lö latehe möi niha si lö mangosinangegö goi-goi Lowalangi ba wamosumange solakhömi andrö, sameʼe faʼauri.—Hez. 44:9.

3. Hana wa lö aetu-aetu mubohouni niha soloʼö khö Keriso?

³ Hewisa wa alua gangilata Hezekieli daʼö? Simane nitutunö ba Faza 2, iʼogunaʼö Keriso Yehowa ba wamohouni ono mbanuania iʼotarai 1914 irugi 1919. Hadia ha ndrege daʼö wamohouni andrö? Löʼö! Barö zi otu fakhe si lalö, lö ibato Keriso ba woʼalawaʼö goi-goi gamuata niʼamoniʼö moroi khö Yehowa. Ba, moguna ba niha soloʼö khönia wamohouni si lö aetu-aetu. Hadia mbörö? Börö me no iʼowuloi niha soloʼö khönia Keriso moroi ba gulidanö si lö sökhi andre, ba lö irai ibato Satana ba wondröni yaʼira mangawuli ba getuna wamalua fohorö. (Baso II Fetero 2:20-22.) So tölu ngawalö hezo manö moguna mubohouni niha  Keriso sindruhu. Si oföna, datatutunö ngawalö wamohouni amuata, aefa daʼö si no muhenaigö ba wondrorogö banua niha Keriso enaʼö lö taʼunö, ba safuria sanandrösa ba wongambatö.

4, 5. Hadia dandrawa si no ara iʼogunaʼö Satana, ba hadia lua-luania?

⁴ Omasi nono mbanua Yehowa wamalua amuata si sökhi ba satulö. Börö daʼö, latemaʼö wanuturu lala nibeʼe khöra. Datafaigi duma-dumania.

⁵ Amuata wohorö. Yehowa zangaʼasogö faʼorudu ba gotalua zi no mongambatö enaʼö lö taʼunö ba tobali faʼohahau dödö. Omasi Zatana wamuyuʼö buala si sökhi andre, iʼasogö ngawalö zi raʼiö ba wondrönisi tödö nono mbanua Yehowa enaʼö taya wahuwusara khö Lowalangi. Mofozu dandrawa Zatana daʼa simane salua ba götö Mbileamo, ba itugu ifadanö nasa ba ngaluo safuria andre.—IV Moz. 25:1-3, 9; Fam. 2:14.

6. Hadia wahölusa nifazökhi ba Watch Tower, hewisa wangogunaʼö yaʼia, ba hadia mbörö wa lö laʼogunaʼö saʼae hölu andrö ba gafuriatania? (Faigi nisura ba gahe zura.)

⁶ Ba wolawa tandrawa Zatana andre, so hölu si fao fawuʼusa li nifazökhi Watch Tower 15 mbaŵa si Önö 1908. Imane, ”Gofu hawaʼara ba hezo so manö, lö tebulö gamuatagu khö ndra matua mazui ira alawe, he ba naha si tobini hegöi ba nahia sato niha.” b Hewaʼae lö lafaso wamalua daʼö, ato zanemaʼö ba laʼandrö enaʼö tesura döira ba Zionʼs Watch Tower. Hauga fakhe aefa daʼö, hewaʼae moguna hölu andrö ba niha sato; ba gafuriatania lö laʼogunaʼö saʼae börö me ha fangeheta gesuanö. Hizaʼi, lö tebulö laʼalawaʼö goi-goinia.

7. Me 1935, hadia gabula dödö nifatunö ba The Watchtower, ba hadia goi-goi si no muʼabeʼeʼö mangawuli?

⁷ Itugu tedou dandrawa Zatana. Itutunö The Watchtower 1 mbaŵa si Tölu 1935 gabula dödö si tedou ba gotalua nono mbanua Lowalangi. So ösa zangumaʼö, na fao ira ba wanuriaigö, lö moguna saʼae laʼoʼö goi-goi Yehowa ba waʼaurira zamösana. Iʼabeʼeʼö The Watchtower wangumaʼö, ”Moguna mutöngöni, tenga ha fao ba wanuriaigö niʼandrö khöda. Samaduhuʼö Yehowa andrö no salahinia, ba lö tola lö moguna lasalahini Yehowa hegöi Banuania.” Aefa daʼö, ibeʼe mene-mene artikel daʼö sanandrösa ba waʼorudu enaʼö ’laʼangelamaisi wohorö andrö’.—I Kor. 6:18.

8. Hadia mbörö wa lö aetu-aetu iʼombakhaʼö buku Manuriaigö geluaha ngawua wehede ba li Yunani sanandrösa ba gamuata wohorö?

⁸ Hauga wulu fakhe barö-barö daʼa, asese iʼabakhaiʼö Manuriaigö geluaha ngawua wehede niʼogunaʼö ba Mbuku Niʼamoniʼö Yunani sanandrösa ba wohorö, yaʼia daʼö por·neiʹa. Tenga ha faʼorudu geluahania. Hizaʼi, farahu ba daʼö gamuata wohorö, yaʼia daʼö fefu gamuata sogoro ita ba nomo-omo wohorö. Börö daʼö, tola telumöʼö niha soloʼö khö Keriso moroi ba gamuata wohorö si tobali waba ba niha sato ba ginötö andre.—Baso Efeso 4:17-19.

9, 10. (a) Hadia gamuata si lö tefaudu nitutunö ba The Watchtower 1935? (b) Hadia wamahaʼö si tefaudu moroi ba Zura Niʼamoniʼö sanandrösa ba wamadu tuo?

 ⁹ Fangogunaʼö tuo si fasala. Itutunö The Watchtower 1 mbaŵa si Tölu 1935 gamuata si lö tefaudu tanö böʼö: ”No muʼila wa so zamadu [tuo] me möi ira manuriaigö ba me lafalua halöwö tanö böʼö ba organisasi. Hadia niwaʼö Zura Niʼamoniʼö sanandrösa ba wamadu tuo? Hadia sinangea mamadu tuo na so lua-luania ba halöwö nifalua zi samösa niha ba organisasi Zoʼaya?”

¹⁰ So mbua gera-era satulö ba Daromali Lowalangi sanandrösa ba wamadu tuo. Lö niʼelifi Zura Niʼamoniʼö wamadu agu hegöi tuo tanö böʼönia, asala muʼönaigö. Hizaʼi, iʼelifi wemabu-mabu. (Zin. 104:14, 15; I Kor. 6:9, 10) Sanandrösa ba wamadu tuo na mangai halöwö niʼamoniʼö, no ara mufangelama nono mbanua Lowalangi ba zalua khö ndraono Gaʼaroni. Ibunu ira Lowalangi me labeʼe galitö si tenga niwaʼönia khöra, yawa ba naha wanunu sumange. Ba zalua khöra andrö oroma hadia mbörö wa lafalua zi lö tefaudu, börö me lö ara aefa daʼö ibeʼe goroisania Lowalangi enaʼö fefu ndra ere tebai labadu duo na mangai halöwö niʼamoniʼö. (III Moz. 10:1, 2, 8-11) Daʼa dane-dane ba niha soloʼö khö Keriso ba ginötö andre ba woʼangenanöi enaʼö lö labadu duo na lafalua halöwö niʼamoniʼö.

11. Hadia mbörö wa tefahowuʼö nono mbanua Lowalangi ba waʼaboto ba dödö sanandrösa ba alkoholisme?

¹¹ Barö zi hauga wulu fakhe andre, no tefahowuʼö niha soloʼö khö Keriso, itugu abakha waʼaboto ba dödöra sanandrösa ba alkoholisme yaʼia daʼö faʼasandru wamadu tuo. Börö gö wamati ba ginötö si tefaudu andre, ato zi no tetolo ba wanaha tödöra ba wemabu ba laʼila lafatörö waʼaurira saʼae. Ato göi nitolo enaʼö laʼaröuʼö ira ba duo. Gofu haniha manö lö latehegö na so zangailasi faʼaurira, ösi nomora, mendrua manö halöwö si sökhi ba wameʼe famosumange sohau-hau khö Yehowa, ha börö me fasala ba wangogunaʼö tuo.

12. Hewisa wamaigi niha soloʼö khö Keriso sanandrösa ba wangogunaʼö bago fatua lö tebörögö ngaluo safuria?

¹² Fangogunaʼö bago. No ibörögö lö faduhu dödö nono mbanua Keriso ba wangogunaʼö bago fatua lö tebörögö ngaluo safuria. Hauga fakhe si lalö, itörö tödö dalifusöda salawa döfi sotöi Charles Capen me awena falukha ia khö Charles Taze Russell ba gangohorita abad si-19. Döfi Capen me luo daʼö 13 fakhe, fao ira datölu dalifusönia, no laʼagö nora Bible House ba Allegheny, Pennsylvania. Me fazuzu khöra Russell, manofu ia, ”No moroko ami yaʼö? Uʼago-ago hua roko.” Lafaduhuʼö khönia wa lö soroko ira. Maʼifu lö aombö dödöra ba gera-era Russell sanandrösa ba daʼö. Ba Watch Tower 1 mbaŵa si Walu 1895, ibeʼe mbua gera-erania Russell sanandrösa ba II Korindro 7:1, imane, ”Moloʼö yaʼo, tebai lafosumange Lowalangi motöi niha Keriso, mazui lö hadöi gunania khöda zamösana, na  muʼogunaʼö mbago gofu hewisa ia. . . . Lö taʼila takhalaigö na aböu simbo mbago Zoʼaya mazui na ibeʼe zi taʼunö ba mbawania.”

13. Hadia wamohouni amuata si so me döfi 1973?

¹³ Me 1935, The Watchtower ifotöi mbago, ”oʼo si taʼunö”. Imane wa gofu haniha zi manga mazui sanisiö bago, tebai tobali ösi nomo Mbetieli mazui salahi organisasi Lowalangi ba weʼamöi merintis ba halöwö famasui. Me 1973, so wamohouni amuata. Itutunö The Watchtower 1 mbaŵa si Önö wa tebai lasöndra wetaro si sökhi Samaduhuʼö Yehowa ba mbanua niha Keriso na lö laböhöli gamuata si möi famunu, fanaʼunöisi, ba si lö faʼomasi. Iʼotarai daʼö, laʼefasi ba gangowuloa niha si lö mamöhöli mangogunaʼö bago ba zi fasala. c Daʼa sambua lala nifalua Keriso ba wamohouni niha soloʼö khönia.

14. Hadia goi-goi Lowalangi sanandrösa ba ndro, ba hewisa transfusi darah no toʼölö laʼogunaʼö niha sato?

¹⁴ Fangogunaʼö do si fasala. Me götö Noakhi, iwaʼö Lowalangi wa tebai muʼa ndro. Ifuli iʼabakhaiʼö zui wangumaʼö ba Goroisa nibeʼenia ba ndraono Gizaraʼeli, ba ibeʼe wanuturu lala ba mbanua niha Keriso enaʼö ’böi lababaya . . . ndro’. (Hal. 15:20, 29; I Moz. 9:4; III Moz. 7:26) Lö ahöli-höli dödöda ba ginötö daʼa no isöndra lala Satana enaʼö lasawö goi-goi Lowalangi niha sato. Latandraigö transfusi darah ira doto me abad si-19, ba itugu laʼogunaʼö manö me no lasöndra golongan darah. Me 1937, laʼowuloi ndro ba laʼiröʼö ba bank darah, ba tedou manö wangogunaʼö yaʼia me alua Wasuwöta Gulidanö II. Lö ara, toʼölö saʼae wangogunaʼö transfusi ba zi sagörö ulidanö.

15, 16. (a) Hadia gangetula ndra Samaduhuʼö Yehowa sanandrösa ba transfusi darah? (b) Hewisa niha soloʼö khö Keriso lasöndra wanolo sanandrösa ba transfusi hegöi fameʼe dalu-dalu si lö mangogunaʼö do, ba hadia mbuania?

¹⁵ Iʼotarai 1944, iʼoromaʼö The Watchtower wa fangogunaʼö transfusi darah sindruhunia no lala böʼö ba wemanga do. Ba ndröfi aefa daʼö, ifuli laʼaroʼö ba laʼabakhaiʼö hadia niwaʼö Zura Niʼamoniʼö. Me 1951, no mufazökhi wanofu-nofu hegöi fanema li ba wanolo ono mbanua Lowalangi wahuhuosa khö ndra medis. Ba zi sagörö ulidanö, lö ataʼu niha soloʼö khö Keriso ba wangai angetula hewaʼae asese laʼoʼaya ira, lafaʼudusi, ba lafakao. Hizaʼi, lö ibato Keriso wondröniaʼö organisasinia ba wameʼe fanolo. No mufazökhi ngawalö brosur hegöi artikel si no muhaogö mufaʼanö.

¹⁶ Me 1979, möi ndra satua sokubaloi ba zi hawaʼoya ruma saki ba wanolo ira doto enaʼö aboto ba dödöra gangetula nihalöda, dane-dane moroi ba Zura Niʼamoniʼö hegöi fangali ndro si no tehenaigö. Me 1980, mufahaʼö ndra satua sokubaloi ba zi 39 kota ba Amerika Serikat. Ba gafuriatania, fao dödö Mboto Solohe na tefasindro Panitia Penghubung Rumah Sakit ba zi sagörö ulidanö. Hadia so waʼatedou iʼotarai daʼö? Iadaʼa, falulu fohalöwö zi  hauga wulu ribu sohalöwö ba medis—ira doto, sohalöwö ba wangoperasi, hegöi doto anestesi—khö ndra Samaduhuʼö Yehowa nirorogö ba ruma saki, laʼosinangegö nifilida na lö taʼogunaʼö ndro. Itugu oya ruma saki si lö mangogunaʼö do, so zangumaʼö wa daʼö goi-goi salawa sanandrösa ba wondrorogö niha sofökhö. Tatu ahöli-höli dödöda na taʼangerönusi lala niʼogunaʼö Yesu ba wolumöʼö niha soloʼö khönia moroi khö Zatana, sanaʼunöisi yaʼira!—Baso Efeso 5:25-27.

17. Hewisa wangandröda saohagölö khö Keriso me no ibohouni niha soloʼö khönia?

¹⁷ Moguna tasofu khöda, ’Hadia taʼandrö saohagölö lala nifalua Keriso ba wamohouni niha soloʼö khönia, tafahaʼö ita ba wangodaligö goi-goi salawa khö Yehowa?’ Na yaʼia, böi olifuʼö wa lö ibato Satana wamandrö-ndröu yaʼugö moroi khö Yehowa ba Yesu, ifakiko wangosinangegömö amuata si sökhi. Enaʼö tola ölawa ia, no ihenaigö organisasi Yehowa wameʼe famangelama hegöi famasugi ba dödö sanandrösa ba gamuata niha gulidanö. Böi mörö ita ba wamati, tafondro-ndrongo ba taʼoʼö mene-mene andrö.—Gamd. 19:20.

18. Hadia wamasugi ba dödö niʼilada moroi ba gangilata Hezekieli sanandrösa ba niha sangodödögö wolawa goi-goi Lowalangi?

¹⁸ Fangehao si dua sanandrösa ba gamuata yaʼia daʼö lala nifalua enaʼö lö taʼunö mbanua niha Keriso. Alimagö sibai, so ösa zi faröi khö Yehowa hewaʼae no latema goi-goi sanandrösa ba gamuata hegöi folulu faʼaurira khö Lowalangi. Ba gafuriata, tebulö dödöra ba laʼodödögö wanawö goi-goi andrö. Hadia nifalua ba niha simane daʼö? So wanuturu lala khöda ba gangilata Hezekieli sanandrösa ba gosali wamati nitutunö ba wamobörö faza daʼa. Törö tödöu mbawa gölinia salawa. Lalumöʼö gosali andrö ira sanaro, enaʼö lö möi ”niha böʼö si lö muboto tödö”. (Hez. 44:9) Daʼa zamasugi ba dödöda wa famosumange satulö andrö no töi si sökhi nibeʼe, ha ba niha sangodödögö soʼaurifagö goi-goi Yehowa sanandrösa ba gamuata sohau-hau. Simanö göi ba ginötö daʼa, lö tebeʼe ba niha fefu döi si sökhi wefao khö ndra talifusöda niha Keriso ba wamosumange Lowalangi.

19, 20. (a) Hewisa Keriso ba wanolo niha soloʼö khönia enaʼö tebohouni lala ba wangai angetula na so zamalua horö? (b) Tötöi tölu mbörö wa laʼefasi ba gangowuloa niha si lö mamalalini era-erara.

¹⁹ Me 1892, imane Watch Tower wa ”no sinangea halöwöda ba wangefasi (niha Keriso) sangodödögö mazui sangositengagö wa ibeʼe waʼaurinia Keriso tobali höli [böli si fagölö] ba niha fefu”. (Baso II Yohane 10.) Me 1904, ifaduhuʼö The New Creation wa niha si fatandro wamalua amuata si fasala tola ifakiko mbanua niha Keriso. Me luo daʼö, fao mbanua niha Keriso ba ”pengadilan gereja” wamareso amuata si lö sökhi si no mufalua. Hizaʼi, lö asese alua daʼa. Me 1944, iforomaʼö The Watchtower wa sangai angetula na so zimane daʼö ha ira talifusöda ira matua. Me 1952, mufaʼanö ba The Watchtower lala wangai angetula na so gamuata si lö sökhi ba mbanua niha Keriso. Itutunö dani wa muʼefasi niha si lö mamalalini era-erara—enaʼö lö taʼunö mbanua niha Keriso.

²⁰ Hauga wulu fakhe aefa daʼö, itolo niha soloʼö khönia Keriso ba wangombakha hegöi ba wamohouni lala sinangea lafalua na so gamuata si lö sökhi. Lafahaʼö ndra satua sokubaloi wangai angetula moloʼö goi-goi Yehowa, yaʼia daʼö lö ebua dödö zambuana ba wangoromaʼö faʼatulö hegöi faʼahakhö dödö. Iadaʼa, taʼila wa si löʼö-löʼönia so tölu mbörö wa muʼefasi niha si lö mamalalini era-era ba mbanua niha Keriso: (1) enaʼö lö teʼoʼaya döi Yehowa, (2) enaʼö lö taʼunö mbanua niha Keriso, ba (3) si tobali famarou dödö ba niha si no fasala enaʼö ifalalini gera-erania na tola.

21. Hana wa tobali howu-howu ba nono mbanua Lowalangi na laʼefasi niha samalua horö ba gangowuloa?

²¹ Hadia öʼila wa tobali howu-howu ba niha soloʼö khö Keriso iadaʼa na muʼefasi zamalua horö? Ba ndraono Gizaraʼeli, na so zamalua horö, lö sökhi lua-luania ba soi daʼö.  Itaria abölö ato ira moroi ba niha sangomasiʼö Yehowa ba sangodödögö satulö. Lua-luania, asese teʼoʼaya döi Yehowa ba tekiko wahuwusara. (Yer. 7:23-28) Iadaʼa, tenga ha sambua soi niʼameʼegö tödö Yehowa, hizaʼi [ngawawa] gofu haniha moroi ba ngawalö soi, samosumange ba soloʼö goi-goinia. Börö me laheta ba gotaluada niha samalua horö sabeʼe tandro, lö latehegö khöra tobali ’fangöna’ Zatana ba wamakiko faʼasökhi mbanua niha Keriso. Landregegö lua-lua nifaluara. Börö me si sambua ngawawa ita, faduhu dödöda waʼomasi Yehowa. Böi olifuʼö, no ifabuʼu Yehowa, ”Fefu wangöna, nibago ba wamakiko yaʼugö, ba si lö boto.” (Yes. 54:17) Hadia lö faröi ita ba wotuhini ira satua sokubaloi, sangai halöwö sabua ba wangai angetula na so zamalua horö?

22, 23. Hana wa taʼandrö saohagölö khö ndra talifusöda niha Keriso me böröta abad si-20, tobali hana wa moguna fagölö-gölö dödöda sanandrösa ba wongambatö?

²² Fangehao si tölu soguna ba niha soloʼö khö Keriso moʼamakhaita ba wangowalu hegöi faʼauri ba wongambatö. Hadia no mubohouni waʼaboto ba dödöda barö daʼa sanandrösa ba wongambatö? Noa. Duma-dumania, me tabaso waö-waö waʼauri nono mbanua Lowalangi me böröta abad si-20, tatu toröi-röi ba dödöda waʼaohagölö niforomaʼöra. Omuso dödöda me laʼofönaiʼö wangai halöwö niʼamoniʼö ba waʼaurira. Hizaʼi, moguna göi taʼila wa fagölö-gölö dödöda ba wamalua yaʼia. Hadia mbörö?

²³ Asese so ndra talifusöda ira matua sanemaʼö halöwö mazui si möi ba mbanua niha Keriso misa. Lua-luania, fandrö-ndröu ira ba nösi nomora ba zi hauga waŵa. Itaria, labeʼe wamarou dödö faböi mangowalu töra moroi ba niwaʼö Zura Niʼamoniʼö, ba lö oya wanuturu lala ba wangaʼaroʼö fongambatö niha Keriso. Hadia alua daʼa ba niha soloʼö khö Keriso ba ginötö andre? Löʼö!

24. Hewisa Keriso wanolo ono mbanuania si lö faröi enaʼö fagölö-gölö dödöra sanandrösa ba wangowalu hegöi ba wongambatö?

²⁴ Iadaʼa, tebai muʼosiwawöi noro dödö ba nomo ha börö wolohi ngawalö halöwö teokratis. (Baso I Timoteo 5:8.) Aefa daʼö, ifaigi niha soloʼö khönia Keriso enaʼö lö aetu latema mene-mene si sökhi ba Zura Niʼamoniʼö, fagölö-gölö dödöra sanandrösa ba wangowalu hegöi faʼauri ba wongambatö. (Ef. 3:14, 15) Me 1978, mufazökhi mbuku Membina Keluarga Bahagia. Mato 18 fakhe aefa daʼö, mufazökhi mbuku Rahasia Kebahagiaan Keluarga. Baero daʼö, oya artikel nifaʼanö ba mbuku Manuriaigö si möi fanolo ba zi no mongambatö enaʼö lafalua goi-goi Zura Niʼamoniʼö ba waʼaurira.

25-27. Me itugu numalö ginötö, hewisa wonorogö tödö wameʼe gö wamati ba ndraono moroi ba ngawalö ndröfi?

²⁵ Hewisa göi zi bohou ebua? Ba zi hauga fakhe, muʼameʼegö tödö zoguna khöra. No ara ihenaigö organisasi  Yehowa fefu zi sökhi ba ndraono, gofu hawaʼalawa ndröfira. Hizaʼi, si no amaedola ungo nidanö side-ide, iadaʼa tobali ungo nidanö sebua. Duma-dumania, so ”Juvenile Bible Study” ba The Golden Age iʼotarai 1919 irugi 1921. Aefa daʼö, lafazökhi The Golden Age ABC me 1920 hegöi buku Children me 1941. Me 1970-an, teʼasogö mbuku Mendengar kepada Guru yang Agung, Masa Remaja—Manfaatkanlah Sebaik-baiknya, hegöi Buku Cerita Alkitab. Me 1982, ibörögö so seri ”Kaum Remaja Bertanya”, ba Sadarlah! irege tefazökhi mbuku Pertanyaan Kaum Muda—Jawaban yang Praktis me 1989.

²⁶ Iadaʼa, so dombua jilid mbuku Kaum Muda, ba lö aetu mufaʼanö seri daʼa ba situs Web khöda, jw.org. So göi khöda mbuku Belajarlah dari sang Guru Agung. Oya nifaʼanö ba situs Web khöda soguna ba zi bohou ebua, farahu ba daʼö kartu tokoh Zura Niʼamoniʼö, famareso Zura Niʼamoniʼö ba ndraono sebua hegöi sawuyu-wuyu, dahö-dahö,  video, ba komik Zura Niʼamoniʼö. So göi wamahaʼö ba Zura Niʼamoniʼö ba ndraono sambö tölu fakhe. Ba daʼa taʼila wa lö si tebulö dödö Keriso khö zi bohou ebua, iʼotarai me italagui ndraono side-ide me döfi siföföna. (Mrk. 10:13-16) Omasi ia na laʼomasiʼö ba labönökhi gö wamati ba zi bohou ebua.

²⁷ Omasi Yesu na telumöʼö ndraono moroi ba deʼala. Börö me itugu lö sökhi gamuata niha gulidanö andre, asese manö alua wangailasi iraono ba wohorö. Börö daʼö, no mufazökhi mbuku si tefaudu ba si lö fabinisa tödö si möi fanolo zatua enaʼö lalumöʼö ndraonora moroi ba gamuata sogoro ita. d

28. (a) Simane angilata Hezekieli sanandrösa ba gosali, hadia nifaluada na omasi tabeʼe wamosumange sohau-hau khö Lowalangi? (b) Hadia gangetula nihalömö?

²⁸ Ahöli-höli dödöda me ibohouni niha soloʼö khönia Keriso, ifahaʼö ira enaʼö so wangosinangegö, lafaudugö waʼaurira, ba latema mbuania na laʼoʼö goi-goi salawa moroi khö Yehowa sanandrösa ba gamuata! Khalaigö göi gosali ba gangilata Hezekieli. Törö tödöu mbawa gölinia salawa. Atulö sa, tenga sindruhu-ndruhu so gosali daʼö, ha osali ba wamati ia. Hizaʼi, hadia toʼele ia khöda? Taʼondrasi, tenga ha möi ba Balai Mbanua Lowalangi mazui mamokai Sura Niʼamoniʼö hegöi manoko bawandruhö nomo na möi manuriaigö. Fefu daʼö niʼila hörö. Tola göi ifalua daʼö niha samini tödö hewaʼae tenga sindruhu-ndruhu möi ia ba gosali Yehowa. Hizaʼi, na tafalua daʼö, na taʼoʼaurifagö goi-goi salawa moroi khö Yehowa, ba atulö dödöda ba wamosumange yaʼia, no möi ita ba nahia niʼamoniʼö andrö—wameʼe famosumange satulö khö Lowalangi Yehowa! Dataʼosinangegö halöwö si sökhi andre. Taʼodödögö wangoromaʼö wa no niʼamoniʼö Yehowa, taʼalawaʼö goi-goinia satulö!