1, 2. Hana wa buala si sökhi wangandrö, ba hana wa moguna öʼila niwaʼö Zura Niʼamoniʼö sanandrösa ba wangandrö?

NO IDE-IDE gulidanö andre na lafaedogö ia ba nifazökhi tanö böʼö si so ba mbanua si yawa. Me ifaigi gulidanö Yehowa, soi niha no amaedola mböi-böi nidanö ba doyo dimba. (Zinunö 115:15; Yesaya 40:15) Hewaʼae simanö, imane ba Zinunö 145:18, 19, ”No ahatö Yehowa, ba zi angaröfi li yaʼia, fefu, ba ziʼangaröfi li yaʼia soroi ba dödö. Iʼoʼö zomasi zangataʼufi yaʼia, ifondro-ndrongo weʼaora ba itolo.” No ibeʼe khöda Yehowa mbuala si sökhi, yaʼia daʼö fangandrö! Hewaʼae yaʼia Zomböi fondrege zabölö, omasi ia ahatö khöda. Ifondro-ndrongo wangandröda.

² Awena ifondro-ndrongo wangandröda Yehowa na tefaudu ba zomasi ia. Hewisa wamalua yaʼia? Datafaigi niwaʼö Zura Niʼamoniʼö sanandrösa ba wangandrö.

3. Hana wa khö Yehowa mangandrö ndraʼugö?

³ Omasi Yehowa na fahuhuo ba mangandrö ita khönia. Hezo taʼila? Tola öbaso ba Filifi 4:6, 7. Angeraigö atö. Somböi banua si yawa awö danö iʼameʼegö tödö ndraʼugö ba omasi ia na öfatunö khönia nösi dödöu ba abula dödöu.

4. Hana wa aro wahuwusada khö Yehowa na lö tabato wangandrö?

 ⁴ Fangandrö zanolo yaʼita enaʼö aro wahuwusada khö Yehowa. Na asese fahuhuo ita khö zi fahuwu khöda, faoma tafatunö hadia niʼera-erada, abula dödöda, tola aro wahuwusada. Simanö göi na mangandrö ita khö Yehowa. No ifaʼema khöda zi so ba dödönia ba Zura Niʼamoniʼö, ifatunö nifaluania ba zi so föna. Böi taböhöli wahuhuosa khönia ba wangombakha ösi dödöda enaʼö aro wahuwusada khö Yehowa.​—Yakobo 4:8.

5. Hana wa taʼila wa lö fefu wangandrö ifondro-ndrongo Yehowa?

⁵ Hadia fefu wangandrö ifondro-ndrongo Yehowa? Löʼö. Ba götö zamaʼeleʼö sotöi Yesaya, imane Yehowa ba ndraono Gizaraʼeli, ”He mihöna wangandrö, ba lö ufondro-ndrongo khömi; oi do saʼae dangami andrö.” (Yesaya 1:15) Na lö taʼangenanöi  gamuatada, tola tafalua gamuata sogoro Yehowa, ba lö ifondro-ndrongo wangandröda.

6. Hana wa mamati ita? Ba hadia dandra wa so khöu wamati?

⁶ Na omasi ita ifondro-ndrongo wangandröda Yehowa, moguna mamati ita khönia. (Mareko 11:24) Imane sinenge sotöi Faulo, ”Na lö famati, ba tebai iʼomasiʼö niha Lowalangi: sangondrasi Lowalangi enaʼö ba löʼö sa tola lö mamati ia, so Lowalangi, ba ifoluo zangalui yaʼia andrö.” (Heberaiʼo 11:6) Ambö na ha mamati ita khö Yehowa. Moguna göi taʼoʼö linia ero maʼökhö.​—Baso Yakobo 2:26.

7. (a) Hana wa taʼide-ideʼö ita ba tafosumange Yehowa na mangandrö? (b) Hadia dandra wa soroi ba dödö wangandröda?

⁷ Tafosumange ba taʼide-ideʼö ita na mangandrö khö Yehowa. Hadia mbörö? Simane na fahuhuo ita khö zalawa mazui khö presiden, tatu tahaogö wehededa khöra ba tafosumange ira. Mendrua manö na fahuhuo ita khö Yehowa si Lö Ambö Faʼabölö, taʼide-ideʼö ita ba tafosumange ia. (I Moze 17:1; Zinunö 138:6) Mangandrö ita khö Yehowa soroi ba dödö ba böi tafuli-fuli furi mazui ha daʼö-daʼö manö niwaʼöda.​—Mataiʼo 6:7, 8.

8. Na so niʼandröda khö Yehowa, hadia zinangea tafalua?

⁸ Aefa daʼö, na mangandrö ita, moguna tafalua zi faudu ba wangandröda. Duma-dumania, na taʼandrö zoguna khöda si ero maʼökhö khö Yehowa, böi areu ita wohalöwö ba böi tadöna-döna wa ibönökhi manö zoguna khöda na lö mohalöwö ita. Tababaya gofu hadia halöwö, böi tafili-fili. (Mataiʼo 6:11; II Tesalonika 3:10) Mazui na taʼandrö wanolo khö Yehowa ba wamöhöli famalua si lö atulö, moguna taʼaröuʼö  ita ba ngawalö zondrönisi tödöda ba wamalua si lö sökhi. (Kolose 3:5) Iadaʼa, datafatunö ngawalö wanofu sanandrösa ba wangandrö.

9. Haʼökhö mangandrö ita? Hadia niwaʼö Yohane 14:6 sanandrösa ba wangandrö?

⁹ Haʼökhö mangandrö ita? Ifahaʼö ndra nifahaʼönia Yesu enaʼö mangandrö ira khö ’Nama si so ba zorugo’. (Mataiʼo 6:9) Imane nasa, ”Yaʼodo lala, yaʼodo waʼaduhu, yaʼodo waʼauri. Lö sondrugi Ama, na lö itörö ndraʼo.” (Yohane 14:6) Andrö, mangandrö ita ha khö Yehowa ba döi Yesu. Hadia geluahania? Enaʼö ifondro-ndrongo wangandröda Yehowa, moguna taʼosinangegö halöwö si sökhi nibeʼenia khö Yesu. No tafahaʼö ita wa möi Yesu ba gulidanö ba wangöhöli yaʼita moroi ba horö ba ba waʼamate. (Yohane 3:16; Roma 5:12) No ituyu Yesu Yehowa tobali Ere Sebua ba Sanguhuku.​—Yohane 5:22; Heberaiʼo 6:20.

10. Hadia no tetatugöi lagu mboto na mangandrö? Tutunö.

¹⁰ Hadia no tetatugöi wetaroda na mangandrö? Löʼö, lö niʼandrö Yehowa tatuhi danö na mangandrö ita, ma mudadao, mazui musindro. Ifahaʼö ita Sura Niʼamoniʼö wa tola fahuhuo ita khö Yehowa gofu hewisa wetaroda asala tafosumange ia. (I Ngaʼötö 17:16; Nehemia 8:6; Danieli 6:10) Fangandrö soroi ba dödö nifondro-ndrongo Yehowa, tenga fetaroda. Tola ebua lida wangandrö mazui fangandrö ba dödö, gofu hezo so ba gofu hawaʼara. Faduhu dödöda wa hasambalö ifondro-ndrongo wangandröda Yehowa hewaʼae lö niha samondrongo khöda.​—Nehemia 2:1-6.

11. Hadia manö zi tola taʼandrö khö Yehowa?

 ¹¹ Hadia zi tola taʼangandröi? Fefu niʼandröda si faudu ba zomasi Yehowa, ifondro-ndrongo. Imane Sura Niʼamoniʼö, ”Na so niʼandröda, hadia ia, zi faudu ba zomasi ia, ba ifondro-ndrongo khöda.” (I Yohane 5:14) Hadia tola taʼangandröi zoguna khöda? Tola. Na mangandrö ita, hulö na fahuhuo ita khö zi fahuwu khöda. Tafatunö zi so ba dödöda khö Yehowa mazui niʼera-erada. (Zinunö 62:9) Taʼandrö khönia geheha si tobali fanoloda ba wamalua satulö. (Luka 11:13) Aefa daʼö, taʼandrö waʼatua-tua khö Yehowa enaʼö tola tahalö gangetula si sökhi, ba taʼandrö waʼabölö ba wanaögö abula dödö. (Yakobo 1:5) Moguna taʼandrö enaʼö iʼefaʼö golalöwada. (Efeso 1:3, 7) Ba böi olifu ita wangandrö salahi niha böʼö, simane ösi nomoda mazui ira talifusöda si sara lala wamati khöda.​—Halöwö Zinenge 12:5; Kolose 4:12.

12. Hadia zi oföna taʼangandröi?

¹² Hadia zabölö moguna ba wangandröda? Yehowa hegöi ohitö dödönia. Taʼandrö saohagölö khönia soroi ba dödö fefu zi no ifalua khöda. (I Ngaʼötö 29:10-13) Me so Yesu ba gulidanö, ifahaʼö ndra nifahaʼönia ba wangandrö. (Baso Mataiʼo 6:9-13.) Imane khöra, miʼofönaiʼö miʼandrö wangamoniʼö töi Lowalangi. Aefa daʼö, faʼatohare Mbanuania, ba enaʼö alua gohitö dödö Yehowa ba gulidanö. Na no taʼandrö fefu daʼö, awena taʼandrö zoguna khöda samösa. Na taʼofönaiʼö Yehowa ba ohitö dödönia ba wangandröda, daʼö dandra wa abölö moguna ia ba waʼaurida.

13. Hawaʼoya ginötö niʼogunaʼöda na mangandrö?

 ¹³ Hawaʼoya ginötöda ba wangandrö? Lö nitatugöi Zura Niʼamoniʼö. Tola adogo-dogo mazui anau moloʼö salua ba inötö si tefaudu. Duma-dumania, taʼadogoiʼö wangandröda fatua lö manga, tobali tola anau wangandröda na tatutunö khönia gabula dödöda mazui na so niʼandröda saohagölö. (I Zamueli 1:12, 15) Böi taʼoyaiʼö wehededa na mangandrö fa lasuno ita niha, simane nifalua niha ba  götö Yesu. (Luka 20:46, 47) Lö adöni dödö Yehowa ba wangandrö simane daʼö, ha fangandrö soroi ba dödö zabölö ifondro-ndrongo.

14. Hawaʼasese mangandrö ita, ba hadia zi tola tafahaʼö yaʼita sanandrösa khö Yehowa?

¹⁴ Hawaʼasese mangandrö ita? Iʼandrö khöda Yehowa enaʼö böi aetu fahuhuo ita khönia. Imane Sura Niʼamoniʼö, ”Miʼangandrö”, ”böi mifamalö-malö wangandrö”, ba ”böi aetu-aetu wangandrömi”. (Mataiʼo 26:41; Roma 12:12; I Tesalonika 5:17) Hasambalö ifondro-ndrongo wangandröda Yehowa. Ero maʼökhö taʼandrö saohagölö waʼomasi ba faʼoböwönia. Tola taʼandrö wanuturu lala khönia, faʼabölö, ba fondrara dödö. Na sindruhu-ndruhu taʼosinangegö wangandrö, taʼaseseʼö fahuhuo khö Yehowa.

15. Hana wa tawaʼö ”yaduhu” ba gafuriata wangandröda?

 ¹⁵ Hana wa tawaʼö ”yaduhu” ba gafuriata wangandröda? Ngawua wehede ”yaduhu” eluahania ”ya simanö” mazui ”ya alua”. Daʼö dandra wa taʼosindruhugö wangandrö. (Zinunö 41:14) Ifahaʼö ita Sura Niʼamoniʼö, he fangandrö ba dödö, hegöi na ebua lida, mazui mangandrö föna niha sato, sökhi na tawaʼö ”yaduhu”, eluahania fao dödöda ba wangandrö.​—I Ngaʼötö 16:36; I Korindro 14:16.

16. Hadia sindruhu-ndruhu itema wangandröda Yehowa? Tutunö.

¹⁶ Hadia duhu itema wangandröda Yehowa? Duhu. Ba Zura Niʼamoniʼö tefotöi ia ”Samondro-ndrongo fangandrö”. (Zinunö 65:3) Ifondro-ndrongo Yehowa wangandrö niha si haʼuga zuta asala soroi ba dödö, ba oya lala niʼogunaʼönia ba wanema li wangandröra.

17. Hewisa wangogunaʼö Yehowa ndra malaʼika hegöi ono mbanuania ba wanema li fangandröda?

¹⁷ Iʼodela ndra malaʼika Yehowa hegöi ono mbanuania ba wanema li fangandröda. (Heberaiʼo 1:13, 14) Duma-dumania, so zangandrö enaʼö aboto ba dödönia Zura Niʼamoniʼö, ba lö ara aefa daʼö laʼondrasi ia ira Samaduhuʼö Yehowa. Iʼombakhaʼö Sura Niʼamoniʼö wa fao ndra malaʼika ba wanuriaigö ”turia somuso dödö” ba zi sagörö ulidanö. (Baso Famaʼeleʼö 14:6.) Ato ndra talifusöda sangandrö khö Yehowa ba ginötö so gabula dödöra, lö ara aefa daʼö latema wanolo moroi khö ndra talifusöda niha Keriso.​—Gamaedola 12:25; Yakobo 2:16.

18. Hewisa wangogunaʼö Yehowa gehehania hegöi Sura Niʼamoniʼö ba wanema li fangandröda?

 ¹⁸ Iʼodela gehehania Yehowa ba wanema li fangandröda. Ba ginötö taʼandrö wanolo na so gabula dödöda, iʼogunaʼö gehehania ba wameʼe fanuturu lala ba faʼabölö khöda. (II Korindro 4:7) Iʼodela Zura Niʼamoniʼö Yehowa ba wanema li fangandröda, enaʼö atua-tua ita ba wangai angetula. Na tabaso Zura Niʼamoniʼö, tola tasöndra ayati sanolo yaʼita. Ifarou göi Yehowa dalifusöda ba wameʼe bua gera-era ba gangowuloa si faudu ba gabula dödö salua khöda, mazui iʼogunaʼö zatua sokubaloi ba gangowuloa ba wamatunö khöda mene-mene moroi ba Zura Niʼamoniʼö.​—Galatia 6:1.

19. Hana wa lö ibeʼe nasa Yehowa gangandröwa dödöda?

¹⁹ Itaria, manofu dödöda, ’Hana nasa wa lö ibeʼe Yehowa gangandröwa dödögu?’ Törö tödöu wa abölö iʼila hawaʼara ba hewisa wameʼenia angandröwada. Iʼila hadia zabölö moguna khöda. Na lö aetu mangandrö ita khönia, daʼö dandra wa sindruhu-ndruhu moguna sibai niʼandröda andrö, ba tandra wa mamati ita khönia. (Luka 11:5-10) Itaria, fanema Yehowa fangandröda tenga ba zomasi ita. Duma-dumania, na taʼandrö enaʼö aefa gabula dödöda, lö iheta gabula dödö andrö. Tobali, ibeʼe khöda waʼabölö enaʼö tola tataögö ia.​—Baso Filifi 4:13.

20. Hana wa moguna asese mangandrö ita khö Yehowa?

²⁰ Sindruhu-ndruhu buala si sökhi me no tola mangandrö ita khö Yehowa! Faduhu dödöda wa ifondro-ndrongo wangandröda. (Zinunö 145:18) Na asese mangandrö ita khö Yehowa soroi ba dödö, itugu aro wahuwusada khönia.