1, 2. (a) Hana wa lö aboto ba dödö ndra nifahaʼö? (b) Hadia geluaha wamasi niwaʼö Yesu?

 AMBÖ aboto ba dödö ndra nifahaʼö Yesu. Iwaʼö khöra, ”Mifaöga hörömi, ba mifaigi nowi, noa saʼae aʼusö, tandra wa basitö.” Lafaigi nowi nituturu Yesu, hizaʼi niʼilara andrö tenga afusi, owugeʼe—laʼa-laʼa liwiö seʼiri (barli). Te manofu-nofu ira, ’Hadia nibasi? Awena tola mubasi mato hauga waŵatö.’—Yoh. 4:35.

² Hizaʼi, tenga sindruhu wamasi niwaʼö Yesu. Iʼogunaʼö daʼa ba wameʼe khö ndra nifahaʼönia dombua wamahaʼö sanandrösa ba wamasi soʼamakhaita ba wamati—mamasi niha. Hadia manö? Enaʼö taʼila, datafaigi waö-waönia.

3. (a) Hadia mbörö wa iwaʼö Yesu, ”Nowi, noa saʼae aʼusö, tandra wa basitö”? (Faigi nisura ba gahe zura.) (b) Hadia niwaʼö Yesu enaʼö laʼila geluaha wehedenia?

³ Ahatö ba Zikhara fahuhuo Yesu khö ndra nifahaʼönia ba gafuriata 30 M, banua niha Zamaria. Me ahatö larugi mbanua daʼö ira nifahaʼönia, ibaloi ira Yesu ba zinga gumbu nidanö. Ba daʼö iʼombakhaʼö zindruhu sanandrösa ba wamati khö ndra alawe, ba alio iʼila wa moguna wamahaʼö Yesu. Me mangawuli ndra nifahaʼö, alio-lio wofanö ndra alawe daʼö ba Zikhara ba wangombakha khö zi falazi omo khönia sahöli-höli dödö nirongonia khö Yesu. Börö daʼö, ato niha somasi falukha khö Yesu. Tola manö me luo daʼö—me ifakhölö ia moroi ba zaröu wamaigi nowi, ato niha Zamaria sangondrasi yaʼia—imane Yesu, ”Mifaigi nowi, noa saʼae aʼusö, tandra wa basitö.” a Aefa daʼö, ba wangombakha wa tenga famasi sindruhu geluaha niwaʼönia, hizaʼi famasi ba wamati, inönö wangumaʼö, ”Samasi, ba iʼozaragö mbua ba waʼauri si lö aetu.”—Yoh. 4:5-30, 36.

4. (a) Hadia zi dombua famahaʼö nibeʼe Yesu sanandrösa ba wamasi? (b) Hadia manö wanofu nifatunöda?

⁴ Hadia zi dombua famahaʼö nibeʼe Yesu sanandrösa ba wamasi soʼamakhaita ba wamati? Si oföna, mangaösö halöwö. Fehedenia wa ”nowi, noa saʼae aʼusö tandra wa basitö” yaʼia daʼö fogaoni ira nifahaʼönia ba wamalua halöwö andrö. Ba wotandrösaigö khö ndra nifahaʼönia wa  mangaösö halöwö andrö imane Yesu, ”Itema saʼae luo samasi.” Sindruhu, no tebörögö wamasi—tebai mutaha-taha! Si dua, owua-wua dödö ndra sohalöwö. Imane Yesu, sananö ba samasi enaʼö ”faoma omuso dödöra”. (Yoh. 4:35b, 36) Simane faʼohahau dödö nirasoi Yesu me iʼila ”ato zamati khönia banua Zamaria”, simanö göi waʼohahau dödö nirasoi ndra nifahaʼönia ba halöwö wamasi soroi ba dödö. (Yoh. 4:39-42) Waö-waö salua me döfi siföföna andrö so gunania khöda börö me iʼombakhaʼö hadia zalua iadaʼa ba ginötö wamasi soʼamakhaita ba wamati götö waʼara. Hamega tebörögö wamasi ba ginötö daʼa? Haniha manö zi fao? Hadia mbuania?

5. Haniha zondröniaʼö famasi ba zi sagörö ulidanö, ba hewisa gangilata Yohane ba wangoromaʼönia wa aösö halöwö daʼa?

⁵ Ba gangilata Yohane, iforomaʼö Yehowa wa no ifataro Yesu ba wondröniaʼö halöwö wamasi niha ba zi sagörö ulidanö. (Baso Famaʼeleʼö 14:14-16.) Ba gangilata andrö, so dakula khö Yesu hegöi sabi. ’Takula anaʼa si so ba högö Yesu’ zamaduhuʼö dadaomania tobali Razo. ’Sabi satarö si so ba dangania’ zamaduhuʼö wa yaʼia zamasi. Me ifaʼema khö zi samösa malaʼika wa ”no oköli-köli mbasitö andrö-ba danö”, ifaduhuʼö Yehowa wa mangaösö halöwö andrö. Sindruhu, ”noa sa irugi inötö wamasi”, tebai mutaha-taha! Si tobali fanema li moroi ba niwaʼö Lowalangi ”fatörö zabimö andrö”, ifatörö zabinia Yesu, ba tebasi gulidanö—tebasi niha si so ba gulidanö. Ba gangilata andrö tefasugi ba dödöda wa ”nowi, noa saʼae aʼusö, tandra wa basitö”. Hadia itolo ita angilata andre ba wangiʼila hamega tebörögö wamasi ba zi sagörö ulidanö? Tatu manö!

6. (a) Hamega tebörögö ’mbaŵa wamasi’? (b) Hamega zindruhunia tebörögö ”mbasitö andrö ba danö”? Tutunö.

⁶ Börö me khö Yesu manandrösa gangilata Yohane nisura ba Wamaʼeleʼö faza 14, yaʼia Zamasi, samake takula (ayati 14), ba no alua wametaro yaʼia tobali Razo me 1914. (Dan. 7:13, 14) Lö ara aefa daʼö, itema fareta Yesu enaʼö ibörögö wamasi (ayati 15). Waö-waö si fagölö oroma ba gamaedola Yesu sanandrösa ba wamasi gandru; iwaʼö, ”Ba famasi, ba amozua götö danö andre.” Börö daʼö, baŵa wamasi ba amozua götö danö andrö tebörögö me 1914. Aefa daʼö, ”na baŵa wamasi”, tebörögö wamasi sindruhu. (Mat. 13:30, 39) Na tafuli tafaigi sejarahnia, tola taʼila wa famasi andrö tebörögö barö zi hauga fakhe me no tobali Razo Yesu. Si oföna, iʼotarai 1914 irugi böröta 1919, Yesu zangehao niha soloʼö khönia si no tebayoini. (Mal. 3:1-3; I Fet. 4:17) Aefa daʼö, me 1919, tebörögö ”mbasitö andrö  ba danö”. Lö itaha-taha, iʼogunaʼö Yesu zawuyu si lö faröi si bohou ifataro ba wanolo ira talifusöda enaʼö laʼila wa mangaösö halöwö fanuriaigö andre. Faigi hadia zalua.

7. (a) Hadia zanolo ira talifusöda enaʼö aboto ba dödöra wa mangaösö halöwö fanuriaigö andrö? (b) Hadia lua-luania khö ndra talifusöda?

⁷ Me baŵa si Fitu 1920, imane The Watch Tower, ”Me no lafareso Zura Niʼamoniʼö, oroma wa tebeʼe halöwö si sökhi sinangea ifalua osali ba wamaʼema turia mbanua Lowalangi.” Duma-dumania fehede nifaʼeleʼö Yesaya, itolo ndra talifusöda ba wangiʼila wa moguna muʼombakhaʼö duria Mbanua Lowalangi ba zi sagörö ulidanö. (Yes. 49:6; 52:7; 61:1-3) Lö laʼila hewisa wangasiwai halöwö daʼa, hizaʼi faduhu dödöra wa hasambalö ituturu khöra lala Yehowa. (Baso Yesaya 59:1.) Me so khöra waʼaboto ba dödö sanandrösa ba halöwö fanuriaigö andre, terou dödö ndra talifusöda ba wondrouʼö halöwöra. Hadia nifaluara?

8. Me 1921, hadia zi dombua ngawalö zaboto ba dödö ndra talifusöda sanandrösa ba halöwö fanuriaigö?

⁸ Me baŵa si Felendrua 1921, iʼombakhaʼö The Watch Tower, ”Döfi si sökhi ndröfi daʼa; ba ato niha zamondrongo sindruhu me 1921 moroi ba ndröfi si lalö.” Imane nasa majalah daʼö, ”Hizaʼi oya nasa zinangea mufalua. . . . Datafalua ia si fao faʼowua-wua dödö.” Faigi dombua zindruhu si faoma moguna, niʼila ndra talifusöda sanandrösa ba halöwö fanuriaigö nitandrösaigö Yesu khö ndra sinengenia: Mangaösö halöwönia, ba owua-wua dödö zohalöwö.

9. (a) Me 1954, hadia gangetula nihalö The Watchtower sanandrösa ba halöwö wamasi, ba hadia mbörö? (b) Hadia zalua barö zi 50 fakhe andre sanandrösa ba waʼatedou ndra sanuriaigö ba zi sagörö ulidanö? (Faigi grafik ” Faʼatedou ba zi Sagörö Ulidanö”.)

⁹ Me 1930-an, me no aboto ba dödö ndra talifusöda wa angowuloa sebua mbiri-biri böʼö latemaʼö duria Mbanua Lowalangi, ladouʼö nasa halöwö fanuriaigö. (Yes. 55:5; Yoh 10:16; Fam. 7:9) Buania? Tedou waʼato zanuriaigö moroi ba zi 41.000 me 1934 tobali 500.000 me 1953! Ihalö gangetula The Watchtower 1 mbaŵa si Felendrua 1954, ”Eheha Yehowa ba faʼabölö Daromalinia zamalua famasi sebua ba zi sagörö ulidanö.” b—Zakh. 4:6.

10, 11. Hadia manö nitutunö ba gamaedola sanandrösa ba hunö moster?

¹⁰ Ba gamaedola Yesu sanandrösa ba Mbanua Lowalangi, ifaʼeleʼö mbua wamasi faoma fehede si sökhi nifoʼamaedola. Datafaigi duma-duma sanandrösa ba hunö moster (lada) hegöi ragi (laru). Datafaigi hewisa waʼaluania ba ngaluo safuria.

¹¹ Amaedola sanandrösa ba hunö moster. Samösa ndra matua itanö sambua hunö moster. Hunö daʼa tumbu tobali eu si tobali nahia wanuge wofo. (Baso Mataiʼo 13:31, 32.) Hadia manö nitutunö ba gamaedola daʼa? (1) Ahöli-höli dödöda waʼamanöinia. ”Si no fondrege zide-ide mbua zinanö” tobali ”modaha sebua ia”. (Mrk. 4:31, 32) (2) No tatu waʼamanöinia. ”Ba na no mufazaewe [danömö andrö], ba manöi.” Lö iwaʼö Yesu, ”Tola manö manöi ia.” Löʼö. Imane Yesu, ’Manöi ia.’ Tebai mubatogö waʼamanöinia. (3) Adöni dödö zangondrasi ba waʼamanöi geu sebua andrö ba tobali nahia wolombase. ’Tohare wofo ba dalu mbanua’ ba ”mangazuni ba ndrahania”. Hewisa zi tölu ngawalö andre manandrösa ia ba wamasi soʼamakhaita ba wamati ba ginötö daʼa?

12. Hewisa wa tefaudu gamaedola sanandrösa ba hunö moster ba halöwö wamasi ba ginötö andre? (Faigi bagan ” Itugu Monönö Waʼato Nifahaʼö ba Zura Niʼamoniʼö”.)

¹² (1) Faʼamanöinia: Amaedola andre manandrösa ba waʼatedou duria Mbanua Lowalangi hegöi banua niha Keriso. Iʼotarai me 1919, muʼowuloi zamasi sowölö-ölö ba mbanua niha Keriso si no lahaogö. Me luo daʼö, lö ato zohalöwö, hizaʼi alio waʼatedounia. Ahöli-höli dödöda waʼatedounia iʼotarai me 1900-an irugi iadaʼa. (Yes. 60:22) (2) Faʼatatu: Faʼatedou mbanua niha Keriso tebai musaisi. Hewaʼae fanandraigö moroi ba nudu Lowalangi andrö hulö gara solangögö tanömö side-ide, hizaʼi tedou manö ia—itimbagö fefu wanandraigö. (Yes. 54:17) (3) Nahia wanuge: ’Fofo ba dalu mbanua’ sanöndra nahia wanuge ba geu daʼö amaedola niha satulö tödö si hauga zuta faʼato ba zi 240 soi sanemaʼö turia Mbanua Lowalangi si tobali banua niha Keriso. (Hez. 17:23) Ba daʼö latema gö ba wamati, faʼowua-wua dödö, hegöi folumöʼö.—Yes. 32:1, 2; 54:13.

13. Hadia manö nitutunö ba gamaedola sanandrösa ba ragi?

¹³ Amaedola sanandrösa ba ragi. Me no aefa inönö ragi si samösa ira alawe ba hamo darigu, iʼaisöni maʼafefu. (Baso Mataiʼo 13:33.) Hadia manö nitutunö ba gamaedola daʼa? Faigi zi dombua ngawalö andre. (1) Faʼatedou zamobörö faʼatebulö. Iʼanöröi ragi andrö fefu zi no mufaruka ”irege aisö maʼafefu”. (2) Fatutu waʼatedou. Iʼanöröi ragi andrö fefu ”ba zi tölu yöu hamo”. Hewisa zi dua ngawalö  andre manandrösa ia ba wamasi soʼamakhaita ba wamati ba ginötö daʼa?

14. Hewisa wa tefaudu gamaedola sanandrösa ba ragi ba halöwö wamasi ba ginötö andre?

¹⁴ (1) Faʼatebulö: Ragi eluahania turia Mbanua Lowalangi, ba hamo darigu no amaedola niha gulidanö. Simane ragi nifaruka ba hamo darigu so waʼatebulö, simanö göi duria Mbanua Lowalangi tola ibulöʼö dödö niha sanemaʼö yaʼia. (Rom. 12:2) (2) Fatutu: Foʼanöröi ragi ba hamo darigu eluahania famazaewe turia Mbanua Lowalangi. Faruka ragi ba hamo darigu andrö irege iʼaisöni maʼafefu. Simanö göi duria Mbanua Lowalangi andrö iʼanöröi ”irugi wondrege danö”. (Hal. 1:8) Ba gamedola andre oroma göi wa tefazaewe duria Mbanua Lowalangi ba soi si lö manehegö halöwöda, hewaʼae lö laʼameʼegö tödö.

15. Hewisa wa alua wehede Yesaya 60:5, 22? (Faigi kotak ” Börö Yehowa Wa Tola Alua”, ngaʼörö 93, ba ” ’Fondrege Zide-ide’ Tobali ’Soi Sabölö’”, ngaʼörö 96-97.)

¹⁵ Mato 800 fakhe fatua lö itutunö Yesu gamaedola si dombua andrö, ifaʼema Yehowa khö Yesaya wamaʼeleʼö nikhamö wamasi soʼamakhaita ba wamati iadaʼa hegöi  faʼomuso dödö ba li sauli itörö tödö. c Iwaʼö Yehowa wa niha moroi ba ”zaröu” laʼondrasi organisasinia. Imane Yehowa khö ndra ’alawe’, niʼamaedolagö niha nibayoini si toröi ba gulidanö, ”Na öʼila dania, ba humaga mbawau [ba waʼomuso dödö], humufa dödöu ba ebolo; isawa saʼae ndraʼugö anaʼa si otarai nasi, möi khöu girö-girö niha baero.” (Yes. 60:1, 4, 5, 9) Itörö sibai wehede daʼö! Iadaʼa, ono mbanua Yehowa si no ara ba wamati omuso dödöra me laʼila itugu monönö zanuriaigö Banua Lowalangi ba soira, si lö atoto tobali ngahönö.

16, 17. Hana wa ’faoma omuso dödö, he sanaru, he samasi’? (Faigi kotak ” Dombua Risalah Fagöna ba Dödö zi Darua Niha ba Amazon”.)

¹⁶ Te itörö tödöu hadia niwaʼö Yesu khö ndra sinengenia, ”Samasi . . . iʼozaragö mbua ba waʼauri si lö aetu, enaʼö faoma omuso dödöra, he sanaru, ba he samasi.” (Yoh. 4:36) Hadia manö zi ’faoma omuso dödöda’ ba wamasi ba zi sagörö ulidanö? Datafaigi zi tölu ngawalö andre.

¹⁷ Si oföna, omuso dödöda me fao Yehowa ba halöwö daʼa. Ba ginötö taturiaigö Mbanua Lowalangi, no tafazaewe danömö zinanö. (Mat. 13:18, 19) Na tatolo niha nifahaʼöda ba Zura Niʼamoniʼö tobali nifahaʼö Keriso, no tabasi mbuania. Tarasoi waʼomuso dödö sebua ba ahöli-höli dödöda na tanehegö hewisa Yehowa ba ’wamotalinga hegöi ba wamanöi tanömö Mbanua Lowalangi’. (Mrk. 4:27, 28) So göi danömö zinanö si no ara tafazawili awena motalinga, ba niha böʼö zamasi. Te no irai örasoi zi no alua khö Joan, talifusöda ira alawe ba Inggris si no tebayagö idanö 60 fakhe si lalö. Imane, ”Falukha ndraʼo ba niha sangumaʼö wa yaʼo zananö tanömö andrö ba dödöra me manuriaigö ndraʼo ba zi hauga fakhe si lalö. Ba zi lö uʼila, so ndra Samaduhuʼö tanö böʼö zamahaʼö ba sanolo yaʼira tobali ono mbanua Yehowa. Omuso dödögu börö me tedou danömö zinanö si no ufazaewe ba mubasi.”—Baso I Korindro 3:6, 7.

18. Hadia mbörö wa omuso dödöda moloʼö I Korindro 3:8?

¹⁸ Si dua, tobali ita sohalöwö sowua-wua tödö na lö olifu ita wehede Waulo, ”Itema sa luonia zamösana, balazi halöwönia.” (I Kor. 3:8) Tebeʼe luo börö halöwö nifaluania, tenga buania. Börö zi no ifabuʼu andre, hawaʼebua waʼomuso dödö zi möi manuriaigö ba mbanua sambö manemaʼö turia si sökhi! Ba wamaigi Lowalangi, fefu Zamaduhuʼö sangodödögö famazaewe ’oya latema mbua’, ba daʼa zameʼe khöra faʼomuso dödö.—Yoh. 15:8; Mat. 13:23.

19. (a) Moloʼö si no ifaʼeleʼö Yesu ba Mataiʼo 24:14, hadia mbörö wa lö aetu waʼomuso dödöda? (b) Hadia zinangea tatörö tödöda na lö mofozu niha nifahaʼöda?

¹⁹ Si tölu, owua-wua dödöda börö me fao ita ba wamalua halöwö si no tefaʼeleʼö. Faigi wanema li nibeʼe Yesu me manofu ndra sinengenia, ”Hadia dandra waʼasomö ba  tandra waʼatua danö?” Ifatunö khöra sambua dandrania yaʼia daʼö halöwö fanuriaigö ba zi sagörö ulidanö. Hadia halöwö fombaliʼö nifahaʼö geluaha niwaʼönia? Tenga. Imane, ”Ba teturiaigö mbanua Lowalangi andrö, turia somuso dödö, ba gulidanö misa, maʼasagörö, ba wamaduhuʼö.” (Mat. 24:3, 14) Börö daʼö, fanuriaigö Banua Lowalangi—famazaewe tanömö—daʼö sambua dandrania. Tobali, ba ginötö taturiaigö duria Mbanua Lowalangi, böi olifu ita hewaʼae na lö aʼozu tobali nifahaʼö ira, hizaʼi no aʼozu wameʼeda sambua ’famaduhuʼö’. d Gofu hewisa wanemaʼöra, no fao ita wamalua halöwö nifaʼeleʼö Yesu ba taʼokhögö döi sebua tobali ’sanolo ba halöwö khö Lowalangi’. (I Kor. 3:9) Daʼa mbörö wa owua-wua dödöda!

20, 21. (a) Hewisa wa alua wehede Maleakhi 1:11? (b) Hadia gangetula sinangea öhalö ba halöwö wamasi, ba hadia mbörö?

²⁰ Me döfi siföföna, itolo ndra sinengenia Yesu enaʼö laʼila wa mangaösö halöwö wamasi andrö. Iʼotarai 1919 irugi iadaʼa, lö aetu-aetu ibeʼe wanolo Yesu khö ndra nifahaʼönia. Andrö, owölö-ölö nono mbanua Lowalangi ba wamalua halöwöra. Sindruhu wa tebai musaisi halöwö wamasi. Simane nifaʼeleʼö Maleakhi, mufalua halöwö fanuriaigö iadaʼa ”iʼotarai sa ba gatumbukha luo, numalö ba gaekhula”. (Mal. 1:11) Atulö, iʼotarai gatumbukha numalö ba gaekhula, gofu hezo so manö ba zi sagörö ulidanö—samazaewe ba samasi faoma mohalöwö ba owua-wua dödöra. Iʼotarai gatumbukha numalö ba gaekhula—iʼotarai sihulö wongi irugi tanö owi, sara ngaluo—mangaösö dödöda wamalua halöwö.

²¹ Na ifuli tafaigi ginötö barö zi 100 fakhe si lalö ba taʼila hewisa waʼatedou ngawawa side-ide tobali ”soi sabölö”, ba ”humufa” dödöda safönu faʼowua-wua dödö. (Yes. 60:5, 22) Faʼowua-wua dödö ba faʼomasida khö Yehowa, ’Sokhö basitö’, daʼö zamarou yaʼita lö taböhöli wamalua halöwö wamasi sabölö ebua sagötö faʼara!—Luk. 10:2.