1, 2. Hadia zasese lasofu niha?

TEKIKO mbanua börö tsunami. Samösa niha sofana osali, mesokho niha si so ba daʼö ba ato zi mate. Mate samösa ndra alawe börö wökhö kanker, iröi dalima nononia.

² Na alua gabula dödö simane daʼö ato niha sanofu, ”Hana wa alua daʼö?” Manofu dödöra hana wa afönu gulidanö andre famakao ba faʼabu dödö. Hadia no irai ösofu zimane daʼö?

3, 4. (a) Hadia nisofu Habakuki? (b) Hadia wanema li Yehowa?

³ Ba Zura Niʼamoniʼö, so samösa ndra matua samati khö Lowalangi sanofu simane daʼö. Duma-dumania, manofu zamaʼeleʼö sotöi Habakuki khö Yehowa, ”Hana wa öfaʼilaʼö khögu zi lö sökhi, ba öfaigi-faigi manö göi wamakao niha awöra? Famalangögö ba famakao zi so ba duduma hörögu; andrö wa no tumbu wasosota, ba soso manö zui wagua-guasa.”​—Habakuki 1:3.

⁴ Na tabaso ba zura Habakuki 2:2, 3, taʼila wanema li Lowalangi fanofunia andrö, ifabuʼu wa ifuli ifareso zalua. Iʼomasiʼö sibai niha gulidanö Yehowa. Imane Sura Niʼamoniʼö, ”Soso sa dödönia ami.” (I Fetero 5:7) Abölö fatuwu Lowalangi zi lö sökhi moroi khöda. (Yesaya 55:8, 9) Börö daʼö, dataʼalui wanema  li ba wanofu andre, hana wa oya sibai wamakao ba gulidanö?

5. Hadia niwaʼö zondröniaʼö ba agama sanandrösa ba wamakao salua ba niha? Ba hadia niwaʼö Zura Niʼamoniʼö?

⁵ Lamane ira sondröniaʼö ba agama, no nitehe Lowalangi wa göna ita famakao. So zangumaʼö fefu zi göna ita he faʼamate no nihonogöigö Lowalangi, ba tebai taʼila hadia mbörö. So göi zangumaʼö, andrö wa mate niha he iraono side-ide enaʼö möi ira khö Lowalangi ba zorugo. Faya manö daʼö fefu. Tenga börö Yehowa wa alua zimane daʼö. Imane Sura Niʼamoniʼö, ”Böi manö tawaʼö, ilau zi lö sökhi Lowalangi ba ifatörö zi lö atulö Si lö ambö faʼabölö!”​—Yobi 34:10.

6. Hana wa ato niha sangumaʼö Lowalangi zangaʼasogö famakao?

⁶ Ato zangumaʼö börö Lowalangi wa so wamakao ba gulidanö, lawalingagö Lowalangi zamatörö ulidanö. Sindruhunia simane si no taʼila ba Faza 3, Afökha Satana zamatörö ulidanö.

7, 8. Hana wa oya wamakao ba gulidanö?

⁷ Imane Sura Niʼamoniʼö, ”Ba danga Gafökha so nösi gulidanö, maʼafefu.” (I Yohane 5:19) Amuʼi ba afaito sibai Zatana, samatörö ulidanö. Yaʼia ”samaelungu niha ba gulidanö, fefu”. (Famaʼeleʼö 12:9) Ato niha soloʼö amuatania. Daʼö mbörö wa afönu gulidanö andre falimosa, fatiusa, ba faʼalösökhi.

⁸ So mbörö tanö böʼö wa alua wamakao ba gulidanö. Me no lasawö goroisa Lowalangi ira Adamo  ba Khawa, laröi horö ondröita ba ngaʼötöra, andrö wa faoma lafakao nawöra zamösana. Asese lamane dödöra, abölö ira moroi ba niha tanö böʼö, daʼö wa faʼudu ira, fasuwö, ba lafakao nawöra. (Zangombakha 4:1; 8:9) Itataria göna niha famakao ba ”ginötö si lö mudöna-döna”. (Zangombakha 9:11, NW) Na so ira ba nahia ma ba ginötö si lö tefaudu, tola göna khöra wangabu dödö.

9. Hana wa faduhu dödöda wa so mbörö wa itehegö alua wamakao ba gulidanö Yehowa?

⁹ Tenga Yehowa zangaʼasogö famakao, fasuwöta, ba faʼalösökhi. Tenga börö Lowalangi wa so ndruru danö, angi fuyu, ba molö sebua. Te manofu ndraʼugö, ’Na sindruhu fondrege zabölö Yehowa, hana wa lö iheta fefu ngawalö gabula dödö niha?’ Aboto ba dödöda wa iʼonorogö tödö ita Lowalangi, hizaʼi so mbörö wa lö iʼanemai iheta zi lö sökhi.​—I Yohane 4:8.

10. Hadia nifobahulu Zatana khö Yehowa?

¹⁰ Ifaelungu Gadamo ba Khawa Afökha ba kabu Edena. Ifobahulu Lowalangi Satana wa tenga Samatörö si sökhi ia. Imane, no itaha zi sökhi Lowalangi khö Gadamo ba Khawa. Omasi Zatana na faduhu dödö ndra Adamo wa sökhi wamatörönia moroi khö Yehowa ba lö moguna ifatörö ira Lowalangi.​—I Moze 3:2-5; faigi Gonönöta 27.

11. Hadia wanofu-nofu sinangea mutema li?

¹¹ Lö laʼoʼö li Yehowa ira Adamo ba Khawa, lalawa ia. Lawalingagö tola latatugöi hadia zi sökhi ba si lö  sökhi ba waʼaurira. Hewisa wangoromaʼö Yehowa wa fasala nifaluara, ba wa iʼila hadia zi sökhi khöda?

12, 13. (a) Hana wa lö iʼanemai ifakiko zolawa yaʼia Yehowa? (b) Hana wa itehegö Yehowa khö Zatana wamatörö ulidanö hegöi ba niha gulidanö enaʼö lafatörö ira samösa?

¹² Lö iʼanemai ibunu Gadamo ba Khawa Yehowa. Itehegö mongaʼötö ira ba itehe ba ngaʼötöra wangai angetula haniha zamatörö yaʼira. Ohitö dödö Yehowa enaʼö afönu gulidanö niha soʼahonoa, ba hasambalö ifalua hewaʼae isaisi Afökha.​—I Moze 1:28; Yesaya 55:10, 11.

¹³ Satana, ilawa Yehowa föna malaʼika si töra haʼuga zuta. (Yobi 38:7; Danieli 7:10) Ibeʼe ginötö khö Zatana Yehowa ba wangoromaʼö na sindruhu niwaʼönia. Ibeʼe göi ginötö ba niha gulidanö ba wamatörö yaʼira samösa barö wamatörö Zatana, enaʼö oroma hadia mofozu waʼaurira na lö fao Lowalangi.

14. Hadia zi no oroma?

¹⁴ No ngahönö fakhe waʼara lafatörö ira samösa niha gulidanö, ba lö mofozu. Ba daʼö oroma wa sofaya Zatana. Moguna sibai ba niha wanolo moroi khö Lowalangi. Itörö niwaʼö samaʼeleʼö sotöi Yeremia me imane, ”Uʼila, yaʼugö Yehowa, wa tebai ihuku lalania niha, awö wa tebai ifanandrösa mbekania niha sanörö lala.”​—Yeremia 10:23.

15, 16. (a) Hana wa ara ginötö wamakao nitehegö Yehowa? (b) Hana wa lö iʼaʼazökhi Yehowa zi no ifakiko Satana?

¹⁵ Hana wa ara ginötö wamakao nitehegö Yehowa? Hana wa lö ihori manö zi lö sökhi? Moguna so  ginötö ba wangoromaʼö wa sofaya Zatana. Oya wamatörö si no lafalua niha gulidanö ba lö mofozu. Hewaʼae tedou waʼatua-tuara ba sains hegöi ba teknologi, itugu monönö walöʼatulö, faʼanumana, faʼalösökhi, ba fasuwöta töra moroi ba zi no numalö. Tebai tafatörö ita samösa na lö fao Lowalangi.

¹⁶ Aefa daʼö, lö omasi Yehowa ifazökhi zi no ifakiko Satana, börö na ifalua daʼö hulö na ilului wamatörö Zatana, ba lö irai ifalua daʼö. Aefa daʼö, tola manö faduhu dödö niha gulidanö wa tola lafatörö ira samösa simane niwaʼö Zatana. Sindruhunia faya daʼö fefu, ba lö fao dödö Yehowa börö me lö irai falimo ia.​—Heberaiʼo 6:18.

17, 18. Hadia nifalua Yehowa ba zi no ifakiko Satana?

¹⁷ Hadia tola ifazökhi mangawuli Yehowa zi no ifakiko Satana hegöi niha gulidanö? Tola. Lö si tebai khö Lowalangi. Iʼila ginötö si tefaudu ba wangeheta ba hulunia niwaʼö Zatana. Aefa daʼö ibaliʼö faradaiso gulidanö simane ba mböröta, ba isusugi dania niha si so ba ”lewatö”. (Yohane 5:28, 29) Lö mofökhö niha ba lö mate. Ifuli ihaogö Yesu zi no ifakiko Satana. Iʼogunaʼö Yesu Yehowa ba ’wamakiko famatörö Gafökha’. (I Yohane 3:8) Taʼandrö saohagölö me no iʼaragö ginötö Yehowa irege tola aboto ba dödöda haniha ia, ba tola tahalö gangetula enaʼö yaʼia Zamatörö yaʼita. (Baso II Fetero 3:9, 10.) Itolo ita na göna khöda wamakao.​—Yohane 4:23; baso Yesaya 40:29.

¹⁸ Lö ifaso ita Yehowa ba wofili yaʼia tobali  Samatörö yaʼita. No itehe khöda wangai angetula samösa. Datafaigi hadia guna khöda mbuala andrö.

19. Hadia mbuala Yehowa khöda? Hana wa taʼandrö saohagölö mbuala andrö?

¹⁹ Me no itehegö khöda Yehowa ba wangai angetula samösa, daʼö zi faböʼöda ba gurifö. Na so nifalua gurifö, tenga börö wa no laʼera-era, tobali no simanö wamazökhi yaʼira. Na yaʼita tola tafili hadia zomasi ita, ba tola tahalö gangetula hadia omasi ita tafalua zomasi Yehowa. Tenga simane robot göi ita niʼaturai zamazökhi yaʼia. Tola tahalö gangetula hadia nifaluada, hadia zomasi ita, ba haʼökhö fariawö ita. Omasi Yehowa na so khöda waʼohahau dödö.

20, 21. Hadia gangetula si sökhi nihalöu iadaʼa?

²⁰ Omasi Yehowa na taʼomasiʼö ia. (Mataiʼo 22:37, 38) Hulö zatua, omasi ia na lawaʼö khönia iraononia ”Uʼomasiʼö ndraʼugö ama”, tenga nifarou niha ira wangumaʼö daʼö, tobali si tumbu manö ba dödöra. No itehe khöda Yehowa ba wangai angetula hadia möi ita enonia mazui löʼö. Satana, Adamo ba Khawa, no lafili ba wolawa Yehowa. Hewisa wangogunaʼöu fangai angetula samösa?

²¹ Halö gangetula ba weʼamöi enoni Yehowa. Zuta niha si no mangai angetula ba wamalua somasi Lowalangi ba latimba Zatana. (Gamaedola 27:11) Hadia nifaluau iadaʼa enaʼö tola möi ndraʼugö ba gulidanö si bohou si lö famakao? So wanema li ba faza aefa daʼa.