1, 2. Hadia zomasi Yehowa ba zi no mongambatö?

LOWALANGI YEHOWA zangaʼasogö fongambatö si föföna. Imane Sura Niʼamoniʼö, me no aefa ifazökhi ndra alawe andrö ba ”ifasao ba niha”. Omuso sibai dödö Gadamo, andrö imane wangumaʼö, ”Töla föfö dölagu daʼö ba nagole föfö nagolegu.” (I Moze 2:22, 23) Daʼö zangoromaʼö wa omasi Yehowa na ohahau dödö zi no mongambatö.

² Alimagö sibai, ba ginötö andre ato niha si lö faʼohahau dödö ba wongambatö. Hizaʼi, oya goi-goi ba Zura Niʼamoniʼö sinangea mufalua enaʼö mofozu ba ohahau dödö ba zi sambua omo.​—Luka 11:28.

3, 4. (a) Hadia nifalua woʼomo ira matua ba ndra alawenia? (b) Hana wa moguna ba zi no mongambatö enaʼö faoma laʼefaʼö zala nawöra?

³ Imane Sura Niʼamoniʼö, foʼomo ira matua si sökhi amuata iʼomasiʼö ba ifosumange woʼomonia. Baso Efeso 5:25-29. Lö tebulö waʼomasi woʼomo ira matua khö woʼomonia. Irorogö, ba lö ifalua gamuata si möi fangabu dödö woʼomonia.

⁴ Hadia nifalua woʼomo ira matua na fasala woʼomonia? Niʼandrö khö woʼomo ira matua enaʼö ’böi tebulö miʼomasiʼö ndra alawe, ba böi abao dödömi khöra’. (Kolose 3:19) Yaʼami foʼomo ira matua böi  olifu ami wa asese fasala ami. Na omasi ami iʼefaʼö zalami Lowalangi, miʼefaʼö göi zala woʼomomi. (Mataiʼo 6:12, 14, 15) Na faoma miʼefaʼö zala nawömi, ba so waʼohahau dödö ba wongambatömi.

5. Hana wa moguna ifosumange ndra alawenia foʼomo ira matua?

⁵ Iʼandrö Yehowa khö woʼomo ira matua enaʼö lafosumange ba laʼangeraigö zoguna khö woʼomora. Moguna sibai mufalua daʼa. Na lö sökhi gamuata woʼomo ira matua khö ndra alawenia, lö ifondro-ndrongo wangandrönia Yehowa. (I Fetero 3:7) Wa iʼomasiʼö zi samösa niha Yehowa börö me laʼomasiʼö ia. Lö ebua dödönia ba ndra matua moroi ba ndra alawe.

6. Hadia geluahania ”ha sambua boto” zi no mongambatö?

⁶ Ifatunö Yesu wa ira alawe ba ira matua si no mongambatö ”tenga saʼae darua ira, ha sambua boto”. (Mataiʼo 19:6) Tebai faröi ira khö nawöra. (Gamaedola 5:15-21; Heberaiʼo 13:4) Faoma latörö gömöra khö nawöra ba waʼorudu. (I Korindro 7:3-5) Tebai olifu woʼomo ira matua wa ”lö irai faʼudu niha ba nösinia, irorogö, ba ihaogö-haogö”. Andrö iʼomasiʼö ba ifosumange ndra alawenia. Baero daʼö, omasi göi woʼomo ira alawe na laʼomasiʼö ia ba lahaogö-haogö khönia.​—Efeso 5:29.

7. Hana wa moguna so zondröniaʼö ba zi sambua omo?

⁷ Moguna so zondröniaʼö ero sambua ngambatö enaʼö so khöra wahasara dödö ba wamalua ngawalö halöwö. Imane ba zura I Korindro 11:3, ”Högö ndra matua fefu, ba yaʼia Keriso, ba högö ndra alawe ndra matua, ba högö Keriso Lowalangi.”

8. Hewisa wamosumange ndra alawe foʼomonia?

 ⁸ Asese fasala woʼomo ira matua. Hizaʼi, na iʼoʼö gangetula woʼomo ira matua ira alawe ba falulu fohalöwö ira, tola ohahau dödöra yomo ba nomo. (I Fetero 3:1-6) Imane Sura Niʼamoniʼö, ”Ira alawe, ba enaʼö na iʼataʼufi ndra matua.” (Efeso 5:33) Hewisa na tenga si sara lala wamati ira? Hasambalö ifosumange woʼomonia ira matua ira alawe. Imane Sura Niʼamoniʼö, ”Simanö göi ndra alawe, ndra muʼoʼö li ndra matuara, enaʼö tedönisi daʼö, ba mbua-bua ndra alawe andrö, he lö hede-hede, na so ösa, zi lö mamati ba daromali andrö, na lanehegö mbua-buami, wa miʼataʼufi zi lö sökhi, awö wa no ohau-hau ami.” (I Fetero 3:1, 2) Na sökhi mbua-bua ndra alawe, iʼosinangegö wamatinia foʼomonia ira matua.

9. (a) Hadia nifalua woʼomo ira alawe na lö fao dödönia gangetula woʼomonia? (b) Hadia mene-mene khö woʼomo ira alawe si so ba zura Tito 2:4, 5?

⁹ Hadia nifalua woʼomo ira alawe na lö fao dödönia  ba gangetula woʼomonia? Tola iwaʼö zi so ba dödönia fao wangataʼufi. Simane Sara, iwaʼö zi so ba dödönia si lö fatema ba dödö Gaberahamo. Tobali, imane Yehowa khö Gaberahamo, ”Oʼö niwaʼö Zara” andrö. (I Moze 21:9-12) Ha fawaraö faböʼö moroi ba Zura Niʼamoniʼö gangetula nihalö woʼomo ira matua niha Keriso, andrö wa moguna laʼoʼö niwaʼönia foʼomonia ira alawe. (Halöwö Zinenge 5:29; Efeso 5: 24) Iʼonorogö tödö nösi nomonia foʼomo ira alawe si sökhi bua-bua. (Baso Tito 2:4, 5.) Na laʼila iraono ba foʼomonia nifaluania ba nösi nomonia, monönö wa laʼomasiʼö ba lafosumange ia.​—Gamaedola 31:10, 28.

10. Hadia niwaʼö Zura Niʼamoniʼö sanandrösa ba wabalisa mazui ba wondröi ngambatönia?

¹⁰ Itaria so zi no mongambatö salio mangai angetula ba wabalisa mazui ba wondröi ngambatönia. Hizaʼi, imane Sura Niʼamoniʼö, ”Böi fabali ndra alawe ba ndra matua” ba enaʼö ”ira matua göi, ba böi ya mutiboʼö ndra alawe”. (I Korindro 7:10, 11) So gabula dödö salua ba zi sambua ngambatö wa tola iröi ngambatönia niha, hewaʼae simanö, moguna muhaogö muʼangeraigö. Na simanö, hadia tola fabali zi no mongambatö? Imane Sura Niʼamoniʼö ha sambua mbörö wa tola fabali zi no mongambatö, yaʼia daʼö na no mohorö ira fazamösa.​—Mataiʼo 19:9.

11. Hadia zabölö moguna ba ndraono?

¹¹ Yaʼami satua, mibeʼe ginötömi ba ndraonomi me moguna ami khöra, ba mifahaʼö ira sanandrösa khö Yehowa me daʼö zabölö moguna khöra.​—V Moze 6:4-9.

12. Hadia zinangea lafalua satua ba wondrorogö iraonora?

 ¹² Itugu lö sökhi gulidanö tana khö Zatana andre, so niha somasi mamakiko iraonomi, lafaelungu ba gamuata wohorö. So zatua saila mamatunö khö nononia hewisa waʼorudu ndra matua ba ndra alawe. Hizaʼi, moguna itutunö satua khö nononia hadia dandra na so niha somasi mamakao yaʼira, ba hewisa lala enaʼö laʼaröuʼö ira ba niha simane daʼö. Yaʼami satua, mirorogö ndraonomi. *—I Fetero 5:8.

13. Hadia zinangea ifahaʼö satua ba ndraono?

 ¹³ Moguna laʼonorogö tödö satua ba wamahaʼö iraonora ba gamuata si sökhi. Hewisa lalania? Böi fatöni dödö ndraonou na öfahaʼö ira ba na öbeʼe degu-degu. (Yeremia 30:11) Böi amenesi ira ba ginötö mofönuʼö. Tatu manö lö omasi ndraʼugö na ”hulö nikhu gari” wehedemö khöra, sangafökhöiʼö tödöra. (Gamedola 12:18) Fahaʼö nonou enaʼö laʼila hana wa moguna so khöra woloʼö.​—Efeso 6:4; Heberaiʼo 12:9-11; faigi Gonönöta 30.

14, 15. Hana wa moguna laʼoʼö li zatua iraono?

¹⁴ Iʼoʼö fefu niwaʼö Namania Yesu hewaʼae afökhö. (Luka 22:42; Yohane 8:28, 29) Iʼandrö göi Yehowa ba ndraono enaʼö laʼoʼö li zatuara.​—Efeso 6:1-3.

¹⁵ Yaʼami iraono, hewaʼae afökhö khömi woloʼö li zatuami, mitörö tödömi na so khömi woloʼö, omuso dödö zatuami hegöi Yehowa. *—Gamaedola 1:8; 6:20; 23:22-25.

16. (a) Hewisa wondrönisi Zatana tödö ndraono ba wamalua si lö sökhi? (b) Hana wa sökhi na ba zangomasiʼö Yehowa fariawö ita?

¹⁶ Iʼogunaʼö Afökha nawö-awömi ba wondrönisi tödömi ba wamalua si lö sökhi. Iʼila wa abua khömi wotimbagö niwaʼöra. Duma-dumania, ono Yakobo sotöi Dina, fariawö ia ba niha si lö mangomasiʼö Yehowa. Fangabu dödö lua-lua. (I Moze 34:1, 2) Na ba zi lö mangomasiʼö Yehowa fariawö ami, tola tedönisi dödömi wamalua si fatuwu khönia, si möi fangabu dödömi ba ösi nomomi, hegöi Lowalangi.  (Gamaedola 17:21, 25) Andrö wa moguna fariawö ami ba niha sangomasiʼö Yehowa.​—I Korindro 15:33.

17. Hadia zi tobali noro dödö yomo ba zi sambua omo?

¹⁷ Na fefu nösi nomo laʼoʼö goi-goi Lowalangi, tola teʼaröuʼö ira moroi ba gabula dödö. Na foʼomo ira matua ndraʼugö, omasiʼö woʼomou ira alawe. Na yaʼugö foʼomo ira alawe, fosumange ba oʼö li woʼomou ira matua, ba oʼö gamuata woʼomo ira alawe simane si no musura ba Gamaedola 31:10-31. Na satua ami, mifahaʼö ndraonomi ba wangomasiʼö Lowalangi. (Gamaedola 22:6) Na ama ndraʼugö ba nomo ’haogö wamatörö soroi yomou’. (I Timoteo 3:4, 5; 5:8) Yaʼami iraono, miʼoʼö li zatuami. (Kolose 3:20) Törö tödöu wa fefu nösi nomo oi fasala, andrö moguna so khöda wangide-ngideʼö, ba faoma tabologö dödöda khö nawöda. So ba Zura Niʼamoniʼö wanuturu lala moroi khö Yehowa soguna ba zi sambu-sambua omo.