FAZA 3
Iʼombakhaʼö Gohitö Dödönia Yehowa
1, 2. Hewisa wangoromaʼö Yehowa ohitö dödönia ba niha?
SATUA si so faʼomasi, lafaogö ndraonora na so zinangea lafatunö ba nomo. Hizaʼi, lafatimbaisi hawaʼoya zinangea lafaʼema. Awena lafatunö irege wondrege zide-ide ha na no atua wangera-ngera ndraonora ba wofatimbaisi hadia ia.
2 Simanö göi Yehowa, lö isamuzaigö wamatunö ohitö dödönia ba niha gulidanö. Hizaʼi, awena ifalua daʼö ha na tefaudu ginötö. Datafaigi hewisa wangombakha Yehowa sindruhu ba zi sagötö sejarah sanandrösa ba Mbanua Lowalangi.
Hana Wa Moguna Mbanua Lowalangi?
3, 4. Hadia itatugöi Yehowa waö-waö lala sejarah niha gulidanö? Tutunö.
3 Ba wamobörö, tenga Banua Mesia zi tobali ohitö dödö Yehowa. Hadia mbörö? Lö nitatugöi Yehowa lala waʼauri niha; me ifazökhi niha gulidanö, itehegö khöra wamalua ohitö dödöra. Börö daʼö, ifatunö khö Gadamo ba Khawa hadia gohitö dödönia ba niha gulidanö. Imane, ”Miʼoʼono ba miʼoyaʼö ami, mifoʼösi gulidanö ba mibeʼe barö mbawami.” (I Moz. 1:28) Iʼandrö göi khöra Yehowa enaʼö laʼosinangegö goi-goinia sanandrösa ba zi sökhi hegöi si lö sökhi. (I Moz. 2:16, 17) Tola lafili ira Adamo ba Khawa enaʼö lö faröi khö Yehowa. Na lö faröi ira hegöi ngaʼötöra, lö moguna so khöda Mbanua Lowalangi nifatörö Keriso ba wamalua ohitö dödö Lowalangi. Sindruhunia, niha soʼahonoa zangiagö ulidanö andre ba ginötö daʼa, ba lafosumange Yehowa.
4 Hewaʼae no lalawa Yehowa ira Satana, Adamo, ba Khawa, hasambalö iʼoʼozui gohitö dödönia enaʼö laʼiagö gulidanö andre ngambatö niha soʼahonoa. Ifaudugö lala ba wamalua yaʼia Yehowa. Tenga simane kereta api gohitö dödönia, ha sambua lala nitörö enaʼö ofeta ba mbanua si no mutatugöi ba tola manö ifawuʼa lalania niha böʼö. Na no iʼombakhaʼö gohitö dödönia Yehowa, lö hadöi faʼabölö ba gulidanö si tola manaisi faʼalua gohitö dödönia. (Baso Yesaya 55:11.) He na so zanaisi lalania, iʼogunaʼö lala böʼö Yehowa. a (II Moz. 3:14, 15) Na fagöna ba dödönia, ifatunö ba nono mbanuania si lö faröi lala si bohou niʼogunaʼönia ba wamalua ohitö dödönia.
5. Hadia nifalua Yehowa me so wamadaö ba Gedena?
5 Börö me no alua wamadaö ba Gedena, ifasindro Mbanuania Yehowa. (Mat. 25:34) Me no ogömi sejarah niha gulidanö, ibörögö ifatunö Yehowa lala niʼogunaʼönia ba wamohouni niha, ba ihori wangabu dödö niʼasogö Zatana ba wamadöni famatörö. (I Moz. 3:14-19) Hizaʼi, lö isamuzaigö Yehowa wangombakha sanandrösa ba Mbanuania.
Ibörögö Iʼombakhaʼö Yehowa Zindruhu sanandrösa ba Mbanuania
6. Hadia nifabuʼu Yehowa, ba hadia zi lö iʼombakhaʼö?
6 Ba wamaʼeleʼö si oföna sibai, ifabuʼu Yehowa wa so ’maʼuwu’ somama högö gulö. (Baso I Moze 3:15.) Hizaʼi, tenga me luo daʼö iʼombakhaʼö haniha nifotöi maʼuwu andrö hegöi maʼuwu gulö. Barö zi 2.000 fakhe, lö manö niʼombakhaʼö Yehowa sanandrösa ba maʼuwu andrö. b
7. Hana wa tefili Gaberahamo, ba hadia wamahaʼönia khöda?
7 Ba gafuriatania, ifili Gaberahamo Yehowa enaʼö moroi ba ngaʼötönia tohare maʼuwu si no mufabuʼu. Ifili Gaberahamo börö me ’iʼoʼö niwaʼö Yehowa’. (I Moz. 22:18) So wamahaʼö si tola tahalö ba daʼa—ha ba niha sangataʼufi ba samosumange yaʼia iʼombakhaʼö gohitö dödönia Yehowa.—Baso Zinunö 25:14.
8, 9. Hadia niʼombakhaʼö Yehowa khö Gaberahamo hegöi khö Yakobo sanandrösa ba maʼuwu andrö?
8 Me iʼogunaʼö malaʼikania Yehowa ba wahuhuosa khö Gaberahamo, si fahuwu khönia, daʼö ginötö si oföna sibai me itutunö zindruhu sanandrösa ba maʼuwu si no ifabuʼu: Yaʼia andrö niha. (I Moz. 22:15-17; Yak. 2:23) Hizaʼi, hewisa womamania högö gulö? Haniha gulö daʼö? So wanema linia ba ngawalö wamaʼeleʼö nifatunö ba duho daʼa.
9 No ihalö gangetula Yehowa wa tohare zi no ifabuʼu andrö ba maʼuwu Gadamo sotöi Yakobo, samösa niha sangokhögö famati saro föna Lowalangi. (I Moz. 28:13-22) Iʼombakhaʼö khö Yakobo wa moroi ba ngaʼötö Yehuda Niha Nifabuʼu andrö, ono Yakobo. Ifaʼeleʼö Yakobo wa itema ”ziʼo zalawa” andrö ngaʼötö Yehuda, si no amaedola kuaso ba wamatörö, ba ”niʼoʼö soi niha dania” ia. (I Moz. 49:1, 10) Ba daʼö iforomaʼö Yehowa wa tobali samatörö mazui razo Niha Nifabuʼu andrö.
10, 11. Hadia mbörö wa iʼombakhaʼö Yehowa gohitö dödönia khö Dawido hegöi khö Danieli?
10 Mato 650 fakhe me no aefa götö Yehuda, iʼombakhaʼö gohitö dödönia Yehowa khö Razo Dawido, ngaʼötö Yehuda. Ifoʼamaedolagö Dawido Yehowa ”niha si faduhu dödönia”. (I Zam. 13:14; 17:12; Hal. 13:22) Börö me iʼataʼufi Lowalangi Dawido si fao famosumange, fawuʼuli Yehowa khönia wa so moroi ba ngaʼötönia zamatörö irugi zi lö aetu.—II Zam. 7:8, 12-16.
11 Mato 500 fakhe aefa daʼö, iʼogunaʼö zamaʼeleʼö khönia Yehowa sotöi Danieli ba wangombakha ba ndröfi hadia tohare Niha Nibayoini, mazui Mesia ba gulidanö. (Dan. 9:25) Ba dödö Yehowa, Danieli andrö ”no omasiö”. Hadia mbörö? Börö me ifosumange sibai Yehowa ba lö ibato wangai halöwö khönia.—Dan. 6:17; 9:22, 23.
12. Hadia niʼandrö khö Danieli enaʼö ifalua, ba hadia mbörö?
12 Iʼogunaʼö ndra samaʼeleʼö si lö faröi Yehowa simane Danieli ba wanura fefu sanandrösa ba maʼuwu si no ifabuʼu, Mesia. Hizaʼi moloʼö Yehowa, tenga inötönia nasa ba nono mbanuania enaʼö aboto ba dödöra geluaha zi no ifaʼeleʼö. Duma-dumania, me no aefa ibeʼe gangilata khö Danieli sanandrösa ba waʼatefasindro Mbanua Lowalangi, ifarou ia Yehowa ba wamotandro famaʼeleʼö andrö irugi ginötö si no ihonogöigö. Ba ginötö daʼö, ”tedou-dou dania” waʼaboto ba dödö.—Dan. 12:4.
Iʼogunaʼö ndra matua si lö faröi Yehowa simane Danieli ba wanura fefu sanandrösa ba Mbanua Mesia
Iforomaʼö Yesu Haga sanandrösa ba Gohitö Dödö Lowalangi
13. (a) Haniha maʼuwu si no mufabuʼu andrö? (b) Hewisa wanutunö Yesu wamaʼeleʼö ba I Moze 3:15?
13 No ihaogö iʼombakhaʼö Yehowa wa Yesu zi tobali maʼuwu nifabuʼunia, ngaʼötö Dawido samatörö tobali Razo. (Luk. 1:30-33; 3:21, 22) Me ibörötaigö Yesu wamalua halöwönia ba gulidanö, hulö amaedola waʼatumbu haga luo waʼaboto ba dödö niha gohitö dödö Lowalangi. (Mat. 4:13-17) Duma-dumania, ibotokhi ba dödöda Yesu haniha zindruhunia ”gulö” nitutunö ba I Moze 3:14, 15, ifotöi Gafökha ”samunu niha” ba ”ama zofaya”. (Yoh. 8:44) Ba wamaʼeleʼö nibeʼe khö Yohane, iʼombakhaʼö Yesu wa ”ulö satua” andrö ”Afökha ba Satana”. c (Baso Famaʼeleʼö 1:1; 12:9.) Ba wamaʼeleʼö daʼö, iforomaʼö göi Yesu hewisa ia—maʼuwu si no mufabuʼu—ba gafuriatania ifalua zi no mufaʼeleʼö ba Gedena ba imama högö Zatana.—Fam. 20:7-10.
14-16. Hadia ahori aboto ba dödö ndra nifahaʼö Yesu me döfi siföföna ngawalö zindruhu niʼombakhaʼönia? Tutunö.
14 Simane si no mututunö ba Faza 1 ba mbuku daʼa, ifatunö Yesu geluaha tanö böʼö soʼamakhaita ba Mbanua Lowalangi. Hizaʼi, lö isamuzaigö wamatunö fefu khö ndra nifahaʼönia. Me izara-zara Keriso wanutunö ba niha soloʼö khönia, awena laʼila ba gafuriatania geluaha nifaʼema Zokhö yaʼira, itaria mato hauga abad aefa daʼö. Faigi duma-dumania.
15 Me döfi 33 M, itutunö Yesu wa moroi ba gulidanö tehalö nawönia samatörö, sanolo Razo Mbanua Lowalangi, ba tesusugi ira tobali boto eheha ba zorugo. Hizaʼi, lö iʼanemai laʼila ira nifahaʼönia wamaʼeleʼö andrö. (Dan. 7:18; Yoh. 14:2-5) Ba ndröfi daʼö, ibeʼe gamaedola Yesu ba wangoromaʼö wa tefasindro Mbanua Lowalangi andrö na no ara möi ia ba zorugo. (Mat. 25:14, 19; Luk. 19:11, 12) Moguna sibai niwaʼönia andrö, hizaʼi lö aboto ba dödö ndra nifahaʼönia. Ba gafuriata, lasofu khö Yesu, ”Hadia öfuli öʼaʼazökhi iyaʼe dania nöri ndraono Gizaraʼeli?” Me luo daʼö, lö oya niʼombakhaʼö Yesu khöra. (Hal. 1:6, 7) Ifahaʼö göi Yesu wa so ”mbiri-biri böʼö” si lö tefarahu ba gotalua ndra awönia samatörö, ”si lö atoto”. (Yoh. 10:16; Luk. 12:32) Ambö aboto ba dödö niha soloʼö khö Keriso haniha zi dombua ngawawa andre. Awena aboto ba dödöra me no tefasindro Mbanua Lowalangi me 1914.
16 Oya ngawalö zi tola ifahaʼö Yesu khö ndra nifahaʼönia me so ia ba gulidanö, hizaʼi iʼila wa tebai laʼonoro. (Yoh. 16:12) Faduhu dödöda wa oya waʼaboto ba dödö sanandrösa ba Mbanua Lowalangi niʼombakhaʼö me döfi siföföna. Hizaʼi, tenga inötönia nasa tedou waʼaboto ba dödö andrö.
Tedou Waʼaboto ba Dödö ba ”Götö Safuria”
17. Hadia nifaluada enaʼö so khöda waʼaboto ba dödö sanandrösa ba Mbanua Lowalangi, ba hadia göi zinangea taʼokhögö?
17 Ifabuʼu khö Danieli Yehowa wa ba ”götö safuria”, ato niha ”zangalu-ngalui eluaha ba tedou-dou dania waʼaboto ba dödö” sanandrösa ba gohitö dödö Lowalangi. (Dan. 12:4) Niha somasi manöndra faʼaboto ba dödö andrö, moguna iforege wangalui yaʼia. Imane sambua karya referensi, ngawua wehede ’sangalu-ngalui eluaha’ ba kata kerja li Heberaiʼo, fagölö ira simane niha samareso ba sangosisiʼö sambua buku. Hizaʼi, hewaʼae tahaogö taʼosisiʼö Zura Niʼamoniʼö, lö taʼila tasöndra waʼaboto ba dödö sanandrösa ba Mbanua Lowalangi na lö iʼamualagö khöda Yehowa.—Baso Mataiʼo 13:11.
18. Hewisa niha sangataʼufi Yehowa wangoromaʼöra famati hegöi fangide-ngideʼö?
18 Lö isamuzaigö Yehowa ba wangombakha sindruhu sanandrösa ba Mbanua Lowalangi ba götö safuria andre, hulö simane fatua lö 1914. Simane niforomaʼö ba Faza 4 ba 5 mbuku daʼa, no hauga kali labohouni waʼaboto ba dödöra ono mbanua Lowalangi barö zi 100 fakhe andre. Hadia daʼö geluahania lö fao khöra Yehowa? Tenga! Fao ia khöra. Hadia mbörö? Börö me so dombua gamuata somasi Yehowa ba niha sangataʼufi yaʼia—famati ba fangide-ngideʼö. (Heb. 11:6; Yak. 4:6) Mamati nono mbanua Yehowa wa alua fefu zi no tefabuʼu ba Daromali Lowalangi. Laforomaʼö wangide-ngideʼö me lö labiniʼö wa fasala niʼilara sanandrösa ba waʼalua zi no mufabuʼu andrö. Oroma wa so khöra wangide-ngideʼö ba The Watch Tower, 1 mbaŵa si Tölu 1925, me imane, ”Taʼila wa Soʼaya samösa zamoʼeluaha khönia, ifoʼeluaha Daromalinia ba nono mbanuania moloʼö lalania si sökhi ba inötö si no itatugöi.”
”Soʼaya samösa . . . ifoʼeluaha Daromalinia ba nono mbanuania moloʼö lalania si sökhi ba inötö si no itatugöi”
19. Iadaʼa, hadia waʼaboto ba dödö nitehegö Yehowa khöda enaʼö taʼila, ba hadia mbörö?
19 Me tefasindro Mbanua Lowalangi me 1914, ambö aboto ba dödö nono mbanua Lowalangi hewisa waʼalua ngawalö wamaʼeleʼö soʼamakhaita ba Mbanua Lowalangi. (I Kor. 13:9, 10, 12) Börö me omuso sibai dödöda wombaloi faʼalua zi no ifabuʼu Lowalangi, itaria fasala gangetula nihalöda. Ba zi töra hauga fakhe, oroma wa sindruhu wehede nisura ba The Watch Tower si no mutötöi moroi yawa. Imane ba daʼö, ”Angetula si tola tahalö yaʼia daʼö lö taʼila tasöndra waʼaboto ba dödö sanandrösa ba wamaʼeleʼö na lö salua ia mazui no alua.” Iadaʼa, ba götö safuria so ita, oya wamaʼeleʼö sanandrösa ba Mbanua Lowalangi si no alua hegöi si no ibörögö alua ba ginötö daʼa. Börö me so wangide-ngideʼö ba nono mbanua Lowalangi ba omasi ira na laʼatulöʼö waʼaboto ba dödöra, andrö wa itehegö khöda Yehowa monönö waʼaboto ba dödöda sanandrösa ba gohitö dödönia. Sindruhu-ndruhu wa tedou-dou waʼaboto ba dödöda!
Tetafi Nono Mbanua Lowalangi me Tebohouni Waʼaboto ba Dödö
20, 21. Hewisa lua-luania ba waʼauri niha Keriso ba ndröfi siföföna me so wamohouni faʼaboto ba dödö?
20 Me ibohouni waʼaboto ba dödöda Yehowa sanandrösa ba zindruhu, tetandraigö hadia nösi dödöda. Na so khöda wamati hegöi fangide-ngideʼö, hadia tatema wamohouni andrö? No tetandraigö dödö niha Keriso, sauri me talu ndröfi siföföna. Duma-dumania, khalaigö na tobali ndraʼugö samösa niha Yehuda Keriso, sauri me luo daʼö. Öʼosinangegö sibai Goroisa Moze ba omuso dödömö me no tobali ndraʼugö ono mbanua Gizaraʼeli. Iadaʼa, ötema zura si no mufaʼeleʼö khö Waulo. Imane wa lö moguna saʼae Goroisa andrö ba no itimbagö ndraono Gizaraʼeli ba waʼaniha Yehowa, ifili ndraono Gizaraʼeli ba wamati yaʼia daʼö niha Yehuda hegöi si tenga Yehuda. (Rom. 10:12; 11:17-24; Gal. 6:15, 16; Kol. 2:13, 14) Hewisa dödömö?
21 Niha Keriso si so fangide-ngideʼö, latema waʼaboto ba dödö andrö moroi khö Waulo ba ifahowuʼö ira Yehowa. (Hal. 13:48) Tanö böʼö, lö latema wamohouni andrö ba fatandro ira ba waʼaboto ba dödö si no tohöna laʼila. (Gal. 5:7-12) Na lö labulöʼö waʼaboto ba dödöra, tola taya wanötönara tobali samatörö awö Keriso.—II Fet. 2:1.
22. Hewisa dödöu me no so waʼaboto ba dödö sanandrösa ba Mbanua Lowalangi?
22 Barö zi hauga wulu fakhe andre, no ibohuni waʼaboto ba dödöda Yehowa sanandrösa ba Mbanua Lowalangi. Duma-dumania, no itolo ita wangila hawaʼara tefasafi niha si tobali ono Mbanua Lowalangi moroi ba niha si lö omasi ba duria somuso dödö, simane famasafi nono mbiri-biri ba nambi. Ifahaʼö göi ita hawaʼara moʼahonoa waʼato zi 144.000, hadia geluaha gamaedola Yesu sanandrösa ba Mbanua Lowalangi, ba hawaʼara tesusugi ba zorugo niha safuria mubayoini. d Hewisa dödöu sanandrösa ba waʼaboto ba dödö andrö? Hadia teʼaroʼö wamatimö? Hadia ömane tödöu wa daʼö no tandra wa lö aefa ifahaʼö nono mbanuania Yehowa si so fangide-ngideʼö? Ba duho aefa daʼa, itugu teʼaroʼö waʼafaduhu dödömö wa lö isamuzaigö wangombakha ohitö dödönia Yehowa ba niha sangataʼufi yaʼia.
a Ba kata kerja li Heberaiʼo, töi Lowalangi eluahania ”Faʼalua”. Töi Yehowa zangoromaʼö yaʼia Zamalua fefu zi no ifabuʼu. Faigi kotak ”Eluaha Döi Lowalangi”, ba Faza 4.
b Hewaʼae hulö ara ginötö andre, böi olifu ita wa anau noso niha gulidanö me mböröta; ha öfa ngaʼötö niha iʼotarai Gadamo irugi Gaberahamo. Auri Gadamo me götö Lameki, ama Noakhi. Auri Lameki me götö Zemi, ono Noakhi. Auri Zemi me götö Gaberahamo.—I Moz. 5:5, 31; 9:29; 11:10, 11; 25:7.
c So 18 kali mutötöi ”Zatana” ba ”Mbuku Nisura ba Li Heberaiʼo” ba wangoromaʼö wa yaʼia andrö sambua boto. Töra 30 kali mutötöi ”Zatana” ba ”Mbuku Niʼamoniʼö Yunani Niha Keriso”. Lö muʼabakhaiʼö wanutunö ba Mbuku Nisura ba Li Heberaiʼo, börö me sabölö mufatunö sanandrösa khö Mesia. Me tohare Mesia, iʼombakhaʼö haniha zindruhunia Zatana, si no tesura ba Mbuku Niʼamoniʼö Yunani Niha Keriso.
d Enaʼö öʼila danö böʼö nasa sanandrösa ba ngawalö waʼaboto ba dödö si no mubohouni, faigi Menara Pengawal: 15 mbaŵa si Fulu 1995, ngaʼörö 23-28; 15 mbaŵa si Sara 2008, ngaʼörö 20-24; 15 mbaŵa si Fitu 2008, ngaʼörö 17-21; 15 mbaŵa si Fitu 2013, ngaʼörö 9-14.
