1. Hadia wangandrö si no laʼila niha?

ZUTA waʼato niha sangila Fangandrö Zoʼaya. Daʼö duma-duma wangandrö nibeʼe Yesu khö ndra nifahaʼönia meföna. Hadia niʼandrönia? Ba hana wa moguna khöda wangandrö daʼö iadaʼa?

2. Hadia zi tölu ngawalö nifahaʼö Yesu zinangea taʼangandröi?

² Imane Yesu, ”Andrö mimane wangandrö: He Ama khöma si so ba zorugo! Yateʼamoniʼö döiu. Yatobali Banuau fefu niha. Yaʼitörö zomasi ndraʼugö, hulö ba zorugo, yasimanö göi ba gulidanö.” (Baso Mataiʼo 6:9-13.) Hana wa ifahaʼö ita Yesu enaʼö taʼangandröi zi tölu ngawalö andrö?​—Faigi Gonönöta 20.

3. Hadia niʼilada nifalua Mbanua Lowalangi?

³ No aboto ba dödöda wa Yehowa döi Lowalangi. Aboto göi ba dödöda gohitö dödö Lowalangi ba niha ba ba gulidanö. Hadia geluaha wehede Yesu me imane, ”Yatobali Banuau fefu niha”? Datafaigi hadia geluaha Mbanua Lowalangi andrö, hadia nifaluania, ba hewisa wangamoniʼönia töi Lowalangi.

4. Hadia Mbanua Lowalangi andrö, ba haniha zi tobali Razonia?

⁴ No ifasindro Yehowa wamatörö ba zorugo, Yesu nifilinia tobali Razo. Ba Zura Niʼamoniʼö lafotöi ia Banua Lowalangi. Yesu ’ba no Razo si ha samösa,  ba Soʼaya sokhö’. (I Timoteo 6:15) Abölö sökhi wamatörö Yesu ba ebua kuasonia moroi ba wamatörö niha gulidanö.

5. Hezo iʼotarai wamatörö Lowalangi andrö? Ba haniha nifatörönia?

⁵ Öfa wulu wongi me no aefa tesusugi Yesu, manahae ia ba zorugo. Ifataro ia Yehowa tobali Razo ba Mbanuania. (Halöwö Zinenge 2:33) Mamatörö Mbanua Lowalangi ba gulidanö si otarai zorugo. (Famaʼeleʼö 11:15) Andrö wa ifotöi ia ba Zura Niʼamoniʼö ’Banua zorugo’.​—II Timoteo 4:18.

6, 7. Hadia mbörö wa sökhi wamatörö Yesu moroi ba wamatörö niha gulidanö?

⁶ Ifatunö khöda Sura Niʼamoniʼö wa Yesu andrö töra moroi ba razo niha gulidanö, börö ’me lö itörö ia faʼamate’. (I Timoteo 6:16) Fefu razo niha gulidanö hasambalö mate, na Yesu lö itörö waʼamate. Fefu nifaluania lö tebulö irugi zi lö aetu.

⁷ Ifatunö khöda Sura Niʼamoniʼö wa Yesu andrö Razo satulö ba sahakhö tödö, ”Ba ahono khönia geheha Yehowa; eheha samaʼema faʼatua-tua ba faʼaboto ba dödö ba famolala tödö ba faʼabölö ba fangila wetahögö ba fangataʼufi Yehowa. Samohua khönia wangataʼufi Yehowa andrö; tenga niʼila hörönia dali wanguhukunia, ba tenga dali wangetuʼö huku nirongo dögi dalingania; satulö saʼae dali khönia wameʼe huku ba zi numana.” (Yesaya 11:2-4) Hadia lö omasi ndraʼugö razo simane daʼö?

8. Hana wa taʼila wa tenga ha Yesu zamatörö?

⁸ So niha nifili Lowalangi moroi ba gulidanö si fao awö Yesu ba wamatörö ba zorugo. Duma-dumania,  imane sinenge sotöi Faulo khö Dimoteo, ”Na tataha wamakao, ba awö göi ita dania, ba waʼasalawa.” (II Timoteo 2:12) Hawaʼato zi fao khö Yesu dania ba wamatörö?

9. Hawaʼato nawö Yesu ba wamatörö? Ba hamega ibörögö ifili ira Lowalangi?

⁹ Simane si no taʼila ba Faza 7, oroma ba gangilata sinenge sotöi Yohane wa no tobali Razo Yesu ba zorugo fao zi 144.000 razo tanö böʼö. Haniha zi 144.000 andrö? Imane Yohane, ”Nisura ba gangangora töi [Yesu] ba töi Namania andrö.” Imane nasa, ’Yaʼira zoloʼö Ono Mbiri-biri [Yesu] andrö hezo möi. Yaʼira nihöli moroi ba niha gulidanö.’ (Baso Famaʼeleʼö 14:1, 4.) Si 144.000 andrö niha Keriso si lö faröi nituyu Lowalangi tobali ”salawa ira dania ba gulidanö” si fao khö Yesu. Na mate ira, tesusugi möi ba zorugo. (Famaʼeleʼö 5:10) Iʼotarai ndra sinenge Yesu, ibörögö ifili Yehowa zi 144.000 moroi ba gotalua niha Keriso si lö faröi.

10. Hana wa tawaʼö börö waʼomasi Yehowa wa ifili Yesu hegöi si 144.000 zamatörö ba gulidanö?

¹⁰ Börö wangosinangegö Yehowa niha gulidanö, andrö wa ifili ba gotaluara zamatörö si fao khö Yesu. Sökhi wamatörö Yesu, iʼameʼegö tödö ita, me no itörö wamakao simane nitörö niha gulidanö. Imane Faulo, Yesu andrö ’sahakhö tödö, ba waʼambö waʼabölöda, zi so khöda’, ba ”si no mutandraigö ba ngawalö hadia ia fefu, hulö simane yaʼita”. (Heberaiʼo 4:15; 5:8) Simanö göi zi 144.000, börö me moroi ba gulidanö ira niha si lö moʼahonoa, no  irai göna khöra wökhö ba famakao, andrö wa faduhu dödöda wa tenga ha aboto ba dödöra hadia nirasoida, tobali aboto göi ba dödöra hadia gabula dödö salua khöda.

11. Hana wa ifahaʼö ndra nifahaʼönia Yesu ba wangandrö enaʼö alua gohitö dödö Lowalangi ba zorugo?

¹¹ Ifahaʼö ndra nifahaʼönia Yesu ba wangandrö enaʼö alua gohitö dödö Lowalangi ba zorugo. Hadia mbörö? No tafahaʼö ita ba Faza 3 wa no molawa Gafökha Satana khö Yehowa. Hewaʼae simanö, itehe nasa Yehowa toröi ba zorugo ndra malaʼika selungu mazui bekhu. Börö daʼö, lö fefu zi so ba zorugo lafalua zomasi Lowalangi. Ba Faza 10 dania tafahaʼö ita sanandrösa khö Zatana ba malaʼikania.

12. Hadia zi dombua ngawalö salua nitötöi ba zura Famaʼeleʼö 12:10?

¹² Itutunö Sura Niʼamoniʼö me no tefataro Razo Yesu ba Mbanua Lowalangi, fasuwö ira Zatana. (Baso Famaʼeleʼö 12:7-10.) Ba ayati 10 ifatunö so dombua zalua, tobali Razo Yesu Keriso ba Mbanua Lowalangi, ba tetiboʼö Zatana ba gulidanö. Ba no alua daʼa fefu.

13. Hadia zalua ba zorugo me tetiboʼö Zatana ba gulidanö?

¹³ Ifatunö Sura Niʼamoniʼö, omuso dödö ndra malaʼika ba zorugo me no tetiboʼö Zatana awö malaʼikania ba gulidanö. Imane, ”Andrö miʼomusoiʼö dödömi, yaʼami banua si yawa, awö zi so nahia ba daʼö.” (Famaʼeleʼö 12:12) Awena ohahau dödö zi so ba zorugo ba so khöra wahasara dödö ba wamalua somasi Lowalangi.

14. Hadia zalua ba gulidanö me no tetiboʼö Zatana moroi ba zorugo?

 ¹⁴ Faböʼö zalua ba gulidanö. Oya gabula dödö börö ”me no möi mitou Gafökha andrö”, ba ”me no ebua wönunia, ba me no iʼila, lö aratö nitehe khönia”. (Famaʼeleʼö 12:12) Ebua sibai wönu Zatana. Me no latiboʼö ia ba gulidanö, ba me no iʼila lö aratö wamakiko yaʼia. Iforege wamakao niha gulidanö, ibeʼe wökhö ba abula dödö tanö böʼö.

15. Hadia gohitö dödö Lowalangi ba gulidanö?

¹⁵ Hewaʼae simanö, lö tebulö gohitö dödö Lowalangi ba gulidanö, enaʼö fefu niha gulidanö lasöndra waʼauri si lö aetu ba waradaiso. (Zinunö 37:29) Hewisa wamalua Mbanua Lowalangi daʼö?

16, 17. Hadia nifatunö ba zura Danieli 2:44 sanandrösa ba Mbanua Lowalangi?

¹⁶ Simane nifaʼeleʼö ba Danieli 2:44, ”Ba na luo razo andrö, ba iʼasogö gamatöröwa Lowalangi ba zorugo, amatöröwa si tebai adudu, götö-götö waʼara, ba faʼasalawa daʼö, ba lö möi ba niha böʼö; irasa dania gamatöröwa no mege fefu, ba ihori, ba yaʼia, ba lö tebulö, irugi zi lö aetu.” Hadia zi tobali famahaʼö khöda ba nifaʼeleʼö sanandrösa ba Mbanua Lowalangi?

¹⁷ Si oföna, alua mamatörö Mbanua Lowalangi ”na luo razo”. Eluahania tohare Mbanua Lowalangi ba gotalua wamatörö niha. Si dua, ifatunö khöda wa Banua Lowalangi andrö lö tebulö irugi zi lö aetu. Si tölu, fasuwö Mbanua Lowalangi ba wamatörö niha gulidanö. Banua Lowalangi zi möna,  ba yaʼia zamatörö si sökhi ba gulidanö maʼasagörö, irege larasoi waʼohahau dödö niha gulidanö.

18. Hadia döi wasuwöta safuria ba gotalua Mbanua Lowalangi ba famatörö niha gulidanö?

¹⁸ Hewisa wa tola alua Mbanua Lowalangi ba gulidanö? Fatua lö alua wasuwöta safuria nifotöi Hamagedo, lafaelungu ’razo ba gulidanö maʼasagörö ira malaʼika selungu, ba wangowuloi yaʼira ba wanuwö andrö na baŵa sebua khö Lowalangi Samatörö fefu hadia ia’. Fefu razo ba gulidanö lalawa Mbanua Lowalangi.​—Famaʼeleʼö 16:14, 16; faigi Gonönöta 10.

19, 20. Hana wa moguna khöda Mbanua Lowalangi andrö?

¹⁹ Hana wa moguna khöda Mbanua Lowalangi andrö? So tölu mbörö. Si oföna, börö me si tumbu ba horö ita, andrö göna fökhö ba faʼamate. Hizaʼi, imane Sura Niʼamoniʼö so waʼauri si lö aetu na tohare Mbanua Lowalangi. Imane Yohane 3:16, ”Simanö sa waʼomasi Lowalangi nösi gulidanö, no ibeʼe Nononia andrö si ha sambua, enaʼö lö tekiko dozi samati khönia, enaʼö so khöra waʼauri si lö aetu.”

²⁰ Si dua, börö me no so ita ba gotalua niha si lö sökhi, si falimo ba samalua amuata sogoro Lowalangi, andrö wa moguna khöda Mbanua Lowalangi. Tebai taheta zi lö sökhi andrö, ha Lowalangi zi tola, ihori dania niha si lö sökhi ba Hamagedo. (Baso Zinunö 37:10.) Si tölu, börö me famatörö niha gulidanö andrö lö sökhi, laʼakali nawöra, lahalö zi tenga khöra, andrö moguna khöda Mbanua  Lowalangi. Lö lafarou niha ba woloʼö somasi Lowalangi. Imane Sura Niʼamoniʼö, ”Samatörö awönia niha, ba wangalani yaʼia.”​—Zangombakha 8:9.

21. Hadia gohitö dödö Lowalangi salua ba wamatörönia?

²¹ Me no aefa Hamagedo, barö wamatörö Mbanua Lowalangi, alua fefu gohitö dödö Lowalangi ba gulidanö. Duma-dumania, ihori Zatana ba malaʼikania. (Famaʼeleʼö 20:1-3) Lö hadöi fökhö ba faʼamate. Fefu niha gulidanö lasöndra waʼauri si lö aetu ba Waradaiso börö höli si no ibeʼe Yehowa. (Famaʼeleʼö 22:1-3) Teʼamoniʼö döi Lowalangi ba wamatörönia andrö, eluahania ba wamatörö Lowalangi fefu niha laʼogunaʼö döi Yehowa.​—Faigi Gonönöta 21.

22. Hana wa taʼila wa lö iʼanemai tobali Razo Yesu me manahae ia ba zorugo mazui me so ia ba gulidanö?

²² Ifahaʼö ndra nifahaʼönia Yesu ba wangandrö, ”Ya tobali Banuau fefu niha.” Ba daʼö oroma wa lö nasa si tohare wamatörö Lowalangi andrö. Si oföna, ifasindro wamatörönia Yehowa, ba ifataro Yesu tobali Razo. Hadia iʼanemai tobali Razo Yesu  me manahae ia ba zorugo? Löʼö, ibaloi nasa. Me no aefa tesusugi Yesu, itutunö Faulo ba Fetero hadia nifaʼeleʼö Zinunö 110:1 sanandrösa khö Yesu. Simane nifaʼeleʼö ba zura andrö, ”Dadao ba gambölögu, irege ubeʼe dane-dane gaheu zi faʼudu khöu andrö.” (Halöwö Zinenge 2:32-35; Heberaiʼo 10:12, 13) Hawaʼara ibaloi Yesu dadaoma Waʼarazo andrö moroi khö Yehowa?

23. (a) Hamega tobali Razo Yesu ba wamatörö Lowalangi? (b) Hadia nifahaʼöda yaʼita ba faza aefa daʼa?

²³ Haʼuga fakhe fatua lö alua ndröfi 1914, aboto ba dödö niha Keriso satulö tödö si lö atoto wa daʼö ndröfi si tebai muʼolifugö si no tefaʼeleʼö ba Zura Niʼamoniʼö. Salua ba gulidanö iʼotarai me döfi 1914 zi tobali tandra wa sindruhu zi no aboto ba dödöra andrö. Tobali Razo Yesu ba ndröfi daʼö. (Zinunö 110:2) Lö ara aefa daʼö, tetiboʼö Zatana ba gulidanö, hizaʼi ”lö ara nitehe khönia”. (Famaʼeleʼö 12:12) Tafatunö ba faza aefa daʼa wa no auri ita ba ginötö weʼaso Zatana ba gulidanö. Ba tafahaʼö ita wa lö aratö mamatörö Mbanua Lowalangi ba gulidanö.​—Faigi Gonönöta 22.