1. Hadia gohitö dödö Lowalangi ba niha gulidanö?

SO GOHITÖ dödö Lowalangi sahöli-höli dödö ba niha. Ifazökhi niha si föföna, Adamo ba Khawa, ifataro ira ba kabu si sökhi. Ohitö dödö Lowalangi khöra enaʼö moʼono ira, labaliʼö gulidanö faradaiso, ba lafaliaro gurifö.​—I Moze 1:28; 2:8, 9, 15; faigi Gonönöta 6.

2. (a) Hana wa taʼila hasambalö ifalua gohitö dödönia Lowalangi? (b) Moloʼö Sura Niʼamoniʼö, haniha zauri ba gulidanö sagötö faʼara?

² Moloʼö yaʼugö hadia tola auri ita ba gulidanö faradaiso sagötö faʼara? Imane Yehowa, ”Lö tola lö alua dania nihonogöigu ba hadia fefu zi so ba dödögu, ba itörö ubeʼe!” (Yesaya 46:9-11; 55:11) Ifalua zomasi dödönia ba lö si tola manaha yaʼia. Wa ifazökhi gulidanö Yehowa, ”tenga tanö si lö niha-niha ifazökhi”. (Yesaya 45:18) Omasi ia na auri niha ba gulidanö sagötö faʼara. Haniha zomasi Lowalangi zauri ba gulidanö, ba haʼuga fakhe? Imane Sura Niʼamoniʼö, ”Satulö tödö zokhö tanö dania, yaʼira zowanua ba danö, si lö mamalö-malö.”​—Zinunö 37:29; Famaʼeleʼö 21:3, 4.

3. Hadia wanofu si tumbu ba dödöu na göna ita fökhö ba faʼamate?

³ Iadaʼa, göna niha fökhö ba faʼamate. Ba mbanua böʼö, so wasuwöta ba faoma labunu nawöra. Sindruhu-ndruhu tenga daʼö gohitö dödö Lowalangi.  Na simanö, hana wa faböʼö zalua, ba hadia mbörö? Ha Sura Niʼamoniʼö zi tola manema li.

4, 5. (a) Haniha sindruhunia zi fahuhuo khö Khawa ba kabu Edena? (b) Hewisa wa tola tobali sanagö niha sadölö tödö?

⁴ Ifatunö Sura Niʼamoniʼö wa so nudu Lowalangi yaʼia daʼö malaʼika sotöi ”Afökha ba Satana”. Iʼodela gulö Satana ba wahuhuosa khö Khawa ba kabu Edena. (Famaʼeleʼö 12:9; I Moze 3:1) Hulö na ulö zi fahuhuo ibeʼe Satana.​—Faigi Gonönöta 7.

⁵ Hadia Lowalangi zamazökhi Afökha Satana? Tenga! Me ifazökhi kabu Edena Lowalangi si tobali nahia Gadamo ba Khawa, samösa malaʼika ba zorugo zombaliʼö yaʼia samösa Afökha. (Yobi 38:4, 7) Hewisa wa tola alua daʼö? Hewisa niha sadölö tödö tola tobali niha sanagö? Me tumbu ia tenga niha sanagö-nagö. Iʼisö zi tenga okhötania. Iʼangera-ngeraigö manö daʼö, irege tedou gisö-isö dödönia si fasala andrö. Me so ginötö, ba managö ia. Yaʼia samösa zombaliʼö yaʼia sanagö.​—Baso Yakobo 1:13-15; faigi Gonönöta 8.

6. Hewisa wa tobali si faʼudu khö Lowalangi zi samösa malaʼika?

⁶ Daʼö zalua khö malaʼika andrö. Me no aefa ifazökhi Gadamo ba Khawa Yehowa, ifatunö khöra wa moʼono ira dania ’lafoʼösi gulidanö’. (I Moze 1:27, 28) Imane dödönia malaʼika andrö, ’Sindruhunia yaʼo enaʼö nifosumange niha tenga Yehowa!’ Itugu iʼera-era daʼö, itugu tedou waʼomasinia wangokhögö sumange sinangea mubeʼe khö Yehowa. Omasi malaʼika na lafosumange ia niha. Andrö wa ilimo ba  ifaelungu Khawa. (Baso I Moze 3:1-5.) Ba tobali ia Afökha Satana, si faʼudu khö Lowalangi.

7. (a) Hana wa mate Gadamo ba Khawa? (b) Hana wa atua ita ba mate?

⁷ Molawa Gadamo ba Khawa khö Lowalangi, ba laʼa mbua geu. (I Moze 2:17; 3:6) Lafalua horö föna Yehowa, ba mate ira simane niwaʼö Yehowa. (I Moze 3:17-19) Fefu ngaʼötö Gadamo ba Khawa, göna khöra horö ondröita, andrö wa mate ira. (Baso Roma 5:12.) Enaʼö taʼila hana wa göna horö ondröita ngaʼötö Gadamo ba Khawa, datafaigi duma-duma andre. Khalaigö na tabogö kue ba naha wamazökhi kue si no afufu. Fefu kue nibogö khönia hasambalö tekiko simane nahania. Me inötö molawa Gadamo khö Lowalangi ba daʼö lafotöi ia niha si so horö mazui niha si lö moʼahonoa. Börö me ngaʼötö Gadamo ita, andrö wa göna khöda horö ondröita mazui ”tekiko” simane yaʼia, tobali niha si lö moʼahonoa, atua, ba mate.​—Roma 3:23; faigi Gonönöta 9.

8, 9. (a) Hadia zomasi Zatana enaʼö faduhu dödö Gadamo ba Khawa? (b) Hana wa lö iʼanemai ibunu zolawa yaʼia Yehowa?

⁸ Ba daʼö ibörögö molawa Zatana khö Yehowa me ifaelungu Gadamo ba Khawa. Omasi ia na faduhu dödö Gadamo ba Khawa wa Yehowa andrö si falimo, samatörö si lö sökhi, ba lö ibeʼe khöra zi sökhi. Hulö na imane Satana lö moguna ifatörö niha Lowalangi, ba tola latatugöi samösa ira Adamo ba Khawa hadia zi sökhi ba si lö sökhi. Hadia nifalua Yehowa? Tola manö ibunu fefu zolawa famatörönia. Ba hadia daʼö zangoromaʼö wa Satana andrö si falimo? Tenga.

⁹ Lö iʼanemai ibunu zolawa famatörönia Yehowa. Ibeʼe khöra ginötö ba wamatörö faʼaurira samösa. Ba  daʼö oroma wa si falimo Zatana, ba oroma göi wa iʼila Yehowa zabölö sökhi ba niha. Tola tafahaʼö ita ba zalua andrö ba Faza 11 ba mbuku daʼa. Hewisa dödöu me simane daʼö gangetula nihalö Gadamo ba Khawa? Hadia sökhi gangetula nihalöra ba wolawa Lowalangi ba faduhu dödöra khö Zatana? No ibeʼe Yehowa ngawalö zoguna khöra. Ibeʼe khöra waʼauri soʼahonoa,  nahia si sökhi, ba halöwöra. Lö irai ibeʼe khöra zi sökhi Satana. Na so ndraʼugö me luo daʼö, hadia nifaluamö?

10. Hadia zi tola tafili samösa?

¹⁰ Iadaʼa, tola tahalö samösa gangetula, ba teʼodaligö lala waʼaurida ba gangetula nihalöda. Tola tafili woloʼö khö Yehowa tobali Samatörö yaʼita ba tafaduhuʼö wa sofaya Zatana. Mazui tafili Zatana si tobali samatörö yaʼita. (Zinunö 73:28; baso Gamaedola 27:11.) Lö ato zangataʼufi Lowalangi ba gulidanö andre. Sindruhunia, tenga Lowalangi zamatörö ulidanö. Na simanö, haniha zamatörö?

11, 12. (a) Hadia niʼilada moroi ba niforomaʼö Zatana khö Yesu? (b) Hezo ayati tesöndra wa Satana zamatörö ulidanö?

¹¹ Iʼila Yesu haniha zindruhunia zamatörö ulidanö andre. Samuza inötö, ’iʼoromaʼö khönia Afökha mbanua ba gulidanö fefu awö lakhöminia’. Ifabuʼu Satana khö Yesu, ”Ahori ubeʼe khöu daʼö, na ötuhi danö, ba wangalulu khögu.” (Mataiʼo 4:8, 9; Luka 4:5, 6) Tandraigö sofu khöu samösa, ’Na tenga okhöta Zatana nösi gulidanö andre, hadia tola ibeʼe lakhömi daʼö khö Yesu?’ Löʼö. Fefu wamatörö si so ba gulidanö okhöta Zatana.

¹² Te ahöli dödöu, ’Hewisa wa Satana zamatörö ulidanö? Hadia tenga no Fondrege Zabölö Yehowa, ba samazökhi banua siawa awö danö?’ (Famaʼeleʼö 4:11) Atulö Lowalangi zamazökhi ulidanö, hizaʼi, Yesu zangumaʼö wa Satana ”zalawa gulidanö andre”. (Yohane 12:31; 14:30; 16:11) Ifotöi Afökha Satana andrö Faulo ”Lowalangi zi sagötö tanö andre”.  (II Korindro 4:3, 4) Imane Yohane, ”Ba danga Gafökha so nösi gulidanö maʼafefu.”​—I Yohane 5:19.

13. Hana wa moguna khöda gulidanö si bohou?

¹³ Itugu lö sökhi gulidanö andre. Oya wasuwöta, sangokhögö si tenga khönia, samini tödö, ba faʼudusa ba zi fasui yaʼita. Tebai laheta ngawalö gabula dödö andre niha gulidanö he na oya lala nifaluara. Ba zi lö aratö ifakiko gulidanö si lö sökhi Lowalangi ba Hamagedo, ifuli ibohouni gulidanö tobali faradaiso si so faʼatulö.​—Famaʼeleʼö 16:14-16; faigi Gonönöta 10.

14. Haniha nifili Lowalangi tobali Razo ba Mbanuania? Hadia nifaʼeleʼö Zura Niʼamoniʼö sanandrösa khö Yesu?

¹⁴ Yesu Keriso nifili Yehowa tobali Razo ba wamatörönia ba zorugo. Ngahönö fakhe ba zi lalö, no ifaʼeleʼö Sura Niʼamoniʼö wa Yesu zi tobali ”Salawa Waʼatulö” ba lö aetu wamatörönia. (Yesaya 9:6, 7) Ifahaʼö ndra nifahaʼönia Yesu enaʼö laʼangandröi wamatörönia, imane, ”Yatobali Banuau fefu niha. Yaʼitörö zomasi ndraʼugö, hulö ba zorugo, ya simanö göi ba gulidanö.” (Mataiʼo 6:10) Ba Faza 8, taʼila wa Banua Lowalangi zangeheta famatörö niha gulidanö. (Baso Danieli 2:44.) Banua Lowalangi zo bohouni ulidanö tobali faradaiso.​—Faigi Gonönöta 11.

15. Hadia geluaha ”tanö si bohou” andrö?

¹⁵ No ifabuʼu Sura Niʼamoniʼö, ”Ba tadöna-döna mbanua siawa, si bohou, ba tanö si bohou,” ba ”zahono faʼatulö dödö”. (II Fetero 3:13; Yesaya 65:17) Itaria na itötöi Sura Niʼamoniʼö ”gulidanö”, eluahania niha  si toröi ba gulidanö. (I Moze 11:1) Börö daʼö ”tanö si bohou” safönu faʼatulö eluahania fefu niha soloʼö khö Lowalangi ba sanöndra howu-howunia.

16. Hadia mbuala nibeʼe Lowalangi ba niha sauri ba gulidanö si bohou, ba hewisa enaʼö tatema mbuala andrö?

¹⁶ No ifabuʼu Yesu wa niha sauri ba gulidanö si bohou, lasöndra ’waʼauri si lö aetu’. (Mareko 10:30) Hewisa enaʼö tatema mbuala andrö? Baso Yohane 3:16 ba 17:3 enaʼö taʼila wanema li. Datafaigi hadia niwaʼö Zura Niʼamoniʼö sanandrösa ba waʼauri niha ba Waradaiso.

17, 18. Hana wa taʼila so waʼatulö ba gulidanö ba lö ametaʼuö?

¹⁷ Aheta fefu waʼalösökhi, fasuwöta, ba faʼudusa. Lö niha si lö sökhi sauri ba gulidanö. (Zinunö 37:10, 11) ’Itenawa Lowalangi wasuwöta irugi wondrege danö.’ (Zinunö 46:10; Yesaya 2:4) Afönu gulidanö niha sangomasiʼö Lowalangi ba soloʼö somasi ia. So waʼatulö irugi zi lö aetu.​—Zinunö 72:7.

¹⁸ Lö sametaʼu ono mbanua Yehowa. Ba götö Zura Niʼamoniʼö, me laʼoʼö niwaʼö Lowalangi iraono Gizaraʼeli, lö sametaʼu yaʼira me no ilumöʼö ira Lowalangi. (III Moze 25:18, 19) Ba gulidanö Faradaiso, lö sametaʼu yaʼita. Lö aetu tasöndra waʼahono dödö!​—Baso Yesaya 32:18; Mikha 4:4.

19. Hana wa faduhu dödöda wa fahöna mbalazo ba waradaiso?

¹⁹ Fahöna mbalazo. ”Fahöna mbua nowi ba danö, ba hili yawa; mururu mbuania.” (Zinunö 72:16) ”Ifahowuʼö ita Lowalangi” Yehowa, ba ”no ibeʼe baero mbuania tanö”.​—Zinunö 67:7.

20. Hana wa taʼila wa tobali faradaiso gulidanö andre?

²⁰ Tobali faradaiso zi sagörö ulidanö. Lafazökhi nomora zamösana, awö kabu si sökhi. (Baso Yesaya  65:21-24; Famaʼeleʼö 11:18.) Faʼasökhi gulidanö simane faʼasökhi kabu Edena meföna. Ibönökhi zoguna khöda Yehowa. Imane Sura Niʼamoniʼö, ”Öbokai dangau ba öʼabusoiʼö fefu zauri somasi ira.”​—Zinunö 145:16.

21. Hezo taʼila wa tola fahuwu niha ba gurifö?

²¹ Fahuwu ira niha gurifö. Lö ifaʼala niha urifö. Lö ataʼu ndraono side-ide ba gurifö safaito si tola mamaʼala niha simane salua iadaʼa.​—Baso Yesaya 11:6-9; 65:25.

22. Hadia nifalua Yesu ba niha sofökhö?

²² Lö niha sofökhö. Me so Yesu ba gulidanö ato niha nifadöhönia fökhö. (Mataiʼo 9:35; Mareko 1:40-42; Yohane 5:5-9) Börö daʼö, na tobali Razo Yesu ba Mbanua Lowalangi dania, ifadöhö fefu niha sofökhö. Samösa lö sangumaʼö, ”No gönado safökhö khögu.”​—Yesaya 33:24; 35:5, 6.

23. Hadia nifalua Lowalangi ba niha si no mate?

²³ Ifuli auri niha si no mate. No ifabuʼu Lowalangi wa ifuli isusugi niha si no mate, zuta waʼato. ”So wemaoso zimate, he satulö, ba he si lö atulö.”​—Baso Yohane 5:28, 29; Halöwö Zinenge 24:15.

24. Hewisa dödöu sanandrösa ba waʼauri niha ba Waradaiso?

²⁴ Tola tafili zomasi ita. Tola tafili wamahaʼö yaʼita sanandrösa khö Yehowa ba tafalua zomasi ia, mazui tafili wamalua somasi ita. Na tafili wamalua somasi Yehowa, so khöda wanötöna sahöli-höli dödö ba zi so föna. So samösa ndra matua sangandrö enaʼö itörö tödö Yesu ia, ifabuʼu khönia Yesu imane, ”Awögu ndraʼugö ba Waradaiso andrö.” (Luka 23:43) Datafahaʼö ita sanandrösa khö Yesu Keriso, ba hewisa wamaluania ohitö dödö Lowalangi sahöli-höli dödö.