FAIGI hawaʼomuso dödö niha nifahaʼöu ba Zura Niʼamoniʼö me awena aboto ba dödönia ayati sawena ibaso. Imane, ”Eluahania, tola auri ita sagötö faʼara ba Waradaiso—ba daʼa ba gulidanö andre?” Iboho mbawa awömö weʼamöi manuriaigö ba imane, ”Hadia zi no öbaso ba Zura Niʼamoniʼö?” Si fao faʼomuso dödö ifalikhö-likhö högönia börö waʼahöli-höli dödönia, ba imane ”Aha, awena uʼila daʼa!” Itörö tödömö wa daʼö göi niwaʼönia hauga migu si lalö me awena iʼila wa Yehowa döi Lowalangi.

Hadia no irai alua khöu zimanö? Ato nono mbanua Lowalangi zanörö simane daʼö. Arakhagö lö si fakhili-khili ba mbuala sebua böli tanö böʼö baero zi no tatema andre—faʼaboto ba dödö sanandrösa ba zindruhu! Angeraigö atö: Hewisa wa tola ofeta mbuala andrö khöu? Ba faosatö daʼa, taʼalui wanema linia. Lala nono mbanua Lowalangi ba wanemaʼö faʼaboto ba dödö sanandrösa ba wamati tenga ha samuza, ba daʼö no tobali tandra wa toʼele Mbanua Lowalangi. Ba zi otu fakhe, Razo, Yesu Keriso inehegö wa tefahaʼö nono mbanua Lowalangi ba zindruhu.