1-3. Hadia nifalua Yesu me iʼila no taʼunö gosali?

 IʼOSINANGEGÖ Yesu gosali ba Yeruzalema börö me iʼila hadia geluaha wa tefasindro gosali daʼö. No ara tobali nahia wamosumange Lowalangi gosali andrö ba gulidanö. Hizaʼi, moguna muʼehao ba mubohouni wamosumange andrö—famosumange khö Lowalangi si lö raʼiö, sotöi Yehowa. Khalaigö atö hewisa dödö Yesu me iʼila wa no taʼunö gosali andrö, me möi ia me 10 Nisana 33 M. Hadia zalua?​—Baso Mataiʼo 21:12, 13.

² Ba Golayama Niha Baero, lahalö hare si lö atulö ira samawa hegöi sanuka anaʼa soluʼa-luʼa andrö ba nono mbanua Yehowa si möi mameʼe sumange khönia. a ”Ifofanö baero fefu zamawa hadia ia [Yesu], awö zowöli-wöli ba gosali, ba isoʼagö meza zanuka anaʼa.” (Fatimbaisi Nehemia 13:7-9.) Iʼailasi ndra matua si so fakhögusa andrö börö me labaliʼö ”tögi narö hili naha zorabu” nomo Namania. Iʼosinangegö gosali Lowalangi andrö Yesu hegöi eluahania. Lö tola löʼö, böi taʼunö wamosumange khö Namania!

³ Hauga abad aefa daʼö, me no mufataro Yesu tobali Razo, ifuli iʼehao sambua gosali—farahu ba daʼö fefu niha somasi mamosumange Yehowa moloʼö lala somasi ia ba ginötö andre. Hadia gosali nihaogönia me luo daʼö?

4, 5. (a) Hewisa wamohouni ba fangehao ira nifahaʼö Yesu iʼotarai 1914 irugi ba wamobörö ndröfi 1919? (b) Na simanö, hadia no awai wamohouni ba fangehao nono mbanua Lowalangi? Tutunö.

⁴ Simane niʼilada ba Faza 2, me no mufataro Yesu me 1914, fao ia khö Namania ba wamareso osali ba wamati—famaʼanö famosumange sohau-hau. b Buania, iʼila Razo wa moguna mubohouni ba muʼehao niha Keriso nibayoini, ’ono Lewi’. (Mal. 3:1-3) Iʼotarai me 1914 irugi ba wamobörö 1919, Samohouni sotöi Yehowa, itehegö latörö wanandraigö ba abula dödö ono mbanuania, enaʼö tebohouni ba teʼehao ira. Taʼandrö saohagölö me no teʼehao niha nibayoini moroi ba galitö fanandraigö, ba itugu terou dödöra ba wotuhini Razo Mesia!

 ⁵ Na simanö, hadia no awai wamohouni ba fangehao ono mbanua Lowalangi? Löʼö. Sagötö ngaluo safuria, iʼogunaʼö Razo Mesia Yehowa ba wanolo niha soloʼö khönia enaʼö lö raʼiö ba lö tebulö nahiara ba gosali wamati. Ba zi dua faza aefa daʼa, taʼila hewisa wamohouninia yaʼira ba gamuata hegöi ba organisasi. Si oföna, datafaigi wangehao ba wamati. Tatu aro wamatida wamaigi si no ifalua Yesu—he niʼila hörö hegöi si löʼö—ba wanolo niha soloʼö khönia ba wamati.

6. Hadia zi farahu ba wangehao famati na tafaigi goroisa Yehowa ba niha Yehuda si no tetiboʼö?

⁶ Hadia wangehao ba wamati andrö? Enaʼö taʼila wanema linia, datafaigi wehede Yehowa ba niha Yehuda nitiboʼö, me edöna laröi Mbabilona me abad si önö SM. (Baso Yesaya 52:11.) Tani wa mangawuli ira yaʼia daʼö ba wamazökhi osali hegöi ba wamohouni mangawuli famosumange satulö. (Gese. 1:2-4) Omasi Yehowa na laheta fefu lahe agama Mbabilona ono mbanuania. Faigi me ibeʼe khöra goroisa: ”Böi mibabaya hadia ia zi taʼunö”, ”miheta ami khöra”, ba ”mihaogö ami”. Famosumange faya, tebai itaʼunöisi wamosumange satulö niʼokhögö Yehowa. Hadia rahu-rahu si tola tahalö? Böi raʼiö ba wamati eluahania tarorogö enaʼö böi tetaʼunöisi ita moroi ba wamahaʼö hegöi si toʼölö mufalua ba agama sofaya.

7. Hadia niʼogunaʼö Yesu ba wanolo ira nifahaʼönia enaʼö laʼehao ira ba wamati?

⁷ Lö ara me no tefataro Yesu tobali Razo, iʼasogö sambua lala ba wanolo niha soloʼö khönia enaʼö lö raʼiö ba wamati. Ifataro Keriso zawuyu si lö faröi ba satua-tua me 1919. (Mat. 24:45) Me luo daʼö, Ono Zekola Zura Niʼamoniʼö no laʼehao ira moroi ba ngawalö wamahaʼö faya. Hizaʼi, moguna muʼehao ira nasa. Iʼogunaʼö zawuyu si lö faröi Keriso wozara-zara famohouni faʼaboto ba dödö sanandrösa ba upacara hegöi si toʼölö lafalua enaʼö laröi. (Gamd. 4:18) Datafaigi duma-dumania.

8. Hadia zi no ara lafaduhuʼö Ono Zekola Zura Niʼamoniʼö sanandrösa ba Wanunu Fandru, tobali hadia zi lö aboto ba dödöra?

⁸ Ono Zekola Zura Niʼamoniʼö, no ara lafaduhuʼö wa moroi ba wamahaʼö niha baero gowasa Fanunu Fandru, ba tenga 25 mbaŵa si Felendrua tumbu Yesu. Imane Zionʼs Watch Tower baŵa si Felendrua 1881, ”Zuta wamahaʼö niha baero si no muʼohe ba gereja. Hizaʼi soyania, ha töi zi faböʼö börö me ere niha baero tobali ere niha Keriso, ba mubeʼe töi niha keriso gowasa niha baero simane Fanunu Fandru.” Me 1883, so duho ba Watch Tower, ”When Was Jesus Born?” (Hamega Tumbu Yesu?) ihalö gangetula wa kira-kira me böröta mbaŵa si Fulu tumbu Yesu. c Ambö aboto ba dödö Nono  Zekola Zura Niʼamoniʼö me luo daʼö wa moguna mubato wangowasaini Fanunu Fandru. Lö labato wangowasaini ösi nomo Mbetieli ba Brooklyn. Hizaʼi, me aefa 1926, ibörötaigö so zi faböʼö. Hadia mbörö?

9. Hadia niʼila Nono Zekola Zura Niʼamoniʼö ba gafuriata sanandrösa ba Wanunu Fandru?

⁹ Me no lahaogö laʼosisiʼö duho daʼö Ono Zekola Zura Niʼamoniʼö, awena laʼila wa böröta wamahaʼö Fanunu Fandru hegöi si toʼölö mufalua tanö böʼö soʼamakhaita ba daʼö, lö möi famosumange döi Lowalangi. Artikel ”The Origin of Christmas” (Böröta Wanunu Fandru), nifaʼanö ba The Golden Age 14 mbaŵa si Felendrua 1927, imane wa Fanunu Fandru no owasa niha baero, somasi famai-mai, ba so göi wamosumange adu. Itutunö artikel daʼö wa lö niʼoroisi Yesu enaʼö muʼowasaini Wanunu Fandru, ihalö rahu-rahu si fao fehede sabeʼe: ”Ulidanö andre, faʼomasi nösi, hegöi Afökha, omasi ira na lö mubato wangowasaini yaʼia . . . daʼö dane-dane wa aro sibai dödöda enaʼö lö taʼowasaini ia, motöi niha samosumange Yehowa.” Börö daʼö, lö laʼowasaini Wanunu Fandru osi nomo Mbetieli iʼotarai me baŵa si Felendrua daʼö—irugi gofu hawaʼara!

10. (a) Me baŵa si Felendrua 1928, hadia niʼombakhaʼö sanandrösa ba Wanunu Fandru? (Faigi kotak ” Fanunu Fandru, Böröta hegöi Ohitönia”.) (b) Hewisa wamangelama ono mbanua Lowalangi sanandrösa ba ngaluo sebua hegöi owasa tanö böʼönia si tebai lafalua? (Faigi kotak ” Fanutunö Luo Sebua ba Owasa Tanö Böʼö”.)

¹⁰ Me döfi aefa daʼö, so gangombakhata nitema Nono Zekola Zura Niʼamoniʼö sanandrösa ba Wanunu Fandru. Me 12 mbaŵa si Felendrua 1928, ifaʼema huhuo ba radio talifusöda Richard H. Barber, anggota staf gödo sebua. Itutunö hewisa wamobörö zogoro ita sanandrösa ba  ngaluo sebua andrö. Hewisa nono mbanua Lowalangi ba wotemaʼö fanuturu lala moroi ba gödo sebua? Itörö tödö dalifusöda Charles Brandlein me lö laʼowasaini saʼae Wanunu Fandru ösi nomonia, ”Hadia fatimba khöma wangeheta famahaʼö niha baero andrö? Tatu löʼö! . . . Fagölö ira na taheta ba tatiboʼö mbaru si taʼunö.” Simanö göi waʼaterou dödö dalifusöda Henry A. Cantwell, si tobali satua samasui ba gafuriata. Itörö tödönia, ”Omuso dödöma börö me so zi tola maheta ba wangoromaʼö faʼomasima khö Yehowa.” Niha si lö faröi soloʼö khö Keriso, lö abua gölöra ba wombulöʼö si toʼölö lafalua ba lö fao ira ba ngawalö gowasa si otarai wamosumange si taʼunö. d—Yoh. 15:19; 17:14.

11. Hewisa wangoromaʼöda wa tatuhini Razo Mesia?

¹¹ Tobali duma-duma khöda waʼalöfaröi Nono Zekola Zura Niʼamoniʼö! Na taʼangerönusi duma-dumara, moguna tasofu khöda samösa, ’Hewisa wamaigigu fanuturu lala nitemada moroi ba gödo sebua? Hadia utema ba ufalua ia si fao fangandrö saohagölö?’ Na aoha gölöda ba woloʼö, daʼö dandra wa tatuhini Razo Mesia, sangogunaʼö ira sawuyu si lö faröi ba wameʼe gö wamati ba ginötönia.​—Hal. 16:4, 5.

12. Ba zi hauga fakhe, hewisa dödö Nono Zekola Zura Niʼamoniʼö sanandrösa ba röfa?

¹² Barö zi hauga fakhe, fao dödö Nono Zekola Zura Niʼamoniʼö wa röfa andrö tandra waʼaniha Keriso. Tatu  manö lö lafosumange röfa börö me laʼila wa fasala na mufosumange nadu. (I Kor. 10:14; I Yoh. 5:21) Iʼotarai 1883, no iwaʼö Watch Tower wa ”ogoro Lowalangi ngawalö wamosumange adu”. Hizaʼi, moloʼö Ono Zekola Zura Niʼamoniʼö ba wamobörö, lö fasala na muʼogunaʼö röfa ba zi tefaudu. Duma-dumania, omuso dödöra wangogunaʼö pin salib-mahkota enaʼö laʼila haniha ira. Daʼö dandra wa latema mahkota waʼauri na lö faröi ira irugi waʼamate. Ibörötaigö me 1891, so gambara pin salib-mahkota ba ngaʼörö tanö föna Watch Tower.

13. Hadia wamahaʼö si bohou latema ira soloʼö khö Keriso sanandrösa ba wangogunaʼö röfa? (Faigi kotak ” Faʼaboto ba Dödö si Bohou Sanandrösa ba Röfa”.)

¹³ Laʼosinangegö lencana salib-mahkota Ono Zekola Zura Niʼamoniʼö. Hizaʼi, ba gangohorita 1920-an, arara manö mubohouni waʼaboto ba dödö niha soloʼö khö Keriso sanandrösa ba röfa. Itörö tödö dalifusöda Grant Suiter kebaktian nifalua me 1928 ba Detroit, Michigan, AS. Ba gafuriatania tobali ia Boto Solohe. Imane, ”Ba kebaktian daʼa mufatunö wa lencana salib-mahkota tenga ha lö moguna, hizaʼi ogoro ita.” Hauga fakhe aefa daʼö, itugu oya zi bohou taʼila. Ba daʼö oroma wa lö naha röfa ba wamosumange sohau-hau ba sehao ba wamati.

14. Hewisa nono mbanua Lowalangi ba wanemaʼöra faʼaboto ba dödö nizara-zara sanandrösa ba röfa?

¹⁴ Hewisa nono mbanua Lowalangi me so wamohouni faʼaboto ba dödö sanandrösa ba röfa? Hadia laʼogunaʼö lencana salib-mahkota somasi ira? Itörö tödö Lela Roberts, si no ara tobali ono mbanua Yehowa, ”Maheta lencana daʼö me maʼila geluahania.” Isalahini ndra talifusöda sato talifusöda ira alawe si lö faröi sotöi Ursula Serenco, imane, ”Awena taʼila wa tandra niha baero niʼogunaʼöda si tobali salahi waʼamate Zoʼaya hegöi folulu faʼauri niha Keriso, niʼamoniʼöda iʼotarai me föna. Tefaudu ba Gamaedola 4:18, taʼandrö saohagölö me itugu mohaga lalada.” Lö omasi niha soloʼö khö Keriso si lö faröi fao ba zi toʼölö lafalua agama faya sogoro ita!

15, 16. Hewisa wangoromaʼöda wa tahalö gangetula tarorogö golayama gosali wamati khö Yehowa si so ba gulidanö enaʼö lö taʼunö?

¹⁵ Daʼö gangetulada iadaʼa. Taʼila wa so niʼogunaʼö Keriso ba wanolo banuania enaʼö teʼehao ba wamati, yaʼia daʼö sawuyu si lö faröi ba satua-tua. Börö daʼö, taʼoʼö na so wamangelama moroi ba gö wamati sanandrösa ba upacara, amuata, hegöi si toʼölö mufalua ba agama faya. Tahalö gangetula enaʼö lö tataʼunöisi golayama gosali wamati khö Yehowa ba gulidanö, simane nifalua ndra talifusöda me böröta waʼatohare Keriso.

¹⁶ Sagötö ngaluo safuria andre, mohalöwö Keriso ba zi lö taʼila-ila, enaʼö telumöʼö nono mbanua Yehowa moroi ba niha sotaʼunöisi yaʼira ba wamati. Hewisa wamaluania daʼö? Datafaigi.

17, 18. Ba gamaedola Yesu sanandrösa ba giri, hadia geluahania (a) mulau giri ba nasi, (b) ”famaʼuʼu fefu hadia ia ngawalö giʼa”, (c) muʼowuloi giʼa si sökhi ba lalau ba nahia (d) ba mutiboʼö zi lö sökhi?

¹⁷ Razo Yesu Keriso andrö, ifaigi-faigi nono mbanua Lowalangi ba zi sagörö ulidanö. Hewaʼae ambö aboto ba dödöda, ifalua Keriso hegöi ira malaʼikania halöwö famabali. Ifoʼamaedola halöwö daʼa Keriso simane giri. (Baso Mataiʼo 13:47-50.) Hadia geluaha gamaedola daʼa?

¹⁸ Mulau ”giri . . . ba nasi”. Hulö amaedola halöwö fanuriaigö Banua Lowalangi ba zi sagörö asi niha gulidanö. ”Famaʼuʼu fefu hadia ia ngawalö giʼa.” Turia somuso dödö andrö idönisi ngawalö niha—yaʼira samalua hadia nifakhoi ba niha somasi tobali niha Keriso sindruhu, ba ato niha tanö böʼö sadöni tödö ba wamobörö, hizaʼi lö niʼosambuaʼöra tödöra ba wamosumange sohau-hau. e Muʼowuloi ”zi sökhi, lalau ba nahia”. Muʼowuloi niha satulö tödö ba mbanu-banua niha Keriso si hulö nahia ba wameʼe sumange si lö taʼunö khö Yehowa. Mutiboʼö giʼa ”si lö sökhi”. Sagötö ngaluo safuria, Keriso hegöi ira malaʼika andrö, lafabali ”zi lö sökhi andrö ba zatulö”. f Lua-luania, niha si lö atulö tödö—si lö omasi mondröi faʼafaduhu dödö si fasala mazui si toʼölö mufalua—tebai lataʼunöisi mbanua niha Keriso. g

19. Hewisa dödöu ba zi no ifalua Keriso ba wondrorogönia ono mbanua Lowalangi enaʼö lö taʼunö ba ohahau wamosumange sindruhu?

¹⁹ Hadia lö ahono dödöda börö me taʼila Razoda, Yesu Keriso ilumöʼö niha niʼomasiʼönia? Ba, hadia lö terara dödöda börö me taʼila wa fagölö waʼaterou dödönia ba wamosumange satulö hegöi ba nono mbanuania sindruhu, simane me döfi siföföna M me iʼehao gosali? Hawaʼomuso dödöda börö me lö ibato wohalöwö Keriso irege lö tebulö teʼehao nono mbanua Lowalangi ba wamati hegöi famosumange satulö! Taforomaʼö wa tatuhini Razo andrö hegöi Banuania, taʼaröuʼö ita moroi ba agama faya.