1, 2. Hadia manö zasese lasofu niha?

OYA manö nisofu-sofu ndraono. He na no ötema lira lasofu nasa, ’Hana?’ Ba na ötema lira, lafuli lasofu zui ’Hadia mbörö?’

² Fefu ita, he iraono hegöi satua, oi so wanofuda. Tasofu hadia niʼa ba hadia niʼogunaʼöda, ma hadia niʼölida. Mazui fanofu sabölö moguna sanandrösa ba waʼauri iadaʼa hegöi ba zi so föna. Na lö tasöndra wanema li, tola manö taböhöli wangalui yaʼia.

3. Hana wa so zangumaʼö lö fanema li na so wanofuda?

³ Na so wanofuda sabölö moguna, hadia so wanema li ba Zura Niʼamoniʼö? So zangumaʼö so, so göi zangumaʼö lö taʼila geluaha nösi Zura Niʼamoniʼö. So göi zangumaʼö ha ira samahaʼö mazui sondröniaʼö ba agama zangila fanema li. Niha böʼö aila ira wanofu hewaʼae na lö laʼila hadia wanema li. Hewisa moloʼö yaʼugö?

4, 5. Hadia wanofu somasiʼö öʼila fanema li? Hana wa lö awöli-wöli ndraʼugö ba wangalui fanema li?

⁴ Tatu omasiʼö wanöndra fanema li moroi ba wanofu, simane: Hadia lua-lua waʼauri andre? Hadia zalua ba niha si no mate? Hewisa Lowalangi andrö? Imane Yesu Samahaʼö si no tehöngö, ”Miʼangandrö ba tebeʼe khömi; miʼangalui, ba misöndra, mibökö-bökö mbawandruhö, ba tebokai khömi.” (Mataiʼo 7:7) Böi böhöli wangalui fanema li si tola öfaduhusi tödö.

 ⁵ Sindruhu sa ”na öʼalualui”, ba ösöndra wanema li ba Zura Niʼamoniʼö. (Gamaedola 2:1-5) Fanema linia lö abua wangiʼila eluaha. Famahaʼö si no ötema zanolo yaʼugö ba wanöndra faʼohahau dödö iadaʼa hegöi fanötöna ba zi so föna. Datafatunö wanofu sasese lasofu niha.

6. Hana wa ato zangumaʼö lö iʼosinangegö ita Lowalangi?

⁶ Ato zangumaʼö, lö ba dödö Lowalangi ita. Na sindruhu iʼosinangegö ita Lowalangi, lö alua wasuwöta, fa lö faʼomasi ba nawöra niha, ba fangabu dödö tanö böʼö. Ato zofökhö, tefakao, ba mate. Ato zangumaʼö, ’Na sindruhu so ba dödö Lowalangi ita, hana wa itehegö alua wangabu dödö?’

7. (a) Hadia nifahaʼö zondröniaʼö ba agama sanandrösa khö Lowalangi? (b) Hana wa tebai tatahigö Lowalangi na alua zi lö sökhi?

⁷ Itaria so zondröniaʼö ba agama ladönisi dödö niha enaʼö faduhu dödöra wa lö iʼosinangegö ita Lowalangi. Na alua zi lö sökhi, lawaʼö, moroi khö Lowalangi daʼö, no ohitö dödönia wa alua daʼö. Sindruhunia, no sangobousi töi Lowalangi ira na lawaʼö daʼö. Imane Sura Niʼamoniʼö tenga moroi khö Lowalangi ngawalö zi lö sökhi andrö. Imane ba zura Yakobo 1:13 wa lö itandraigö niha Lowalangi. Imane, ”Böi yamuwaʼö niha: Moroi khö Lowalangi, wa tetandraigö ndraʼodo: Lowalangi, ba tebai tetandraigö ba zi lö sökhi, ba yaʼia, ba lö itandraigö niha.” Eluahania, hewaʼae na tenga moroi khö Lowalangi wanandraigö andrö, hizaʼi, itehegö alua zimane daʼö. (Baso Yobi 34:10-12.) Datafaigi sambua duma-duma.

8, 9. Hana wa tebai tatahigö Lowalangi na alua gabula dödö? Beʼe duma-duma.

 ⁸ Khalaigö atö samösa nono matua si toröi ba ngai zatuania. Iʼomasiʼö sibai ia amania ba ifahaʼö ia ba wangai angetula si sökhi. Hizaʼi, ono matua andrö iʼosiwawöi fefu zi sökhi nifahaʼö namania. Mofanö ia moroi ba nomo, ifalua zi lö sökhi, irege tekiko waʼaurinia. Moloʼö yaʼugö, hadia börö namania wa tekiko waʼaurinia? Tatu manö tenga! (Luka 15:11-13) Simanö göi Lowalangi, itehegö ba niha wamalua somasi dödöra. Hizaʼi, na alua wangabu dödö, tebai tatahigö Lowalangi. Börö me tenga yaʼia zameʼe abula dödö andrö.

⁹ So mbörö wa lö iʼanemai iheta zi lö sökhi Lowalangi. Ba Faza 11 ba mbuku daʼa, ifatunö khöda wanema li moroi ba Zura Niʼamoniʼö. Hizaʼi, tola faduhu dödöu wa iʼomasiʼö ita Lowalangi ba tenga sinangea tatahigö ia ba ngawalö zalua khöda. Sindruhunia, ha Yaʼia zi tola mangeheta fefu abula dödö salua khöda.​—Yesaya 33:2.

10. Hana wa faduhu dödöda wa tola ihaogö Lowalangi nifakiko niha?

¹⁰ Lowalangi andrö no niʼamoniʼö. (Yesaya 6:3) Fefu nifaluania oi sökhi. Andrö tola faduhu dödöda khönia. Tenga simane niha gulidanö ia sasese mamalua si lö sökhi. Hewaʼae niha sadölö tödö zamatörö si sambua soi, tebai ihaogö ngawalö nifakiko niha. Lö niha sangokhögö faʼabölö simane Lowalangi. Tola ihaogö fefu zi no lafakiko niha. Ihori sa dania fefu zi lö sökhi sagötö faʼara.​—Baso Zinunö 37:9-11.

11. Hewisa dödö Lowalangi na tefakao niha?

¹¹ Hewisa dödö Lowalangi me iʼila zalua ba gulidanö hegöi salua ba waʼaurimö? Ifatunö khöda Sura Niʼamoniʼö wa ”huku satulö sa zomasi Yehowa”. (Zinunö 37:28) Iʼosinangegö zalua ba niha, he si sökhi hegöi si lö sökhi. Lö omasi ia na tefakao niha. Imane Sura Niʼamoniʼö wa ”ibusi sibai tödönia” me alua zi lö sökhi ba gulidanö, iʼotarai meföna. (I Moze 6:5, 6) Lö si tebulö Lowalangi. (Maleakhi 3:6) Imane Sura Niʼamoniʼö, so so sa ba dödö Lowalangi ndraʼugö.​—Baso I Fetero 5:7.

12, 13. (a) Hana wa taʼomasiʼö ba taʼosinangegö niha, ba hewisa dödöda ba gabula dödö salua ba gulidanö? (b) Hana wa faduhu dödöda wa iheta fefu gabula dödö ba si lö sökhi salua ba gulidanö Lowalangi?

¹² Ifatunö khöda Sura Niʼamoniʼö wa ifazökhi niha Lowalangi si fakhili-khili khönia. (I Moze 1:26) Eluahania, tola taʼokhögö gamuata si sökhi simane Lowalangi. Tobali, na lö omasiʼö wamaigi na tefakao niha si lö fasala, mendrua manö Lowalangi! Hana wa taʼila?

¹³ Ifahaʼö ita Sura Niʼamoniʼö wa ’Lowalangi no faʼomasi’. (I Yohane 4:8) Faʼomasi Lowalangi zi tobali dane-dane ba nifaluania. Andrö wa tafalua waʼomasi börö me no oföna iʼomasiʼö ita. Angeraigö atö: Na so khöu waʼabölö, hadia öheta fefu gabula dödö ba si lö sökhi ba gulidanö andre? Tatu manö, börö me so khöu waʼomasi. Simanö göi Lowalangi, me so khönia waʼabölö, omasi ia iheta gabula dödö ba si lö sökhi salua ba gulidanö. Si no ifabuʼu Lowalangi si tesura ba ngaʼörö öfa ba lima ba mbuku andre, hasambalö alua! Hizaʼi, enaʼö tola faduhu dödöu zi no ifabuʼu, douʼö waʼaboto ba dödöu sanandrösa khö Lowalangi.

14. Haniha döi Lowalangi, ba hana wa taʼogunaʼö ia?

¹⁴ Na omasiʼö fahuwu ba niha, hadia zi oföna öfatunö khönia? Tatu töimö. Hadia so döi Lowalangi? Haniha döinia? Oya agama sangumaʼö töinia yaʼia daʼö Lowalangi mazui Soʼaya, sindruhunia tenga daʼö döinia. Daʼö ha töi ba faka, simane ”razo” ma ”presiden”. Ifatunö Lowalangi wa töinia yaʼia daʼö Yehowa. Imane sura Zinunö 83:19, ”Ba akha aboto ba dödöra, wa no ha yaʼugö zotöi Yehowa, wa ha yaʼugö Wondrege Zalaŵa ba gulidanö maʼasagörö.” Ngahönö kali tesura döinia ba Zura Niʼamoniʼö. Omasi Yehowa na öʼila ba öʼogunaʼö döinia enaʼö tobali ndraʼugö si fahuwu khönia.

15. Hadia geluaha döi Yehowa?

¹⁵ Töi Lowalangi andrö Yehowa, ba so geluahania, yaʼia daʼö tola ifalua fefu nifabuʼunia ba ohitö dödönia. Lö hadöi si tobali taha-taha khönia ba wamalua daʼö. Ha Yehowa zangokhögö töi daʼö. *

16, 17. Hadia geluaha (a) ”Samatörö fefu hadia ia”? (b) Razo ”götö-götö waʼara”? (c) ”Somböi”?

 ¹⁶ Simane nibasoda ba Zinunö 83:19, ’Ha Yehowa, Wondrege Zalawa.’ Simanö göi ba Wamaʼeleʼö 15:3, ”No ebua wolaumö andrö ba sahöli-höli dödö, yaʼugö Soʼaya, Lowalangi, Samatörö fefu, hadia ia; satulö ba sindruhu lalamö andrö, yaʼugö, razo soi niha andrö.” Hadia geluahania ”Samatörö fefu hadia ia”? Eluahania, ha Yehowa wondrege zabölö ba mbanua siawa awö danö. Lafotöi ia Razo ”götö-götö waʼara”,  eluahania lö tebulö ia simane niwaʼö ba zura Zinunö 90:2. No sahöli-höli dödöda!

¹⁷ Yehowa Zomböi hadia ia. Imane ba Wamaʼeleʼö 4:11, ”No sinangea manema ndraʼugö lakhömi ba sumange ba faʼabölö, yaʼugö Soʼaya yaʼaga, Lowalangima, me no yaʼugö zamazökhi fefu hadia ia, ba börö nilau dödöu, wa so ia, awö wa tefazökhi ia.” He malaʼika ba zorugo, he döfi, he bua geu, hegöi iʼa ba nasi—Yehowa zomböi hadia ia!

18. Hana wa lawaʼö niha tebai fahuwu ira khö Lowalangi? Ba hadia nifahaʼö Zura Niʼamoniʼö?

¹⁸ So niha si no mangila amuata Yehowa si sökhi, lamane wangumaʼö, ’Lowalangi andrö fondrege  zabölö, moʼahonoa, ba aröu sibai ia khöda. Hewisa wa tola iʼosinangegö ita?’ Hadia sindruhu simane daʼö Lowalangi andrö? Löʼö. Omasi Yehowa na ahatö ita khönia. Imane Sura Niʼamoniʼö, Lowalangi andrö ”löʼö saʼatö aröu ia khöda fefu”. (Halöwö Zinenge 17:27) Omasi Lowalangi na ahatö ndraʼugö khönia, ba no ifabuʼu wa ’iʼondrasi ndraʼugö’.​—Yakobo 4:8.

19. (a) Hewisa enaʼö fahuwu ami Lowalangi? (b) Hadia gamuata Yehowa sadöni dödöu?

¹⁹ Hewisa enaʼö tola fahuwu ami Lowalangi? Imane Yesu, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu andrö, si ha sambua, ba enaʼö, aboto ba dödöra zinengeu andrö, Yesu Keriso.” (Yohane 17:3) Böi bato wamahaʼö yaʼugö enaʼö tedou waʼaboto ba dödöu sanandrösa khö Yehowa ba Yesu. Ba tola ötema waʼauri si lö aetu. Duma-dumania, no tafahaʼö ita wa ”Lowalangi no faʼomasi”. (I Yohane 4:16) So gamuata Lowalangi sadöni dödöda. Iwaʼö Sura Niʼamoniʼö Yehowa andrö ”sahakhö tödö ba sebua tödö, ba sebolo tödö ba si no fahöna faʼoböwö awö wa lö faröi ia”. (II Moze 34:6) Yehowa andrö si ’sökhi tödö ba sebolo tödö’. (Zinunö 86:5) Ebolo dödönia ba lö faröi ia. (II Fetero 3:9; I Korindro 1:9) Tola monönö waʼaboto ba dödöu gamuata Lowalangi, na asese öfahaʼö ndraʼugö ba Zura Niʼamoniʼö.

20-22. (a) Hewisa enaʼö tola ahatö ndraʼugö khö Lowalangi hewaʼae lö öʼila ia? (b) Na so zangumaʼö, böhöli wamahaʼö yaʼugö ba Zura Niʼamoniʼö, hadia nifaluamö?

²⁰ Hewisa enaʼö tola ahatö ndraʼugö khö Lowalangi hewaʼae lö öʼila ia? (Yohane 1:18; 4:24; I Timoteo 1:17) Na öbaso ba Zura Niʼamoniʼö sanandrösa  khö Yehowa, aboto ba dödöu wa sindruhu-ndruhu so Ia. (Zinunö 27:4; Roma 1:20) Itugu öfahaʼö ndraʼugö sanandrösa khönia, itugu öʼomasiʼö ba ahatö ndraʼugö khönia.

²¹ Aboto ba dödöu wa Yehowa andrö Amada. (Mataiʼo 6:9) Moroi khönia waʼaurida, ba omasi ia na taʼokhögö waʼauri si sökhi. Simanö gohitö dödö zatua sebua faʼomasi ba ndraononia. (Zinunö 36:10) Ifahaʼö Sura Niʼamoniʼö wa tola fahuwu ita khö Yehowa. (Yakobo 2:23) Khalaigö atö, Yehowa Zomböi banua siawa awö danö, ba omasi ia na fahuwu ami!

²² Tola manö so zangumaʼö khöu, böhöli wamahaʼö yaʼugö ba Zura Niʼamoniʼö. Lö omasi ira na öfalalini agamau. Böi awuwu ndraʼugö tobali si fahuwu khö Yehowa. Ha yaʼia zi Fahuwu khöu fondrege zi sökhi.

23, 24. (a) Hana wa moguna asese manofu ita? (b) Hadia nifatunöda ba faza miföna?

²³ Na öfahaʼö ndraʼugö ba Zura Niʼamoniʼö, so so manö zi lö aboto ba dödöu. Böi alawö ndraʼugö wanofu mazui öʼandrö tolo. Ifarou ita Yesu enaʼö taʼide-ideʼö ita simane iraono. (Mataiʼo 18:2-4) Oya wanofu-nofu ndraono. Ba omasi Lowalangi na ösöndra wanema li. Haogö wamahaʼö yaʼugö ba Zura Niʼamoniʼö enaʼö öʼila wa si duhu nifahaʼömö yaʼugö.​—Baso Halöwö Zinenge 17:11.

²⁴ Lala ba wamahaʼö yaʼita sanandrösa khö Yehowa, tafahaʼö ita ba Zura Niʼamoniʼö. Ba faza miföna, taʼila zi faböʼö Zura Niʼamoniʼö moroi ba mbuku tanö böʼö.