BA GINÖTÖ öbaso koran, öfaigi TV, mazui öfondro-ndrongo radio, tola öʼila ba örongo wa itugu tedou waʼalösökhi, fasuwöta, ba terorisme. Te so gabula dödö si göna khöu simane fökhö sabölö-bölö mazui faʼamate niha niʼomasiʼöu.

Sofu khöu samösa:

• Hadia daʼa gohitö dödö Lowalangi khögu hegöi ba nösi nomogu?

• Hezo tola usöndra wanolo ba wanaögö abula dödögu?

• Hadia sindruhu-ndruhu so dania waʼohahau dödö?

So wanema li wanofu andrö ba Zura Niʼamoniʼö si tola tafaduhusi tödö.

• Lö göna niha fökhö, faʼatua mboto, ba faʼamate.​—Famaʼeleʼö 21:4

• ”Ba manaoka zi no ombuyu-mbuyu töla, hulö mböhö.”​—Yesaya 35:6

• ”Ba daʼö dania teboka hörö zauʼa.”​—Yesaya 35:5

•  Ifuli tesusugi zi no mate.​—Yohane 5:28, 29

• Lö fökhö saʼae.​—Yesaya 33:24

• Fahöna mbalazo ba niha gulidanö.—Zinunö 72:16

Na öbaso ngaʼörö si föföna, te ömane dödöu fefu daʼö ha si nörö wangifi. Hizaʼi, no ifabuʼu Lowalangi wa ibohouni gulidanö andre ba zi lö aratö, ba no ifatunö khöda Sura Niʼamoniʼö hewisa wamaluania daʼö fefu.

Hizaʼi, tenga ha daʼö nifatunö Zura Niʼamoniʼö khöda. Ifatunö göi hadia zinangea tafalua enaʼö ohahau dödöda ba ginötö andre. Angeraigö atö hadia mbörö wa so gabula dödöu, simane faʼambö-ambö soguna, fökhö, mazui faʼamate niha niʼomasiʼöu. Tola itolo ndraʼugö Sura Niʼamoniʼö enaʼö tola ötaögö fefu gabula dödö andrö, ba tola irara dödöu ba wanöndra fanema li moroi ba wanofu-nofu simane:

• Hana wa göna ita abula dödö?

• Hewisa enaʼö tola tataögö gabula dödö salua?

• Hadia tola ohahau dödö ba zi sambua omo?

• Hadia zalua na mate ita?

• Hadia tola ifuli falukha ita ba niha niʼomasiʼöda si no mate?

• Hana wa faduhu dödöda wa hasambalö ifalua Lowalangi zi no ifabuʼu?

 Faʼadöni dödöu ba wombaso buku andre zangoromaʼö wa omasi ndraʼugö öʼila hadia nifahaʼö Zura Niʼamoniʼö. Tola itolo ndraʼugö buku daʼa. Ero sambua ngenoli, so wanofu si tola manolo yaʼugö enaʼö aboto ba dödöu wamahaʼö Zura Niʼamoniʼö andrö. Zuta niha somasi mamahaʼö yaʼira ba Zura Niʼamoniʼö khö ndra Samaduhuʼö Yehowa. Matötöna göi wa simanö ndraʼugö. Ya ifahowuʼö ndraʼugö Lowalangi sagötö öfahaʼö ndraʼugö ba Zura Niʼamoniʼö!