1. Hadia zi tumbu ba dödöu me no öfahaʼö yaʼugö ba mbuku andre?

OYA zi no aboto ba dödöu wamahaʼö moroi ba Zura Niʼamoniʼö, simane faʼauri si lö aetu si no ifabuʼu Lowalangi, hewisa niha si no mate, ba fanusugi. (Zangombakha 9:5; Luka 23:43; Yohane 5:28, 29; Famaʼeleʼö 21:3, 4) Te no asese öʼondrasi gangowuloa ndra Samaduhuʼö Yehowa ba no öʼila wa lafalua wamosumange sindruhu. (Yohane 13:35) No öbörögö fahuwu khö Yehowa ba öhalö gangetula  wamosumange yaʼia. Te manofu dödöu, ’Hadia nifaluagu enaʼö tola ufosumange Lowalangi?’

2. Hana wa omasi ndrawa Gatiofia tebayagö idanö?

² Daʼö zi no itörö dawa Gatiofia ba götö Yesu. Lö ara me no aefa tesusugi Yesu, manuriaigö nifahaʼönia sotöi Filifo khö ndrawa Gatiofia andrö. Ibotokhi khönia Filifo wa Yesu andrö Mesia. Adöni dödö ndrawa Gatiofia andrö ba zi no irongo, andrö imane, ”Hiza nidanö! Hadia wanenaŵa na tebayagö idanö ndraʼo?”​—Halöwö Zinenge 8:26-36.

3. (a) Hadia goroisa Yesu khö ndra nifahaʼönia? (b) Hana wa moguna tebayagö idanö ndraʼugö?

³ No ifahaʼö ita Sura Niʼamoniʼö wa moguna tebayagö ita idanö na omasi ita wamosumange Yehowa. Imane Yesu khö ndra nifahaʼönia, ”Mibaliʼö nifahaʼö fefu soi, wamayagö idanö yaʼira.” (Mataiʼo 28:19) No ibeʼe duma-duma Yesu me tebayagö ia idanö. Lahöndrögö ia ba nidanö, tenga ha latefe högönia. (Mataiʼo 3:16) Simanö göi nifalua niha Keriso na tebayagö ira idanö, lahöndrögö ira ba nidanö.

4. Hadia niʼila niha sato me tebayagö ndraʼugö idanö?

⁴ Me öbayagö ndraʼugö idanö, daʼö zangoromaʼö föna niha sato wa sindruhu-ndruhu omasiʼö tobali si fahuwu khö Lowalangi ba öfosumange ia. (Zinunö 40:8, 9) Te manofu dödöu, ’Hadia nifaluagu enaʼö tebayagö ndraʼo idanö?’

5. (a) Hadia zinangea öfalua fatua lö öbayagö ndraʼugö idanö? (b) Hana wa moguna möi ba gangowuloa niha Keriso?

⁵ Fatua lö öbayagö ndraʼugö idanö, moguna aboto ba dödöu Yehowa ba Yesu. No öfalua daʼö me  öbörögö öfahaʼö ndraʼugö ba Zura Niʼamoniʼö. (Baso Yohane 17:3.) Hizaʼi, ambö daʼö. Imane Sura Niʼamoniʼö, moguna ’aboto ba dödöu zindruhu’ sanandrösa ba zomasi Yehowa. (Kolose 1:9) Angowuloa ndra Samaduhuʼö Yehowa zanolo yaʼugö ba wangokhögö fahuwusa si sökhi khö Yehowa. Börö daʼö, böi böhöli weʼamöi ba gangowuloa.​—Heberaiʼo 10:24, 25.

6. Hawaʼoya waʼaboto ba dödö Zura Niʼamoniʼö zinangea öʼila fatua lö tebayagö idanö ndraʼugö?

⁶ Lö iʼandrö Yehowa enaʼö öʼila fefu nösi Zura Niʼamoniʼö fatua lö öbayagö ndraʼugö idanö. Lö iʼandrö khö ndrawa Gatiofia enaʼö iʼila fefu nösi zura fatua lö ibayagö ia idanö. (Halöwö Zinenge 8:30, 31) Sindruhunia, lö aetu tafahaʼö ita sanandrösa khö Lowalangi. (Zangombakha 3:11) Hizaʼi, fatua lö öbayagö ndraʼugö idanö, si löʼö-löʼönia so khöu waʼaboto ba dödö dane-dane wamahaʼö moroi ba Zura Niʼamoniʼö.​—Heberaiʼo 5:12.

7. Hewisa wamahaʼö ba Zura Niʼamoniʼö tola itolo ndraʼugö?

⁷ Imane Sura Niʼamoniʼö, ”Na lö famati, ba tebai iʼomasiʼö niha Lowalangi.” (Heberaiʼo 11:6) Andrö, moguna mamati ndraʼugö fatua lö tebayagö idanö. Ifatunö khöda Sura Niʼamoniʼö so niha Gorindro meföna zamondrongo famahaʼö moroi khö nifahaʼö Yesu, lua-luania, ”mamati ba lafabayagöʼö idanö ira”. (Halöwö Zinenge 18:8) Simanö göi, famahaʼö moroi ba Zura Niʼamoniʼö zanolo yaʼugö ba wamati ba nifabuʼu Lowalangi awö höli si no ibeʼe Yesu ba wangefaʼö yaʼita moroi ba horö ba ba  waʼamate.​—Yosua 23:14; Halöwö Zinenge 4:12; II Timoteo 3:16, 17.

8. Hana wa omasiʼö wamatunö ba niha böʼö hadia zi no öʼila?

⁸ Na öʼila wa moguna ba waʼauriu wamahaʼö ba Zura Niʼamoniʼö, itugu aro wamatiu. Ba terou dödöu wangombakha ba niha böʼö hadia zi no öfahaʼö yaʼugö. (Yeremia 20:9; II Korindro 4:13) Hizaʼi, haʼökhö öʼombakhaʼö?

9, 10. (a) Haʼökhö öfatunö zi no öʼila? (b) Hadia zinangea öfalua na omasiʼö fao khö ndra talifusöda ba weʼamöi manuriaigö?

⁹ Sökhi na öfatunö ba nösi nomou, khö nawö-awöu, ba zi faola omo khöu, mazui khö nawöu wohalöwö hadia zi no öfahaʼö yaʼugö. Hizaʼi, haogö wamatunö khöra. Tola fao ndraʼugö khö ndra talifusö tanö böʼö ba wanuriaigö. Na öʼila tola manuriaigö ndraʼugö, fatunö khö zamahaʼö yaʼugö ba Zura Niʼamoniʼö wa omasiʼö fao khö ndra talifusöda. Na iʼila wa no tola manuriaigö ba no öfaudugö waʼauriu ba goi-goi Zura Niʼamoniʼö, tola miʼondrasi darua zatua sokubaloi si so ba gangowuloa.

¹⁰ Hadia nifatunömi? Fahuhuo khöu ndra satua sokubaloi ba wamaigi hadia no aboto ba dödöu ba hadia faduhu dödöu dane-dane wamahaʼö Zura Niʼamoniʼö, hadia no öfalua goi-goi Zura Niʼamoniʼö ba waʼauriu, ba hadia sindruhu-ndruhu omasiʼö tobali Samaduhuʼö Yehowa. Törö tödöu wa ira satua sokubaloi laʼameʼegö tödö sibai ndra talifusö si so ba gangowuloa, hegöi yaʼugö, andrö lö moguna ataʼu ndraʼugö fahuhuo khöra.  (Halöwö Zinenge 20:28; I Fetero 5:2, 3) Aefa daʼö, lafatunö khöu hawaʼara tola öbörögö fao khö ndra talifusö weʼamöi manuriaigö.

11. Hana wa so zinangea öbulöʼö ba waʼauriu fatua lö faoʼö khö ndra talifusö ba weʼamöi manuriaigö?

¹¹ Laʼombakhaʼö khöu ira satua sokubaloi hadia zinangea öbulöʼö ba waʼauriu fatua lö möiʼö manuriaigö. Hana wa so zinangea tabulöʼö ba waʼaurida? Na tafatunö ba niha sanandrösa khö Lowalangi, sindruhunia no tasalahini Yehowa, andrö moguna tafaudugö lala waʼaurida ba zomasi ia.​—I Korindro 6:9, 10; Galatia 5:19-21.

12. Hana wa moguna wamalalini era-era?

¹² So danö böʼö sinangea öfalua fatua lö tebayagö idanö. Imane sinenge sotöi Fetero, ”Andrö mifalalini gera-erami, ba mifuli ami, ba wamabetaʼö horömi.” (Halöwö Zinenge 3:19) Hadia geluahania? Yaʼia daʼö, so waniasa ba ngawalö zala nifaluada. Duma-dumania, na no irai öfalua gamuata wohorö, iadaʼa bulöʼö lala waʼauriu. Hewaʼae no öforege wamalua satulö ba waʼauriu, lö tebulö nasa öfalalini gera-erau. Börö me niha si so horö ita, moguna taʼandrö waʼebolo dödö Lowalangi.​—Roma 3:23; 5:12.

13. Hadia geluahania ”mifuli ami”?

¹³ Hadia ibönö na ha faniasa? Löʼö. Imane Fetero moguna ”mifuli ami”. Eluahania, moguna öröi fefu gamuata si lö sökhi, ba öbörögö wamalua satulö. Duma-dumania, khalaigö me möiʼö ba nahia si lö irai öʼondrasi. Ba dalu lala, öʼila wa no elungu  ndraʼugö. Hadia nifaluau? Iʼanemai ödaʼi-daʼi, öbatogö ndraʼugö, ba öfuliʼö furi, ba möiʼö ba lala satulö. Simanö göi, me no öfahaʼö ndraʼugö ba Zura Niʼamoniʼö, ömane dödöu wa so zinangea öbulöʼö ba waʼauriu. Öforege ’öfuliʼö furiʼ—si no amaedola öbulöʼö waʼauriu—ba öbörögö öfalua zatulö.

14. Hadia nifabuʼumö khö Lowalangi?

¹⁴ Lala tanö böʼö sinangea öfalua fatua lö tebayagö idanö, yaʼia daʼö fawuʼu li ndraʼugö khö Yehowa. Öfabuʼu ba wangandrö khö Yehowa wa ha yaʼia öfosumange ba öʼofönaiʼö wamalua somasi dödönia ba waʼauriu.​—V Moze 6:15.

15, 16. Hadia zamarou tödö niha fawuʼu li khö Lowalangi?

¹⁵ Fawuʼusa li khö Yehowa fagölö ia na fawuʼu li ba niha niʼomasiʼöda. Khalaigö atö niha si fakawa. Itugu ara, itugu aboto ba dödö nono matua gamuata nono alawe. Ba gafuriata, monönö waʼomasinia ba tumbu ba dödönia wangowalu khö nono alawe andrö. Hewaʼae oya noro dödö na no mangowalu, ba lö tobali taha-taha khönia börö waʼomasinia.

¹⁶ Me no öfahaʼö ndraʼugö sanandrösa khö Yehowa, monönö waʼomasiu khönia ba tumbu ba dödöu wamosumange yaʼia. Daʼö zondrönisi tödöu ba wawuʼusa li khönia ba wangandrö. Imane Sura Niʼamoniʼö niha somasi moloʼö Yesu, ’iʼositengagö ia’. (Mareko 8:34) Hadia geluahania? Moguna öʼofönaiʼö woloʼö khö Yehowa ba waʼauriu. Ofönaiʼö wamalua somasi ia moroi ba zomasi ndraʼugö.​—Baso I Fetero 4:2.

17. Hana wa so niha si lö omasi fawuʼu li khö Yehowa?

¹⁷ So niha si lö omasi fawuʼu li khö Yehowa, ataʼu ira ma tebai lafalua zi no lafabuʼu andrö. Lö omasi ira laʼafökhöiʼö dödö Yehowa, mazui so zangumaʼö na lö fawuʼu li ira khö Yehowa, lö naʼatö foʼömöra khönia.

18. Hadia zanolo yaʼugö enaʼö lö öfalua zi lö sökhi föna Yehowa?

¹⁸ Faʼomasiu khö Yehowa zanolo yaʼugö wa lö öfalua zi lö sökhi ba öforege wamalua si no öfabuʼu khönia. (Zangombakha 5:3; Kolose 1:10) Böi ömane dödöu abua sibai wamalua somasi Yehowa. Imane sinenge sotöi Yohane, ”Daʼö sa waʼomasida Lowalangi, enaʼö taʼoʼö goroisania, ba tenga safökhö woloʼö oroisania.”​—I Yohane 5:3.

19. Hana wa lö moguna ataʼuʼö fawuʼu li khö Yehowa?

¹⁹ Tenga dali moʼahonoa ndraʼugö awena fawuʼu li khö Yehowa. Lö irai iʼandrö zi töra moroi ba zi tola tafalua. (Zinunö 103:14) Itolo ndraʼugö ba wamalua satulö. (Yesaya 41:10) Faduhusi tödö Yehowa, ba ”yaʼia zangadölöʼö töröwau”.​—Gamaedola 3:5, 6.

20. Na no fawuʼu li ndraʼugö khö Lowalangi, hadia nasa zinangea öfalua?

²⁰ Hadia no tola fawuʼu li ndraʼugö khö Yehowa? Na no aefa fawuʼu li ndraʼugö khönia, awena öfalua danö böʼö. Moguna öbayagö ndraʼugö idanö.

21, 22. Hewisa wamaduhuʼöu famatiu föna niha sato?

²¹ Fatunö khö koordinator satua sokubaloi ba gangowuloa si so yaʼugö wa no fawuʼu li ndraʼugö khö Yehowa ba omasiʼö tebayagö idanö. Aefa daʼö, labeʼe  khöu wanofu-nofu moroi ba Zura Niʼamoniʼö. Na laʼila wa tola tebayagö idanö ndraʼugö, lafatunö khöu na so gangowuloa sebua nifalua ndra Samaduhuʼö Yehowa ba zi so föna. Ba daʼö dania, so huhuo samotokhi eluaha wamayagö idanö. Ibeʼe dombua wanofu sangaʼi huhuo khö zedöna mubayagö idanö. Fanema  li moroi ba wanofu andrö dandra wa no öfaduhuʼö wamatiu föna niha sato.​—Roma 10:10.

²² Aefa daʼö, labayagö idanö ndraʼugö, lahöndrögö ba nidanö. Famayagö idanö zangoromaʼö wa no fawuʼu li ndraʼugö khö Yehowa ba iadaʼa no tobali ndraʼugö Samaduhuʼö Yehowa.

23. Hadia geluahania labayagö idanö ’ba döi Nama, ba döi Nono, ba döi geheha niʼamoniʼö’?

²³ Imane Yesu khö ndra nifahaʼönia enaʼö labayagö ira idanö ”ba döi Nama ba ba döi Nono ba ba döi geheha niʼamoniʼö”. (Baso Mataiʼo 28:19.) Hadia geluahania? Eluahania, öfaduhuʼö waʼabölö Yehowa hegöi halöwö Yesu ba wamalua ohitö dödö Lowalangi, simane fangogunaʼö Lowalangi ehehania enaʼö alua gohitö dödönia.​—Zinunö 83:19; Mataiʼo 28:18; Galatia 5:22, 23; II Fetero 1:21.

24, 25. (a) Hadia geluaha wamayagö idanö khöu? (b) Hadia nifatunöda ba faza aefa daʼa?

²⁴ So geluaha wamayagö idanö. Me lahöndrögö ndraʼugö ba nidanö, eluahania no öröi gamuata si lö faudu. Ba me lafazawaʼö moroi ba nidanö, eluahania no öbörögö wamalua ohitö dödö Lowalangi. Daʼö zangoromaʼö wa no ölulu waʼauriu khö Yehowa iʼotarai daʼö. Böi olifuʼö wa tenga ba niha, ma ba gangowuloa niha gulidanö, mazui ba halöwö ölulu waʼauriu, tobali, khö Yehowa.

²⁵ Buʼusa liu khö Lowalangi zanolo yaʼugö enaʼö ahatö ndraʼugö khönia. (Zinunö 25:14) Tenga eluahania na no öbayagö ndraʼugö idanö ba teʼorifiʼö dania. Imane Faulo, ”Miʼalui wangorifimi andrö ba mbanua furi, sataʼu ami ba sanizi-nizi.” (Filifi 2:12) Famayagö idanö ha famobörö ba wogamö faʼauri si lö aetu. Hewisa enaʼö böi mamalö-malö ahatö ita khö Yehowa? Faza safuria ba mbuku andre zameʼe fanema li.