1, 2. Hadia niwaʼö Yehowa khö ndra nifahaʼö Yesu si datölu, ba hadia nifaluara?

 HEWISA dödöu na so niʼandrö Lowalangi Yehowa khöu? Tatu manö, omasi ndraʼugö wamalua gofu hadia ia manö niʼandrönia!

² Me no awai Gowasa Fasa 32 M, alua daʼö khö ndra sinenge Yesu si datölu sotöi Fetero, Yakobo ba Yohane. (Baso Mataiʼo 17:1-5.) Me owulo ira khö Zamahaʼö yaʼira ba zi sambua ”hili salawa”, ba gangilata andrö laʼila hewisa na tobali Razo Yesu dania ba zorugo si fao faʼamolakhömi. Hulö sindruhu-ndruhu no alua gangilata andrö irege so zomasi ifalua Fetero. Me fahuhuo ia, so lawuo yawara. So halöwö si sökhi nitema Wetero hegöi ira awönia yaʼia daʼö ba wamondro-ndrongo li Yehowa. Lö fefu niha zi tola mamondro-ndrongo li daʼö. Me no aefa ifaduhuʼö Yehowa wa Yesu andrö Ononia, imane Yehowa, ”Mifondro-ndrongo linia.” Laʼameʼegö tödö ira sinenge niwaʼö Lowalangi andrö. Lafondro-ndrongo hadia nifahaʼö Yesu, ba lafarou göi niha böʼö enaʼo lafalua zimane daʼö.—Hal. 3:19-23; 4:18-20.

3. Hana wa omasi Yehowa na tafondro-ndrongo li Nononia, ba hadia duho sinangea tafatunö?

³ Ngawua wehede ”mifondro-ndrongo linia” no tesura ba Zura Niʼamoniʼö ba wamahaʼö yaʼita. (Rom. 15:4) Hadia mbörö? Börö me samaʼema huhuo Yehowa Yesu, ba mamahaʼö ia ero inötö, ifaʼema hadia zomasi Namania enaʼö taʼila. (Yoh. 1:1, 14) Asese fahuhuo Yesu sanandrösa ba Mbanua Lowalangi moroi ba duho tanö böʼö. Banua Lowalangi andrö yaʼia daʼö famatörö Mesia ba zorugo, nifatörö Yesu Keriso hegöi awönia si 144.000. Börö daʼö, moguna tahaogö tabotokhi ba dödöda duho sabölö moguna andre. (Fam. 5:9, 10; 14:1-3; 20:6) Si oföna, datafareso hadia mbörö wa asese fahuhuo Yesu sanandrösa ba Mbanua Lowalangi.

4. Hadia dandra wa ahatö ba dödö Yesu Mbanua Lowalangi?

⁴ Ahatö ba dödö Yesu Mbanua Lowalangi. Hana wa tawaʼö daʼö? Börö me moroi ba wehede tola taʼila hadia nösi dödö. Tobali, oroma moroi wehededa hadia zabölö moguna  khöda. Imane Yesu, ”Hadia sa zi no fahöna ba dödö, daʼö zalua ba mbewe.” (Mat. 12:34) Ero so ginötö, fahuhuo Yesu sanandrösa ba Mbanua Lowalangi. Töra 100 kali tefatunö Mbanua Lowalangi ba zi öfa ngawua Injil, ba Yesu zasese manutunö yaʼia. Ibaliʼö tuho wanuriaigönia Mbanua Lowalangi me imane, ”Lö tola lö uturiaigö ba mbanua böʼö göi duria somuso dödö andrö, turia Mbanua Lowalangi andrö; ba daʼö sa tefatenge ndraʼo.” (Luk. 4:43) Me no aefa tesusugi ia, lö ibato Yesu wahuhuosa sanandrösa ba Mbanua Lowalangi khö ndra nifahaʼönia. (Hal. 1:3) Mangandrö saohagölö dödö Yesu ba Mbanua Lowalangi andrö, daʼö mbörö wa tefarou dödönia ba wanutunö ba niha.

5-7. (a) Hezo taʼila wa ahatö ba dödö Yehowa Mbanua Lowalangi? Beʼe duma-duma. (b) Na ahatö ba dödöda Mbanua Lowalangi, hadia nifaluada?

⁵ Ahatö göi ba dödö Yehowa Mbanua Lowalangi. Hezo taʼila daʼö? Törö tödöu, ifatenge Nononia si ha sambua Yehowa ba gulidanö; ba fefu niwaʼö Nononia hegöi famahaʼönia, oi moroi khö Yehowa. (Yoh. 7:16; 12:49, 50) Moroi khö Yehowa fefu nisura ba zi öfa ngawua Injil sanandrösa ba waʼauri hegöi fanuriaigö Yesu. Angeraigö atö sabata hadia geluahania.

⁶ Khalaigö na öfaʼanö album koda nösi nomou. Oya sibai koda zinangea öfili, hizaʼi lö monaha fefu ba album daʼö. Hadia nifaluamö? Öfili hezo manö zinangea öbeʼe ba album. Hulö simane album koda göi Injil. Ba daʼö taʼila zindruhunia fefu sanandrösa khö Yesu. Lö ibeʼe gehehania Yehowa khö ndra sanura Injil ba wanura fefu niwaʼö hegöi nifalua Yesu ba gulidanö. (Yoh. 20:30; 21:25) Hizaʼi, ibeʼe gehehania khöra Yehowa ba wanura fefu wehede hegöi nifalua Yesu si tola manolo yaʼita enaʼö aboto ba dödöda hadia guna halöwö fanuriaigö Yesu ba hadia zabölö moguna khö Yehowa. (II Tim. 3:16, 17; II Fet. 1:21) Börö me afönu Injil wamahaʼö Yesu sanandrösa ba Mbanua Lowalangi, tola faduhu dödöda wa no ahatö ba dödö Yehowa Mbanua Lowalangi. Angeraigö—omasi Yehowa na taʼila Mbanuania andrö!

⁷ Moguna manofu ita khöda zamösana, ’Hadia ahatö ba dödögu Mbanua Lowalangi?’ Na yaʼia, omasi tafondro-ndrongo hadia niwaʼö ba nifahaʼö Yesu sanandrösa ba Mbanua Lowalangi—hadia gunania, hewisa ba hawaʼara tohare ia.

8. Hewisa wangombakha Yesu wa moguna sibai Mbanua Lowalangi?

⁸ Faigi duma-duma wangandrö. Iʼabakhaiʼö Yesu wangombakha hadia gunania Mbanua Lowalangi andrö si fao fehede salio laʼila eluaha, ba iforomaʼö hadia zi no ikhamö. So fitu gangandröwa ba wangandrö daʼö. Angandröwa si oföna irugi tölu manandrösa ba gohitö dödö Yehowa yaʼia  daʼö fangamoniʼö töinia, faʼatohare Mbanua Lowalangi, ba faʼalua gohitö dödönia ba gulidanö simane ba zorugo. (Baso Mataiʼo 6:9, 10.) Oi moʼamakhaita gangandröwa si tölu ngawalö andre. Famatörö Mesia no sambua lala niʼogunaʼö Yehowa ba wangamoniʼö töinia hegöi ba wamalua ohitö dödönia.

9, 10. (a) Hewisa waʼatohare Mbanua Lowalangi andrö? (b) Hadia nidöna-dönau moroi ba zi no ifabuʼu Sura Niʼamoniʼö?

⁹ Hewisa waʼatohare Mbanua Lowalangi andrö? Na mangandrö ita, ’Yatohare Mbanuau’, taʼandrö enaʼö so nifalua Mbanua Lowalangi. Ba ginötö tohare Mbanua Lowalangi, iʼogunaʼö fefu waʼabölönia ba gulidanö. Ihori fefu zi lö sökhi ba gulidanö simane famatörö nifasindro niha, ba iʼasogö gulidanö si bohou safönu faʼatulö. (Dan. 2:44; II Fet. 3:13) Aefa daʼö, barö wamatörö Mbanua Lowalangi, tobali saʼae faradaiso fefu gulidanö. (Luk. 23:43) Teʼorifi fefu niha nitörö tödö Lowalangi ba teʼosambuaʼö ira ba niha niʼomasiʼöra. (Yoh. 5:28, 29) Moʼahonoa fefu niha si lö faröi ba laʼokhögö waʼauri si lö aetu sagötö faʼara. (Fam. 21:3-5) Ba gafuriatania, alua gohitö dödö Lowalangi Yehowa ba gulidanö simane ba zorugo! Hadia lö ödöna-döna alua zi no ifabuʼu Sura Niʼamoniʼö andrö? Böi olifuʼö, ero öʼangandröi waʼatohare Mbanua Lowalangi, eluahania mangandrö ndraʼugö enaʼö alua wuʼusa li si sökhi andrö.

¹⁰ Sindruhu-ndruhu wa lö si ’tohare’ nasa Mbanua Lowalangi si tobali fanema li ba wangandrö andrö. Aefa daʼö, lö sawai wamatörö nifasindro niha gulidanö ba lö si tohare gulidanö si bohou safönu faʼatulö. Hizaʼi, so duria somuso dödö. No tefasindro Mbanua Lowalangi simane nifatunöda dania ba faza aefa daʼa. Iadaʼa, dataʼalui hadia niwaʼö Yesu sanandrösa ba ginötö waʼatefasindro Mbanua Lowalangi ba hawaʼara tohare ia.

11. Hadia niforomaʼö Yesu sanandrösa ba waʼatefasindro Mbanua Lowalangi?

¹¹ Iforomaʼö Yesu wa tenga me döfi si föföna M tefasindro Mbanua Lowalangi, hewaʼae no ladöna-döna ira nifahaʼönia. (Hal. 1:6) Datafaigi hadia niwaʼönia me ibeʼe gamaedola si dombua, ambö moroi ba zi dua fakhe.

12. Ba gamaedola sanandrösa ba gandru hegöi oʼo, hadia zangoromaʼö wa tenga me döfi si föföna M tefasindro Mbanua Lowalangi?

¹² Amaedola sanandrösa ba gandru ba oʼo. (Baso Mataiʼo 13:24-30.) Me no aefa iwaʼö Yesu gamaedola andrö, te me inötö musim semi 31 M (te baŵa si Öfa, baŵa si Lima, ba Öno), itutunö hadia geluahania khö ndra nifahaʼönia. (Mat. 13:36-43) Daʼa duho gamaedola andrö hegöi eluahania: Me no aefa mate ndra sinenge, ifazaewe goʼo Afökha (niha Keriso faya) ba gotalua gandru (”ono Mbanua”, mazui niha Keriso nibayoini). Faoma mutehegö auri gandru hegöi oʼo sagötö baŵa waʼatedou irugi mbaŵa wamasi, yaʼia  daʼö ”amozua götö danö andre”. Me ibörögö mbaŵa wamasi, oföna muʼowuloi goʼo, awena gandru. Ba gamaedola andre aboto ba dödö wa tenga me döfi si föföna M tefasindro Mbanua Lowalangi, hizaʼi me no awai mbaŵa waʼatedou. Awai mbaŵa waʼatedou ba tebörögö mbaŵa wamasi me döfi 1914.

13. Hewisa woʼamaedolagö Yesu wa lö iʼanemai mufataro ia tobali Razo Mesia me mangawuli ia ba zorugo?

¹³ Amaedola sanandrösa ba mina. (Baso Luka 19:11-13.) Ibeʼe gamaedola daʼa Yesu me döfi 33 M ba gafuriata weʼamöinia ba Yeruzalema. So ösa zamondro-ndrongo yaʼia, lawalinga iʼanemai tefasindro Mbanua Lowalangi me ofeta ira ba Yeruzalema. Iʼatulöʼö Yesu wangera-ngerara ba iʼoromaʼö wa ba zi so föna tefasindro Mbanua Lowalangi. Ifaomagö ia Yesu ba ’zalawa’ si möi ba ”danö saröu, enaʼö tobali tuhenöri ia”. a Eluaha ”danö saröu” yaʼia daʼö sorugo, daʼa nahia Yesu wotema halöwönia tobali razo moroi khö Namania. Hizaʼi, aboto ba dödö Yesu wa lö iʼanemai mufataro ia tobali Razo Mesia me mangawuli ia ba zorugo. Mudadao ia ba gambölö Lowalangi ba ibaseʼö ginötö si no mutatugöi. No ara idöna-döna daʼa ba zi hauga abad.—Zin. 110:1, 2; Mat. 22:43, 44; Heb. 10:12, 13.

14. (a) Hewisa wameʼe Yesu fanema li khö ndra nifahaʼönia si daöfa? (b) Hadia niʼilada me alua wamaʼeleʼö Yesu sanandrösa ba weʼasonia hegöi Banua Lowalangi?

¹⁴ Hauga hari fatua lö mate Yesu, so daöfa ndra nifahaʼönia zanofu-nofu khönia, ”Hadia dandra waʼasomö ba tandra waʼatua danö?” (Mat. 24:3; Mrk. 13:4) Itema lira  Yesu, itutunö sambua wamaʼeleʼö nisura ba Mataiʼo faza 24 ba 25. No izara-zara wanutunö Yesu hadia manö zalua ba zi sagörö ulidanö si tobali tandra ’weʼasonia’. Fendronga tebörögö weʼasonia ba waʼatefasindro Mbanua Lowalangi; fozu weʼasonia fendronga ba waʼatohare Mbanua Lowalangi. Oya sibai dandra wa no alua zi no ifaʼeleʼö Yesu andrö iʼotarai me 1914. b Daʼö dandra wa no ibörögö tohare ia ba tefasindro Mbanua Lowalangi.

15, 16. Haniha nifotöi ”niha si sagötö andre”?

¹⁵ Hawaʼara tohare Mbanua Lowalangi? Lö niʼombakhaʼö Yesu hawaʼara alua daʼö. (Mat. 24:36) Hizaʼi, so nifatunönia khöda enaʼö tafaduhusi tödö wa lö aratö tohare ia. Itutunö Yesu wa tohare Mbanua Lowalangi na no laʼila waʼalua dandra nifaʼeleʼö andrö ”niha si sagötö andre”. (Baso Mataiʼo 24:32-34.) Haniha nifotöi ”niha si sagötö andre”? Datafaigi hadia niwaʼö Yesu.

¹⁶ ”Niha si sagötö andre”. Hadia daʼö geluaha wehede Yesu andrö niha si lö faduhu tödö? Tenga. Datafaigi haniha manö zamondro-ndrongo yaʼia. Ifaʼema wamaʼeleʼö andre Yesu khö ndra sinengenia me ”möi khönia nifahaönia, ba zi ha yaʼira”. (Mat. 24:3) Lö ara aefa daʼö, tebayoini ndra sinenge andrö faoma eheha niʼamoniʼö. Faigi göi nösi huhuonia. Fatua lö fahuhuo Yesu sanandrösa ba ”niha si sagötö andre”, imane Yesu, ”Ba ba döla ara mitöngöni wamaedo andrö: Na moʼidanö ndrahania, na tumbu lehe-lehe, ba miʼila, no ahatö mbaŵa waʼaukhu zino. Simanö göi ami, na miʼila daʼö fefu, ba oroma khömi, no ahatö ia.” Niha soloʼö khö Yesu si no mubayoini zangila si no ifaʼeleʼö ba laʼila göi dandra wa ”no ahatö” tohare Yesu. Tenga niha si lö faduhu tödö zangila. Börö daʼö, eluaha wehede Yesu me iwaʼö ”niha si sagötö andre”, yaʼia daʼö niha soloʼö khönia si no tebayoini.

17. Hadia geluaha ”niha si sagötö andre” hegöi ”daʼö fefu”?

¹⁷ ”Lö fakhamö atua niha si sagötö andre, ba no alua daʼö fefu”. Hewisa waʼalua wehede daʼa? So dombua zinangea taʼila si tobali fanema li ba zinofu andrö, yaʼia daʼö eluaha ”niha si sagötö” ba eluaha ”daʼö fefu”. Ngawua wehede ”niha si sagötö” eluahania, niha si fakhamö endronga auri ba zi sambua inötö, gofu hawaʼalawa ndröfira. Lö talafo ara waʼauri niha si sagötö andrö ba so ndrege ginötönia. (II Moz. 1:6) Ngawua wehede ”daʼö fefu” eluahania fefu zalua si no tefaʼeleʼö sagötö weʼaso Yesu, iʼotarai me döfi 1914 irugi ”wamakao sabölö-bölö”.—Mat. 24:21.

18, 19. Hewisa enaʼö taʼila geluaha wehede Yesu sanandrösa ba ”niha si sagötö andre”, ba hadia rahu-rahu si tola tahalö?

¹⁸ Tobali, hewisa enaʼö taʼila hadia geluaha wehede Yesu sanandrösa ba ”niha si sagötö andre”? So dombua ngawawa niha nibayoini si fakhamö endronga auri ba gotalua niha si sagötö andre. Si oföna, niha nibayoini sangila böröta waʼalua dandra me döfi 1914. Si dua, niha nibayoini si  fendronga auri ba ngawawa siföföna ba zi sambua inötö. Si löʼö-löʼönia, so mato hadauga moroi ba gotalua ngawawa si dombua andre zangila böröta waʼalua wamakao sabölö-bölö. Andrö wa so niha si sagötö moroi ba zi dombua ngawawa niha Keriso si no tebayoini, börö me fakhamö endronga auri ira ba zi sambua inötö. c

¹⁹ Hadia rahu-rahu zi tola tahalö ba daʼa? Aboto ba dödöda wa oroma ba zi sagörö ulidanö dandra weʼaso Yesu ba waʼabölö Mbanua Lowalangi. Taʼila göi wa itugu atua niha si no tebayoini si no tefarahu ba ”niha si sagötö andre”; hizaʼi, lö fefu mate ira fatua lö ibörögö tohare wamakao sabölö-bölö. Börö daʼö, tola tamane wangumaʼö wa lö aratö tohare Mbanua Lowalangi ba mamatörö ia ba gulidanö! Tatu ahöli-höli dödöda na alua wangandrö si no ifahaʼö Yesu khöda me imane, ’Yatohare Mbanuau’!

20. Hadia duho nifatunöda ba mbuku daʼa, ba hadia nifatunöda ba faza aefa daʼa?

²⁰ Böi olifu ita wehede Yehowa moroi ba zorugo sanandrösa khö Nononia me imane, ”Mifondro-ndrongo linia.” Börö me niha Keriso sindruhu ita, tatu manö omasi taʼoʼö hadia niwaʼö Lowalangi andrö. Omasi taʼila fefu niwaʼö hegöi nifahaʼö Yesu sanandrösa ba Mbanua Lowalangi. Ba mbuku andre, so duho sinangea tabotokhi ba dödöda yaʼia daʼö fefu zi no ikhamö Banua Lowalangi hegöi nifaluania ba zi so föna. Ba faza aefa daʼa, tafatunö waʼatedou zahöli-höli dödö si no alua me tefasindro Mbanua Lowalangi ba zorugo.