FAMAHAʼÖ 01
Hewisa Zura Niʼamoniʼö Wanolonia Yaʼugö?
Oya sibai wanofu-nofuda sanandrösa ba waʼauri, fangabu dödö, faʼamate hegöi salua ba zi so miföna. Asese göi taʼangeragö gabula dödöda ero maʼökhö, simane lala ba wombönökhi soguna khöda mazui lala enaʼö ohahau dödöda ba wongambatö. Ato niha zi no morasoi bua si sökhi ba wanema li moroi ba Zura Niʼamoniʼö sanandrösa ba wanofu simane daʼö hegöi mene-mene soguna ba waʼaurida ero maʼökhö. Moloʼö yaʼugö, hadia tola itolo ita Sura Niʼamoniʼö?
1. Hadia manö wanofu-nofu si so fanema li ba Zura Niʼamoniʼö?
Itutunö khöda Sura Niʼamoniʼö wanema li ba wanofu-nofu sabölö moguna andre: Hewisa mböröta waʼauri? Hadia lua-lua waʼauri andre? Hana wa ato niha si göna famakao? Hadia zalua na no mate niha? Na fefu niha omasi ira atulö, hana wa asese sibai alua wasuwöta? Hadia zalua ba gulidanö andre ba zi so miföna? Ifarou ita Sura Niʼamoniʼö wangalui fanema li moroi ba wanofu-nofu andrö. Zuta niha samalua daʼö, ba larasoi samösa waʼomuso dödö börö wanema li moroi ba Zura Niʼamoniʼö.
2. Hewisa Zura Niʼamoniʼö wanolonia yaʼita enaʼö tasöndra waʼomuso dödö ero maʼökhö?
Ibeʼe khöda wanuturu lala si sökhi Sura Niʼamoniʼö. Duma-dumania, ifatunö hewisa lala wanöndra faʼomuso dödö sindruhu ba zi sambua omo. Ibeʼe göi khöda wanuturu lala na fawuka gera-erada hegöi lala enaʼö tasöndra waʼomuso dödö ba halöwöda. Ba ginötö tafahaʼö ita ba mbuku daʼa, öʼila dania hadia nitutunö Zura Niʼamoniʼö sanandrösa ba daʼö, ba oya nasa danö böʼönia. Na tatutunö fefu daʼö, yateʼaroʼö waʼafaduhu dödöu wa ”fefu nösi Mbuku Niʼamoniʼö andrö . . . moguna ia”.—2 Timoteo 3:16.
Tenga fogati Zura Niʼamoniʼö mbuku daʼa. Hizaʼi, ifarou ita enaʼö tafareso samösa nösi Zura Niʼamoniʼö. Börö daʼö, baso fefu ayati si so ba mbuku daʼa, ba fatimbaisi ayatinia ba nifahaʼöu yaʼugö.
ODÖDÖGÖ NASA WANGALUI
Tatutunö dania hadia manö mbua nirasoi niha si no mamahaʼö yaʼia ba Zura Niʼamoniʼö, hewisa enaʼö tasöndra waʼomuso dödö ba wombaso Sura Niʼamoniʼö, ba hana wa moguna khöda wanolo moroi ba niha böʼö enaʼö taʼila geluahania.
3. Ibeʼe khöda wanuturu lala Sura Niʼamoniʼö
Sura Niʼamoniʼö tola muʼamaedolagö simane sete si tara haga. Itolo ita Sura Niʼamoniʼö ba wangai angetula si tefaudu ba ifatunö khöda hadia zalua ba zi so miföna.
Baso Zinunö 119:105, ba beʼe wanema li ba wanofu-nofu daʼa:
-
Hadia niwaʼö zanura sinunö andrö sanandrösa ba Zura Niʼamoniʼö?
-
Hewisa mbua gera-eramö sanandrösa ba Zura Niʼamoniʼö?
4. So wanema li ba Zura Niʼamoniʼö moroi ba wanofu-nofuda
Faigi hewisa zi samösa ira alawe wanöndrania fanema li moroi ba Zura Niʼamoniʼö ba wanofu-nofu si no hauga fakhe iʼabusi tödö. Futa VIDEO, ba beʼe wanema li ba wanofu-nofu daʼa:
-
Ba video daʼö, hadia wanofu-nofu si tumbu ba dödö ndra alawe andrö?
-
Hadia mbuania me no ifahaʼö ia ba Zura Niʼamoniʼö?
Ifarou ita Sura Niʼamoniʼö enaʼö manofu. Baso Mataiʼo 7:7, ba beʼe wanema li ba wanofu daʼa:
-
Hadia manö wanofu-nofu si tumbu ba dödömö si so fanema li ba Zura Niʼamoniʼö?
5. Tola örasoi waʼomuso dödö ba wombaso Sura Niʼamoniʼö
Ato niha somasi mombaso Sura Niʼamoniʼö, ba latema mbua me lafalua daʼö. Futa VIDEO, ba beʼe wanema li ba wanofu-nofu daʼa:
-
Ba video daʼö, hadia sindruhu-ndruhu omasi ndra si bohou ebua andrö wombaso?
-
Hewaʼae na lö omasi ira mombaso, hana wa adöni dödöra wombaso Sura Niʼamoniʼö?
Fefu wamahaʼö Zura Niʼamoniʼö möi fondrara dödö ba ibeʼe khöda dötönafö. Daʼö niwaʼö Zura Niʼamoniʼö. Baso Roma 15:4, ba beʼe wanema li ba wanofu daʼa:
-
Hadia omasiʼö nasa öʼila sanandrösa ba mbuʼusa li si so ba ayati daʼö?
6. Tola latolo ita niha böʼö enaʼö aboto ba dödöda Zura Niʼamoniʼö
Ato niha somasi mombaso Sura Niʼamoniʼö. Hewaʼae na tola labaso samösa, hizaʼi so göi gunania khöra na latutunö daʼö ba niha böʼö. Baso Halöwö Zinenge 8:26-31, ba beʼe wanema li ba wanofu daʼa:
-
Hewisa enaʼö aboto ba dödöda Zura Niʼamoniʼö?—Faigi ayati 30 ba 31.
The Ethiopian man needed help to understand the Scriptures. Many people today find it helpful to discuss the Bible with others
SO ZANGUMAʼÖ: ”Fangohori ginötö na tafahaʼö ita ba Zura Niʼamoniʼö.”
-
Hewisa moloʼö yaʼugö? Hadia mbörö wa öwaʼö zimane daʼö?
RAHU-RAHU WAMAHAʼÖ
Ibeʼe khöda wanuturu lala Sura Niʼamoniʼö soguna ba waʼaurida ero maʼökhö, simanö göi wanema li ba wanofu-nofu sasese tumbu ba wangera-ngerada. Baero daʼö, ibeʼe göi khöda wondrara dödö ba tötönafö.
Hadia Wamahaʼö si Tola Öhalö?
-
Hadia mene-mene nisöndrada ba Zura Niʼamoniʼö?
-
Hadia wanofu-nofu si so fanema li ba Zura Niʼamoniʼö?
-
Hadia manö zomasiʼö öfahaʼö ndraʼugö ba Zura Niʼamoniʼö?
ALUI NASA DANÖ BÖʼÖ
Hadia manö mene-mene Zura Niʼamoniʼö soguna khöda irugi maʼökhö?
”Famahaʼö Zura Niʼamoniʼö—Moguna Irugi zi Lö Aetu” (Manuriaigö No. 1 2018)
Hewisa Zura Niʼamoniʼö wanolonia si samösa ira matua sorasoi wa hulö lö moguna waʼaurinia iʼotarai me ide-ide?
Hadia manö mene-mene Zura Niʼamoniʼö enaʼö so waʼohahau dödö ba zi sambua omo?
”12 Lala ba Wanöndra Faʼomuso Dödö ba Wongambatö” (Sadarlah! No. 2 2018, tehenaigö ba li Indonesia)
Ato zi lö mangila haniha zindruhunia zamatörö ulidanö andre. Hizaʼi, so wanema linia moroi ba Zura Niʼamoniʼö.
Hana Wa Moguna Tafahaʼö Ita ba Zura Niʼamoniʼö?—Versi Sanau (3:14)
Moguna wanolo khö zi samösa ira matua Gaitiofia enaʼö aboto ba dödönia Zura Niʼamoniʼö. Ato niha iadaʼa sangokhögö faʼaboto ba dödö si tefaudu ba Zura Niʼamoniʼö börö wanolo moroi ba niha böʼö.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
