1, 2. Hadia nisofumö khöu samösa, ba hana wa moguna?

SAGÖTÖ öfahaʼö ndraʼugö ba Zura Niʼamoniʼö, no öʼila wa ato niha sangumaʼö lafosumange Lowalangi, sindruhunia si fatuwu khö Lowalangi nifaluara. (II Korindro 6:17) Andrö wa iʼoʼou ita Yehowa enaʼö taheta ita ba agama sofaya, ’Babilona Sebua’. (Famaʼeleʼö 18:2, 4) Iadaʼa, hadia nifaluau? Yaʼita samösa zangai angetula, tasofu khöda samösa, ’Hadia lala wamosumangegu Lowalangi si faudu ba zomasi ia, mazui si faudu ba zomasi ndraʼodo?’

² Sökhi na no öheta ndraʼugö ba agama sofaya. Hizaʼi, te so nasa zoʼamakhaita ba agama sofaya nifaluau. Datafatunö hadia ngawalö zi toʼölö lafalua, ba hana wa moguna tafaigi nifaluara simane famaigi Yehowa.

3. (a) Hana wa so zangogunaʼö adu ba wamosumange Lowalangi? (b) Hadia niwaʼö Zura Niʼamoniʼö sanandrösa ba wangogunaʼö adu?

³ Ato niha si no arara mangogunaʼö adu. Na samösa ndraʼugö zangogunaʼö adu, te abua khöu wamosumange Lowalangi na lö öʼogunaʼö ia. Hizaʼi, böi olifu ndraʼugö wa no ifahaʼö ita Yehowa hewisa lala ba wamosumange yaʼia. Ifatunö khöda Sura Niʼamoniʼö wa lö omasi Yehowa na taʼogunaʼö nadu ba wamosumange yaʼia.​—Baso II Moze 20:4, 5; Zinunö 115:4-8; Yesaya 42:8; I Yohane 5:21.

4. (a) Hana wa tebai tafosumange zatua si no mate? (b) Hana wa itegu nono mbanuania Yehowa ba wahuhuosa ba niha si no mate?

 ⁴ Ato niha sangohorigö inötönia, faʼabölönia ba wamosumange satuara si no mate. Hizaʼi, no tafahaʼö ita wa niha si no mate tebai latolo mazui lafakao niha sauri. Lö auri nosora ba nahia tanö böʼö. Teʼala ita na fahuhuo ba niha si no mate, börö me bekhu sindruhunia zi fahuhuo khöda. Itegu ndraono Gizaraʼeli Yehowa enaʼö lö fahuhuo ira ba zi no mate mazui laʼogunaʼö hadia zoʼamakhaita ba daʼö.​—V Moze 18:10-12; faigi Gonönöta 26 ba 31.

5. Hadia zanolo yaʼugö enaʼö öböhöli wangogunaʼö adu ba famosumange satua si no mate?

⁵ Hadia zanolo yaʼugö enaʼö öböhöli wangogunaʼö adu mazui famosumange satua si no mate? Moguna öbaso Zura Niʼamoniʼö ba fatou-tou tödöu hewisa wamaigi Yehowa amuata simane daʼö. ’Iʼelifi’ ba iʼogorofi niha samalua daʼö. (V Moze 27:15) Angandrö khö Yehowa ero maʼökhö enaʼö öʼokhögö zimane tödönia, ba enaʼö si tefaudu ba zomasi ia zumange nibeʼeu. (Yesaya 55:9) Faduhu dödöu wa iʼabölöʼö ndraʼugö Yehowa ba wondröi fefu soʼamakhaita ba agama sofaya.

6. Hana wa 25 mbaŵa si Felendrua nifilira inötö waʼatumbu Yesu?

⁶ Owasa sebua ba zi sagörö ulidanö yaʼia daʼö Fanunu Fandru ba ato niha sangumaʼö daʼö inötö waʼatumbu Yesu. Sindruhunia Fanunu Fandru moʼamakhaita ba wamahaʼö agama sofaya. Imane buku encyclopedia, wa niha Roma laʼowasaini waʼatumbu dewa matahari 25 mbaŵa si Felendrua. Omasi  zondröniaʼö ba agama enaʼö so niha baero si tobali niha Keriso, andrö hewaʼae tenga 25 mbaŵa si Felendrua tumbu Yesu, laʼowasaini manö. (Luka 2:8-12) Lö laʼowasaini Wanunu Fandru ira nifahaʼö Yesu. So mbuku sangumaʼö wa 200 fakhe me no aefa tumbu Yesu, ”lö sangila hamega ginötö waʼatumbu Yesu, lö ato zoʼameʼegö tödö.” Sacred Origins of Profound Things (Asal Usul Sakral dari Hal-Hal yang Bermakna Dalam) Ngaotu fakhe me no aefa möi Yesu ba gulidanö, awena so Wanunu Fandru.

7. Hana wa lö laʼowasaini Wanunu Fandru niha Keriso sindruhu?

⁷ Ato niha sangila wa femanga-manga ba fameʼe-meʼe buala ba ginötö Wanunu Fandru no si toʼölö nifalua niha baero. Duma-dumania, lö latehegö ira samatörö ba Inggris hegöi ba Amerika Wanunu Fandru börö me famahaʼö niha baero. Lahuku na so zangowasaini. Lö ara aefa daʼö lafuli laʼowasaini zui. Hana wa lö laʼowasaini Wanunu Fandru niha Keriso sindruhu? Börö me omasi ira laʼomusoiʼö dödö Lowalangi ba ngawalö nifaluara.

8, 9. Hana wa lö laʼowasaini mbaŵa waʼatumbu niha Keriso si föföna?

⁸ Sasese laʼowasaini niha nasa yaʼia daʼö baŵa waʼatumbu. Hadia laʼowasaini mbaŵa waʼatumbura niha Keriso? Ha niha si lö mamosumange Yehowa zangowasaini baŵa waʼatumbunia nisura ba Zura Niʼamoniʼö. (I Moze 40:20; Mareko 6:21) Fangowasaini baŵa waʼatumbu lafalua ba wamosumange lowalangi böʼö. Andrö lamane niha Keriso si föföna  wa ”fanörö tödö baŵa waʼatumbu famahaʼö niha baero”.​—The World Book Encyclopedia.

⁹ Faduhu dödö niha Roma hegöi dawa Heleni wa so malaʼika si fao ba waʼatumbu ndraono, daʼö zolumöʼö yaʼia sagötö faʼaurinia. ”So gamakhaitania waʼatumbu ndraono andrö ba waʼatumbu lowalangi böʼö (dewa)”, simane nitutunö ba mbuku The Lore of Birthdays (Kepercayaan Tradisional tentang Hari Lahir).

10. Ba ginötö andre, hana wa lö laʼowasaini mbaŵa waʼatumbu niha Keriso sindruhu?

¹⁰ Moloʼö yaʼugö hadia omasi Yehowa gowasa nifalua soʼamakhaita ba agama sofaya? (Yesaya 65:11, 12) Löʼö. Daʼö wa lö taʼowasaini mbaŵa waʼatumbuda mazui owasa tanö böʼö soʼamakhaita ba agama sofaya.

11. Hana wa so niha samalua owasa? Hadia zi oföna öfalua?

¹¹ Ato niha sangila wa Fanunu Fandru ba owasa tanö böʼö famahaʼö moroi ba niha baero, hewaʼae simanö, lö labato wamalua yaʼia. Lamane dödöra daʼö ginötö waʼowuloda khö ndra talifusöda ba waʼaniha. Hadia simanö zi so ba dödöu? Lö fasala na owulo zi fatalifusö. Yehowa zangaʼasogö si sambua omo, ba omasi ia na sökhi gotaluada zamösana. (Efeso 3:14, 15, NW) Hizaʼi, abölö sökhi na tarorogö wahuwusada khö Yehowa moroi na taʼomusoiʼö dödö dalifusöda ba waʼaniha na taʼowasaini zoʼamakhaita ba agama sofaya. Andrö wa iwaʼö Faulo, ”Mitimba tödömi, hadia zomasi Zoʼaya.”​—Efeso 5:10.

12. Hadia mbörö wa so gowasa si lö fatema ba dödö Yehowa?

 ¹² Ato zangumaʼö lö moguna taʼila hezo moroi fefu niʼowasaini niha. Ba lö fao dödö Yehowa zimane daʼö. Lö omasi ia na taʼowasaini zoʼamakhaita ba agama faya, sameʼe fanuno ba niha, mazui sanuno sambua soi. Duma-dumania, oya gowasa nifalua niha Miserai ba wamosumange lowalangira. Me no aheta ndraono Gizaraʼeli ba danö Miserai, lahalö khöra gowasa ndrawa Miserai ba lafotöi ia ”gowasa khö Yehowa”. Andrö wa ihuku ira Yehowa. (II Moze 32:2-10) Imane Yesaya, ”Böi mibabaya hadia ia zi taʼunö!”​—Baso Yesaya 52:11.

13. Hadia wanofu-nofu dödöu na öbato wangowasaini hadia ia?

¹³ Me öhalö gangetula wamöhöli fefu niʼowasaini niha, te manofu dödöu: Ha uwaʼö na lasofu awögu wohalöwö hana wa lö uʼowasaini Wanunu Fandru? Hadia nifaluagu na so zameʼe khögu buala Wanunu Fandru? Hadia nifaluagu na itötöna ngambatögu enaʼö fao ndraʼo ba wangowasaini hadia ia? Hewisa wanologu iraonogu enaʼö lö afatö dödöra me lö muʼowasaini mbaŵa waʼatumbura mazui owasa tanö böʼö?

14, 15. Hadia nifaluau na so zangumaʼö khöu yaʼahowu Wanunu Fandru, mazui labeʼe khöu mbuala na döfi si bohou?

¹⁴ Moguna atua-tua ita na tawaʼö ba na tafalua hadia ia. Duma-dumania, na so zangumaʼö khöda yaʼahowu Wanunu Fandru ma döfi si bohou, böi osiwawöi ira. Tola öwaʼö khöra, ”Saohagölö”. Ba na so zomasi mangila hadia mbörö wa lö öʼowasaini Wanunu Fandru, haogö wanutunö khöra, ba öfosumange  ira. Imane Sura Niʼamoniʼö, ”Böi tebulö khömi wangehao fehedemi, nilau asio, fa miʼila, he miwisa wanema li zamösana.” (Kolose 4:6) Tola öfatunö khöra wa omasi ndraʼugö owulo khö ndra talifusö ba waʼaniha mazui öbeʼe mbuala, hizaʼi tenga ba ginötö laʼowasaini hadia ia.

¹⁵ Hewisa na so zamuala khöu na so gowasa? Lö nizara-zara Zura Niʼamoniʼö wangombakha hadia zinangea tafalua, hizaʼi faigi zi lö iteguʼö tödöu. (I Timoteo 1:18, 19) Tola manö samuala khömö andrö lö iʼila wa lö öʼowasaini zimane daʼö. Mazui imane, ”Uʼila wa lö khömi fangowasaini simane daʼa, tobali umane dödögu mamualado manö khöu wöʼi.” Yaʼugö zangaʼi angetula na öhalö ba na löʼö. Gofu hadia ia gangetula nihalöu, faigi zi lö muhede dödöu side-ide. Lö omasi ita na tekiko wahuwusada khö Yehowa.

16. Hadia nifaluau na so niʼowasaini nösi nomou?

¹⁶ Hadia nifaluau na so niʼowasaini nösi nomou? Lö moguna fadaʼawa ndraʼugö khöra. Tatu manö no laʼangeraigö hadia gangetula nihalöra. Haogö wehedeu khöra ba fosumange ira, börö me omasi ndraʼugö na lafosumange zi faduhu dödöu. (Baso Mataiʼo 7:12.) Na omasi nösi nomou fao ndraʼugö khöra ba wangowasaini hadia ia, hadia nifaluau? Fatua lö öhalö gangetula, andrö khö Yehowa waʼatua-tua enaʼö lö fasala gangetula nihalöu. Angeraigö hadia zalua ba alui wanuturu lala. Törö tödöu wa hasambalö öʼomusoiʼö dödö Yehowa.

17. Hewisa wanolou iraonou ba ginötö laʼila wa laʼowasaini hadia ia iraono tanö böʼö?

 ¹⁷ Hewisa wanolou iraonou ba ginötö laʼila wa laʼowasaini hadia ia iraono tanö böʼö? Na tola ohe ira manörö, mazui beʼe khöra mbuala si lö ladöna-döna. Buala sabölö ebua nibeʼeu khöra yaʼia daʼö inötöu ba faʼomasiu.

18. Hana wa owölö-ölö ita weʼamöi ba gangowuloa niha Keriso?

¹⁸ Ba wangomusoiʼö tödö Yehowa, moguna taröi fefu zoʼamakhaita ba agama sofaya, simane fangowasaini ma si toʼölö lafalua agama sofaya. Hewisa lalania? Yaʼia daʼö böi bato weʼamöi ba gangowuloa niha Keriso. (Baso Heberaiʼo 10:24, 25.) Feʼamöi ba gangowuloa no sambua lala ba wamosumange Lowalangi. (Zinunö 22:23; 122:1) Tola tafarou dödö nawöda na owulo ita.​—Roma 1:12.

19. Hana wa moguna öfatunö ba niha böʼö zindruhu sanandrösa ba Zura Niʼamoniʼö?

¹⁹ Lala tanö böʼö ba wamosumange Lowalangi yaʼia daʼö na tadunö-dunö ba niha hadia zi no tafahaʼö yaʼita moroi ba Zura Niʼamoniʼö. Ato niha sabu tödö ba gulidanö andre börö waʼoya zi lö sökhi salua. Te so zi faʼila khöu zi göna abula dödö simanö. Ombakhaʼö khöra wanötöna sahöli-höli dödö salua ba zi so föna. Na möi ndraʼugö ba gangowuloa niha Keriso mazui mangombakha ba niha böʼö sindruhu sanandrösa ba Zura Niʼamoniʼö, lö tumbu ba dödöu saʼe wamalua nifalua-lua agama sofaya andrö. Faduhu dödöu wa ösöndra waʼohahau dödö, ba ifahowuʼö Yehowa gangetula nihalöu ba wamosumange yaʼia.​—Maleakhi 3:10.