1, 2. Hezo tasöndra nahia enaʼö lö teʼala ita?

KHALAIGÖ na ötörö dalu deu toho. Ogömi danö, ilau gari mbanua, moʼugu mbanua, awena aekhu deu. Öʼalui nahia wolombaseu. Hawaʼomuso dödöu na ösöndra nahia wolombase si lö abasö ndraʼugö!

² Simanö zalua ba gulidanö andre, itugu lö sökhi. Te manofu dödöu, ’Hezo usöndra nahia si lö fangala?’ Imane sanura sura zinunö, ”Umane khö Yehowa: ’Saŵatögu ndraʼugö ba hatigu, Lowalangigu, tötönafögu.’” (Zinunö 91:2) Atulö wa Yehowa nahia wolombaseda moroi ba ngawalö gabula dödö, ba no ibeʼe khöda dötönafö si sökhi ba zi so föna.

3. Hewisa enaʼö tobali nahia wolombaseda Yehowa?

³ Hewisa wolumöʼö Yehowa yaʼita? Itolo ita enaʼö tola tataögö fefu gabula dödö salua, abölö ia moroi ba zamaʼala yaʼita. Na göna ita abula dödö iadaʼa, faduhu dödöda wa iheta fefu daʼö Yehowa ba zi so föna. Iʼoʼou ita Sura Niʼamoniʼö, ”Miʼaroʼö ami, ba waʼomasi Lowalangi.” (Yuda 21) Böi mamalö-malö tahatöʼö ita khö Yehowa enaʼö itolo ita na so gabula dödö. Hewisa wamalua yaʼia?

4, 5. Hewisa wangoromaʼö Yehowa faʼomasinia khöda?

⁴ Enaʼö böi mamalö ahatö ita khö Yehowa, moguna taʼila wa iʼomasiʼö ita. Angeraigö zi no ifalua  khöda. No ibeʼe gulidanö si sökhi si tobali nahiada, si so urifö ba sinanö. No ibeʼe gö niʼa ba idanö nibadu. Ba Zura Niʼamoniʼö, no ifatunö khöda haniha döinia hegöi amuatania si sökhi. Aefa daʼö, tandra waʼomasinia sebua yaʼia daʼö me ifatenge Nononia Yesu ba gulidanö, ba wangöhöli yaʼita. (Yohane 3:16) Börö höli andrö wa so dötönaföda si sökhi ba zi so föna.

⁵ No ifasindro Yehowa wamatörö Mesia ba zorugo si lö aratö mangeheta abula dödö ba gulidanö. Banua Lowalangi zombaliʼö ulidanö faradaiso, safönu faʼohahau dödö. (Zinunö 37:29) Tandra waʼomasi Yehowa nasa, ifahaʼö ita enaʼö tola sökhi lala waʼaurida ba ginötö andre. Ikaoni ita ba wangandrö khönia, ba ibeʼe ginötönia wamondro-ndrongo fangandröda. Sindruhu-ndruhu no iforomaʼö Yehowa waʼomasinia khöda zamösana.

6. Hewisa wotemaʼömö faʼomasi Yehowa andrö?

⁶ Hewisa wotemaʼöu faʼomasi Yehowa? Foromaʼö wa öʼandrö saohagölö ba zi no ifalua khöu. Alimagö me ato niha ba ginötö andre si lö mangila mangandrö saohagölö. Simanö zalua me so Yesu ba gulidanö. Samuza inötö, ifadöhö dafulu zofökhö bou auri, ba ha samösa zangandrö saohagölö khönia. (Luka 17:12-17) Omasi ita taʼoʼö zangandrö saohagölö khö Yesu. Moguna taʼandrö saohagölö khö Yehowa.

7. Hawaʼabakha waʼomasiu khö Yehowa?

⁷ Moguna taforomaʼö wa taʼomasiʼö Yehowa. Ifahaʼö ndra nifahaʼönia Yesu enaʼö laʼomasiʼö Yehowa moroi siʼaikö ba dödöra, era-erara, hegöi nosora. (Baso Mataiʼo 22:37.) Hadia geluahania?

8, 9. Hewisa wangoromaʼöda wa taʼomasiʼö Yehowa?

 ⁸ Ambö na ha tawaʼö taʼomasiʼö Yehowa. Na sindruhu taʼomasiʼö Yehowa moroi siʼaikö ba dödöda, era-erada, hegöi nosoda, taforomaʼö ba mbua-buada. (Mataiʼo 7:16-20) No ifahaʼö ita Sura Niʼamoniʼö dandra waʼomasi khö Lowalangi yaʼia daʼö na taʼoʼö fefu goi-goinia. Hadia abua wamalua daʼö? Löʼö, börö me ’tenga safökhö woloʼö oroisa’ Yehowa.​—Baso I Yohane 5:3.

⁹ Na taʼoʼö goroisa Yehowa, ohahau dödöda. (Yesaya 48:17, 18) Na simanö, hadia zanolo yaʼita enaʼö böi mamalö ahatö ita khö Yehowa? Datafaigi wanema linia.

10. Hana wa lö taböhöli wamahaʼö yaʼita sanandrösa khö Yehowa?

¹⁰ Hana wa tola fahuwu ndraʼugö khö Yehowa? Börö me no öfahaʼö ndraʼugö ba Zura Niʼamoniʼö, irege monönö waʼaboto ba dödöu sanandrösa khönia ba aro wahuwusami. Fahuwusa andrö amaedola na mufedoʼö galitö. Enaʼö böi mate, lö mubato wameʼe eu. Simanö göi wahuwusa khö Yehowa, böi tebulö öfahaʼö ndraʼugö sanandrösa khönia enaʼö aro wahuwusami.​—Gamaedola 2:1-5.

11. Hewisa lua-lua wamahaʼö Zura Niʼamoniʼö khöu?

¹¹ Na öfahaʼö ndraʼugö ba Zura Niʼamoniʼö, so wamahaʼö sadöni dödöu. Simanö zalua khö nifahaʼö Yesu si darua me larongo wamahaʼönia sanandrösa ba nifaʼeleʼö Zura Niʼamoniʼö. Lamane, ”Tenga no aukhu-aukhu bakha dödöda, me fahuhuo ia khöda ba lala, me ibotokhi khöda zi so ba Zura?”​—Luka 24:32.

12, 13. (a) Hana wa tadouʼö waʼomasida khö Lowalangi? (b) Hewisa enaʼö böi taya waʼomasida khö Yehowa?

 ¹² Adöni dödöu me ibörögö öʼila geluaha nösi Zura Niʼamoniʼö, simane me adöni dödö ndra nifahaʼö Yesu ba Ayati sawena mubotokhi khöra. Daʼö zanolo yaʼugö enaʼö aboto ba dödöu sanandrösa khö Yehowa ba monönö waʼomasiu khönia. Tatu lö omasi ndraʼugö taya waʼomasiu khönia.​—Mataiʼo 24:12.

¹³ Na no fahuwu ami Lowalangi, moguna öforege ba wandrorogö yaʼia. Böi böhöli öfahaʼö ndraʼugö sanandrösa khönia hegöi khö Yesu ba angeraigö hewisa wamalua ba waʼauriu si no aboto ba dödöu. (Yohane 17:3) Ba ginötö öfahaʼö ndraʼugö ba Zura Niʼamoniʼö, sofu khöu samösa, ’Hadia wamahaʼö moroi ba ayati andre sanandrösa khö Yehowa Lowalangi? Hana wa moguna uʼomasiʼö ia moroi siʼaikö ba dödögu, hegöi ba gera-eragu?’​—I Timoteo 4:15.

14. Hewisa wa aro waʼomasida khö Yehowa na mangandrö ita?

 ¹⁴ Na asese fahuhuo ndraʼugö khö zi fahuwu khöu, aro wahuwusami. Simanö göi, moguna asese fahuhuo ita khö Yehowa ba wangandrö enaʼö monönö waʼomasida khönia. (Baso I Tesalonika 5:17.) Fangandrö no buala si sökhi moroi khö Namada si so ba zorugo, ba moroi ba dödöda na fahuhuo ita khönia. (Zinunö 62:9) Böi fangandrö nitanö ba dödö wangandröda. Na lö taböhöli tafahaʼö ita ba Zura Niʼamoniʼö, ba fangandrö soroi ba dödö wangandröda, monönö waʼomasida khönia.

15, 16. Hewisa ba dödöu halöwö fanuriaigö?

¹⁵ Enaʼö itugu ahatö ita khö Yehowa, moguna tafatunö ba niha böʼö wamatida. Daʼö sambua halöwö si sökhi sibai. (Luka 1:74) Daʼö halöwö nibeʼe Yesu ba niha Keriso sindruhu. Andrö, moguna fao ita ba wanuriaigö turia Mbanua Lowalangi. Hadia no fao ndraʼugö?​—Mataiʼo 24:14; 28:19, 20.

¹⁶ Moloʼö Faulo, amaedola harato halöwö fanuriaigö; ifotöi ia ”girö-girö”. (II Korindro 4:7) Moguna öfatunö ba niha böʼö sanandrösa khö Yehowa ba ohitö dödönia. Daʼö lala ba wamosumange Yehowa, ba iʼosinangegö halöwöu. (Heberaiʼo 6:10) Na möiʼö manuriaigö, no ötolo ndraʼugö hegöi niha böʼö ba wangokhögö fahuwusa khö Yehowa ba ba wanöndra faʼauri si lö aetu. (Baso I Korindro 15:58.) Hadia so halöwö tanö böʼö sabölö sökhi moroi ba halöwö fanuriaigö?

17. Hana wa aösö sibai halöwö fanuriaigö?

 ¹⁷ Aösö sibai wamalua halöwö fanuriaigö. Moguna ’öʼombakhaʼö daromali’, ba ”böi bulöʼögö, he baŵa, ba he tenga baŵa”. (II Timoteo 4:2) Moguna lafarongogö ba niha fefu Mbanua Lowalangi. Imane Sura Niʼamoniʼö, ”No ahatö mbaŵa sebua andrö khö Yehowa; no ahatö ia, ba alio sibai irugi!” Ba, ”lö zi lö alua” daʼö. (Zefania 1:14; Habakuki 2:3) Lö aratö, ifakiko gulidanö tana khö Zatana Yehowa. Fatua lö alua, moguna lafangelama niha enaʼö lahalö gangetula ba wamosumange Yehowa.

18. Hana wa moguna fao ita khö ndra talifusöda niha Keriso ba wamosumange Yehowa?

¹⁸ Omasi Yehowa na fao ita khö ndra talifusöda niha Keriso ba wamosumange yaʼia. Imane Sura Niʼamoniʼö, ”Ba datafaoma tafaigi nawöda, ba wamarou tödö ba waʼomasi andrö, ba ba mbua-bua si sökhi. Ba böi taböhöli weʼamöi ba migu khöda, simane nifolau-lau danö böʼö ösa, tafarou dödö nawöda, ba mendrua manö, me itugu miʼila, ahatö mbaŵa andrö.” (Heberaiʼo 10:24, 25) Taforege wangondrasi angowuloa. Daʼö ginötö khöda ba wamarou tödö ndra talifusöda.

19. Hadia zanolo yaʼita enaʼö monönö waʼomasida khö ndra talifusöda niha Keriso?

¹⁹ Me öʼondrasi gangowuloa, ösöndra zi fahuwu khöu sanolo yaʼugö ba wamosumange Yehowa. Faböʼö-böʼö ndra talifusöda si falukha khöu. Simane yaʼugö göi, omasi ira lafosumange Yehowa. Ba simane yaʼugö, yaʼira andrö göi lö moʼahonoa ba asese fasala. Börö daʼö, moguna ebolo dödöu khöra. (Baso Kolose 3:13.) Haogö töngöni gamuatara si sökhi,  enaʼö lö taha-taha khöu ba wangomasiʼö yaʼira hegöi ba wangahatöʼö yaʼugö khö Yehowa.

20, 21. Hadia nifotöi ”zindruhu faʼauri andrö”?

²⁰ Omasi Yehowa na ohahau dödö zi fahuwu khönia. No ifahaʼö ita Sura Niʼamoniʼö wa faehu waʼaurida ba zi so föna moroi ba waʼaurida iadaʼa.

²¹ Ba zi so föna, tola tasöndra waʼauri si lö aetu, tenga ha 70 ma 80 fakhe ndröfida. Tasöndra ”waʼauri si lö aetu” soʼahonoa, lö fökhö, ba ohahau dödöda ba gulidanö faradaiso. Andrö wa ifotöi ia Sura Niʼamoniʼö ”zindruhu faʼauri andrö”. No ifabuʼu Yehowa wa ibeʼe khöda waʼauri sindruhu, hizaʼi moguna taforege enaʼö ’takhamö’.​—I Timoteo 6:12, 19.

22. (a) Hewisa enaʼö ’takhamö zindruhu faʼauri andrö’? (b) Hana wa tenga sinangea tatema ia?

²² Hewisa enaʼö ’takhamö zindruhu faʼauri andrö’? ’Tatolo nawöda’ ba ’fahöna khöda mbua-bua si sökhi’. (I Timoteo 6:18) Eluahania, tafalua zi no tafahaʼö yaʼita ba Zura Niʼamoniʼö. Hizaʼi, tatema waʼauri sindruhu andrö tenga börö waʼabölöda, ba tenga sinangea tatema ia. Daʼö no buala Yehowa khö nono mbanuania, tandra ’waʼebua dödönia’. (Roma 5:15) Sindruhu-ndruhu omasi Namada si so ba zorugo wameʼe buala khö nono mbanuania si lö faröi.

23. Hana wa öfalua iadaʼa na so zinangea öbulöʼö ba waʼauriu?

²³ Sofu khöu samösa, ’Hadia faudu ba zomasi Lowalangi wamosumangegu yaʼia?’ Na so zinangea öbulöʼö ba waʼauriu, falua daʼö iadaʼa. Na taʼodaligö Yehowa ba taforege woloʼö yaʼia, tobali nahia wolombaseda ia. Irorogö nono mbanuania si lö faröi  Yehowa ba gulidanö tana khö Zatana andre safönu faʼalösökhi, ba irugi tobali Faradaiso gulidanö andre, simane si no ifabuʼu. Andrö, tola ökhamö waʼauri sindruhu na öhalö gangetula satulö iadaʼa!