1, 2. (a) Hadia lala niʼogunaʼö Yesu wahuhuosa ba niha sato? (b) Hewisa woloʼö ndra nifahaʼö Keriso si lö faröi duma-duma nibeʼenia, ba hadia mbörö?

 ATO niha zohurufai Yesu ba zinga nidanö. Hizaʼi, möi ia yawa ba dundraha ba iʼaröuʼö ia maʼifu moroi ba zinga nidanö. Hadia mbörö? Iʼila wa tete nidanö zi tola mangebuaʼö linia, ba larongo niha sato hadia nifaʼemania.—Baso Mareko 4:1, 2.

² Hauga wulu fakhe me tefasindro Mbanua Lowalangi, laʼoʼö duma-duma Keriso ira nifahaʼönia si lö faröi, laʼogunaʼö ngawalö lala si bohou ba wamaʼema turia somuso dödö sanandrösa ba Mbanua Lowalangi. Ibeʼe wanuturu lala Razo ba nono mbanua Lowalangi enaʼö ladouʼö ba laʼogunaʼö teknologi si no so, hewaʼae itugu faböʼö zalua. Omasi ita manuriaigö ba niha fefu fatua lö atua danö. (Mat. 24:14) Datafaigi hadia manö lala niʼogunaʼöda ba wangombakha ba niha fefu, gofu hezo toröi ira. Angeraigö göi hewisa enaʼö tola öʼoʼö wamati niha si lö faröi si möi manuriaigö me götö föna.

3. Hadia mbörö wa aukhu dödö nudu si lö omasi ba zindruhu börö me taʼogunaʼö koran?

³ Koran. No lafazökhi Watch Tower ira talifusöda Russell hegöi awö-awönia iʼotarai 1879 ba wamaʼema turia Mbanua Lowalangi ba niha fefu. Hizaʼi, ngafulu fakhe fatua lö 1914, hulö Keriso zamangaösö enaʼö itugu ato zamondrongo turia somuso dödö. Ibörötaigö daʼö me döfi 1903. Me luo daʼö, Dr. E.L. Eaton, zi tobali salahi na fahuhuo zohalöwö Protestan ba Pennsylvania, iʼandrö khö Charles Taze Russell enaʼö fabuʼa-buʼa ira sanandrösa ba wamahaʼö Zura Niʼamoniʼö ba latohugö ba ngaluo böʼö. Ifaʼoheʼö zurania Eaton khö Russell, ”Imane tödögu, na fabuʼa-buʼa ita föna niha sato sanandrösa ba waʼaboto ba dödöda si faböʼö-böʼö . . . tola adöni dödö niha sato.” Fao göi dödö Russell hegöi ira awönia. Andrö, lafaʼanö wabuʼa-buʼasara ba koran si tehöngö, The Pittsburgh Gazette. Ato  niha somasi artikel-artikel koran daʼö irege lafaʼanö huhuo Russell ero migu ba koran, börö me adöni dödö niha ba nifaʼema Russell sanandrösa ba Zura Niʼamoniʼö. Tatu manö aukhu dödö nudu si lö omasi sindruhu!

4, 5. Hadia gamuata niforomaʼö Russell, ba hewisa ndra talifusöda sangai halöwö woloʼö duma-dumania?

⁴ Simanö göi koran-koran tanö böʼö, omasi ira lafaʼanö huhuo nifaʼema Russell. Me 1908, iʼombakhaʼö Watch Tower wa fefu huhuonia andrö lö aetu-aetu mufaʼanö ba zi ”felezara koran”. Hizaʼi, lamane khö Russell ira talifusöda si no anehe ba wamazökhi koran, moguna ifindrakö ba kota si tehöngö gödo Lembaga moroi ba Pittsburgh, enaʼö oya koran zamazökhi artikel si teʼodane-dane ba Zura Niʼamoniʼö. Me no iʼangeraigö Russell mbua gera-erara andrö hegöi tanö böʼönia, ifindrakö gödo ba Brooklyn, New York, me 1909. Buania? Ha ba zi hauga waŵa me no findra gödo andrö, so mato 400 koran zamaʼanö huhuo Russell, ba itugu monönö manö nasa. Me tefasindro Mbanua Lowalangi me 1914, töra 2.000 koran zamaʼanö huhuo hegöi artikel moroi khö Russell ba zi öfa ngawalö li!

⁵ Hadia wamahaʼönia khöda? Moguna laʼoʼö wangide-ngideʼö niforomaʼö Russell ira talifusöda sangai halöwö ba organisasi Lowalangi ba ginötö andre. Lalania? Ba ginötö muhalö gangetula soguna, fatimbaisi mbua gera-era niha böʼö.—Baso Gamaedola 15:22.

6. Hewisa lua-lua ba zi samösa niha me no iʼila zindruhu si no mufazökhi ba artikel koran?

⁶ Ato niha si no mombulöʼö faʼaurira börö zindruhu sanandrösa ba Mbanua Lowalangi nifaʼanö ba koran-koran. (Heb. 4:12) Duma-dumania, Ora Hetzel, nibayagö idanö me 1917. Samösa ia moroi ba gotalua niha sato, zi oföna tefahaʼö ba zindruhu moroi ba artikel andrö. Imane Ora, ”Me no mangowaludo, möido khö mamagu ba Rochester, Minnesota. Me ofetado ba daʼö, uʼila-ila me iguti artikel moroi ba koran. Daʼö huhuo Russell. Itutunö mamagu hadia manö zi no ifahaʼö ia ba artikel koran andrö.” Itema zindruhu Ora ba tobali ia sanuriaigö Banua Lowalangi si lö faröi te ba zi 60 fakhe faʼara.

7. Hadia mbörö wa laʼogunaʼö koran-koran ira talifusöda sondröniaʼö?

⁷ Me 1916, so dombua zalua si tobali börö wa labato wangogunaʼö koran ba wanuriaigö ira sangai halöwö. Si oföna, börö me alua Wasuwöta Sebua me luo daʼö, abua wanöndra ngawalö fakake niʼogunaʼö ba pencetakan. Me 1916, itutunö departemen koran ba Inggris, ”Iadaʼa, hatö töra 30 koran si no mamaʼanö Ngawalö Huhuo. Ba zi lö aratö, tola manö alö waʼoyania börö me tedou mböli garate.” Si dua, börö me mate dalifusöda Russell me 31 mbaŵa si Fulu 1916. Iʼombakhaʼö The Watch Tower 15 mbaŵa si  Felendrua 1916, ”Me no mate dalifusöda Russell, tebato saʼae wamaʼanö huhuo [ba koran-koran].” Hewaʼae tebato lala wanuriaigö daʼa, so zui lala tanö böʼö si no mofozu yaʼia daʼö ”Drama-Foto Penciptaan”.

8. Hadia manö nifalua ba wangaʼasogö ”Drama-Foto Penciptaan”?

⁸ Famaehagö Gambara. Mato tölu fakhe mohalöwö Russell hegöi ira awönia ba wamazökhi ”Drama-Foto Penciptaan”, niʼombakhaʼö me 1914. (Gamd. 21:5) Mufotöi ia ”Drama” börö me orudua gambara nifawuʼa-wuʼa, rekaman li, hegöi slide kaca sogambara. Ngaotu niha si fao ba drama Zura Niʼamoniʼö andre, larekam ba pita film, ba lafaogö göi gurifö. So sambua laporan me 1913 sangumaʼö, ”Töra matonga laʼogunaʼö gurifö moroi ba taman margasatwa sebua ba wamazökhi Gambara Nifawuʼa-wuʼa enaʼö  terongo hulö simane me götö Noakhi ba wamaehagö siföföna.” Ira seniman ba London, New York, Paris, ba Philadelphia, lafolaʼa-laʼa faoma tangara ngaotu slide kaca.

9. Hana wa oya ginötö hegöi kefe niʼogunaʼö ba wangaʼazökhi ”Drama-Foto”?

⁹ Hana wa oya muʼogunaʼö ginötö hegöi kefe ba wamazökhi ”Drama-Foto”? Sambua gangetula si no mutema ba seri kebaktian 1913 itutunö, ”Mofozu sibai nikhamö koran-koran Amerika ba wamaʼanö bua gera-era niha sato, laʼogunaʼö kartun, duma-duma, faoma gambara nifawuʼa-wuʼa si no tehöngö ba si tola muʼogunaʼö gofu hezo so. Börö daʼö, faduhu dödöda, yaʼita sanuriaigö ba samahaʼö kelas-kelas Zura Niʼamoniʼö somasi tedou ba halöwö, datatuhini wangogunaʼö gambara nifawuʼa-wuʼa hegöi slide börö me tefaudu ba sökhi sibai na laʼogunaʼö ira sanuriaigö hegöi samahaʼö.”

10. Hezo ndrege no tefaʼema ”Drama-Foto”?

¹⁰ Me 1914, ero maʼökhö lafuta ”Drama-Foto” ba zi 80 kota. Arakhagö walu zuta niha samaigi ba Amerika Serikat hegöi ba Kanada. Ba ndröfi daʼö, lafuta göi ”Drama-Foto” ba Australia, Denmark, Finlandia, Inggris, Jerman, Norwegia, Selandia Baru, Swedia, hegöi ba Swiss. Ba mbanua sigide-ide, lafazökhi ”Drama-Foto” sadogo-dogo, si lö gambara nifawuʼa-wuʼa. Abölö mura wangehaogö yaʼia—”Drama Eureka”—ba aoha göi wolohe misa. Me 1916, lafoʼeluaha ”Drama-Foto” hegöi ”Drama Eureka” ba li Armenia, Denmark-Norwegia, Italia, Jerman, Polandia, Prancis, Spanyol, Swedia, hegöi Yunani.

11, 12. Hewisa zi samösa si bohou ebua toröi-röi ba dödönia ”Drama-Foto”, ba hadia duma-duma si tola taʼoʼö?

¹¹ Toröi-röi ba dödö nono matua si 18 fakhe sotöi Charles Rohner ”Drama-Foto” ba li Prancis. Imane Charles, ”No ufaigi ba mbanua si tumbu yaʼo—Colmar, Alsace, Prancis. Iʼotarai ba wamobörö me lafuta ia, adöni dödögu me mubotokhi zindruhu sanandrösa ba Zura Niʼamoniʼö.”

¹² Tebayagö idanö Charles, ba ihalö halöwö safönu inötö me 1922. Halöwönia si oföna yaʼia daʼö fao ia ba wangoromaʼö ”Drama-Foto” ba Prancis. Imane Charles sanandrösa ba halöwönia andrö, ”Oya ngawalö halöwögu—fabiola, hamba pembukuan, ba hamba lektur. Laʼandrö göi khögu ba wamahono niha sangondrasi fatua lö mubörögö waö-waö halöwö. Sagötö folombase, mabeʼe lektur. Mafataro samösa dalifusöda ira matua mazui ira alawe ero sambu-sambua nahia ba gedung. Laʼohe zamösana lektur ba laʼondrasi niha ero sambu-sambua oto-oto. Ba mbawandruhö weʼamöi ba gedung, mafaʼoli meza safönu lektur.” Me 1925, tekaoni Charles wohalöwö ba Mbetieli Brooklyn, New York. Ba daʼö, lafataro ia tobali samözi  note orkestra ba stasiun radio WBBR sawena mufasindro. Me no taʼila duma-duma dalifusöda Rohner, tola tasofu khöda samösa, ’Hadia aoha gölögu ba wotema halöwö gofu hadia ia manö ba wanuriaigö turia Mbanua Lowalangi?’—Baso Yesaya 6:8.

13, 14. Hewisa wangogunaʼö radio ba wamaʼema turia somuso dödö? (Faigi göi kotak ” Program ba WBBR” ba ” Kebaktian Bersejarah”.)

¹³ Radio. Me 1920-an ibörögö alö wamuta ”Drama-Foto”, hizaʼi laʼogunaʼö radio ba wamaʼema turia Mbanua Lowalangi. Me 16 mbaŵa si Öfa 1922, ifaʼema huhuo si tebai mu’olifugö talifusöda Rutherford ba radio Metropolitan Opera House ba Philadelphia, Pennsylvania. So mato 50.000 niha zamondrongo huhuo ”Lö Irai Mate Niha si Hauga Zuta Faʼato si No Auri Iadaʼa”. Aefa daʼö me 1923, ba zi oföna sibai, lafaʼema ba radio waö-waö halöwö ba kebaktian.Tenga göi ha stasiun-stasiun radio komersial niʼogunaʼöra, lahalö gangetula ira sondröniaʼö wa abölö sökhi na so stasiun radioda samösa, nifazökhi ba Staten Island, New York, ba lafasuraʼö döinia WBBR. Siaran si oföna, terongo me 24 mbaŵa si Dua 1924.

¹⁴ Itutunö The Watch Tower 1 mbaŵa si Felendrua 1924 ohitö dödö wa muʼogunaʼö WBBR, ”Faduhu dödöda wa radio andre mura ba tefaudu ba wamaʼema sindruhu.” Imane aefa daʼö, ”Na iʼila Soʼaya wa sinangea mufazökhi stasiun radio tanö böʼö ba wamaʼema sindruhu, ha ba niʼasogönia gefe moloʼö lalania si sökhi.” (Zin. 127:1) Me 1926, so önö ngawua stasiun radio khö nono mbanua Yehowa. Dombua ba Amerika Serikat, yaʼia daʼö WBBR ba New York hegöi WORD sahatö ba Chicago. Si öfa ngawua tanö böʼö so ba Kanada, yaʼia daʼö ba Alberta, British Columbia, Ontario, hegöi ba Saskatchewan.

15, 16. (a) Hadia nifalua ndra klerus börö siaran radioda? (b) Hewisa wa möi fanolo halöwö fanuriaigö nifalua ba nomo-omo misa ba wamaʼema huhuo sebua ba radio?

¹⁵ Ira klerus Agama-Agama Niha Keriso, laʼosisiʼö siaran radio sanandrösa ba zindruhu moroi ba Zura Niʼamoniʼö si no ofeta ba mbanua misa. Iʼila-ila Albert Hoffman halöwö nifalua ba stasiun radio ba Saskatchewan, Kanada, ba imane, ”Itugu ato zangila Ono Zekola Zura Niʼamoniʼö [töi Zamaduhuʼö Yehowa me luo daʼö]. Lafaʼema wamaduhuʼö sahöli-höli dödö irugi 1928. Ba ndröfi daʼö, lafaso zamatörö ira klerus enaʼö lö latehegö so stasiun radio ndra Samaduhuʼö Yehowa ba Kanada.”

¹⁶ Hewaʼae no laduhö stasiun radio ba Kanada, lö aetu laʼombakhaʼö huhuo moroi ba Zura Niʼamoniʼö ba stasiun-stasiun komersial. (Mat. 10:23) Enaʼö sökhi waö-waö halöwö ba radio andrö, The Watch Tower hegöi The Golden Age (iadaʼa Awake!, mazui Sadarlah!) lasura döi-töi stasiun radio komersial samaʼema sindruhu moroi ba  Zura Niʼamoniʼö, enaʼö lafarou dödö niha misa ira talifusöda wamondrongo huhuo nifaʼema ba stasiun radio si so ba mbanuara. Hadia mbuania? Imane Bulletin baŵa si Sara 1931, ”No tobali famarou dödö radio andrö khö ndra talifusöda ba wanuriaigö ba nomo-omo misa. Oya duria nirongoma wa ato niha samoli radio, ba laʼanemai latema mbuku nibeʼe khöra börö me no lafondro-ndrongo huhuo dalifusöda Rutherford.” Ifoʼamaedolagö siaran radio Bulletin andrö hegöi fanuriaigö ba nomo-omo misa tobali ”dombua lala si sökhi sibai ba wogamö niha sato moroi ba organisasi Zoʼaya.”

17, 18. Hewaʼae no faböʼö zalua, hewisa wa lö labato wangogunaʼö radio?

¹⁷ Me 1930-an, itugu tedou wolohi börö me taʼogunaʼö stasiun-stasiun radio komersial. Börö daʼö, ba gangohorita 1937, lafaudugö zinangea lafalua ono mbanua Yehowa ba zalua andrö. Lö laʼogunaʼö stasiun radio komersial ba laʼosambuaʼö dödöra ba wanuriaigö ba nomo-omo. a Hizaʼi, radio zabölö tefaudu ba wamaʼema turia somuso dödö ba soi sigide-ide mazui ba mbanua si lö manehegö fanuriaigö. Duma-dumania, iʼotarai 1951 irugi 1991, sambua stasiun radio ba Berlin Barat, Jerman, lö aetu-aetu ifaʼema huhuo moroi ba Zura Niʼamoniʼö irege larongo duria sanandrösa ba Mbanua Lowalangi niha si toröi ba Jerman Timur me luo daʼö. Tebörögö 1961 ba töra 30 fakhe aefa daʼö, sambua stasiun radio nasional ba Suriname, Amerika Selatan, lafaʼema waö-waö halöwö ero migu, 15 menit waʼara ba wangombakha sindruhu moroi ba Zura Niʼamoniʼö. Iʼotarai 1969 irugi 1977, töra 350 rekaman radio nifazökhi organisasi ba seri ”Oi Moguna Fefu Nösi Mbuku Niʼamoniʼö”. Ba Amerika Serikat, so 291 stasiun radio zamaʼema huhuo andrö ba zi 48 negara bagian. Me 1996, sambua stasiun radio ba Apia, ibu kota Samoa ba Pasifik Selatan, ifaʼema waö-waö halöwö ero migu, tuhonia ”Fanema Li ba Zinofumö Sanandrösa ba Zura Niʼamoniʼö”.

¹⁸ Ba gangohorita abad si-20, tenga saʼae radio zi tobali tuho ba wamaʼema turia somuso dödö. Hizaʼi, so teknologi böʼö si tola mogamö niha sato.

19, 20. Hana wa lafazökhi jw.org ono mbanua Yehowa, ba hewisa lua-luania? (Faigi göi kotak ” JW.ORG”.)

¹⁹ Internet. Me 2013, töra 2,7 miliar niha, arakhagö 40 persen niha ba zi sagörö ulidanö, zangogunaʼö Internet. Moloʼö si no muʼerai, so mato dua miliar niha sangogunaʼö perangkat bergerak, simane smartphone ba tablet ba wamokai Internet. Itugu monönö waʼatedounia ba zi sagörö ulidanö, hizaʼi tohude ba Afrika, töra 90 zuta niha sasese mowöli paket Internet. Tefalali lala ba wanemaʼö turia börö waʼatedou andrö.

 ²⁰ Tebörögö me 1997, laʼoʼö ono mbanua Yehowa lala si bohou ba wogamö niha sato. Me 2013, tola labokai situs Web jw.org mato 300 ngawalö li, ba tola la-download informasi si teʼodane-dane ba Zura Niʼamoniʼö ba zi töra 520 ngawalö li. Samaigi situs daʼa ero maʼökhö töra 750.000 niha. Ero waŵa, tenga ha lafaigi video, töra 3 zuta mbuku ni-download, 4 zuta majalah, ba 22 zuta fail audio.

21. Hadia wamahaʼö si tola öhalo moroi khö Sina?

²¹ Sökhi sibai wangogunaʼö situs Web andre ba wamaʼema turia Mbanua Lowalangi, hewaʼae ba soi si lö manehegö halöwö fanuriaigö. Duma-dumania, me böröta ndröfi 2013, isöndra situs jw.org samösa ira matua sotöi Sina, aefa daʼö itelefo gödo sebua ba Amerika Serikat, enaʼö iʼila danö böʼö nasa moroi ba Zura Niʼamoniʼö. Hana wa no sahöli-höli dödöda daʼa? Sina andre Dawa, si toröi ba mbanua side-ide si lö manehegö halöwö ndra Samaduhuʼö Yehowa. Buania, lahalö wahasara dödö ba wamahaʼö Sina ba Zura Niʼamoniʼö dua kali samigu, khö zi samösa talifusöda Samaduhuʼö ba Amerika Serikat. Lafalua wamahaʼö daʼa ba zi sambua layanan video Internet.

22, 23. (a) Hadia mubato wanuriaigö ba nomo-omo misa me no oya lala niʼogunaʼö ba wanuriaigö? (b) Hewisa wamahowuʼö Razo halowö nifaluada?

²² Lö labato wanuriaigö ba nomo-omo misa hewaʼae oya lala tanö böʼö niʼogunaʼö ba wogamö niha sato, simane koran, ”Drama-Foto”, radio, hegöi situs Web. Hadia mbörö? Börö me laʼoʼö duma-duma nibeʼe Yesu ono mbanua Yehowa. Tenga ha asala manuriaigö ia ba niha  sato; hizaʼi iʼosambuaʼö dödönia ba wanolo si samö-samösa niha. (Luk. 19:1-5) Ifahaʼö göi ndra nifahaʼönia Yesu enaʼö lafalua zimane daʼö, ba ibeʼe khöra duria sinangea lafaʼema. (Baso Luka 10:1, 8-11.) Simane si no tatutunö ba Faza 6, moguna lafarou dödö nono mbanua Yehowa yaʼira sondröniaʼö enaʼö faʼila bawa ira na fahuhuo ba niha.—Hal. 5:42; 20:20.

²³ Otu fakhe me no aefa tefasindro Mbanua Lowalangi, töra 7,9 zuta zowölö-ölö ba wamahaʼö niha böʼö sanandrösa ba gohitö dödö Lowalangi. Ifahowuʼö Razo ngawalö lala niʼogunaʼö ba wangombakha Banuania. Simane niʼombakhaʼö ba faza aefa daʼa, ifahowuʼö göi fefu ngawalö niʼogunaʼöda ba wanuriaigö turia somuso dödö ba ngawalö soi, mado, hegöi ba ngawalö li.—Fam. 14:6.