1. Hana wa moguna taʼila haniha ndra malaʼika?

OMASI Yehowa na taʼila haniha nösi nomonia. Ira malaʼika no ösi nomo Lowalangi. Ba Zura Niʼamoniʼö lafotöi ira ’ono Lowalangi’. (Yobi 38:7) Hadia manö halöwö ndra malaʼika? Hewisa wanolora niha meföna? Ba hewisa wanolora yaʼita iadaʼa?​—Faigi Gonönöta 8.

2. Hezo moroi mböröta ndra malaʼika? Hawaʼatora?

² Moguna taʼila haniha zomböi ira malaʼika. Imane ba zura Golose 1: 16, ifazökhi ira Yehowa me no aefa ifazökhi Yesu, ”Ba khönia sa mbörö wamazökhi hadia ia, fefu, he si so ba zorugo, ba he si so ba gulidanö”, fao ndra malaʼika ba daʼö. Hawaʼatora? Imane Sura Niʼamoniʼö, ngaotu zuta.​—Zinunö 103:20; Famaʼeleʼö 5:11.

3. Hadia niwaʼö Yobi 38:4-7 sanandrösa khö ndra malaʼika?

³ Ifatunö khöda Sura Niʼamoniʼö wa oföna ifazökhi Yehowa ndra malaʼika moroi ba gulidanö. Hewisa dödöra me laʼila gulidanö? Ifatunö khöda sura Yobi wa omuso sibai dödöra. Ösi nomo Yehowa ira ba ngoni-ngoninia.​—Yobi 38:4-7.

4. Hewisa dödö ndra malaʼika ba niha gulidanö?

⁴ Omasi sibai ndra malaʼika ba niha gulidanö ba  ba gohitö dödö Yehowa ba gulidanö hegöi ba niha. (Gamaedola 8:30, 31; I Fetero 1:11, 12) Abu sibai dödöra me molawa Gadamo ba Khawa. Ba abölö abu dödöra iadaʼa me ato niha solawa khö Yehowa. Na so zamalalini era-era ba omuso sibai dödö  ndra malaʼika. (Luka 15:10) Omasi sibai ndra malaʼika ba niha samosumange Lowalangi. Iʼogunaʼö ira Yehowa ba wanolo ono mbanuania ba gulidanö. (Heberaiʼo 1:7, 14) Datafaigi duma-duma andre.

5. Hewisa wanolo ndra malaʼika ono mbanua Lowalangi meföna?

⁵ Ifatenge Yehowa darua malaʼikania ba wangorifi Loti awö zoroi yomonia me tefakiko mbanua Zodoma ba Gomora. (I Moze 19:15, 16) Ngaotu fakhe aefa daʼö, me latiboʼö zamaʼeleʼö sotöi Danieli ba dögi zingo, lö mate ia me ’no ifatenge malaʼikania Lowalangi ba no ikusi mbawa zingo’. (Danieli 6:23) Aefa daʼö, me so zinenge sotöi Fetero ba gurunga, ifatenge Yehowa samösa malaʼikania ba wangefaʼö yaʼia. (Halöwö Zinenge 12:6-11) Me so Yesu ba gulidanö, latolo ia ira malaʼika. Duma-dumania, me no aefa tebayagö ia idanö, möi ira ”ngoni-ngoninia”. (Mareko 1:13) Fatua lö labunu Yesu, samösa malaʼika ”sangabölöʼö yaʼia”.​—Luka 22:43.

6. (a) Hana wa taʼila wa latolo nono mbanua Lowalangi ba ginötö andre ira malaʼika? (b) Hadia wanofu-nofu sinangea mutema li?

⁶ Hewaʼae lö oroma ndra malaʼika ba niha gulidanö iadaʼa, iʼogunaʼö ira Lowalangi ba wanolo ono mbanuania. Imane Sura Niʼamoniʼö, ”Ifasui malaʼika Yehowa zangataʼufi yaʼia ba iʼefaʼö ira.” (Zinunö 34:8) Hana wa moguna telumöʼö ita? Börö me so nududa sabölö, sedöna mamakiko yaʼita. Haniha nududa andrö? Hezo moroi ira? Hewisa lalara ba wamakiko yaʼita? Enaʼö taʼila wanema linia, datafaigi hadia zalua me no aefa tefazökhi Gadamo ba Khawa.

7. Hadia fefu niha aekhu ba dandrawa Zatana?

⁷ No tafahaʼö ita ba Faza 3, wa so samösa malaʼika Lowalangi solawa yaʼia ba somasi mamatörö niha gulidanö. Tefotöi ia ba Zura Niʼamoniʼö Afökha Satana. (Famaʼeleʼö 12:9) Omasi Zatana na fefu niha lalawa Lowalangi. Tola ifaelungu Khawa, iʼotarai daʼö tola ifaelungu fefu niha. Hizaʼi, so ösa zoloʼö khö Yehowa si lö faröi simane Habeli, Khenoki, ba Noakhi.​—Heberaiʼo 11:4, 5, 7.

8. (a) Hana wa so ösa zi tobali bekhu ndra malaʼika andrö? (b) Hadia nifalua ndra malaʼika enaʼö lö mate ira me Anönö Danö Idanö?

⁸ Ba götö Noakhi, so ndra malaʼika sondröi sorugo, ba labaliʼö ira niha gulidanö. Hadia mbörö? Imane Sura Niʼamoniʼö, omasi ira na so woʼomora. (Baso I Moze 6:2.) Fasala nifaluara andrö. (Yuda 6) Simanö göi nifalua niha gulidanö me luo daʼö, lahalö zi tenga khöra ba afaito ira. No ihalö gangetula Yehowa ba wamakiko niha si lö sökhi, inönöi danö idanö. Ba iʼorifi zi lö faröi khönia. (I Moze 7:17, 23) Enaʼö tola auri malaʼika si lö sökhi, mangawuli ira ba zorugo. Tefotöi ira ba Zura Niʼamoniʼö, bekhu. Fao ira khö Zatana ba wolawa Lowalangi, ba Afökha zamatörö yaʼira.​—Mataiʼo 9:34.

9. (a) Hadia zalua ba mbekhu andrö me mangawuli ira ba zorugo? (b) Hadia nifatunöda aefa daʼa?

⁹ Lö itema saʼe Yehowa tobali ösi nomonia ndra malaʼika solawa. (II Fetero 2:4) Ba tebai göi lafuli labaliʼö ira boto niha, hizaʼi tola ’lafaelungu niha ba gulidanö fefu’. (Famaʼeleʼö 12:9; I Yohane 5:19)  Datafaigi hewisa lalara ba wamaelungu niha.​—Baso II Korindro 2:11.

10. Hewisa lala mbekhu wamaelungu niha?

¹⁰ Oya lala mbekhu ba wamaelungu niha. Na so niha somasi fahuhuo ba mbekhu, sangodela samaʼeleʼö, sameʼe dalu-dalu nifahede, ma si faeta, daʼö nifotöi si fakelemu. Iʼoʼou ita Sura Niʼamoniʼö enaʼö taʼaröuʼö ita ba ngawalö zoʼamakhaita ba mbekhu. (Galatia 5:19-21) Hadia mbörö? Hulö simane si möi malu, laʼogunaʼö dandrawa ba wondraʼu ahulua, simanö göi mbekhu laʼogunaʼö dandrawa ba wamaelungu niha.​—Faigi Gonönöta 26.

11. Hadia waetasa andrö, ba hana wa taʼaröuʼö ita ba daʼö?

¹¹ Faetasa zi tobali tandrawa niʼogunaʼö mbekhu. Laʼogunaʼö waʼabölö mbekhu ba wanahö hadia zalua ba zi so föna. So zamaigi döfi, lafaʼa niha, labaso kartu tarot, laʼogunaʼö bola kristal, ba lafaigi zuʼa danga. Ato niha sangumaʼö lö sala na lafalua daʼö, sindruhunia fasala sibai. Tola möi fangalara. Duma-dumania, simane si so ba Zura Niʼamoniʼö, wa niha samalua faetasa falulu fohalöwö ira ba mbekhu. Ifatunö khöda ba Halöwö Zinenge 16:16-18 wa ’so mbekhu waetasa’ sanolo samösa ono alawe ba ”waetasania andrö”. Me no ifofanö sinenge sotöi Faulo mbekhu andrö, tebai ifalua waetasa ono alawe no mege.

12. (a) Hana wa fasala na fahuhuo ita ba niha si no mate? (b) Hana wa tebai fao nono mbanua Lowalangi wamalua halöwö soʼamakhaita ba mbekhu?

 ¹² So dandrawa tanö böʼö niʼogunaʼö mbekhu. Laʼalui lala enaʼö faduhu dödöda wa tola fahuhuo ita ba niha si no mate, aefa daʼö lamane auri noso niha si no mate ba tola latolo mazui lafakao niha. Duma-dumania, tola taʼodela duku ba wahuhuosa ba niha si no mate. Ba ifatunö khöda duku hadia niwaʼöra, ba tola ifaudugö linia ba li niha si no mate. (I Zamueli 28:3-19) Na lakoʼo zi mate, labeʼe wangasi, latörö tödö waʼamate, fameʼe gö ba zi no mate, ritus kejandaan, mazui owasa soʼamakhaita ba niha si no mate, börö me faduhu dödöra wa auri noso niha si no mate. Na lö lafalua daʼö niha Keriso sindruhu, mofönu zi fahatö khöra, laʼoʼaya ira, mazui latiboʼö ira banua. Hizaʼi, aboto ba dödöra wa lö auri noso niha si no mate. Andrö wa tebai fahuhuo ita khöra ba tebai lafaʼala ita. (Zinunö 115:17) Angelama, böi fahuhuo ba niha si no mate mazui ba mbekhu ba böi falua hadia ia zoʼamakhaita khöra.​—Baso V Moze 18:10, 11; Yesaya 8:19.

13. Hewisa niha si no irai ataʼu ba mbekhu?

¹³ Bekhu andrö tenga ha lafaelungu niha, tobali lafetaʼu göi. Aboto ba dödö mbekhu ba Satana wa ’lö aratö ginötö nitehe khöra’. Ihori ira Lowalangi ba waʼalio, andrö itugu afaito ira iadaʼa töra moroi ba zi no numalö. (Famaʼeleʼö 12:12, 17) Hewaʼae simanö, töra ngahönö niha si no irai ataʼu ba mbekhu, ba lö ataʼu ira saʼe iadaʼa. Hadia mbörö?

14. Simane nifalua niha Keriso meföna, hewisa enaʼö aefa ita moroi ba mbekhu?

¹⁴ Ifatunö khöda Sura Niʼamoniʼö hewisa wolawa ba hewisa wangefaʼö yaʼita moroi ba mbekhu. Duma-dumania, ba mbanua Efeso, so niha si fakelemu fatua lö saboto ba dödöra zindruhu. Hewisa enaʼö tola aefa ira ba daʼö? Imane Sura Niʼamoniʼö, ”Ba ato zi no molau faya-faya mangowuloi sura andrö ba latunu, ba zanehe zato.” (Halöwö Zinenge 19:19) Börö me omasi ira tobali niha Keriso sindruhu, andrö latunu mbuku soʼamakhaita ba wakelemusa. Tola göi mufalua zimane daʼö ba ginötö andre. Niha somasi moloʼö khö Yehowa, moguna latiboʼö fefu zoʼamakhaita ba mbekhu, simane buku, film, musik, mai-mai, hazima, gambara soʼamakhaita ba waʼabölö mbekhu si lö fasala wamaigida.​—I Korindro 10:21.

15. Hadia nasa nifaluada ba wolawa Satana ba bekhu?

¹⁵ Haʼuga fakhe me no aefa latunu mbuku gelemura niha Efeso, imane Faulo lö tola lö nasa ’fasöndra ira’ ba wolawa ”bekhu si lö sökhi andrö”. (Efeso 6:12) Hewaʼae no latunu mbukura, lö iröi-röi ira nasa bekhu andrö. Hadia zinangea lafalua? Imane Faulo, ”Ba mihalö mbaluse famati andrö, si tola mibeʼe fangokafu nono wana Gafökha andrö, soʼalitö.” (Efeso 6:16) Simane baluse tola ilumöʼö zaradadu si möi fasuwö, simanö göi wamati tola ilumöʼö ita. Na faduhu dödöda wa ilumöʼö ita Yehowa, faduhu dödöda wa tola tatimbagö Zatana ba bekhu.​—Mataiʼo 17:20.

16. Hewisa enaʼö aro wamatida khö Yehowa?

¹⁶ Hewisa enaʼö aro wamatida khö Yehowa? Böi  tabato wombaso Sura Niʼamoniʼö ero maʼökhö, ba tabeʼe balazida ia ba wondrorogö yaʼita. Na aro wamatida khö Yehowa, tebai ifaʼala ita Satana ba bekhu.​—I Yohane 5:5.

17. Hadia nasa zi tola molumöʼö yaʼita moroi ba mbekhu?

¹⁷ Hadia nasa nifalua niha Keriso ba Efeso? No so ira ba gotalua niha si fakelemu. Andrö imane khöra Faulo, ’Böi mifamalö-malö wangandrö.’ (Efeso 6:18) Moguna laʼandrö wanolo khö Yehowa ero inötö. Hewisa göi ita? No so ita ba gotalua niha somasi fakelemu. Andrö moguna taʼandrö wanolo ba döi Yehowa. (Baso Gamaedola 18:10.) Ifondro-ndrongo Yehowa na lö tabato wangandrö khönia enaʼö iʼefaʼö ita ba danga Zatana.​—Zinunö 145:19.

18, 19. (a) Hewisa enaʼö möna ita ba wolawa Satana ba bekhu? (b) Hadia wanofu nitemada li ba faza aefa daʼa?

¹⁸ Na tatiboʼö fefu gama-gama soʼamakhaita ba mbekhu, ba tabeʼe balazida Yehowa ba wondrorogö yaʼita, tola talawa Zatana ba bekhu. Lö moguna ataʼu ita ira. (Baso Yakobo 4:7, 8.) Abölö Yehowa moroi ba mbekhu. No tehuku ira ba ginötö Noakhi, ba ihori ira zui ba zi so föna. (Yuda 6) Törö tödöu, tenga ha yaʼita zolawa Satana, so ndra malaʼika niʼogunaʼö Yehowa si fao khöda ba wondrorogö yaʼita. (II Razo 6:15-17) Faduhu dödöda ba wanolo Yehowa ba tola möna ita ba wolawa Satana ba bekhu.​—I Fetero 5:6, 7; II Fetero 2:9.

¹⁹ Na börö Zatana ba bekhu wa so wamakao ba gulidanö, ba hana wa lö ihori ira nasa Lowalangi? Ba faza aefa daʼa so wanema li.