1, 2. Hadia zi faböʼö ba Zionʼs Watch Tower baŵa si Sara 1895, ba hewisa dödö ndra talifusöda?

 SAMÖSA Nono Zekola Zura Niʼamoniʼö sowölö-ölö sotöi John A. Bohnet, itema majalah Zionʼs Watch Tower me baŵa si Sara 1895, ba ahöli-höli dödönia ba zi no iʼila andrö. Baga-baga guli majalah daʼö—so gambara mercusuar salawa sibai ba oroma hagania ba dalu nasi na bongi. Angombakhata ba majalah si bohou andrö tuhonia ”Our New Dress” (Baruma si Bohou).

² Börö me adöni dödö Bohnet ba majalah andrö, ifaʼoheʼö zurania khö Russell. Imane, ”Omasido wamaigi MALIGE si sökhi andre. No baga-baga laʼa-laʼania.” Imane Ono Zekola Zura Niʼamoniʼö tanö böʼö sotöi John H. Brown ba guli majalah andre, ”Ahöli-höli dödöda. Aro sibai dane-dane maligenia hewaʼae na göna bade ba angi sabölö.” Awena laʼila ira talifusöda waʼafaböʼö ba ndröfi daʼö me no tebohouni guli majalahnia, hizaʼi tenga daʼö zafuria. Me baŵa si Felezara, so wamohouni sebua sadöni dödöda sanandrösa ba nasi sobade.

3, 4. Hadia gabula dödö nitutunö ba Watch Tower 15 mbaŵa si Felezara 1895, ba hadia lua-lua wamohouni sebua andrö?

³ So gabula dödö nitutunö ba artikel si so ba Watch Tower 15 mbaŵa si Felezara 1895: Abula dödö si no amaedola mbade sebua samawukasi faʼohahau dödö ba organisasi Nono Zekola Zura Niʼamoniʼö. Lafadöni ira talifusöda haniha zondröniaʼö ba mbanua niha Keriso. Ba wanolo ira talifusöda enaʼö laʼila wa amuata fahindrisa möi famabali, ba artikel andrö ifagölösi organisasi hulö simane köfa. Aefa daʼö, lö ibiniʼö wamaduhuʼö wa lö mofozu zondröniaʼö ba wamaʼanö organisasi si no amaedola göfa na tohare mbade. Hadia zinangea mufalua?

⁴ Imane ba artikel andrö wa kafite göfa sonekhe ifaigi na no tehenaigö römba (pelampung) yawa ba göfa, ba fefu zohalöwö ba göfa no lafaʼanö ira na so mbade sabölö-bölö. Simanö göi niha sondröniaʼö ba organisasi, moguna lafaigi hadia no tefaʼanö fefu mbanua niha Keriso na alua mbade sabölö-bölö. Ba wamalua yaʼia, iʼombakhaʼö artikel daʼö  wa so lua-lua wamohouni sabölö ebua. Ifarou fefu enaʼö ”Ero sambua paguyuban, lafili zatua sokubaloi” ba ”’wamaigi’ nikubaloi”.​—Hal. 20:28.

5. (a) Hadia mbörö wa tefaudu gamakhoita si bohou sanandrösa khö ndra satua sokubaloi? (b) Hadia manö wanofu nifatunöda?

⁵ Amakhoita si bohou sanandrösa khö ndra satua sokubaloi, no sambua lala waʼatedou ba ginötö si tefaudu ba wamaʼanö banua niha Keriso enaʼö sökhi. Daʼö zanolo ira talifusöda me alua mbade sabölö-bölö börö Wasuwöta Gulidanö I. Ba zi hauga wulu fakhe aefa daʼö, fangaʼazökhi hegöi famöföʼö ono mbanua Lowalangi itugu tedou irege tetolo ira ba wangai halöwö khö Yehowa. He zo ba Zura Niʼamoniʼö zamaʼeleʼö faʼatedou andre? Hadia manö wamohouni si no öʼila ba organisasi? Hadia gunania khöu samösa?

6, 7. (a) Hadia geluaha wamaʼeleʼö ba Yesaya 60:17? (b) Hadia zoroma me mututunö ’zalaŵa’ ba ’samatörö’ halöwö?

⁶ Simane si no tafatunö ba Faza 9, no ifaʼeleʼö Yesaya wa ifahowuʼö Yehowa nono mbanuania irege monönö waʼato. (Yes. 60:22) Hizaʼi, no ifabuʼu Yehowa wa ifalua zi töra moroi andrö. Imane nasa, ”Salahi döla garamba ufabeʼeʼö ganaʼa ba salahi ziʼöli wirö, salahi geu döla garamba ba salahi gara ziʼöli; ba ubeʼe salaŵamö waʼohahau dödö, ba samatörö yaʼugö ubeʼe waʼatulö.” (Yes. 60:17) Hadia geluaha wamaʼeleʼö daʼö? Hewisa waʼaluania khöda ba ginötö andre?

⁷ No ifaʼeleʼö Yesaya wa so wogati döla-döla tanö böʼö. Hizaʼi, datafaigi wa fogati andrö yaʼia daʼö famohouni, tenga moroi ba zi lö sökhi tobali sökhi, hizaʼi moroi ba zi sökhi itugu monönö waʼasökhi. Na anaʼa zi tobali fogati döla garamba eluahania so waʼatedou, simanö göi ngawalö zi no mutötöi no mege. Tobali, moroi ba zi no mugambaraini andre, no ifaʼeleʼö Yehowa wa ono mbanuania itugu ara itugu sökhi. Hadia manö nifazökhi si no ifaʼeleʼö andrö? Me itötöi ”salaŵamö” ba ”samatörö”, iʼombakhaʼö Yehowa ba nono mbanuania wa itugu tedou ba monönö wamöföʼö ono mbanuania.

8. (a) Haniha zangaʼasogö faʼafaböʼö nitutunö ba wamaʼeleʼö Yesaya? (b) Hadia gunania khöda? (Faigi kotak ” Itemaʼö Mene-Mene si Fao Fangide-ngideʼö”.)

⁸ Haniha mbörö wa so waʼatedou ba wamöföʼö daʼa? Imane Yehowa, ’Ubeʼe ganaʼa,  . . . ba Ubeʼe wirö  . . . ba Ubeʼe waʼatulö.’ Faʼatedou ba organisasi mbanua niha Keriso tenga börö niha gulidanö, hizaʼi börö Yehowa. Me no Yehowa zamataro Yesu tobali Razo, daʼö mbörö wa so waʼatedou. Hadia gunania khöda? Ayati si fagölö zangumaʼö faʼatedou andre iʼaʼasogö ”waʼohahau dödö” ba ’faʼatulö’. Na taʼodaligö Yehowa hegöi fanuturu lala si no mubohouni, so khöda waʼatulö hegöi faʼomasi ba gotaluada ba tefarou dödöda wamosumange Yehowa, simane niwaʼö Waulo ”Lowalangi waʼohahau dödö”.​—Fil. 4:9.

9. Hadia dane-dane saro ba waʼahono hegöi ba waʼafatalifusöta ba mbanua niha Keriso, ba hadia mbörö?

 ⁹ Imane Faulo sanandrösa khö Yehowa, ”Tenga sa Lowalangi wamakuyu Lowalangi, no Lowalangi waʼatulö ia.” (I Kor. 14:33) Faigi atö, lö ifagölösi Faulo waʼahono ba waʼafawuka, hizaʼi faʼatulö. Hadia mbörö? Fatimbaisi daʼa: Faʼahono andrö tenga ha faʼatulö niʼaʼasogönia. Duma-dumania, teʼoli ndra saradadu weʼamöi ba naha wasuwöta, tobali fahasara dödöra ba wofanö saekhu ba wasuwöta tenga ba waʼatulö. Börö me niha Keriso ita, böi taʼolifugö daʼa: Gofu hadia ia nifaʼanö si lö teʼodane-dane ba waʼatulö, alio ara hasambalö adudu. Hizaʼi, faʼatulö moroi khö Lowalangi daʼö zangaʼasogö faʼahono irugi zi lö aetu. Taʼandrö sibai saohagölö börö me so zanuturu lala ba organisasida andre ba no ibohouni ’Lowalangi sameʼe faʼohahau dödö’. (Rom. 15:33) Faʼatulö nibeʼe Lowalangi no amaedola dane-dane saro ba wahasara dödö si tola tarasoi ba wangandrö saohagölö ba mbanua niha Keriso ba zi sagörö ulidanö.​—Zin. 29:11.

10. (a) Hadia manö zi tedou ba organisasida ba wamobörö? (Faigi kotak ” Itugu Sökhi Wondröniaʼö”.) (b) Hadia manö wanofu nifatunöda?

¹⁰ Moroi ba kotak ” Itugu Sökhi Wondröniaʼö” taʼila waʼafaböʼö si tefaudu ba ahono, salua ba organisasida ba wamobörö. Hizaʼi, hadia waʼafaböʼö moroi ba ’döla garamba si tobali anaʼa’ niʼasogö Yehowa barö-barö daʼa, me iʼogunaʼö Razoda? Hewisa wamohouni ba wondröniaʼö tola möi fangaʼaroʼö faʼatulö ba fahasara dödö ba mbanua niha Keriso ba zi sagörö ulidanö? Hewisa wa tetolo ndraʼugö ba wangai halöwö khö ”Lowalangi waʼohahau dödö”?

11. (a) Me no laʼosisiʼö Zura Niʼamoniʼö, hadia wamohouni sanandrösa ba waʼaboto ba dödöda? (b) Hadia gohitö dödö ndra talifusöda boto solohe?

¹¹ Iʼotarai 1964 irugi 1971, lahaogö laʼosisiʼö nösi Zura Niʼamoniʼö ira boto solohe, ba lafareso hewisa wohalöwö mbanua niha Keriso me döfi siföföna. a Sanandrösa ba struktur organisasi, aboto ba dödö nono mbanua niha Keriso me döfi siföföna wa boto zatua sokubaloi zondröniaʼö halöwö, tenga ha samösa satua sokubaloi, mazui sondröniaʼö. (Baso Filifi 1:1; I Timoteo 4:14.) Me no abakha waʼaboto ba dödö, awena laʼila ira talifusöda boto solohe wa Razora, Yesu, zameʼe fanuturu lala hegöi famohouni ba organisasi mbanua Lowalangi—ba lahalö gangetula ira talifusöda boto solohe ba woloʼö fanuturu lala moroi khö Razo. Laʼanemaiʼö latema wamohouni andrö enaʼö organisasinia tefaudu moloʼö goi-goi Zura Niʼamoniʼö sanandrösa khö zatua sokubaloi. Hadia manö wamohouni nifazökhi me böröta ndröfi 1970-an?

12. (a) Hadia wamohouni si no lafalua ba mboto solohe? (b) Hewisa wamöföʼö Mboto Solohe iadaʼa? (Faigi kotak ” Boto Solohe Zamöföʼö Halöwö Mbanua Lowalangi”, ngaʼörö 130.)

¹² Famohouni si oföna tefalua khö ndra boto solohe. Me luo daʼö, so dafitu ndra talifusöda ngawawa si no tebayoini, tobali ira anggota dewan direksi Watch Tower Bible and Tract Society of Pennsylvania. Itugu monönö waʼato mboto solohe moroi ba zi dafitu tobali 11 me döfi 1971, ba lö saʼae  lafotöi ira dewan direksi. Ba wamaigira, fefu anggota oi fagölö wetarora ba si tobali ketua tefalali ero röfi moloʼö hurufo döira.

13. (a) Hadia zi no mufakhoi barö zi 40 fakhe? (b) Hadia nifalua Boto Solohe me 1972?

¹³ Famohouni ganetenia molua-lua ia ba zi sambu-sambua banua niha Keriso. Hezo manandrösa ia? Iʼotarai 1932 irugi 1972, ha samösa dalifusöda ira matua si tobali satua ba mbanua niha Keriso. Irugi 1936, talifusöda si no lafataro andre lafotöi ia direktur dinas. Ba gafuriata, tefaböʼöni döi tobali enoni paguyuban, aefa daʼö enoni mbanua niha Keriso, ba safuria saʼae tobali satua mbanua niha Keriso. Owölö-ölö dalifusöda si no lafataro andrö ba woʼameʼegö tödö gö wamati nikubaloira. Na ihalö gangetula satua mbanua niha Keriso, lö iʼandrö mbua gera-era ndra enoni böʼö. Hizaʼi, sagötö 1972, lafaʼanö sambua wamohouni ira Boto Solohe si tebai muʼolifugö. Hadia manö zi farahu ba wamohouni andre?

14. (a) Hadia zawena lafaʼanö si no tebörögö muʼogunaʼö me 1 mbaŵa si Fulu 1972? (b) Hewisa koordinator boto zatua sokubaloi ba wamalua mene-mene ba Filifi 2:3?

¹⁴ Moroi na ha samösa zi tobali satua mbanua niha Keriso, iadaʼa mufataro ndra talifusöda si no tola mangai halöwö si tefaudu ba goi-goi Zura Niʼamoniʼö moloʼö teokratis, ba tobali ira satua sokubaloi ba mbanua niha Keriso. Tefasindro mboto satua sokubaloi ba wamaigi banua niha Keriso si so ba mbanuara, tebörögö me 1 mbaŵa si  Fulu 1972. Iadaʼa, lö iʼosebua ia koordinator mboto satua sokubaloi moroi ba danö böʼö, hizaʼi tobali ia ’fondrege zide-ide’. (Luk. 9:48) Sindruhu wa no sambua howu-howu daʼa ba waʼafatalifusötada ba zi sagörö ulidanö börö me so khöra wangide-ngideʼö!​—Fil. 2:3.

15. (a) Hadia gunania ba mbanua niha Keriso me so mboto zatua sokubaloi? (b) Hadia zangoromaʼö wa so waʼatua-tua khö Razoda?

¹⁵ Fameʼe halöwö ba mbanua niha Keriso ba gotalua anggota mboto zatua sokubaloi, no sambua tandra wa tedou waʼatua-tua ba wangai halöwö. Fatimbaisi zi tölu ngawalö gunania: Si oföna, fefu zi no latatugöi andrö möi fanolo ndra satua sokubaloi enaʼö laʼila wa Yesu zi tobali Högö mbanua niha Keriso hewaʼae abua halöwöra. (Ef. 5:23) Si dua, simane niwaʼö ba Gamaedola 11:14, ”Ba ohahau dödö ba zi lö ambö samolala.” Na lahaogö lafatimbaisi wanuturu lala ira satua sokubaloi ba lafatunö zoʼamakhaita ba gö wamati mbanua niha Keriso, tetolo ira ba wangai angetula si tefaudu ba goi-goi Zura Niʼamoniʼö. (Gamd. 27:17) Ifahowuʼö Yehowa gangetula simane daʼö, ba tola mofozu halöwöra. Si tölu, na ato ndra talifusöda si tobali satua sokubaloi, itugu monönö zohalöwö hegöi sokubaloi banua niha Keriso. (Yes. 60:3-5) Khalaigö atö waʼatedou mbanua niha Keriso ba zi sagörö ulidanö me döfi 1971 so mato 27.000, ba me 2013 töra 113.000! Sindruhu sa, Razoda  si so faʼatua-tua iʼasogö ndra kubalo ba niha soloʼö khönia ba ginötö si tefaudu.​—Mi. 5:5.

16. (a) Hadia noro dödö ndra satua sokubaloi? (b) Hewisa Nono Zekola Zura Niʼamoniʼö ba wanemaʼöra mene-mene Yesu ba ’wokubaloi mbiri-biri’?

¹⁶ Me böröta Nono Zekola Zura Niʼamoniʼö, aboto ba dödö ndra satua sokubaloi wa moʼömö ira ba wanolo ira talifusöda ba wamati enaʼö lö faröi ba wamosumange Lowalangi. (Baso Galatia 6:10.) Me döfi 1908, itutunö ba zi sambua artikel Watch Tower mene-mene Yesu, ”Kubaloi nono mbiri-birigu.” (Yoh. 21:15-17) Ifatunö artikel daʼö khö ndra satua sokubaloi, ”Moguna sibai taʼonorogö tödö niwaʼö Zamahaʼö sanandrösa ba mbiri-biri, ba taʼandrö saohagölö me no tebeʼe döi sebua ba wameʼe gö hegöi ba wondrorogö nifahaʼö Zoʼaya.” Me 1925, ifuli iʼabakhaiʼö The Watch Tower wa moguna sibai lafalua halöwö gubalo si möi famasugi ba dödö khö ndra satua sokubaloi, ”Osali Lowalangi yaʼia daʼö okhötania samösa, . . . ba yaʼia dania zonofu-nofu khöra ba halöwö si sökhi si no tebeʼe ba wanolo ira talifusöda.”

17. Hewisa wanolo ira sondröniaʼö enaʼö tobali ira kubalo satua-tua?

¹⁷ Hewisa organisasi Yehowa wanolo ira satua sokubaloi enaʼö so khöra waʼatua-tua ba wokubaloi biri-biri moroi ba ’ziʼöli tobali firö’? Teʼasogö wamahaʼö. Si oföna sibai tebörögö Sekolah Pelayanan Kerajaan me 1959 khö ndra satua sangai halöwö. Sambua duho nifatunö ba kelas daʼö ”Taʼameʼegö Tödö Ero Samö-samösa Niha”. Lafarou ndra talifusöda sangai halöwö enaʼö ”latatugöi ginötöra ba wamalukhaisi ira sanuriaigö ba nomora”. Ba wamahaʼö andrö lafadumaisi hewisa zatua sokubaloi wamalukhaisi ira talifusöda si möi famarou dödö. Me döfi 1966 tebörögö wamohouni Sekolah Pelayanan Kerajaan. Ba zekola andrö lafatunö duho ”Moguna Sibai Halöwö Fokubaloi”. Hadia duho  si oföna nitutunö ba kelas andrö? Yaʼira sondröniaʼö ”laʼonorogö tödö nono mbiri-biri Lowalangi si fao faʼomasi, hizaʼi lö laʼosiwawöi nösi nomora hegöi halöwö fanuriaigö”. Barö-barö ndröfi daʼa, oya sekola niʼasogö khö ndra satua sokubaloi. Hadia lua-luania me lö aetu-aetu iʼasogö wamahaʼö organisasi Yehowa? Iadaʼa, ngahönö ndra talifusöda ira matua satua-tua si tobali kubalo ba wamati.

18. (a) Hadia noro sebua nibeʼe khö ndra satua sokubaloi? (b) Hana wa omasi Yehowa hegöi Yesu khö ndra satua sokubaloi sangodödögö wohalöwö?

¹⁸ Razoda, Yesu, niʼogunaʼö Yehowa ba wamataro ira satua sokubaloi wangai halöwö sebua. Halöwö hadia? Mondröniaʼö ono mbanua Lowalangi ba wanaögö abula dödö ba ginötö si lö sökhi salua ba niha gulidanö. (Ef. 4:11, 12; II Tim. 3:1) Omasi sibai Yehowa hegöi Yesu khö ndra satua sokubaloi sowölö-ölö ba wamalua halöwö börö me laʼoʼö fareta Zura Niʼamoniʼö, ”Mikubaloi rorogöfö Lowalangi andrö, ba khömi . . . enaʼö na saohagölö, enaʼö na moroi ba waʼomasi  . .  enaʼö na tobali duma-duma ami, ba nikubaloi andrö.” (I Fet. 5:2, 3) Oya lala ndra kubalo niha Keriso enaʼö tobali ira duma-duma ba nono mbiri-biri ba enaʼö teʼasogö waʼatulö hegöi faʼomuso dödö ba mbanua niha Keriso. Datafaigi dombua ba gotaluania.

19. Hadia nirasoida na fao ita khö ndra satua sokubaloi ba wanuriaigö?

¹⁹ Si oföna, falulu fohalöwö zatua sokubaloi khö ndra talifusö ba mbanua niha Keriso. Imane Luka sanura Injil sanandrösa khö Yesu, ”Ba itöröi mbanua sebua, awö zide-ide, mangombakha ia, manuriaigö turia mbanua Lowalangi andrö; ba awönia zi felendrua.” (Luk. 8:1) Simane Yesu, fao ia manuriaigö khö ndra sinengenia, simanö göi ndra satua sokubaloi si no tobali tulada iadaʼa, fao ira khö ndra  talifusöda ba wanuriaigö. Aboto ba dödöra, na lafalua daʼa tola so waʼowölö-ölö ba mbanua niha Keriso. Hewisa dödö mbanua niha Keriso khö zatua sokubaloi simane daʼö? Imane talifusöda ira alawe si 90 fakhe sotöi Jeannine, ”Tola fahuhuodo ba aboto ba dödögu haniha ira sindruhunia me fao ndraʼo manuriaigö khö zatua sokubaloi.” Imane talifusöda ira matua sarakhagö 30-an ndröfinia sotöi Steven, ”Me faodo khö zatua sokubaloi manuriaigö, uʼila wa omasi ia itolo ndraʼo. Ba wanema fanolo simane daʼa no sambua faʼomuso dödögu.”

20, 21. Hewisa zatua sokubaloi woloʼöra kubalo ba gamaedola Yesu? Hadia duma-dumania? (Faigi kotak ” Bua Wamalukhaisi Ero Samigu”.)

²⁰ Si dua, lafahaʼö zatua sokubaloi ba organisasi Yehowa enaʼö laʼoromaʼö waʼahakhö dödö ba niha si no taya moroi ba mbanua niha Keriso. (Heb. 12:12) Hana wa latolo ira satua sokubaloi niha si no awuwu ba wamati, ba hewisa wamaluara daʼö? Tebeʼe wanema linia ba gamaedola Yesu sanandrösa khö gubalo hegöi biri-biri si taya. (Baso Luka 15:4-7.) Me iʼila kubalo andrö so nono mbiri-birinia si taya, möi ia iʼalui hulö na ha daʼö mbiri-biri niʼokhögönia. Hewisa ndra satua sokubaloi ba ginötö andre woloʼöra duma-duma nibeʼe gubalo? Simane kubalo ba wamaiginia ebua mböli mbiri-biri si taya, simanö göi ndra satua sokubaloi ba wamaigira ono mbanua Lowalangi si no taya. Ba dödöra, niha si no awuwu ba wamati amaedola mbiri-biri si taya, tenga tebai mutolo saʼae. Ihalö gangetula kubalo ba ’wangalui si sageu andrö, irege isöndra’, simanö göi ndra satua sokubaloi laʼodödögö wangalui hegöi ba wanolo niha si no awuwu ba wamati.

²¹ Hadia nifalua gubalo me no isöndra mbiri-birinia? Ihaogö wamazawa, ”iʼangalisigö”, ba iʼohe mangawuli ba naha mbiri-biri. Simanö göi waʼahakhö dödö niforomaʼö ndra satua sokubaloi, lahaogö wameʼe fanolo ba zi no awuwu famati ba laʼohe mangawuli ba mbanua niha Keriso. Daʼö zalua khö Victor, samösa talifusöda ira matua ba Afrika si no ara mondröi banua niha Keriso. Imane, ”No walu fakhe fandrö-ndröu ndraʼo ba gangowuloa, lö laböhöli ira satua sokubaloi wanolo yaʼo.” Hadia sibai zadöni dödögu? Itutunö, ”Samuza inötö, John, satua sokubaloi si no irai faoga ba Sekolah Dinas Perintis, möi ia khögu ba iforomaʼö kodama me faoga ba zekola andrö. Itörö tödögu zi no numalö irege omasido ufuli urasoi hewisa me ufosumange Yehowa.” Lö ara me no möi John, ifuli ia Victor ba mbanua niha Keriso. Iadaʼa no tobali ia perintis. Ira talifusöda satua sokubaloi si so faʼahakhö dödö ba mbanua niha Keriso, omasi labeʼe wanolo khöda enaʼö tasöndra waʼowua-wua dödö.​—II Kor. 1:24. b

22. Hewisa waʼatulö ba faʼohahau dödö möi fangaʼaro wahasara dödö ba mbanua niha Keriso? Faigi kotak ” Ahöli-höli Dödöma”.)

²² Simane si no mututunö, ifaʼeleʼö Yehowa wa itugu monönö waʼatulö ba faʼohahau dödö ba gotalua nono mbanua Lowalangi. (Yes. 60:17) Si dombua daʼa zameʼe folumöʼö fahasara dödö mbanua niha Keriso. Hewisa lalania? Sanandrösa ba waʼatulö andre, ”Lowalangida, ha Yehowa, ha yaʼia”. (V Moz. 6:4) Fagölö goi-goi waʼatulönia iʼotarai soi si sambua numalö ba soi böʼö. Ha sambua goi-goinia sanandrösa ba zi fasala ba satulö, ba fagölö ”ba gangowuloa niha niʼamoniʼö fefu”. (I Kor. 14:34) Hizaʼi, monönö waʼatedou mbanua niha Keriso ha na lafalua goi-goi Lowalangi. Sanandrösa ba waʼatulö, somasi Razoda tenga ha taʼokhögö waʼohahau dödö ba mbanua niha Keriso, hizaʼi ’taʼomasiʼö waʼatulö’. (Mat. 5:9) Daʼö mbörö wa ’tagohi enaʼö atulö’. Na so waʼafaböʼö wangera-ngera ba gotaluada, moguna taʼasiwai ba waʼalio. (Rom. 14:19) Na simanö, no fao ita ba wangaʼasogö faʼohahau dödö hegöi fahasara dödö ba mbanua niha Keriso.​—Yes. 60:18.

23. Hadia nirasoida yaʼita ono mbanua Yehowa ba ginötö andre?

²³ Me baŵa si Felezara 1895, ibeʼe gangombakhata si bohou Watch Tower sanandrösa khö zatua sokubaloi, simanö göi ndra talifusöda sangai halöwö lafaehagö nösi dödöra. Hadia nösi dödöra andrö? Lalau mangandrö ba ladöna-döna enaʼö famohouni si bohou ba organisasi möi fanolo ba nono mbanua Lowalangi enaʼö ”alio teʼosambuaʼö ba wamati”. Barö zi hauga wulu fakhe, taʼandrö saohagölö me iʼogunaʼö Razoda Yehowa ba wamaigi yaʼita irege telumöʼö wahasara dödöda ba wamosumange Lowalangi. (Zin. 99:4) Ono mbanua Yehowa ba zi sagörö ulidanö ba ginötö andre laʼokhögö waʼomuso dödö ”hasara dödöma, wanörö lala”, ba woloʼö ”lahe”, ba ”enaʼö teʼanö” wangai halöwö khö ”Lowalangi waʼohahau dödö”.​—II Kor. 12:18; baso Zefania 3:9.