1, 2. Hadia zalua si tebai taʼolifugö ba sejarah gulidanö, ba hana wa lö oroma ia ba niha gulidanö?

 HADIA no irai manofu-nofu ndraʼugö hewisa rasonia waʼauri ba ginötö alua waʼafaböʼö sabölö-bölö ba sejarah gulidanö? Ato zanofu-nofu simane daʼö. Hizaʼi, angeraigö: Na so ndraʼugö me luo daʼö, hadia öʼila zalua si tola mangaʼasogö faʼafaböʼö? Te löʼö. Sasesenia, lö laʼila niha sato hadia manö zalua fatua lö adudu wamatörö si no ara hegöi si no tesura ba ngawalö mbuku sejarah. Oya zalua si lö laʼila niha sato—bakha ba istana, ba mbateʼe sololohe famatörö, mazui ba gödo ndra samatörö. Hewaʼae simanö, salua andrö tola ifaböʼöni waʼauri niha si hauga zuta faʼato.

² So zalua si tebai taʼolifugö ba sejarah gulidanö. Salua andre tola molua-lua ia ba waʼauri niha si hauga zuta. Hizaʼi, lö oroma ia ba niha gulidanö. Tatu manö, eluaha niwaʼöma yaʼia daʼö faʼatefasindro Mbanua Lowalangi ba zorugo. Daʼa wamatörö Mesia si no ara tefabuʼu ba wangohori fefu famatörö si so ba gulidanö. (Baso Danieli 2:34, 35, 44, 45.) Börö me lö laʼila niha waʼatumbu si tebai muʼaohasi ba dödö, hadia daʼö geluahania ibiniʼö Yehowa zalua andre ba niha gulidanö? Mazui ifaʼanö nono mbanuania si lö faröi ba zalua andrö? Datafaigi.

3-5. (a) Haniha nifotöi ”tenge-tenge wawuʼusa li” ba Maleakhi 3:1? (b) Hadia zalua fatua lö tohare ba gosali ”tenge-tenge wawuʼusa li”?

³ Iʼotarai me föna, ohitö dödö Yehowa yaʼia daʼö ba wamaʼanö ono mbanuania ba waʼatefasindro Mbanua Mesia. Duma-dumania, faigi atö wamaʼeleʼö ba Maleakhi 3:1, ’Hiza, nifatengegu andrö, enaʼö ihaogö lala fönagu; ba lö mudöna-döna, ba möi ba gosalinia Zoʼaya andrö, niʼaluimi, tenge-tenge wawuʼusa li andrö, somasi ami, zi so.’

⁴ Ba waʼaluania ba ginötö andre, hawaʼara tohare Yehowa, ’Soʼaya’, ba wamareso niha sohalöwö ba golayama gosali wamati ba gulidanö? Ba wamaʼeleʼö andrö itutunö wa fao ”tenge-tenge wawuʼusa li” andrö ba weʼaso Yehowa. Haniha ia? Yaʼia andrö Razo Mesia, Yesu Keriso! (Luk. 1:68-73)  Börö me yaʼia zi no tefataro tobali Samatörö, möi ia wamareso hegöi ba woʼamoniʼö ono mbanua Lowalangi ba gulidanö.—I Fet. 4:17.

⁵ Tobali, haniha ’denge-tenge’ tanö böʼö nitötöi ba wamobörö Maleakhi 3:1? Oföna so niha nifaʼeleʼö daʼa fatua lö tohare Razo Mesia. Ngafulu fakhe fatua lö 1914, hadia so ’zangehaogö lala’ khö Razo Mesia?

6. Haniha ’denge-tenge’ si no tefaʼeleʼö si oföna sibai tohare ba wamaʼanö niha si lö faröi ba zi lö aratö alua?

⁶ Tola tasöndra wanema li ba publikasi daʼa sanandrösa ba sejarah sahöli-höli dödö ba nono mbanua Yehowa ba ginötö andre. Tebörögö sejarah daʼa ba gangohorita abad si 19, me oroma niha satulö soroi ba dödö si lö atoto tobali niha Keriso sindruhu ba gotalua nowi walimosa. Yaʼira andre tefotöi Ono Zekola Zura Niʼamoniʼö. Niha sondröniaʼö me luo daʼö simane Charles T. Russell hegöi ira awönia sahatö khönia, tobali ira ”tenge-tenge” nifaʼeleʼö andrö. Labeʼe wanuturu lala ba wamati ba nono mbanua Lowalangi ba lafaʼanö ira ba zi lö aratö alua andrö. Datafaigi zi öfa ngawalö lala nifalua ”tenge-tenge” andrö.

7, 8. (a) Me döfi 1800-an, haniha zi oföna sibai mangombakha falimosa sanandrösa ba wamahaʼö noso si lö mate? (b) Hadia manö wamahaʼö faya niʼombakhaʼö C.T. Russell hegöi iro awönia sahatö khönia?

⁷ Ono Zekola Zura Niʼamoniʼö andre laʼandrö wanuturu lala moroi khö Yehowa; ba lahalö gangetula sanandrösa ba wamahaʼö si tefaudu, laʼowuloi, ba lafazökhi. Ba zi hauga abad faʼara, no ogömi Agama-Agama Niha Keriso ba wamati. Oya wamahaʼöra si otarai niha baero. Duma-duma siföföna yaʼia daʼö famahaʼö sanandrösa ba noso si lö mate. Sagötö 1800-an, so Nono Zekola Zura Niʼamoniʼö si lö atoto, lafareso wamahaʼö andrö ba aboto ba dödöra wa lö tefaudu ia ba nösi Daromali Lowalangi. Lö faʼataʼu khö Henry Grew, George Stetson, ba George Storrs ba wanura hegöi ba wamaʼema huhuo ba wangombakha falimosa Zatana. a Ebua lua-lua nifaluara andrö khö C.T. Russell hegöi ira awönia sahatö khönia.

⁸ Aboto ba dödö Nono Zekola Zura Niʼamoniʼö wa famahaʼö tanö böʼö soʼamakhaita ba noso si lö mate oi fasala ba möi fangafökhö högö niha. Duma-dumania, so wamahaʼö wa fefu niha si sökhi amuata möi ba zorugo mazui ifakao niha si lö sökhi Lowalangi ba galitö narako sagötö faʼara. Lö ataʼu Russell hegöi ira awönia sahatö khönia ba wangombakha falimosa andrö ba zi hauga ngawua artikel, buku, pamflet, risalah hegöi huhuo sebua.

9. Hewisa wangombakha Zionʼs Watch Tower walimosa sanandrösa ba wamahaʼö Lowalangi Sambua Tölu?

⁹ Laʼombakhaʼö göi Ono Zekola Zura Niʼamoniʼö wa faya wamahaʼö Lowalangi Sambua Tölu nifosumange niha misa. Me 1887, imane Zionʼs Watch Tower, ”No ihaogö itutunö khöda Sura Niʼamoniʼö hewisa waʼafaböʼöra Yehowa  ba Soʼaya yaʼita Yesu hegöi amakhaitara.” Imane nasa artikel andrö wa ahöli-höli dödönia ”me tehöngö ba latema niha sato wamahaʼö Lowalangi sambua tölu—tölu Lowalangi ba zi sambua, ba endronga samösa Lowalangi ba zi tölu. Daʼa zangoromaʼö wa abölö sibai wemörö niha gosali me iböbö ia udunia faoma bilagu wamahaʼö faya”.

10. Hewisa wangombakha Watch Tower wa döfi 1914 no döfi si no lafotandro?

¹⁰ Simane si no tesura ba duhonia, omasi sibai jurnal Zionʼs Watch Tower and Herald of Christʼs Presence ba wamaʼeleʼö soʼamakhaita ba waʼatohare Keriso. Laʼila ira niha nibayoini si lö faröi sanura jurnal andrö wa moʼamakhaita wamaʼeleʼö Danieli sanandrösa ba zi ”mewitu fakhe” ba waʼalua gohitö dödö Lowalangi sanandrösa ba Mbanua Mesia. Iʼotarai 1870-an, no latatugöi wa tebato zi mewitu fakhe andrö ba ndröfi 1914. (Dan. 4:22; Luk. 21:24) Hewaʼae lö ahori aboto ba dödö ndra talifusöda me luo daʼö geluaha ndröfi si no lafotandro andrö, hizaʼi möi ira laturiaigö gofu hezo so misa irege molua-lua ia ofeta mane maʼökhö.

11, 12. (a) Haniha nisuno dalifusöda Russell ba wamahaʼönia? (b) Hawaʼamoguna halöwö nifalua Russell hegöi awö-awönia ba zi hauga wulu fakhe fatua lö 1914?

 ¹¹ Lö omasi Russell hegöi ira awönia si lö faröi na lasuno ira niha ha börö me no laʼila ba aboto ba dödöra zindruhu andrö. Isuno Russell niha si tohöna mangila fatua lö yaʼira. Sabölö isuno yaʼia daʼö Lowalangi Yehowa, börö me Yehowa zamahaʼö ono mbanuania hadia zinangea laʼila ba hawaʼara moguna laʼila ia. Ifahowuʼö halöwö Russell Yehowa hegöi ira awönia ba wotafiʼö sindruhu moroi ba wamahaʼö faya. Hauga fakhe aefa daʼö, itugu aröu waʼafaböʼöra moroi ba Agama-Agama Niha Keriso tanö böʼö.

¹² Sökhi sibai halöwö nifalua ndra matua si lö faröi andrö ba wangoʼawögö sindruhu ba zi hauga wulu fakhe fatua lö 1914! Imane The Watch Tower and Herald of Christʼs Presence 1 mbaŵa si Felezara 1917, ”Aefa niha si hauga zuta faʼato ba ginötö andre moroi ba waʼataʼu sanandrösa ba wamahaʼö alitö narako, hegöi famahaʼö faya tanö böʼö . . . Itugu tedou manö wangiʼila Sindruhu si no mubörögö öfa wulu fakhe ba zi lalö, ba lö aetu tedou irugi inönöi zi sagörö ulidanö; ba niha sombaʼagö enaʼö böi tefazaewe Zindruhu ba zi sagörö ulidanö, hulö zolawa dulu sabölö-bölö.”

13, 14. (a) Hewisa wamaʼanö ”tenge-tenge” andrö lala khö Razo Mesia? (b) Hadia zi tobali famahaʼö khöda moroi khö ndra talifusöda sauri ba zi töra otu fakhe si lalö?

¹³ Angeraigö: Na lö laʼila ono mbanua Lowalangi gamaehuta Yesu moroi khö Namania, Yehowa, hadia tola lafaʼanö ira ba waʼatohare Keriso? Tatu manö löʼö! Lö göi nifaʼanöra ira na lawalinga lö latörö waʼamate fefu niha hewaʼae sindruhunia daʼö no buala sebua böli ba niha si lö atoto sotara lahe Keriso; lö nifaʼanöra ira na lawalinga ifakao niha Lowalangi ba galitö narako sagötö faʼara! ”Tenge-tenge” andrö zamaʼanö lala khö Razo Mesia!

¹⁴ Hewisa ita ba ginötö andre? Hadia wamahaʼö si tola tahalö moroi khö ndra talifusöda sauri ba zi töra otu fakhe si lalö? Moguna omasi ita wombaso hegöi ba wamahaʼö yaʼita ba Daromali Lowalangi simane yaʼira. (Yoh. 17:3) Börö me itugu awuwu wamati niha gulidanö solohi anaʼa, yamonönö waʼomasida ba gö wamati!—Baso I Timoteo 4:15.

15. Hadia zawena aboto ba dödö Nono Zekola Zura Niʼamoniʼö? (Faigi nisura ba gahe zura.)

¹⁵ Lafahaʼö niha Ono Zekola Zura Niʼamoniʼö wa moguna laheta ira moroi ba gosali niha gulidanö. Me 1879, itutunö Watch Tower ”gosali Mbabilona”. Hadia daʼö geluahania ira paus? Mazui Osali Katolik Roma? Moloʼö orahua Protestan ba zi hauga abad, daʼö zi no mufoʼamaedola ba Zura Niʼamoniʼö sanandrösa ba Mbabilona. Hizaʼi, laʼila Ono Zekola Zura Niʼamoniʼö wa fefu Agama-Agama Niha Keriso iadaʼa, daʼö nifotöi ”Babilona” ba ginötö andre. Hadia mbörö? Börö me lafahaʼö waya simane si no tatutunö  moroi yawa. b Ba gafuriata, lö ibiniʼö wangombakha publikasida hadia zinangea lafalua ösi gosali Mbabilona satulö tödö.

16, 17. (a) Hewisa mbuku Millennial Dawn Jilid III hegöi majalah Watch Tower ba wamarou tödö niha enaʼö laheta ira moroi ba agama faya? (b) Hadia mbörö wa ambö abeʼe wamangelama nibeʼe me luo daʼö? (Faigi nisura ba gahe zura.)

¹⁶ Duma-dumania, me 1891, itutunö Millennial Dawn Jilid III hewisa me itimbagö Lowalangi Mbabilona ba ginötö andre ba imane, ”Mutimbagö fefu zoʼamakhaita khönia—fefu ngawalö lala halöwöra.” Aefa daʼö, imane wa fefu niha ”si lö fao tödö ba wamahaʼö faya hegöi si toʼölö lafalua, tekaoni enaʼö laheta ira khönia”.

¹⁷ Me baŵa si Sara 1900, ibeʼe mene-mene Watch Tower ba niha si lö mangeheta töira ba nösi gosali ba sangalu-ngalui tahi sangumaʼö, ”Omasido zindruhu ba lö asese möido ba kebaktian tanö böʼö.” Isofu artikel daʼö, ”Hizaʼi, hadia atulö ia andre—matonga baero ba matonga bakha ba Mbabilona? Hadia daʼa woloʼö niʼandrö . . . somasi ba si tefaudu ba dödö Lowalangi? Tatu manö tenga. Fawuʼu li ia [ösi gosali] föna niha sato na fao ia ba zi sambua orahua ba moguna iʼoʼö fefu zi no lafakhoi ba mbuʼusa li andrö irege . . . iheta mazui lö iʼoʼozui wefao ba daʼö föna niha sato.” Itugu abeʼe goroisa andrö ba zi hauga fakhe. c Fefu nono mbanua Yehowa moguna laheta ira ba ngawalö zoʼamakhaita ba agama faya.

18. Hadia mbörö wa moguna laheta ira moroi ba Mbabilona Sebua?

¹⁸ Na mubato wamaʼema famangelama enaʼö aheta ba Mbabilona Sebua, hadia so khö Razo si bohou tefataro, sotöi Keriso, ngawawa si no mamaʼanö yaʼira, yaʼia daʼö niha nibayoini ba gulidanö? Tatu manö löʼö, börö me ha niha Keriso si no teʼefaʼö moroi ba mbilagu wamahaʼö Mbabilona zi tola mamosumange Yehowa ”ba geheha ba . . . ba waʼaduhu”. (Yoh. 4:24) Hadia tahalö gangetula ba ginötö andre enaʼö taʼefaʼö ita moroi ba agama sofaya? Ya lö tebulö taʼoʼö fareta, ”Miheta ami khönia, yaʼami banuagu”!—Baso Famaʼeleʼö 18:4.

19, 20. Hewisa Watch Tower wamarou tödö nono mbanua Lowalangi enaʼö owulo ira ba wamosumange Lowalangi?

¹⁹ Lafahaʼö niha Ono Zekola Zura Niʼamoniʼö wa moguna owulo niha si sara lala wamati ba wamosumange Lowalangi, na tola. Moloʼö niha Keriso sindruhu, lö ibönö na ha aheta moroi ba agama sofaya. Moguna göi muʼoʼö wamosumange sindruhu. Iʼotarai mböröta me tefazökhi Watch Tower, ifarou niha somasi mombaso enaʼö faoma owulo ira ba wamosumange Lowalangi. Duma-dumania, me baŵa si Fitu 1880, ifatunö talifusöda Russell me möi ia misa ba wamaʼema huhuo, iʼombakhaʼö wa tefarou dödö ndra talifusöda börö gangowuloa si no mufalua. Aefa daʼö, ifarou niha sombaso enaʼö lafaʼoheʼö kartu ba wangombakha faʼatedou  gangowuloa nifaluara. So ösa nifalemba ba ngaʼörö-ngaʼörö jurnal andrö. Hadia gunania? ”Enaʼö taʼila . . . hewisa wameʼe Yesu khöda faʼohahau dödö, me lö aetu-aetu owulo ami ba niha sangokhögö famati sebua.”

²⁰ Me 1882, so sambua artikel ba Watch Tower, tuhonia ”Fao Waʼowulo”. Ifarou niha Keriso enaʼö lafalua gangowuloa-gangowuloa ”ba wondrouʼö, ba wamarou tödö, hegöi ba wangaʼaroʼö”. Imane, ”Hewaʼae so ba gotaluami zi lö sekola mazui si lö nekhe-nekhe danga, miʼohe Zura Niʼamoniʼö, karate, ba fese, ba mihaogö miʼogunaʼö Konkordansi. Fili duhonia; andrö wanolo moroi ba Geheha; aefa daʼö baso, angeraigö, fatimbaisi ayatinia, ba hasambalö ibeʼe khöu wanuturu lala enaʼö öʼila zindruhu.”

21. Hadia duma-duma si sökhi moroi ba mbanua niha Keriso si so ba Allegheny, Pennsylvania sanandrösa ba gangowuloa hegöi fokubaloi?

²¹ So gödo sebua Nono Zekola Zura Niʼamoniʼö ba Allegheny, Pennsylvania, AS. Ba soi andrö, labeʼe duma-duma si sökhi, owulo ira ba woloʼö mene-mene si no iʼehehaini ba zura Heberaiʼo 10:24, 25. (Baso.) Ba gafuriata, itörö tödö dalifusöda si no alawa döfi sotöi Charles Capen  gangowuloa-gangowuloa si no irai iʼondrasi me ide-ide ia. Isura, ”Lö olifudo ayati nigambaraini ba dowa nahia gangowuloa Lembaga. ’Ha samösa Zamahaʼö yaʼami, yaʼia daʼö Keriso; ba si fatalifusö ami fefu.’ Toröi-röi ba dödögu ayati daʼö—lö hadöi amaehuta zondröniaʼö ba niha si toʼölö ba gotalua nono mbanua Yehowa.” (Mat. 23:8) Itörö tödö dalifusöda Capen gangowuloa-gangowuloa si möi fangaʼaroʼö ba samarou tödö hegöi faʼowölö-ölö dalifusöda Russell ba wokubaloi ono mbanua Lowalangi ero samö-samösa.

22. Hadia nifalua niha si lö faröi me mufarou ira enaʼö laʼondrasi fefu gangowuloa niha Keriso, ba hadia wamahaʼö si tola tahalö moroi khöra?

²² Niha si lö faröi laʼoʼö duma-duma hegöi fanuturu lala si no mubeʼe. Oya mbanua niha Keriso sawena tefasindro ba negara bagian tanö böʼö simane Ohio hegöi ba Michigan, aefa daʼö ba zi sagörö Amerika Utara hegöi ba soi tanö böʼö. Angeraigö: Na lö mufahaʼö niha si lö faröi ba woloʼö mene-mene Zura Niʼamoniʼö enaʼö owulo ira ba wamosumange Lowalangi, hadia tola lafaʼanö ira ba waʼatohare Keriso? Tatu manö tebai! Hewisa göi ita ba ginötö andre? Moguna tahalö gangetula enaʼö owölö-ölö ita weʼamöi ba gangowuloa ba taʼodödögö wefao ba wamosumange Lowalangi hegöi ba wangaʼaroʼö famatida.

23. Hewisa wanutunö Watch Tower wa fefu niha nibayoini lö tola löʼö tobali ira sanuriaigö sindruhu?

²³ Ono Zekola Zura Niʼamoniʼö lafahaʼö wa fefu niha nibayoini lö tola löʼö tobali ira sanuriaigö sindruhu. Me 1885, imane Watch Tower, ”Böi olifu ita wa fefu niha  nibayoini andrö tebayoini ira enaʼö manuriaigö.” (Yes. 61:1) So wamangaösö ba nifazökhi me 1888, ”Lö si tobini halöwöda . . . Na taʼosiwawöi ia ba taʼalu-alui lala enaʼö lö tafalua, tobali ita sawuyu sareu ba tenga sinangea tatema dadaoma salawa me tekaoni ita.”

24, 25. (a) Hadia göi nifalua Russell hegöi ira awö-awönia sahatö khönia baero wamarou niha enaʼö möi ira manuriaigö? (b) Hadia nidunö-dunö samösa kolportir sanandrösa ba halöwönia me lö oya moto me luo daʼö?

²⁴ Tenga ha lafarou niha ira Russell hegöi awö-awönia sahatö khönia enaʼö möi manuriaigö. Lafazökhi göi risalah Bible Students’ Tracts, mazui töinia ba gafuriata Old Theology Quarterly. Latema risalah-risalah daʼa ira sombaso Watch Tower ba labeʼe ba niha misa, lö laʼandrö mböli.

²⁵ Niha sanehegö faʼaurinia ba wamalua halöwö safönu inötö lafotöi ira kolportir. Samösa moroi ba gotaluara yaʼia daʼö Charles Capen si no mutötöi moroi yawa. Itörö tödönia, ”Uʼogunaʼö peta moroi ba Lembaga Survei Geologis Amerika Serikat ba wangohalöwögöigö banua Pennsylvania. Oroma fefu lala ba peta andre irege utörö tanö ba woʼanöröi yaʼia. Itaria na no tölu hari utörö tanö ba mbanua andrö ba wanofu ba niha hadia omasi ira mbuku seri Studies in the Scriptures, usewa kudo hegöi kureta ba wamasao buku andrö khöra. Asese tebatodo ba mörö ndraʼo ba nomo niha sohalöwö ba danö. Lö oya moto me luo daʼö.”

26. (a) Hadia mbörö wa moguna owölö-ölö nono mbanua Lowalangi ba halöwö fanuriaigö? (b) Hadia zinangea tasofu khöda samösa?

²⁶ Tatu manö moguna waʼabarani hegöi faʼowölö-ölö ba wanuriaigö me luo daʼö. Na lö mufahaʼö niha Keriso sindruhu wa moguna halöwö fanuriaigö, hadia tola lafaʼanö ira ba wamatörö Keriso? Tatu manö löʼö! Mendrua manö me halöwö andrö no tobali tandra waʼatohare Keriso. (Mat. 24:14) Moguna mufaʼanö nono mbanua Lowalangi enaʼö labaliʼö ohitö dödöra halöwö andre. Moguna manofu ita ba ginötö daʼa, ’Hadia halöwö fanuriaigö andre no tobali ohitö dödögu ba waʼauri? Hadia aoha gölögu ba wamalua halöwö fanuriaigö andre?’

27, 28. Hadia niʼila Yohane ba gangilatania, ba hadia nifalua Zatana hegöi ira malaʼikania me no tefasindrö Mbanua Lowalangi?

²⁷ Ba gafuriatania, tohare ndröfi 1914 andrö. Simane si no mututunö ba wamobörö faza daʼa, samösa lö sangila salua solakhömi andrö ba zorugo. Hizaʼi, tebeʼe khö Yohane gangilata sangoromaʼö fefu zalua andre si no mufoʼamaedolagö. Khalaigö daʼa: Iʼila ”dandra sebua” Yohane ba zorugo. ”Ira alawe” khö Lowalangi si no amaedola organisasinia si fao ira malaʼika ba zorugo, manabina ba tumbu khönia samösa nono matua. Ono si no mufoʼamaedola andre ’ikubaloi dania fefu soi siʼo siʼöli’ ba zi lö aratö. Hizaʼi, me no tumbu ia, ”teʼohe khö Lowalangi nononia andrö, föna dadaomania”. So li siʼao ba zorugo imane,  ”Awena toʼele wangorifi andrö khö Lowalangida, ba faʼabölö andrö ba famatörö andrö; ba faʼatola andrö, khö nibayoini andrö khönia.”—Fam. 12:1, 5, 10.

²⁸ Sindruhu-ndruhu no iʼila Yohane ba gangilata, wa no tefasindro Mbanua Mesia. Molakhömi sibai zalua andrö. Hizaʼi, lö fefu so zomuso tödö. Faʼudu Zatana hegöi ira malaʼikania khö ndra malaʼika si lö faröi nidöniaʼö Mikhaeli mazui Keriso. Hadia lua-luania? Databaso, ”Ba tetiboʼö naga sebua andrö, ulö satua andrö, sotöi Afökha ba Satana, samaelungu niha ba gulidanö, fefu; tetiboʼö si tou ia ba danö ba tetiboʼö göi malaʼikania andrö, awönia.”—Fam. 12:7, 9.

29, 30. Me no aefa tefasindro Mbanua Mesia, hadia zalua (a) ba gulidanö? (b) ba zorugo?

²⁹ Fatua lö 1914, no lawaʼö Ono Zekola Zura Niʼamoniʼö wa tebörögö mbaŵa wamakao ba ndröfi si no lafotandro. Lö irai lakhalaigö wa tefaudu sibai zi no laʼangeraigö andrö. Simane salua ba gangilata Yohane, itugu abölö Zatana ba wolohi hegöi ba wanuwö niha gulidanö: ”Ba alai gulidanö, awö nasi, me no möi mitou Gafökha andrö khömi, ba me no ebua wönunia, ba me no iʼila, lö ara nitehe khönia.” (Fam. 12:12) Me 1914, alua wasuwöta gulidanö siföföna ba zi sagörö ulidanö, tandra weʼaso Keriso ba wamatörönia. Tebörögö göi ”götö safuria” andre.—II Tim. 3:1.

³⁰ Hizaʼi, so waʼomuso dödö ba zorugo. Tetiboʼö Zatana hegöi ira malaʼikania irugi zi lö aetu. Imane Yohane, ”Andrö miʼomusoiʼö dödömi, yaʼami banua si yawa, awö zi so nahia ba daʼö.” (Fam. 12:12) Me no ohahau zorugo ba tefataro Yesu tobali Razo, iadaʼa no ifaʼanö ia Banua Mesia ba wamalua soguna ba nono mbanua Lowalangi ba gulidanö. Hadia nifaluania? Simane niʼilada ba wamobörö faza daʼa, Keriso si no amaedola ”tenge-tenge wawuʼusa li” si oföna ibohouni nono mbanua Lowalangi ba gulidanö. Hadia geluahania?

31. Hadia nifaʼeleʼö Maleakhi sanandrösa ba mbaŵa wamohouni, ba hewisa wa alua nifaʼeleʼö andrö? (Faigi nisura ba gahe zura.)

³¹ No ifaʼeleʼö Maleakhi wa lö aoha wamohouni andrö. Imane wanura, ”Haniha zanaha baŵa waʼasonia andrö, ba haniha zi tola, na toʼele ia? Me hulö simane alitö ba zolaugö anaʼa ia, ba me hulö simane idanö nawu ba zamabago nukha.” (Mal. 3:2) Atulö sibai ngawua wehede daʼö! Iʼotarai 1914, oya wanandraigö hegöi abula dödö sebua nitaögö nono mbanua Lowalangi ba gulidanö. Me alua Wasuwöta Gulidanö I, ato Nono Zekola Zura Niʼamoniʼö si göna folohi ba labeʼe ira ba gurunga. d

32. Hadia gabula dödö salua ba gotalua nono mbanua Lowalangi me no aefa ndröfi 1916?

³² So göi gabula dödö moroi bakha ba organisasi. Me 1916, mate dalifusöda Russell me 64 fakhe ndröfinia. Ato  nono mbanua Lowalangi zi tokea. Me no aefa mate ia, oroma wa so ösa niha si talafo mamosumange ira matua si tobali tulada. Hewaʼae lö omasi dalifusöda Russell na lasuno-suno ia, ato zui zamalua daʼö. Lawalinga ba waʼamatenia tebato wamaʼeleʼö sindruhu saʼae, so zi lö fao tödö ba laʼalui lala enaʼö lö tedou ba wamati. Lua-luania ato zondröi sindruhu irege aboto organisasi.

33. Hewisa wa tetandraigö nono mbanua Lowalangi börö me lö alua zi no ladöna-döna?

³³ Abula dödö tanö böʼö yaʼia daʼö me lö alua zi no ladöna-döna. Hewaʼae no iwaʼö Watch Tower wa tebato Götö Niha Baero ba ndröfi 1914, so ndra talifusöda si lö mangila hadia zalua ba ndröfi daʼö. (Luk. 21:24) Lawalinga me 1914, iʼohe Keriso ba zorugo ngawawa niʼowalu niha nibayoini ba fao ira mamatörö ba daʼö. Lö aʼozu sa nitötönara andrö. Ba gangohorita 1914, iʼombakhaʼö The Watch Tower wa tebato zi 40 fakhe mbaŵa wamasi ba musim semi 1918 (te me baŵa si Öfa, Lima, ba Önö). Hizaʼi, lö tebato halöwö fanuriaigö. Itugu tedou halöwö andrö me no aefa ndröfi daʼö. Itutunö majalah andrö te lö sawai mubasi zi toröi mbasitö hewaʼae sindruhunia no awai mbaŵa wamasi. Hizaʼi, ato zafatö tödö irege labato wamosumange Yehowa.

34. Hadia gabula dödö sebua me 1918, ba hadia mbörö wa lawalinga no ”mate” nono mbanua Lowalangi ira Agama-Agama Niha Keriso?

³⁴ Alua wanandraigö sabölö-bölö me döfi 1918. Lataha J.F. Rutherford, fogati C.T. Russell ba wondröniaʼö ono mbanua Lowalangi, hegöi si dafitu talifusöda tanö böʼö sangai halöwö. Huku si lö atulö nibeʼe khöra. Labeʼe ira ba gurunga federal ba Atlanta, Georgia, AS ba ara laʼefasi ira. Ba zi sambua inötö, hulö no tebato halöwö nono mbanua Lowalangi. Ato klerus Agama-Agama Niha Keriso zomuso tödö. Lawalinga teduhö gödo sebua ba Brooklyn börö me no mukuru ”ndra sondröniaʼö”. Ba börö me no musaisi halöwö fanuriaigö ba Amerika hegöi ba Eropa, tatu ”mate” saʼae Nono Zekola Zura Niʼamoniʼö solohe fökhö waba andre ba lö tobali ira saʼae ametaʼuö. (Fam. 11:3, 7-10) Fasala sibai ira!

35. Hana wa itehegö Yesu alua gabula dödö ba niha soloʼö yaʼia, ba hadia nifaluania ba wanolo yaʼira?

³⁵ Lö laʼila udu zindruhu, wa itehegö alua gabula dödö andre Yesu ba nono mbanua Lowalangi börö me dumadao Yehowa ”wolaugö firö andrö ba fangehao yaʼia”. (Mal. 3:3) Faduhu dödö Yehowa hegöi Ononia wa hasambalö so niha si lö faröi saefa moroi ba galitö fanandraigö, mubohouni ira, ba itugu sökhi ira ba wangai halöwö Razo. Iʼotarai ndröfi 1919, so nifalua geheha Lowalangi si tebai alua moloʼö niwaʼö nudu. Tebohouni fefu niha si lö faröi! (Fam. 11:11) Me luo daʼö, sindruhu ifalua dandra si oföna Keriso moroi ba ngaluo safuria. Ifataro ”zawuyu si lö faröi  ba satua-tua”, ngawawa ndra matua nibayoini si lö atoto ba wondröniaʼö ono mbanuania, lafaʼema gö wamati ba ginötö si tefaudu.—Mat. 24:45-47.

36. Hadia manö zangoromaʼö wa no tebohouni ba wamati nono mbanua Lowalangi?

³⁶ Laʼefasi ba gurunga dalifusöda Rutherford hegöi ira awönia me 26 mbaŵa si Tölu 1919. Lö aratö mufalua kebaktian ba mbaŵa si Siwa. Laʼera-era ba wamazökhi jurnal si dua nifotöi The Golden Age. Awö majalah The Watch Tower andre mufazökhi ia enaʼö tola muʼogunaʼö ba wanuriaigö. e Ba ndröfi daʼö göi tefazökhi Bulletin si oföna, iadaʼa mufotöi ia Faʼauri Niha Keriso ba Fanuriaigö. Iʼotarai ba wamobörö, daʼa zi tobali famarou dödö ba wanuriaigö misa. Iʼotarai 1919 irugi iadaʼa, muʼofönaiʼö halöwö fanuriaigö ero samö-samösa hegöi ba nomo-omo misa.

37. Hewisa wa so ösa niha si faröi me no aefa ndröfi 1919?

³⁷ Itugu tebohouni nono mbanua Keriso ba halöwö fanuriaigö börö me lö lafalua halöwö side-ide andre niha sangosebua ba sasiliyawa. Niha si lö moloʼö lala halöwö daʼa, lafabali ira moroi ba niha si lö faröi. Me no aefa ndröfi 1919, so ösa niha si faröi safökhö tödö, laʼoʼaya ba laböbögö zi lö  duhu, faʼawö ira ba niha solohi ono mbanua Yehowa si lö faröi.

38. Hadia zi faduhu dödöda börö me mofozu halöwö niha soloʼö khö Keriso ba gulidanö andre ba so khöra wemöna?

³⁸ Hewaʼae so wolohi simane daʼö, itugu tedou zoloʼö khö Keriso ba gulidanö andre ba ohahau dödöra ba wamati. Faʼamofozu halöwöra, ba ero möna ira me luo daʼö, no tobali tandra khöda wa no mamatörö Mbanua Lowalangi! Ha börö wanolo Lowalangi hegöi howu-howu niʼasogönia ba döi Nononia hegöi Banua Mesia, andrö wa tola möna ngawawa niha gulidanö si lö atoto, si toʼölö manö, si lö moʼahonoa, ba wokalaisi Satana hegöi ulidanö si lö sökhi tana khönia!—Baso Yesaya 54:17.

39, 40. (a) Hadia manö wamahaʼö si tola tahalö ba publikasi andre? (b) Hewisa enaʼö tola öhalö wamahaʼö moroi ba mbuku andre?

³⁹ Ba faza aefa daʼa, tafareso hadia zi no ikhamö Banua Lowalangi ba gulidanö ba zi otu fakhe iʼotarai me tefasindro ia ba zorugo. Ero sambua faosatö ba mbuku daʼa itutunö hadia halöwö Mbanua Lowalangi ba gulidanö. Ero-ero sambua faza, so kotak famuli furi sanolo yaʼita enaʼö taʼila tatatugöi hawaʼatoʼele Mbanua Lowalangi khöda. Ba faza-faza safuria, tatutunö hadia dania zalua na tohare Mbanua Lowalangi ba zi lö aratö ba wangohori niha si lö sökhi hegöi ba wangaʼasogö faradaiso ba gulidanö. Hewisa enaʼö tola öhalö khöu wamahaʼö moroi ba publikasi andre?

⁴⁰ Omasi Zatana na awuwu wamatimö ba Mbanua Lowalangi. Hizaʼi, omasi Yehowa wangaʼaroʼö famatimö enaʼö telumöʼö ba lö awuwu. (Ef. 6:16) Börö daʼö, mafarou ndraʼugö enaʼö öfahaʼögö ba mbuku daʼa soroi ba dödö. Böi bato wamareso tödöu, ’Hadia toʼele khögu Mbanua Lowalangi?’ Na itugu toʼele ia iadaʼa, itugu tefaʼanö ndraʼugö ba wotuhini yaʼia. Böi faröi ndraʼugö ba böi bato wotuhini yaʼia irege laʼila fefu niha sauri wa toʼele Mbanua Lowalangi ba no mamatörö!