1, 2. Hana wa buala Lowalangi fondrege zebua Zura Niʼamoniʼö?

HEWISA dödöu na mamuala zi fahuwu khöu ba zi lö ödöna-döna? Öʼanemai öfaigi ba omuso dödöu me iʼosinangegö ndraʼugö. Öʼandrö khönia saohagölö.

² Sura Niʼamoniʼö buala moroi khö Lowalangi. Oya nisöndrada khönia moroi ba mbuku tanö böʼö. Duma-dumania, iʼombakhaʼö khöda wa Lowalangi zamazökhi banua, ulidanö, awö niha si föföna. So goi-goi si tola manolo yaʼita na so gabula dödö. Tola taʼila ba Zura Niʼamoniʼö hewisa wamazökhi Lowalangi ulidanö tobali nahia si sökhi. Sindruhu-ndruhu wa Sura Niʼamoniʼö buala fondrege zebua moroi khö Lowalangi!

3. Hadia niʼilau na öfahaʼö ndraʼugö ba Zura Niʼamoniʼö?

³ Na öfahaʼö ndraʼugö ba Zura Niʼamoniʼö, aboto ba dödöu wa omasi sibai Lowalangi na fahuwu ndraʼugö khönia. Itugu öfahaʼö ndraʼugö khönia, tedou wahuwusami.

4. Hadia zahöli dödöu sanandrösa ba Zura Niʼamoniʼö?

⁴ No lafoʼeluaha Zura Niʼamoniʼö ba zi töra 2.800 ngawalö li, no lafazökhi töra miliaran ngawua. Miliaran niha zangila mombaso Sura Niʼamoniʼö ba li niʼogunaʼöra samösa. Ba töra sazuta zangokhögö Sura Niʼamoniʼö ero samigu! Lö hadöi buku tanö böʼö si fagölö ba Zura Niʼamoniʼö.

5. Hana wa tawaʼö Sura Niʼamoniʼö andrö ”eheha Lowalangi zameʼe ba dödö niha”?

 ⁵ Sura Niʼamoniʼö ”eheha Lowalangi zameʼe ba dödö niha”. (Baso II Timoteo 3:16.) So zangumaʼö, ’Ira matua zanura Sura Niʼamoniʼö andrö ba hana wa miwaʼö moroi khö Lowalangi?’ Itema li Sura Niʼamoniʼö, ”Nifatörö geheha niʼamoniʼö niha, na humede ira; ba Lowalangi moroi.” (II Fetero 1:21) Simane kafalo wohalöwö iʼandrö khö sekretarisnia ba wanura sura. Na simanö ha bua gera-era nösi zura andrö? Bua gera-era gafalo wohalöwö tenga bua gera-era sekretarisnia. Simanö göi nösi Zura Niʼamoniʼö, Lowalangi Zamaʼanö yaʼia, tenga bua gera-era niha. Lowalangi  zanuturu lala ba wanura bua gera-erania. Sindruhu-ndruhu Sura Niʼamoniʼö ”taromali Lowalangi”.​—I Tesalonika 2:13; faigi Gonönöta 2.

6, 7. Hana wa tawaʼö lö faböʼö-böʼö nösi Zura Niʼamoniʼö?

⁶ Faʼara wanura Sura Niʼamoniʼö andrö töra 1.600 fakhe. No faböʼö-böʼö ginötö waʼauri niha sanura yaʼia. So zi no möi sekola ba so göi zi löʼö. So doto, so göi zohalöwö ba danö, so zi fagai ba nasi, kubalo gurifö, samaʼeleʼö, sanguhuku, ba so göi razo. Hewaʼae faböʼö-böʼö niha sanura Sura Niʼamoniʼö, lö faböʼö nösinia. Fefu nisurara oi moʼamakhaita. *

⁷ Buku si föföna ba Zura Niʼamoniʼö, ifatunö khöda hana wa so gabula dödö ba gulidanö, ba buku safuria ifatunö hewisa wangeheta Lowalangi si lö sökhi ba ibaliʼö gulidanö tobali faradaiso. Ifatunö khöda waʼauri niha ba zi töra ngahönö fakhe ba zi lalö ba iʼombakhaʼö wa fefu gohitö dödö Lowalangi hasambalö alua.

8. Beʼe duma-duma wa ösi Zura Niʼamoniʼö tefaudu ba sains.

⁸ Tenga ba wamahaʼö niha ba sains wa lasura Zura Niʼamoniʼö. Hizaʼi, börö me moroi khö Lowalangi Zura Niʼamoniʼö, tefaudu ia ba sains. Duma-dumania, ba zura III Moze ifatunö goi-goi Lowalangi ba ndraono Gizaraʼeli enaʼö lö göna khöra wökhö niha tanö böʼö. No ara tesura daʼa fatua lö niʼila niha wa so dungö si tola molohe fökhö. Ifatunö khöda  Sura Niʼamoniʼö wa ulidanö andre no manawa-nawa yawa zi löʼö. (Yobi 26:7) Lamane niha, ulidanö andre no fadaya-daya, tobali Sura Niʼamoniʼö zangombakha wa ulidanö andre no owulo-wulo.​—Yesaya 40:22.

9. Hadia wamahaʼö khöda me lö falimo zanura Sura Niʼamoniʼö?

⁹ Itörö fefu nifatunö Zura Niʼamoniʼö sanandrösa ba zalua meföna. Oya mbuku tanö böʼö nisura niha, lö itörö börö me falimo ira. Duma-dumania, lö lafatunö na no kala soira. Tobali, sanura Sura Niʼamoniʼö lö falimo, lafatunö me kala ndraono Gizaraʼeli. Lasura nasa zi fasala ira samösa. Ba zura IV Moze, iʼombakhaʼö Moze wa no fasala ia, ba no göna ia degu-degu moroi khö Lowalangi. (IV Moze 20:2-12) Lafaduhuʼö sanura Sura Niʼamoniʼö wa moroi khö Lowalangi mbuku andrö. Daʼö mbörö wa tafaduhusi tödö Zura Niʼamoniʼö.

10. Hana wa moguna khöda mene-mene Zura Niʼamoniʼö ba ginötö andre?

¹⁰ Fefu nösi Zura Niʼamoniʼö ”eheha Lowalangi zameʼe ba dödö niha, ba moguna ia, ba wamahaʼö, ba ba wangotuʼö, ba ba wangaʼazökhi, ba ba wamamaha ba waʼatulö dödö”. (II Timoteo 3:16) Moguna khöda mene-mene Zura Niʼamoniʼö ba ginötö andre. Iʼila Yehowa hezo moroi mbörötada, andrö aboto ba dödönia gera-erada ba salua khöda. Abölö iʼila moroi khöda, ba omasi ia na ohahau dödöda. Iʼila hadia zi sökhi khöda, iʼila göi zi möi famaʼalada.

11, 12. (a) Hadia mene-mene Yesu ba Mataiʼo faza 5 irugi 7? (b) Hadia danö böʼö zinangea tafahaʼö yaʼita ba Zura Niʼamoniʼö?

¹¹ Ba zura Mataiʼo faza 5 irugi 7, ba daʼö tabaso mene-mene Yesu hewisa lala enaʼö so waʼohahau  dödö, enaʼö sökhi gamakhaitada ba niha, hewisa lala wangandrö, ba hewisa wangera-ngerada ba wangalui kefe. Hewaʼae no 2.000 fakhe ba zi lalö me no ibeʼe mene-mene daʼa Yesu, moguna manö khöda irugi maʼökhö andre.

¹² Ba Zura Niʼamoniʼö, ifahaʼö ita Yehowa ba goi-goi sanolo yaʼita enaʼö ohahau dödöda ba nomo, enaʼö sökhi lala wohalöwöda, ba enaʼö atulö ita ba niha böʼö. Lö tebulö goi-goi Zura Niʼamoniʼö ba wanolo yaʼita, gofu haniha ita, gofu hezo toröi, ba gofu hadia gabula dödöda.​—Baso Yesaya 48:17; faigi Gonönöta 3.

13. Hadia nifaʼeleʼö Yesaya sanandrösa ba mbanua Mbabilona?

¹³ Oya zalua si no tefaʼeleʼö ba Zura Niʼamoniʼö. Duma-dumania, ifaʼeleʼö Yesaya waʼadudu mbanua Mbabilona. (Yesaya 13:19) Itutunö hewisa waʼadudu mbanua andrö dania. No lafoʼöli kara mbanua andrö ba so nungo nidanö samasui yaʼia. Ifaʼeleʼö Yesaya wa laʼoköliʼö nidanö andrö dania ba tebokai mbawandruhönia. Möi bakha zanuwö ba wanudugö banua andrö ba lö solawa yaʼira. Ifaʼeleʼö döi niha sanudugö banua Babilona andrö yaʼia daʼö Kiro.​—Baso Yesaya 44:27–45:2; faigi Gonönöta 4.

14, 15. Hewisa waʼalua wamaʼeleʼö Yesaya?

¹⁴ Dua ngaotu fakhe me no tesura wamaʼeleʼö andrö, awena tohare zanuwö ba wanudugö banua Mbabilona. Haniha zondröniaʼö yaʼira? Simane si no tefaʼeleʼö yaʼia daʼö Kiro, razo Weresia. Alua fefu zimane si no tefaʼeleʼö.

 ¹⁵ Me inötö lafalua gowasa niha Mbabilona, tohare zanuwö yaʼira. Lawai tebai möi zanuwö ba mbanua andrö börö me so göli kara awö nungo nidanö samasui yaʼia. So Kiro ba saradadunia baero mbanua, lakhao mbandra ba wamolala idanö. Alö nidanö ba tola latörö sanuwö moroi ba ndrawa Weresia. Hewisa wa tola latörö göli kara andrö? Simane si no tefaʼeleʼö,  no tebokai mbawandruhö göli kara andrö ba tola möi bakha zanuwö lö solawa yaʼira.

16. (a) Hadia lua-lua Mbabilona moloʼö nifaʼeleʼö Yesaya? (b) Hewisa wa taʼila wa no alua zi no ifaʼeleʼö Yesaya andrö?

¹⁶ Ifaʼeleʼö Yesaya ba gafuriata lö niha si tola auri ba mbanua Mbabilona. Imane wangumaʼö, ”Löʼö saʼae niha khönia, sagötö tanö, tenga banua, götö-götö waʼara.” (Yesaya 13:20) Hadia alua zi no tefaʼeleʼö? Babilona andrö arakhagö 80 kilometer iʼotarai mbanua Bagdad, Irak, hatö adudula zi so ba mbanua Mbabilona. Irugi maʼökhö, samösa lö niha si toröi ba daʼö. No ibözini ira Yehowa faoma ”ezoi fangohori”.​—Yesaya 14:22, 23. *

17. Hana wa tola faduhu dödöda fefu zi no ifabuʼu Lowalangi?

¹⁷ Me no alua fefu zi no tefaʼeleʼö ba Zura Niʼamoniʼö, daʼö wa faduhu dödöda ba nifabuʼunia sanandrösa salua ba zi so föna. Faduhu dödöda wa ifalua  gamabuʼula linia Yehowa ba wombaliʼö ulidanö tobali faradaiso. (Baso IV Moze 23:19.) Tola so khöda ’wanötöna faʼauri si lö aetu, nifabuʼu Lowalangi si lö mofaya föna götö danö andrö’.​—Tito 1:2. *

18. Hadia niwaʼö Waulo sanandrösa ba ”daromali Lowalangi”?

¹⁸ No tafahaʼö ita wa lö buku tanö böʼö si fagölö ba Zura Niʼamoniʼö. Tefaudu nösinia ba sains hegöi ba zalua meföna. Ibeʼe khöda mene-mene si sökhi ba oya wamaʼeleʼö si no alua. Tenga ha daʼö zi tola ibeʼe khöda Sura Niʼamoniʼö, simane nisura zinenge sotöi Faulo, ”Sauri sa daromali Lowalangi andrö, ba sabölö.” Hadia geluahania?​—Baso Heberaiʼo 4:12.

19, 20. (a) Hadia guna khöu Zura Niʼamoniʼö? (b) Hewisa wangandröu saohagölö mbuala andrö yaʼia Zura Niʼamoniʼö?

¹⁹ Tola ibulöʼö waʼaurimö Sura Niʼamoniʼö. Tola itolo ndraʼugö ba wamareso faʼauriu. Tola göi itolo ndraʼugö enaʼö aboto ba dödöu hadia zi so ba wangera-ngerau ba hadia nirasoimö. Duma-dumania, na tawaʼö taʼomasiʼö Lowalangi, tobali ba wangoromaʼö yaʼia, tafalua hadia niwaʼö Zura Niʼamoniʼö.

²⁰ Sindruhu-ndruhu wa Sura Niʼamoniʼö andre moroi khö Lowalangi. Omasi ia na tabaso, tafahaʼö ita khönia, ba taʼomasiʼö mbuku andrö. Andrö saohagölö mbuala andrö ba böi bato wamahaʼö yaʼugö khönia. Awena aboto ba dödöu hadia gohitö dödö Lowalangi ba niha. Ba faza miföna, tafahaʼö ita sanandrösa ba gohitö dödönia.