1, 2. Hadia mbörö wa tefotöi Yesu sanuturu lala satua-tua?

 KHALAIGÖ atö na iʼohe ndraʼugö sanuturu lala si no ara mohalöwö ba wamasui sambua banua sebua ba si sökhi sibai. Öhaogö öfondro-ndrongo fefu ngawua wehedenia börö me awena möiʼö ba daʼö hegöi ira awömö. So zomasi miʼila sanandrösa ba mbanua daʼö. Na ösofu khö zanuturu lala andrö, awena itema limö na no oroma nisofumö. Tatu itugu ahöli-höli dödöu ba waʼatua-tuania börö me ifatunö khöu zinangea öʼila ba ginötö si tefaudu.

² Fagölö niha Keriso ba niha si möi manörö ba zi sambua banua. Omasi taʼila mbanua sebua si sökhi sibai, ’banua andrö, saro dane-dane’, yaʼia daʼö Banua Lowalangi. (Heb. 11:10) Me so Yesu ba gulidanö, yaʼia zanuturu lala khö ndra soloʼö khönia, iʼohe dangara ba wanöndra faʼaboto ba dödö ba Mbanua Lowalangi. Hadia ibeʼe wanema li ba ngawalö zinofura ba iʼanemai ifatunö khöra me luo daʼö fefu zanandrösa ba Mbanua Lowalangi? Löʼö. Imane, ”Waʼoya na niwaʼögu khömi, ba tebai mitaha iadaʼe.” (Yoh. 16:12) Börö me sanuturu lala satua-tua Yesu, lö ibeʼe khö ndra nifahaʼönia waʼaboto ba dödö si tebai laʼonoro nasa.

3, 4. (a) Hewisa wamahaʼö Yesu niha si lö faröi sanandrösa ba Mbanua Lowalangi? (b) Hadia nifatunöda ba faza daʼa?

³ Ifaʼema Yesu wehedenia ba Yohane 16:12 ba mbongi fatua lö mate ia ba gulidanö. Me no aefa mate ia, hewisa wamahaʼönia niha si lö faröi ba Mbanua Lowalangi? Ifaduhuʼö ba dödö ndra sinengenia, ”Eheha si duhu andrö . . . iʼoromaʼö khömi lala ba zi duhu fefu.” a (Yoh. 16:13) Tola takhalaigö tobali sanuturu lala sebolo tödö khöda geheha niʼamoniʼö. Eheha andrö niʼogunaʼö Yesu ba wamahaʼö soloʼö khönia fefu zinangea laʼila sanandrösa ba Mbanua Lowalangi—ba ginötö moguna laʼila.

⁴ Datafaigi hewisa geheha Yehowa wameʼenia fanuturu lala ba niha Keriso satulö tödö ba wanöndra faʼaboto ba dödö sebua sanandrösa ba Mbanua Lowalangi. Si oföna, datafaigi hadia zaboto ba dödöda sanandrösa hamega ibörögö mamatörö Mbanua Lowalangi. Aefa daʼö,  tatutunö haniha zamatörö yaʼia hegöi si tobali ono Mbanua Lowalangi ba hadia dötönaföra. Safuria, tafaigi hewisa niha soloʼö khö Keriso ba wanöndra faʼaboto ba dödö sanandrösa ba geluaha waʼalöfaröi ba Mbanua Lowalangi.

5, 6. (a) Hadia waʼaboto ba dödö si fasala ba Nono Zekola Zura Niʼamoniʼö sanandrösa ba Mbanua Lowalangi hegöi baŵa wamasi? (b) Hewaʼae fasala waʼaboto ba dödö andrö, hana wa lö aombö dödöda wa Yesu zololohe tanga niha soloʼö khönia?

⁵ Simane niʼilada ba Faza 2 mbuku daʼa, no latatugöi Ono Zekola Zura Niʼamoniʼö ba zi hauga wulu fakhe wa döfi 1914 no döfi si tebai muʼaohasi ba dödö ba waʼalua nifaʼeleʼö Zura Niʼamoniʼö. Hizaʼi, me luo daʼö faduhu dödöra wa feʼaso Keriso tebörögö me 1874, ibörötaigö mamatörö ia ba zorugo me 1878, ba awena musindro Mbanua Lowalangi me baŵa si Fulu 1914. Tebörögö mbaŵa wamasi iʼotarai 1874 irugi 1914, ba fozunia me teʼowuloi niha nibayoini ba zorugo. Börö me fasala waʼaboto ba dödö andrö, hadia aombö dödöda wa iʼogunaʼö geheha niʼamoniʼö Yesu ba wololohe tanga niha nibayoini?

⁶ Tatu löʼö! Fuli khalaigö duma-duma si no mututunö mege. Hadia aombö dödöda khö zanuturu lala andrö börö me no ihulö wangombakha hegöi fanofu niha si möi ba mbanua daʼö? Löʼö! Simanö göi, hewaʼae itaria laʼodödögö ono mbanua Lowalangi wangiʼila fefu ohitö dödö Yehowa fatua lö ibeʼe khöra wanuturu lala eheha niʼamoniʼö, ba daʼö oroma wa Yesu zololohe tangara. Börö daʼö, omasi niha si lö faröi na muʼatulöʼö waʼaboto ba dödöra ba lafaudugö ia si fao fangide-ngideʼö.—Yak. 4:6.

7. Hadia haga ba wamati si tobali howu-howu ba nono mbanua Lowalangi?

⁷ Me no aefa ndröfi 1919, tefahowuʼö nono mbanua Lowalangi, itugu tara haga wamati khöra. (Baso Gamaedola 4:18.) Me 1925, no muhaogö sambua artikel ba The Watch Tower, tuhonia ”Birth of the Nation” (Faʼatumbu Sambua Soi). Ba artikel andrö, oroma dandra Zura Niʼamoniʼö wa musindro Mbanua Mesia me 1914, alua zimane nifaʼeleʼö ba Wamaʼeleʼö faza 12 sanandrösa ba ndra alawe zorugo khö Lowalangi. b Itutunö artikel daʼö wa famakao hegöi abula dödö nitaögö nono mbanua Yehowa me alua wasuwöta, no sambua tandra wa no tetiboʼö Zatana moroi ba zorugo, ”no ebua wönunia, ba me no iʼila, lö ara nitehe khönia”.—Fam. 12:12.

8, 9. (a) Hewisa wangabakhaiʼö faʼamoguna Mbanua Lowalangi? (b) Hadia manö wanofu nifatunöda ba duho daʼa?

⁸ Hawaʼamoguna Mbanua Lowalangi? Me 1928, itandrösaigö The Watch Tower wa abölö moguna Mbanua Lowalangi moroi ba wangorifi zi samö-samösa niha nibeʼe börö höli. Sindruhunia, ba Mbanua Mesia iʼamoniʼö döinia Yehowa, iʼatulöʼö waʼasalawania, ba ifalua fefu gohitö dödönia sanandrösa ba niha gulidanö.

⁹ Haniha nawö Keriso ba wamatörö Mbanua Lowalangi? Haniha zi tobali ono Mbanua Lowalangi ba gulidanö? Ba, hadia halöwö sinangea lafalua niha soloʼö khö Keriso?

10. Hadia zi no ara laʼila ono mbanua Lowalangi sanandrösa ba zi 144.000?

¹⁰ Hauga wulu fakhe fatua lö 1914, aboto ba dödö niha Keriso sindruhu wa fao mamatörö awö Keriso niha soloʼö khönia si lö faröi si 144.000 faʼato ba zorugo. c Laʼila Ono Zekola Zura Niʼamoniʼö wa daʼö faʼato nitatugöi ba tebörögö teʼowuloi ira me döfi siföföna M.

11. Hewisa waʼatedou waʼatua-tua niha sedöna tobali niʼowalu khö Keriso sanandrösa ba halöwö nifaluara ba gulidanö?

¹¹ Hadia halöwö nitema niha sedöna tobali niʼowalu khö Keriso me so ira ba gulidanö? Lafaigi wa iʼabakhaiʼö Yesu halöwö fanuriaigö ba ifakhai daʼö ba mbaŵa wamasi. (Mat. 9:37; Yoh. 4:35) Simane niʼilada ba Faza 2, lawalinga alua mbaŵa wamasi ba zi 40 fakhe faʼara, ba fozunia me teʼowuloi niha nibayoini ba zorugo. Hizaʼi, lö tebato halöwö andrö me no numalö zi 40 fakhe, börö daʼö moguna mubohouni waʼaboto ba dödö. Iadaʼa, taʼila wa baŵa wamasi—baŵa wamöföʼö gandru moroi ba goʼo, hegöi niha Keriso nibayoini si lö faröi moroi ba niha Keriso faya—tebörögö me 1914. Daʼa ginötö ba wangosambuaʼö fangera-ngera ba wangowuloi ngawawa si tosai si möi ba zorugo!

12, 13. Hewisa wa alua gamaedola nibeʼe Yesu sanandrösa ba nono alawe si dafulu hegöi balaki ba ngaluo safuria?

¹² Iʼotarai 1919, lö aefa ibeʼe Keriso wanuturu lala khö ndra sawuyu si lö faröi ba satua-tua ba wangabakhaiʼö halöwö fanuriaigö. Ibeʼe halöwö andrö me döfi siföföna. (Mat. 28:19, 20) Iforomaʼö göi ngawalö gamuata soguna ba niha nibayoini ba wamalua halöwö daʼö. Hewisa lalania? Ba gamaedolania sanandrösa ba nono alawe si dafulu, iforomaʼö Yesu wa moguna ba niha nibayoini lafaʼanö ira, böi mörö ira ba wamati na omasi lakhamö gohitö dödöra si oföna, yaʼia daʼö fao ba wangowalu solakhömi ba zorugo, ba ginötö teʼosambuaʼö Keriso khö zi 144.000 ”nono nihalö”. (Fam. 21:2) Aefa daʼö, ba gamaedola sanandrösa ba mbalaki, ifahaʼö Yesu wa moguna owölö-ölö niha nibayoini ba wamalua halöwö fanuriaigö si no ifaduhusi tödö khöra.—Mat. 25:1-30.

 ¹³ Ba zi otu fakhe andre, oroma wa lö mörö ba wamati niha nibayoini ba owölö-ölö ira. Tatu manö tefahowuʼö gamuatara andrö! Hizaʼi, hadia halöwö wamasi sebua andre ha ba wangowuloi niha si tosai moroi ba zi 144.000 nawö Keriso wamatörö ba zorugo?

14, 15. Tutunö zi öfa ngawawa si no tefatunö ba mbuku The Finished Mystery.

¹⁴ No ara omasi laʼila ira niha si lö faröi haniha ”zato sibai” (”angowuloa sebua”, Terjemahan Lama) ba Famaʼeleʼö 7:9-14. Börö me tenga inötönia khö Keriso ba wangombakha haniha ngawawa sato sibai, andrö lö tokea ita na aröu faböʼö waʼaboto ba dödö sanandrösa ba duho daʼa moroi ba zindruhu niʼilada ba niʼomasiʼöda ba ginötö andre.

¹⁵ Me 1917, imane buku The Finished Mystery wa so ”dombua bosi mazui ngawalö wangorifi ba zorugo, ba so dombua bosi mazui ngawalö wangorifi ba gulidanö”. Haniha manö zi öfa ngawawa andrö si faböʼö-böʼö tötönafö fangorifi? Si oföna, so 144.000 niha samatörö awö Keriso ba zorugo. Si dua, so ngawawa sato sibai. Faʼaboto ba dödö me luo daʼö, yaʼira andrö niha sangotöigö waʼaniha Keriso si lö saefa ba gereja-gereja Agama-Agama Niha Keriso. So khöra wamati, hizaʼi ambö aro dödöra ba wangoromaʼö falöfaröira. Börö daʼö, tebeʼe khöra dadaoma si lö alawa ba zorugo. Sanandrösa ba gulidanö, so waʼaboto ba dödö wa ngawawa si tölu, ”niha me föna”—yaʼia daʼö niha si lö faröi simane Aberahamo, Moze, hegöi niha böʼö—mamatörö ira ba ngawawa si öfa, yaʼia daʼö niha gulidanö.

16. Hadia haga ba wamati niʼombakhaʼö me 1923 ba 1932?

¹⁶ Hewisa geheha niʼamoniʼö wameʼenia fanuturu lala khö ndra soloʼö Keriso sanandrösa ba waʼaboto ba dödö niʼameʼegöda tödö ba ginötö andre? Ibeʼe haga ba wamati ba lö isamuzaigö wamalua daʼö. Iʼotarai 1923, so ngawawa si lö möi ba zorugo nitutunö The Watch Tower, hizaʼi manötöna ira auri ba gulidanö barö wamatörö Keriso. Me 1932, itutunö The Watch Tower sanandrösa khö Yonadabi. Fao ia khö Yehu, razo ndraono Gizaraʼeli si no ibayoini Lowalangi, ba wangohori famosumange sofaya. (II Raz. 10:15-17) Imane ba artikel daʼö, so ngawawa niha ba ginötö andre simane Yonadabi, ba iʼohe ira Yehowa enaʼö ”aefa moroi ba wamakao ba Hamagedo” ba auri ba gulidanö.

17. (a) Hadia haga ba wamati niʼombakhaʼö me 1935? (b) Hewisa dödö niha Keriso si lö faröi sanandrösa ba waʼaboto ba dödö si bohou? (Faigi kotak ” Omuso Dödö Niha si Tohare”.)

¹⁷ Me 1935, tara haga wamati. Ba kebaktian Washington, DC, laʼila wa ngawawa sato sibai no ngawawa sauri ba gulidanö, fagölö ira simane biri-biri ba gamaedola Yesu sanandrösa ba mbiri-biri ba nambi. (Mat. 25:33-40, Terjemahan Dunia Baru [NW]) Ngawawa sato sibai yaʼia daʼö ’biri-biri böʼö’, simane me iʼwaʼö Yesu, ”Lö tola lö uhalö ira.”  (Yoh. 10:16) Me imane J.F. Rutherford, ”Si so fanötöna sauri ba gulidanö yamuzizio” töra mamatonga zozizio! Imane, ”Hiza! Gangowuloa sebua!” Ato zi terou tödö börö me laʼila ba gafuriatania hezo dötönaföra ba zi so föna.

18. Hadia manö niʼodödögö zoloʼö khö Yesu ba wanuriaigö, ba hadia mbuania?

¹⁸ Iʼotarai daʼö, ibeʼe wanuturu lala Keriso khö ndra soloʼö khönia enaʼö laʼosambuaʼö waʼabölöra ba wangowuloi niha sedöna tobali ngawawa sato sibai, si teʼorifi moroi ba wamakao sabölö-bölö. Ba wamobörö, lö faʼahöli-höli dödö ba wangowuloi andrö. No irai iwaʼö talifusöda Rutherford, ”Hulö lö atoto ’ngawawa sato sibai’ andre.” Iadaʼa, taʼila hawaʼebua howu-howu Yehowa ba wamasi andrö! Börö me ibeʼe wanuturu lala Yesu hegöi eheha niʼamoniʼö, tobali ”ha sambawa nikubaloi” niha nibayoini hegöi awöra ”biri-biri böʼö”, ba ’ha samösa gubalora’ simane nifaʼeleʼö Yesu.

19. Hewisa enaʼö tola fao ita ba wonönö faʼato ngawawa sato sibai?

¹⁹ Satonia, auri niha si lö faröi ba gulidanö faradaiso sagötö faʼara, barö wamatörö Keriso hegöi awönia si 144.000. Hadia lö omuso dödöda woʼangerönusi nifalua Keriso ba wanuturu lala ba nono mbanua Lowalangi enaʼö so dötönaföra si tatu moroi ba Zura Niʼamoniʼö? No sambua töi sebua khöda daʼa ba wamatunö tötönafö andrö ba niha nifalukhaisida ba wanuriaigö! Yaʼowölö-ölö ita fatua so ginötö enaʼö monönö waʼato ngawawa sato sibai irege tefolakhömi döi Yehowa!—Baso Luka 10:2.

20. Hadia zi tefarahu ba organisasi Zatana, ba hadia geluahania lö faröi ba niha Keriso?

²⁰ Börö me lö aetu lafahaʼö ira ono mbanua Lowalangi sanandrösa ba Mbanuania, moguna laʼila hadia geluahania lö faröi ba wamatörö zorugo andrö. Börö daʼö, me 1922, iforomaʼö The Watch Tower wa so dombua organisasi sohalöwö, organisasi Yehowa ba organisasi Zatana. Si farahu ba organisasi Zatana yaʼia daʼö fogale, agama, hegöi politik. Niha si lö faroi ba Mbanua Lowalangi nifatörö Keriso, lö faʼawö ira ba organisasi Zatana andrö, gofu hewisa ia. (II Kor. 6:17) Hadia geluahania?

21. (a) Hewisa zawuyu si lö faröi ba wameʼe famangelama ba nono mbanua Lowalangi sanandrösa ba wangalui kefe sebua? (b) Me 1963, hadia niʼombakhaʼö The Watchtower sanandrösa ba ”Mbabilona Sebua”?

²¹ Lö tebato gö wamati moroi khö ndra sawuyu si lö faröi ba wangombakha hewisa waʼatekiko bisnis sebua, ba ifangelama nono mbanua Lowalangi enaʼö lö aolo dödöra ba wolohi faʼakayo. (Mat. 6:24) Itutunö göi publikasida ngawalö agama si no tefarahu ba organisasi Zatana. Me 1963, iforomaʼö The Watchtower wa ”Babilona Sebua” tenga ha Agama-Agama Niha Keriso, hizaʼi fefu gorahua agama faya ba zi sagörö ulidanö. Daʼö mbörö wa latolo nono mbanua Lowalangi si so ba ngawalö soi hegöi si toʼölö lafalua enaʼö ’laheta ira khönia’, ba ngawalö halöwö  soʼamakhita ba agama faya, simane niʼilada ba Faza 10 mbuku daʼa.—Fam. 18:2, 4.

22. Me alua Wasuwöta Gulidanö I, hadia zaboto ba dödö nono mbanua Lowalangi sanandrösa ba Roma 13:1?

²² Hewisa göi politik si tefarahu ba organisasi Zatana? Hadia tola fao niha Keriso sindruhu ba politik hegöi ba waʼudusa ba gotalua soi? Sagötö Wasuwöta Gulidanö I, aboto ba dödö Nono Zekola Zura Niʼamoniʼö wa tebai fao zoloʼö khö Keriso ba wamunu niha. (Mat. 26:52) Hizaʼi, ato zangumaʼö na laʼoʼö goi-goi ”zalawa, si so barö mbawa” simane nisura ba Roma 13:1, eluahania moguna tobali ira saradadu, lafake nukha zaradadu, ba lagogohe wana; hizaʼi, na laʼandrö khöra ba wamunu udu, lafana dalu mbanua.

23, 24. Hadia zaboto ba dödöda ba Roma 13:1 me alua Wasuwöta Gulidanö II, ba hadia waʼaboto ba dödö si tefaudu nitema zoloʼö khö Keriso?

²³ Me alua Wasuwöta Gulidanö II me 1939, ibotokhi ba dödöda The Watchtower sanandrösa ba walöfaʼawö ba gulidanö. Itutunö wa lö faʼawö niha Keriso ba ngawalö wasuwöta hegöi faʼudusa ba gotalua soi ba gulidanö Zatana. Tefaudu ginötö wameʼe fanuturu lala andre! Lö moʼömö niha soloʼö Keriso ba ndro niha si mate ba wasuwöta, simane niluʼi soi si fao ba daʼö. Me böröta ndröfi 1929, itutunö publikasida wa tenga ira samatörö ba gulidanö andre salawa si so ira barö mbawa simane nisura ba Roma 13:1, hizaʼi Yehowa ba Yesu. Moguna so waʼaboto ba dödö sabölö tefaudu.

²⁴ Ibeʼe wanuturu lala eheha niʼamoniʼö khö ndra soloʼö khö Keriso ba waʼaboto ba dödö andrö me 1962, me so  ngawalö artikel sanandrösa ba Roma 13:1-7 ba The Watchtower 15 mbaŵa si Felezara ba 1 mbaŵa si Felendrua. Ba gafuriata, laʼila ono mbanua Lowalangi hadia geluaha na muʼolaini woloʼöda, simane ba wehede Yesu si tehöngö, ”Mibeʼe khö Kaizaro, hadia khö Kaizaro, ba hadia khö Lowalangi, ba mibeʼe khö Lowalangi.” (Luk. 20:25) Aboto ba dödö niha Keriso sindruhu wa salawa si so ira barö mbawa eluahania ira samatörö ba gulidanö andre, ba moguna muʼoʼö goi-goira. Hizaʼi, foloʼöda khöra so nolania. Na lafarou ita ba wanawö goi-goi Lowalangi Yehowa, taʼoʼö simane niwaʼö ndra sinenge, ”Niʼoʼö khö Lowalangi, moroi ba woloʼöda ba niha.” (Hal. 5:29) Ba Faza 13 ba 14 mbuku daʼa, tola taʼila hewisa wangoromaʼö nono mbanua Lowalangi faʼalöfaʼawö niha Keriso ba gulidanö.

25. Hadia mbörö wa öʼameʼegö tödö wanuturu lala nibeʼe geheha niʼamoniʼö sanandrösa ba Mbanua Lowalangi?

²⁵ Angeraigö fefu zi no mufahaʼö ba niha soloʼö khö Keriso sanandrösa ba Mbanua Lowalangi ba zi otu fakhe andre. No taʼila hamega tefasindro Mbanua Lowalangi ba zorugo ba hawaʼamoguna ia. Taʼila hadia dötönafö nibeʼe ba niha si lö faröi, tötönafö ba zorugo hegöi ba gulidanö. Ba, taʼila hewisa lala ba wangoromaʼö faʼalöfaröida ba Mbanua Lowalangi hegöi eluaha na muʼolaini woloʼöda khö ndra samatörö. Angerönusi, ’Hadia tola uʼila fefu zindruhu sebua böli andrö na lö ibeʼe wanuturu lala Yesu Keriso khö ndra sawuyunia si lö faröi ba gulidanö enaʼö tola aboto ba dödöra ba lafahaʼö ia khöda? Daʼa no sambua howu-howu sebua si tola tatema börö me ibeʼe khöda wanuturu lala Keriso ba eheha niʼamoniʼö!