Talifusö Niʼomasiʼö Sanuriaigö Banua Lowalangi,

KHALAIGÖ na yaʼugö ösi nomo Mbetieli Brooklyn me hari Zumaha sihulö wongi 2 mbaŵa si Fulu 1914. Simane si toʼölö, mudadaoʼö ba gurusi si no latatugöi na manga ero sihulö wongi ba wombalo-baloi talifusöda C.T. Russell. Ba zi lö ödöna-döna, teboka mbawandruhö naha wemanga ba tohare dalifusöda Russell. Si toʼölönia tebato ia sabata ba muhede ia ba nösi nomo Mbetieli, ”Yaʼahowu fefu.” Aefa daʼö, moroi na mudadao ia, ibözi tawo-tawo ba wamaʼema angombakhata sahöli-höli dödö, ”No awai Götö Niha Baero; awai ginötö khö ndra razora ba wamatörö!” Omuso dödöu si fao faʼahöli-höli dödö börö me no ara ödöna-döna daʼa! Fao ndraʼugö ba waʼomuso dödö nösi nomo Mbetieli ba gangombakhata andrö ba ara öbözi tawo-tawo.

 No hauga wulu fakhe numalö ginötö me ifaʼema talifusöda Russell gangombakhata andrö. Hadia nikhamö Mbanua Lowalangi iʼotarai daʼö? Oya sibai! Iʼogunaʼö Mbanua Lowalangi, izara-zara ba wamohouni hegöi ba wamahaʼö ono mbanuania Yehowa—me 1914 ha mato hauga ribu, iadaʼa no töra fitu zuta amatonga waʼato. Hadia manö nisöndramö gunania moroi ba wamahaʼö andrö?

Ba ginötö andre, asese tarongo wehede ndra talifusöda, ”Mofanö gureta zorugo Yehowa!” ba sindruhu daʼö. Hizaʼi, iʼotarai 1914, kureta zorugo Yehowa laʼamaedolagö ia organisasi Yehowa si lö oroma, salio sibai, simane niʼilada na tabaso publikasi daʼa. Oya lala niʼogunaʼö zanuriaigö Banua Lowalangi simane koran, plakat, famaehagö gambara, kartu kesaksian, fonograf, radio, hegöi Internet enaʼö teturiaigö duria somuso dödö ba zi sagörö ulidanö.

Börö me ifahowuʼö Yehowa halöwö andre, tola tefazökhi iadaʼa lektur Zura Niʼamoniʼö ba zi töra 670 ngawalö li ba tabeʼe ba niha gofu hezo so ba lö taʼandrö gefe. So ndra talifusöda somasi manolo ba wamazökhi Balai Mbanua Lowalangi, Balai Kebaktian, fasilitas gödo ndraha, ba soi si kayo mazui ba soi böʼö soʼamböta. Ira talifusöda si so faʼomasi andre latolo niha si göna bencana, ba laʼoromaʼö na ”ba wamakao, tumbu ia” si fatalifusö.—Gamd. 17:17.

Itaria so ndra sondröniaʼö ba agama hegöi niha safökhö tödö, laʼalui danömö gabula dödöda. Hizaʼi, itugu aro wamatida na taʼila hewaʼae laforege wanaisi halöwöda, itugu ”abölö terongo duria somuso dödö”.—Zin. 94:20; Fil. 1:12.

No sambua töi sebua na falulu fohalöwö ita khö ndra talifusöda ”barö mbawa si so yomo khönia”. Yafaduhu dödömi wa maʼomasiʼö ami. Enaʼö publikasi daʼa zangabakhaʼö ba dödömi wangandrö saohagölö ba gondröita wamati si no mitema.—Mat. 24:45.

Mafaʼema wangowaima si fao faʼomasi,

Ira talifusömi,

Boto Solohe Samaduhuʼö Yehowa