1. Haniha zamatunö khöda lala satulö ba wamosumange Lowalangi?

OYA agama sangumaʼö no lafahaʼö zatulö sanandrösa khö Lowalangi. Sindruhunia sa faya, faböʼö nifahaʼöra sanandrösa khö Lowalangi, awö lala wamosumange yaʼia. Hewisa enaʼö taʼila lala sindruhu ba wamosumange Lowalangi? Ha Yehowa zi tola mamatunö khöda.

2. Hewisa enaʼö taʼila lala satulö ba wamosumange Lowalangi?

² No ibeʼe khöda Zura Niʼamoniʼö Yehowa enaʼö taʼila lala satulö ba wamosumange yaʼia. Andrö, fahaʼö ndraʼugö ba Zura Niʼamoniʼö, itoloʼö Yehowa ba ösöndra howu-howu ba wamahaʼönia börö me so so dödönia ndraʼugö.​—Yesaya 48:17.

3. Hadia niʼandrö Lowalangi khöda?

³ So zangumaʼö fefu agama itema Lowalangi, hizaʼi tenga simanö wamahaʼö Yesu. Imane, ”Lö dozi molala dania ba Mbanua zorugo andrö zi fa soʼaya khögu, wangumaʼö: He Soʼaya! He Soʼaya! Ha soloʼö somasi Namagu andrö, si so ba zorugo.” Andrö moguna tafahaʼö ita ba zomasi Lowalangi ba tafalua. Börö me ifagölösi Yesu niha si lö moloʼö li Lowalangi simane ”solau si lö atulö”.​—Mataiʼo 7:21-23.

4. Hadia niwaʼö Yesu soʼamakhaita ba wamalua somasi Lowalangi?

⁴ Ifangelama ita Yesu, oya wanaisi na taʼoʼö li Lowalangi. Imane, ”Mitörö mbawa göli sise-ise andrö,  me no ebua mbawa göli ba me no ebolo lala saekhu ba waʼatekiko andrö, ba me no ato zanörö yaʼia. Ba me no ide-ide mbawa göli ba me no ise-ise lala saekhu ba waʼauri andrö, ba me lö ato zanöndra yaʼia.” (Mataiʼo 7:13, 14) Lala sise-ise, mazui lala sindruhu ba wamosumange Lowalangi zolohe yaʼita ba waʼauri si lö aetu. Lala sebolo, mazui lala selungu ba wamosumange Lowalangi zolohe yaʼita ba waʼamate. Hizaʼi, lö omasi Yehowa na mate niha. Andrö ibeʼe ginötö ba niha fefu wamahaʼö yaʼira ba zindruhu sanandrösa khönia.​—II Fetero 3:9.

5. Hewisa enaʼö taʼila haniha zindruhu zamosumange Lowalangi?

⁵ Imane Yesu tola taʼila haniha zindruhu zamosumange Lowalangi, hadia zi faduhu dödöra, ba hadia nifaluara. Imane nasa, ”Ba mbua-buara aboto ba dödömi ira.” Aefa daʼö imane zui, ”Iʼowua mbua si sökhi fefu geu si sökhi.” (Mataiʼo 7:16, 17) Tenga eluahania fefu zamosumange Lowalangi moʼahonoa. Hewaʼae simanö, laforege wamalua satulö. Datafaigi hadia zanolo yaʼita enaʼö taʼila haniha zindruhu zamosumange Lowalangi.

6, 7. Hana wa teʼodane-dane wamahaʼö agama sindruhu ba Zura Niʼamoniʼö? Hadia duma-duma nibeʼe Yesu?

⁶ Teʼodane-dane ba Zura Niʼamoniʼö wamahaʼöda. Imane Sura Niʼamoniʼö, ”Fefu nösi zura andrö, ba eheha Lowalangi zameʼe ba dödö niha, ba moguna ia ba wamahaʼö, ba ba wangotuʼö ba ba wangaʼazökhi, ba ba wamamaha ba waʼatulö dödö, enaʼö moʼahonoa genoni Lowalangi andrö, si no toʼölö ba ngawalö  mbua-bua si sökhi andrö fefu.” (II Timoteo 3:16, 17) Imane Faulo ba niha Keriso, ”Me no mifonaha Daromali Lowalangi andrö, nirongomi khöma, tenga simane taromali niha, no simane sindruhunia, simane taromali Lowalangi.” (I Tesalonika 2:13) Famahaʼö sindruhu teʼodane-dane ba Daromali Lowalangi, yaʼia daʼö Sura Niʼamoniʼö. Tenga ba waʼatua-tua niha, mazui hada, ba ma tanö böʼönia.

⁷ Fefu wamahaʼö Yesu teʼodane-dane ba Daromali Lowalangi. (Baso Yohane 17:17.) Asese iʼogunaʼö Yesu Nösi Zura. (Mataiʼo 4:4, 7, 10) Laʼoʼö duma-duma nibeʼe Yesu niha soloʼö khö Lowalangi ba laʼogunaʼö Zura Niʼamoniʼö ba wamahaʼöra.

8. Hadia nifahaʼö Yesu yaʼita ba wamosumange Yehowa?

⁸ Ha Yehowa nifosumangeda. Imane Zinunö 83:19, ”Wa no ha yaʼugö zotöi Yehowa, wa ha yaʼugö Wondrege Zalawa ba gulidanö maʼasagörö.” Omasi Yesu na aboto ba dödö niha haniha Lowalangi, andrö ifatunö khöra döi Lowalangi. (Baso Yohane 17:6.) Imane Yesu, ”Khö Zoʼaya Lowalangiu, mangalulu ndraʼugö ba ha yaʼia öfosumange.” (Mataiʼo 4:10) Taʼoʼö duma-duma nibeʼe Yesu börö me yaʼita soloʼö khö Lowalangi. Ha Yehowa nifosumangeda, taʼogunaʼö döinia, ba tafahaʼö niha böʼö sanandrösa ba döi Lowalangi ba hadia nifaluania khöda.

9, 10. Hewisa wangomasiʼöda awöda?

⁹ Taʼomasiʼö nawöda soroi ba dödö. Ifahaʼö ndra nifahaʼönia Yesu enaʼö faoma laʼomasiʼö nawöra. (Baso Yohane 13:35.) He faböʼö-böʼö mbanua niʼotaraida, he na kayo mazui tosasa, faʼomasi zangosambuaʼö yaʼita simane si fatalifusö. (Kolose 3: 14) Lö fao ita ba wasuwöta, ba lö tabunu niha. Imane Sura Niʼamoniʼö, ”Ba daʼö oroma, haniha nono Lowalangi, ba haniha nono Gafökha. Dozi si lö molau satulö, ba tenga moroi ba Lowalangi ira, awö zi lö mangomasiʼö talifusönia.” Aefa daʼö imane zui, ”Faoma taʼomasiʼö nawöda. Böi simane Kaʼino andrö, soroi ba Gafökha, samunu akhinia.”​—I Yohane 3:10-12; 4:20, 21.

¹⁰ Taʼogunaʼö waʼabölöda, inötö, kefeda ba wanolo ba ba wamarou tödö nawöda. (Heberaiʼo 10:24, 25) ’Talau saʼae zi sökhi ba niha fefu.’​—Galatia 6:10.

11. Hana wa fao dödöda wa Yesu lala sofeta khö Lowalangi?

¹¹ Faduhu dödöda wa börö Yesu Keriso tola takhamö waʼauri. Imane Sura Niʼamoniʼö, ”Ba lö fangorifi ba danö böʼö, ba löʼö sa göi töi böʼö nibeʼe ba niha, ba gulidanö, ba wangorifi yaʼita.” (Halöwö Zinenge 4:12) No tafahaʼö ita ba Faza 5 ba mbuku andre, wa no ifatenge Yesu Yehowa ba wangöhöli niha samati. (Mataiʼo 20:28) Yehowa zamili Yesu tobali Razo samatörö ba gulidanö. Andrö wa iwaʼö ba Zura Niʼamoniʼö, oʼö li Yesu na omasiʼö ösöndra waʼauri si lö aetu.​—Baso Yohane 3:36.

12. Hana wa tebai fao ita ba politik?

¹² Lö fao ita ba politik. Lö fao Yesu ba politik. Imane khö Wilato sanguhuku ba Roma, ”Tenga moroi ba gulidanö andre Mbanuagu andrö.” (Baso Yohane 18:36.) Lö faröi ita ba Mbanua Lowalangi simane nifalua Yesu, andrö wa lö fao ita ba politik. Hizaʼi, iʼoʼou ita Sura Niʼamoniʼö enaʼö taʼoʼö ”li zalawa”, yaʼia daʼö famareta. (Roma 13:1) Taʼoʼö goi-goi famareta ba mbanua si toröi yaʼita.  Na so goi-goi ndra famareta si lö faudu ba zomasi Lowalangi, taʼoʼö simane nifalua ndra sinenge Yesu, sangumaʼö, ”Niʼoʼö khö Lowalangi, moroi ba woloʼöda ba niha.”​—Halöwö Zinenge 5:29; Mareko 12:17.

13. Hana wa moguna taturiaigö Mbanua Lowalangi?

¹³ Faduhu dödöda wa Banua Lowalangi zi tola mangefaʼö yaʼita ba ngawalö gabula dödö. Imane Yesu, ”Teturiaigö dania Mbanua Lowalangi andrö” ba zi sagörö ulidanö. (Baso Mataiʼo 24:14.) Lö hadöi famatörö niha gulidanö samalua simane nifalua Mbanua Lowalangi. (Zinunö 146:3) Ifahaʼö ita Yesu ba woʼangandröi Banua Lowalangi me imane, ”Yatobali Banuau fefu niha. Yaʼitörö zomasi ndraʼugö, hulö ba zorugo, yasimanö göi ba gulidanö.” (Mataiʼo 6:10) Ifatunö Sura Niʼamoniʼö wa ifakiko fefu wamatörö niha gulidanö Banua Lowalangi, ba yaʼia ”lö tebulö, irugi zi lö aetu”.​—Danieli 2:44.

14. Moloʼö yaʼugö haniha zindruhu zamosumange Lowalangi?

¹⁴ Me no aefa tadunö-dunö daʼa fefu, sofu khöu samösa: ’Haniha zangodane-dane famahaʼöra ba Zura Niʼamoniʼö? Haniha zanuriaigö töi Lowalangi? Haniha zi faoma mangomasiʼö awöra, ba si faduhu tödö wa Lowalangi zamatenge Yesu ba wangefaʼö yaʼita? Haniha zi lö fao ba politik? Haniha zanuriaigö wa Banua Lowalangi zangeheta yaʼita ba ngawalö gabula dödö?’ Ha ira Samaduhuʼö Yehowa.​—Yesaya 43:10-12.

15. Hadia nifaluada enaʼö itema Lowalangi zumange nibeʼeda?

¹⁵ Ambö na ha asala faduhu dödöda wa so Lowalangi. Bekhu manö faduhu dödöra wa so ia,  hizaʼi lö laʼoʼö linia. (Yakobo 2:19) Na omasi ita itema Lowalangi zumange nibeʼeda, böi ha faduhu dödöda wa so ia, tobali tafalua zomasi ia.

16. Hana wa taʼaröuʼö ita ba agama sofaya?

¹⁶ Na omasi ita itema Lowalangi zumange nibeʼeda, taʼaröuʼö ita ba agama sofaya. Imane samaʼeleʼö sotöi Yesaya, ”Miheta ami khöra! Mihaogö ami.” (Yesaya 52:11; II Korindro 6:17) Andrö wa taʼaröuʼö ita ba zoʼamakhaita ba agama sofaya.

17, 18. Hadia ”Mbabilona Sebua” andrö, ba hana wa taʼaliokö wondröi yaʼia?

¹⁷ Hadia agama faya andrö? Yaʼia daʼö samahaʼö lala wamosumange Lowalangi si lö faudu ba Daromali. Tefotöi ia ba Zura Niʼamoniʼö ”Babilona Sebua”. (Famaʼeleʼö 17:5) Hadia mbörö? Me no aefa Anönö Danö Idanö ba ginötö Noakhi, oya wamahaʼö agama faya si otarai Mbabilona, si no muzawili ba zi sagörö ulidanö. Duma-dumania, niha si so ba Mbabilona, lafosumange lowalangi si sambua tölu. Simanö göi ba ginötö andre, oya agama samahaʼö wa so Lowalangi si Sambua Tölu. Hizaʼi, ifatunö Sura Niʼamoniʼö wa ha samösa Lowalangi sindruhu sotöi Yehowa ba töi Nononia, Yesu. (Yohane 17:3) Faduhu dödö niha Mbabilona wa auri noso niha si no mate, ba noso andrö dania nifakao ba galitö narako. Faya daʼö.​—Faigi Gonönöta 14, 17, ba 18.

¹⁸ No ifaʼeleʼö Lowalangi, lö aratö tefakiko agama faya. (Famaʼeleʼö 18:8) Hadia aboto ba dödöu hana wa muʼaliokö wondröi agama faya? Omasi Yehowa Lowalangi na öfalua daʼö fatua so ginötö.​—Famaʼeleʼö 18:4.

19. Hewisa wangosinangegö Yehowa yaʼugö na no öʼoʼö ia?

 ¹⁹ Na no öhalö gangetula ba wondröi agama faya ba öʼoʼö Yehowa, ato nawöu mazui ösi nomou si lö fao tödö khöu ba lagohi ndraʼugö. Hizaʼi, lö iröi ndraʼugö Yehowa. Tobali ndraʼugö ösi nomo ba waʼafatalifusöta ba zi sagörö ulidanö si faoma mangomasiʼö awöra, ba ösöndra waʼauri si lö aetu ba gulidanö si bohou khö Lowalangi. (Mareko 10:28-30) Tola manö awöu mazui ösi nomou solohi yaʼugö börö me öfosumange Yehowa, ifuli adöni dödöra ba wamahaʼö yaʼira ba Zura Niʼamoniʼö.

20. Hana wa moguna tafosumange Lowalangi si faudu ba zomasi ia?

²⁰ Lö aratö ihori Lowalangi fefu zi lö sökhi, ba musindro Mbanuania ba gulidanö. (II Fetero 3:9, 13) Inötö sahöli-höli dödö daʼö! Fefu niha lafosumange Yehowa si faudu ba zomasi ia. Andrö, aliokö wangai angetula iadaʼa, ba fosumange Lowalangi si faudu ba zomasi ia.