1. Hezo taʼila zalua ba zi so föna?

TE NO irai manofu dödöu na örongo duria, ’Hadia itugu tedou waʼalösökhi ba gulidanö?’ Börö me oya ngawalö zi lö sökhi salua awö wamakao, andrö wa ato zi faduhu tödö wa no ahatö waʼatua danö. Hadia sindruhu daʼö? Hadia so zangombakha khöda salua ba zi so föna? So. Hewaʼae lö laʼila niha hadia zalua, tobali iʼila Yehowa Lowalangi. Ifatunö khöda ba Zura Niʼamoniʼö hadia zalua ba niha hegöi ba gulidanö ba zi so föna.​—Yesaya 46:10; Yakobo 4:14.

2, 3. Hadia zomasi sibai laʼila ira nifahaʼö Yesu, ba hewisa wanema Yesu lira?

² Na tabaso ba Zura Niʼamoniʼö ngawua wehede faʼatua danö, tenga Ulidanö zatua, tobali niha si lö sökhi nifakiko. Imane Yesu, mamatörö Mbanua Lowalangi ba gulidanö andre. (Luka 4:43) Omasi sibai ndra nifahaʼö Yesu laʼila hawaʼara tohare Mbanua Lowalangi, andrö lasofu khö Yesu, ”Ombakhaʼö khöma, hawaʼara daʼö, ba hadia dandra weʼasomö ba tandra waʼatua danö?” (Mataiʼo 24:3) Lö iʼombakhaʼö khöra Yesu ginötö waʼatua danö, hizaʼi ifatunö khöra dandra waʼatua danö. Hadia nifaʼeleʼö Yesu ba no alua iadaʼa.

³ Ba faza daʼa tafatunö wa no auri ita ba ginötö  safuria. Si oföna, moguna aboto ba dödöda wasuwöta si no alua ba zorugo, enaʼö taʼila hana wa oya ngawalö waʼalösökhi ba gulidanö.

4, 5. (a) Hadia zalua ba zorugo me no tobali Razo Yesu? (b) Moloʼö Famaʼeleʼö 12:12, hadia zalua ba gulidanö me no tetiboʼö sitou Zatana?

⁴ No tafahaʼö ita ba Faza 8 wa no mamatörö Yesu tobali Razo ba zorugo me döfi 1914. (Danieli 7:13, 14) Imane ba zura Wamaʼeleʼö, ”Ba tesao wanuwö ba mbanua siawa: Mikhaeli [Yesu] andrö ba malaʼikania, ba fasuwö ba naga [Satana] andrö. Ba fasuwö naga andrö, awö malaʼikania.” * Kala Zatana awö malaʼikania ba wasuwöta andrö ba tetiboʼö ira ba gulidanö. Khalaigö waʼomuso dödö ndra malaʼika ba zorugo! Hewisa niha si so ba gulidanö? Imane Sura Niʼamoniʼö wa tefakao niha gulidanö. Hadia mbörö? Börö me no ebua wönu Gafökha, ”me no iʼila, lö ara nitehe khönia”.​—Famaʼeleʼö 12:7, 9, 12.

⁵ Börö Gafökha wa so ngawalö wamakao ba gulidanö. Mofönu sibai ia me no iʼila lö aratö ifakiko ia Lowalangi. Datafaigi hadia niwaʼö Yesu salua ba ngaluo safuria.​—Faigi Gonönöta 24.

6, 7. Hadia niʼilada sanandrösa ba lofo hegöi ba wasuwöta ba ginötö andre?

⁶ Fasuwöta. Imane Yesu, ”Maoso dania zi sambua soi, udu zi sambua; ba si sara öri, udu zi sara.”  (Mataiʼo 24:7) Ato niha si mate ba wasuwöta ba ginötö andre moroi ba wasuwöta ba zilalö. So duria moroi ba Lembaga Pengamat Dunia, iʼotarai ndröfi 1914, töra 100 zuta niha si mate ba wasuwöta. Faʼato niha si mate iʼotarai ndröfi 1900 irugi ndröfi 2000 börö wasuwöta, töra tölu kali faʼato zi mate fatua lö döfi 1900. Khalaigö hewisa waʼafökhö ba faʼabu dödö nirasoi niha si töra haʼuga zuta waʼato börö wasuwöta!

⁷ Faʼolofo. Imane Yesu, ’So so lofo ba mbanua misa.’ (Mataiʼo 24:7) Hewaʼae oya ngawalö gö niʼaʼasogö ba ginötö andre moroi ba ndröfi si lalö, ambö manö balazo niha nasa. Hadia mbörö? Börö me lö kefera ba wowöli balazo, mazui lö tanöra ba wananö sinanö. Ba töra miliaran niha si mate börö me ambö gefera ba wowöli gö. Imane Organisasi Kesehatan Dunia, töra sazuta ndraono si mate ero röfi börö waʼambö balazo.

8, 9. Hadia zangoromaʼö wa no alua zi no ifaʼeleʼö Yesu sanandrösa ba ndruru danö ba fökhö waba?

 ⁸ Duru danö. Ifaʼeleʼö Yesu, ”So ndruru danö sabölö-bölö.” (Luka 21:11) Asese alua ndruru danö sabölö-bölö ero röfi. Töra dua zuta mate niha ba ndruru danö iʼotarai ndröfi 1900. Hewaʼae so waʼatua-tua niha ba wangila na alua ndruru danö, ato niha si mate nasa.

⁹ Fökhö waba. Ifaʼeleʼö Yesu wa so ’wökhö sebua’. Alio sibai göna ba niha wökhö waba andrö ba ato zi mate ibeʼe. (Luka 21:11) Hewaʼae so doto sangila mamadöhö fökhö, ba oya wökhö nasa si tebai lafadöhö. So zangombakha wa töra sazuta niha mate ero röfi börö wökhö TBC, malaria, ba kolera. Tenga ha daʼö, no lasöndra ira doto 30 ngawalö wökhö sawena so, ba so ba gotaluania zi lö dalu-dalu.

10. Hewisa waʼalua zi no tesura ba II Timoteo 3:1-5 ba ginötö andre?

¹⁰ Imane ba zura II Timoteo 3:1-5, ”So dania mbaŵa si lö  sökhi, ba götö safuria andrö.” Ifatunö sinenge sotöi Faulo hewisa gamuata niha ba ngaluo safuria. Imane, niha ba daʼö

• ha tana khöra laʼalui

• somasi anaʼa

• si lö mamondrongo li zatuara

• si faröi

• si lö mangomasiʼö ösi nomora

• si lö fanaha tödö

• si tebai ahono ba samuʼi

• somasi isö-isö dödöra moroi ba waʼomasira Lowalangi

• hulö soloʼö khö Lowalangi ira wamaigida, ba no sa laʼosilöʼögö ia

11. Moloʼö Zinunö 92:8, hadia zalua ba niha si lö sökhi?

¹¹ Hadia simanö gamuata niha ba zi tefasui yaʼugö? Simane daʼö gamuata niha ba zi sagörö ulidanö. Hizaʼi, so zi lö aratö ifalua Lowalangi. No ifabuʼu, ”Na manöi zebua horö andrö, hulö ndruʼu ba danö, ba na mobowo  zamazökhi si lö sökhi, ba enaʼö tefakiko ira, si lö fangorifi.”​—Zinunö 92:8.

12, 13. Hadia nifahaʼö Yehowa yaʼita ba ngaluo safuria andre?

¹² No ifaʼeleʼö Sura Niʼamoniʼö wa alua dania wamakao ba fangabu dödö ba ngaluo safuria. Hizaʼi, ifaʼeleʼö göi wa so zi sökhi salua dania.

¹³ Faʼaboto ba dödö Zura Niʼamoniʼö. Ifaʼeleʼö Danieli wa ”tedou-dou dania waʼaboto ba dödö” ba ngaluo safuria. (Danieli 12:4) Iʼatua-tuaʼö nono mbanuania Lowalangi enaʼö tedou waʼaboto ba dödöra nösi Zura Niʼamoniʼö töra moroi ba zi no numalö. No ifalua daʼö Yehowa iʼotarai ndröfi 1914. Duma-dumania, ifahaʼö ita hana wa moguna taʼogunaʼö döinia, hadia gohitö dödönia, hadia geluaha höli, hadia zalua ba niha si no mate, ba femaoso zi mate. No tafahaʼö ita wa ha Banua Lowalangi zi tola mangeheta fefu ngawalö gabula dödö. No taʼila hewisa enaʼö so khöda waʼohahau dödö ba hewisa wangohahauʼö tödö Lowalangi. Hizaʼi, hadia nifalua nono mbanua Lowalangi me no so khöra waʼaboto ba dödö? So wanema li ba Zura Niʼamoniʼö.​—Faigi Gonönöta 21 ba 25.

14. Hezo manö teturiaigö duria somuso dödö sanandrösa ba Mbanua Lowalangi, ba haniha zamalua yaʼia?

¹⁴ Fanuriaigö ba zi sagörö ulidanö. Sanandrösa ba ngaluo safuria, imane Yesu, ”Ba teturiaigö dania Mbanua Lowalangi andrö, turia somuso dödö, ba gulidanö misa, maʼasagörö.” (Mataiʼo 24:3, 14) No teturiaigö duria somuso dödö ba zi töra 230 soi, ba ba zi töra 700 ngawalö li. Ira Samaduhuʼö Yehowa  moroi ’ba ngawalö soi ba ba ngawalö mado’, latolo niha enaʼö so khöra waʼaboto ba dödö hadia geluaha Mbanua Lowalangi ba hadia zi lö aratö ifalua ba niha gulidanö. (Famaʼeleʼö 7:9) Lö lagazi ira wamalua daʼö. Hewaʼae fatiu dödö niha khöra ba tefakao ira, ba lö si tola manaisi yaʼira simane si no ifaʼeleʼö Yesu.​—Luka 21:17.

15. (a) Hadia faduhu dödöu wa no so ita ba ngaluo safuria, ba hadia mbörö? (b) Hadia zalua ba niha soloʼö khö Yehowa ba ba niha si lö moloʼö khönia?

¹⁵ Hadia faduhu dödöu wa no so ita ba ngaluo safuria? Oya dandra ngaluo safuria si no alua nifaʼeleʼö ba Zura Niʼamoniʼö. Lö aratö ibatogö Yehowa halöwö fanuriaigö, aefa daʼö ”faʼatua danö”. (Mataiʼo 24:14) Hadia geluahania waʼatua danö? Eluahania Hamagedo, inötö wangohori niha si lö sökhi. Yesu faoma ira malaʼika niʼogunaʼö Yehowa ba wangohori niha si lö moloʼö khönia hegöi si lö moloʼö Ononia. (II Tesalonika 1:6-9) Lö ifaelungu niha saʼae Satana awö malaʼikania. Fefu niha soloʼö khö Lowalangi ba si faduhu tödö ba Mbanuania, laʼila wa alua zi no ifabuʼu.​—Famaʼeleʼö 20:1-3; 21:3-5.

16. Börö me no ahatö waʼatua danö, hadia zinangea öfalua?

¹⁶ Lö aratö tekiko gulidanö nifatörö Zatana andre. Börö daʼö moguna tasofu khöda samösa, ’Hadia zinangea ufalua?’ Omasi Yehowa na öʼodödögö wamahaʼö yaʼugö nasa ba Zura Niʼamoniʼö. (Yohane 17:3) So gangowuloa khö ndra Samaduhuʼö Yehowa ero migu ba wanolo niha enaʼö aboto ba dödöra nösi Zura Niʼamoniʼö. Tandraigö aeʼe ba gangowuloara  andrö. (Baso Heberaiʼo 10:24, 25.) Na no so khöu waʼaboto ba dödö ba omasiʼö öfalalini gera-erau, böi ataʼu ndraʼugö wamalua yaʼia, enaʼö itugu aro wahuwusami Yehowa.​—Yakobo 4:8.

17. Hana wa tokea niha na tohare waʼatua danö?

¹⁷ Imane Faulo, alua waʼatua danö ba zi lö mudöna-döna, ”hulö weʼaso zanagö, ba zi bongi”. (I Tesalonika 5:2) Ifaʼeleʼö Yesu wa ato niha si lö faduhu tödö wa no so ita ba ngaluo safuria. Imane, ”Ba hulö simane me luo Noakhi, simanö göi weʼaso Nono niha andrö dania. Hulö simane yaʼira sa, me luo föna Waʼanönö Danö andrö, manga-manga ira ba mamadu-madu hadia ia, mangowalu ba mameʼe nihalö, irugi luo möi baowo Noakhi, ba lö aboto ba dödöra, irege so waʼanönö andrö ba irege ahori ira fefu, simanö göi dania weʼaso Nono niha andrö.”​—Mataiʼo 24:37-39.

18. Hadia wamangelama nibeʼe Yesu khöda?

¹⁸ Ifangelama ita Yesu enaʼö böi arörö dödöda ba ”wemanga-manga ba ba wemabu-mabu ba ba waʼabu dödö ba mbalazo”. Imane wangumaʼö, tohare waʼatua danö ba zi lö mudöna-döna, ’simane tandrawa’. Ba ”ihawui fefu zi so ba gulidanö, maʼasagörö, misa”. Aefa daʼö imane zui, ”Ba böi miförö, ero maʼökhö, miʼangandrö-ngandrö, enaʼö tola moloi ami ba daʼö fefu, si törö dania, ba enaʼö tola föna Nono niha nahami.” (Luka 21:34-36) Hana wa moguna tafondro-ndrongo wamangelama Yesu? Börö me lö aratö tefakiko gulidanö tana khö Zatana andre. Niha niʼomasiʼö Yehowa ba Yesu zauri irugi zi lö aetu ba gulidanö si bohou.​—Yohane 3:16; II Fetero 3:13.