1-3. Hadia zasese lasofu niha sanandrösa ba waʼamate? Hadia wanema li agama?

NO IFABUʼU Sura Niʼamoniʼö wa samuza inötö dania ”lö faʼamate saʼae”. (Famaʼeleʼö 21:4) No tafahaʼö ita ba Faza 5, wa no tehöli ita irege tasöndra waʼauri si lö aetu. Hizaʼi, fefu niha iadaʼa mate. (Zangombakha 9:5) Tatu manofu dödöda, hadia zalua na mate ita?

² Moguna wanema li moroi ba wanofu andrö, mendrua manö na mate niha niʼomasiʼöda. Tola manofu dödöda: ’Hezo isawa? Hadia iʼila-ila ita? Hadia tola itolo ita? Hadia tola ifuli falukha ita khönia dania?’

³ Faböʼö-böʼö wanema li moroi ba agama. So zangumaʼö na niha satulö ndraʼugö, möiʼö ba zorugo, ba na niha si lö sökhi ndraʼugö, narako nahau. So göi zangumaʼö na no mate ndraʼugö tobali boto eheha, ba falukha khöu ndra tuau si no mate. So göi zangumaʼö na no mate ndraʼugö ba na no tehuku, ifuli auri ba mboto si faböʼö-böʼö, tola tobali niha mazui urifö.

4. Hadia nösi wamahaʼö agama sanandrösa ba niha si no mate?

⁴ Hewaʼae faböʼö-böʼö wanema li agama, ha sambua geluaha niwaʼöra andrö. Yaʼia daʼö na mate niha, auri nosonia. Hadia sindruhu daʼö?

5, 6. Hadia zalua na no mate ita?

⁵ Anehe Yehowa hadia zalua na no mate ita, andrö imane wangumaʼö, na no mate niha lö faʼauri saʼae. Börö daʼö, na no mate niha lö fangera-ngerania saʼae, lö itörö tödöra niha böʼö, lö auri ira ba nahia tanö böʼö. * Na no mate ita, lö taʼila hadia ia, lö tarongo hadia ia, ba lö taʼangeraigö hadia ia.

⁶ Simane nisura Razo Selomo, ”Si no mate, ba lö hadia ia laʼila.” Lö faʼomasi ba niha si no mate, lö fatiusa, me ”ba Mbanua Tou sa, ba zi möiʼö dania, ba lö halöwö, ba lö faʼonekhe ba lö faʼaboto ba dödö ba lö faʼatua-tua”. (Baso Zangombakha 9:5, 6, 10.) Imane ba zura Zinunö 146:4, na no mate niha awai ”nikhoi dödönia”.

7. Hadia niwaʼö Yesu sanandrösa ba niha si no mate?

⁷ Me mate zi fahuwu khö Yesu sotöi Lazaro, imane khö ndra nifahaʼönia, ”No mörö Lazaro andrö, si fahuwu khöda.” Tenga sindruhu femörö Lazaro niwaʼö Yesu, tobali ifuli imane, ”No mate Lazaro.” (Yohane 11:11-14) Ifoʼamaedola zi no mate andrö hulö zi no mörö. Tenga daʼö niwaʼö Yesu no möi Lazaro ba zorugo, mazui no möi ia khö ndra tuania si no mate. Ba lö göi niwaʼönia no tefakao Lazaro ba narako, mazui no tobali mbotonia urifö ma tesusugi ia ba mboto niha tanö böʼö. Lazaro andre  hulö niha sabölö-bölö femörö. Ba ginötö tanö böʼö, iʼamaedolagö Yesu waʼamate andrö hulö zi mörö. Imane Yesu me isusugi nono Yaʼiro moroi ba ngai zi mate, ”Tenga si mate, si mörö.”​—Luka 8:52

8. Hana wa taʼila wa lö omasi Lowalangi na mate niha?

⁸ Hadia daʼö gohitö dödö Lowalangi me ifazökhi Gadamo faoma Khawa enaʼö mate ira? Tenga! Ohitö dödö Yehowa enaʼö so khöra waʼauri si lö aetu ba lö göna ira fökhö. Me awena ifazökhi niha Yehowa, no itanögö ba dödöra waʼomasi enaʼö auri ira irugi zi  lö aetu. (Zangombakha 3:11) Simane satua, lö omasi ira na atua nonora ba mate, simanö göi Yehowa lö omasi ia na mate ita. Na simanö, hana wa mate ita?

9. Hana wa lö afökhö woloʼö oroisa nibeʼe Yehowa khö Gadamo ba Khawa?

⁹ Imane Yehowa khö Gadamo ba kabu Edena, ”Öʼa saʼae mbua geu ba kabu fefu, ba bua geu famotokhi ba dödö si sökhi ba si lö sökhi, ba lö tola öʼa; öʼa siʼaikö daʼö, ba mate ndraʼugö!” (I Moze 2:9, 16, 17) Aboto sibai ba dödö Gadamo ba Khawa goroisa Yehowa andrö, ba lö abua woloʼö yaʼia, sinangea göi ifatunö Yehowa khöra hadia zi sökhi ba si lö sökhi. Na laʼoʼö niwaʼö Yehowa, daʼö dandra wa lafosumange ia. Ba daʼö göi dandra wa laʼandrö saohagölö khönia ba zi no ibeʼe khöra.

10, 11. (a) Hewisa wolimo Zatana ndra Adamo ba Khawa? (b) Hana wa lö ebolo dödö Lowalangi khö Gadamo ba Khawa?

¹⁰ Lö laʼoʼö niwaʼö Yehowa ira Adamo ba Khawa. Imane Satana khö Khawa, ”Hadia, duhu no iwaʼö Lowalangi: Löʼö manö miʼa mbua geu ba kabu?” Itema linia Khawa, ”Tola sa maʼa mbua geu ba kabu, ba ba mbua geu andrö si so ba dalu kabu, ba no iwaʼö Lowalangi: Lö tola miʼa ia, ba böi mibabaya, faböi mate ami!”​—I Moze 3:1-3.

¹¹ Imane Satana, ”Maʼifu sa lö mate ami, ba iʼila sibai sa Lowalangi miʼa siʼaikö ia ba teboka hörömi, ba tobali simane Lowalangi ami, saboto ba dödö si sökhi ba si lö sökhi.” (I Moze 3:4-6) Omasi Zatana na Khawa zo tatugöi hadia zi sökhi ba si lö sökhi ba  waʼaurinia. Ilimo göi Khawa wa lö mate ia hewaʼae lö iʼoʼö niwaʼö Lowalangi. Ihalö mbua geu Khawa, iʼa, ba ibeʼe göi ö woʼomonia. Aboto ba dödö Gadamo faoma Khawa goroisa Yehowa wa tebai laʼa mbua geu andrö. Me luo laʼa ia, ba daʼö lasawö goroisa Yehowa. Ba daʼö dandra wa lö lafosumange Namara si so ba zorugo, sebua faʼomasi. Andrö saʼae wa lö faʼebolo dödö Yehowa khöra!

12. Hana wa afökhö sibai dödö Yehowa ba gangetula nihalö Gadamo ba Khawa?

¹² Faʼafatö dödö zalua me lö moloʼö ndra Adamo ba Khawa, me lö lafosumange Zomböi yaʼira! Hewisa dödöu na lalawa ndraʼugö iraonou si no örorogö iʼotarai me ide-ide? Hadia lö afökhö dödöu?

13. Hadia geluaha wehede Yehowa ”si tobali tanö zui dania”?

¹³ Taya waʼauri si lö aetu khö Gadamo ba Khawa me lö laʼoʼö niwaʼö Lowalangi. Imane Yehowa khö Gadamo, ”Tanö saʼatö ndraʼugö ba si tobali tanö zui dania!” (Baso I Moze 3:19.) Eluahania ifuli tobali tanö Gadamo, hulö zi lö irai so ia. (I Moze 2:7) Me no ifalua horö Adamo, mate ia ba lö irai so ia saʼae.

14. Hana wa mate ita?

¹⁴ So Gadamo faoma Khawa irugi maʼökhö, na laʼoʼö niwaʼö Lowalangi.  Hizaʼi, börö me lö laʼoʼö li Lowalangi, aekhu ira ba horö ba mate ira. Horö no hulö wökhö sabölö-bölö ondröita Gadamo khöda. No fao horö me tumbu ita, andrö wa mate ita. (Roma 5:12) Tenga daʼö gohitö dödö Lowalangi ba niha gulidanö. Lö omasi Lowalangi na mate niha. Tefotöi ba Zura Niʼamoniʼö waʼamate andrö ”si faʼudu”.​—I Korindro 15:26.

15. Hewisa zindruhu wangefaʼö yaʼita moroi ba wamahaʼö faya?

¹⁵ Faʼaboto ba dödö sanandrösa ba waʼamate, daʼö zangefaʼö yaʼita moroi ba wamahaʼö faya. Imane Sura Niʼamoniʼö, lö abu dödö niha si no mate. Tebai fahuhuo ita khöra ba tebai fahuhuo ira khöda. Tebai tatolo ira, ba tebai latolo ita. Ba tebai lafakao ita, andrö böi ataʼu ita khöra. Oya agama sangumaʼö wa auri noso niha si no mate, ba tola tatolo ira na tabeʼe gefe khö ndra fandrita ma ere, mazui ba niha niʼamoniʼö. Börö me no aboto ba dödöda zindruhu, lö telimo ita saʼae.

16. Hadia wamahaʼö moroi ba agama sofaya sanandrösa ba niha si no mate?

¹⁶ Iʼogunaʼö agama sofaya Satana ba wolimo yaʼita, wa auri noso niha si no mate. Duma-dumania, so agama sangumaʼö na no mate ita, auri nosoda ba nahia tanö böʼö. Hadia simanö wamahaʼö ba agama si so yaʼugö? Mazui famahaʼö moroi ba Zura Niʼamoniʼö nifahaʼö yaʼugö? Ilimo ita Satana enaʼö taʼerogö Yehowa.

17. Hana wa teʼobousi döi Yehowa ba wamahaʼö galitö narako?

 ¹⁷ Ahöli-höli dödöda ba wamahaʼö agama. Duma-dumania, so zangumaʼö wa tefakao niha si lö sökhi ba narako. Daʼö fangobousi töi Yehowa. Lö irai itehegö tefakao niha ba galitö narako! (Baso I Yohane 4:8.) Hewisa dödöu na öʼila so zotunu tanga nononia ba galitö? Tatu ömane tödöu, lö sökhi niha andrö. Lö omasiʼö fahuwu khönia saʼae. Daʼö zomasi Zatana enaʼö fatuwu ita khö Yehowa!

18. Hana wa lö ataʼu ita ba niha si no mate?

¹⁸ So agama sangumaʼö wa niha si no mate tobali boto eheha. Lafahaʼö ita enaʼö tafosumange ba taʼataʼufi niha si no mate, börö me tola tobali ira si fahuwu mazui si faʼudu khöda. Ato niha si faduhu tödö ba wamahaʼö faya andrö, laʼataʼufi niha si no mate ba lafosumange töra moroi ba wamosumangera Yehowa. Böi olifu ndraʼugö wa lö laʼila hadia ia niha si no mate, andrö böi ataʼufi ira. Me no Yehowa Zomböi yaʼita ba Lowalangi sindruhu ia, andrö wa ha yaʼia tafosumange.​—Famaʼeleʼö 4:11.

19. Hadia gunania me no aboto ba dödöda zindruhu?

¹⁹ Me no aboto ba dödöda zindruhu sanandrösa ba waʼamate, lö telimo ita ba walimosa agama. Ba itugu aboto ba dödöda geluaha zi no ifabuʼu Yehowa sanandrösa ba waʼauri iadaʼa hegöi ba zi so föna.

20. Hadia nifatunöda ba faza aefa daʼa?

²⁰ Ngahönö fakhe zilalö, manofu genoni Lowalangi sotöi Yobi, ”Hadia na mate niha, hadia, ifuli auri?” (Yobi 14:14) Hadia tola ifuli auri niha si no mate? Ahöli dödöda wanema li nibeʼe Lowalangi ba Zura Niʼamoniʼö. Tafatunö ia ba faza aefa daʼa.