Töi Lowalangi yaʼia daʼö Yehowa ba lafoʼeluaha ia ”Yaʼia Mbörö Wa Alua”. Yehowa andrö Lowalangi si fahöna faʼabölö, ba samazökhi hadia ia. So khönia waʼabölö ba wamalua somasi ia.

Ba li Heberaiʼo, tesura döi Lowalangi öfa hurufo. Ba li Inggris, lasura ia tobali YHWH mazui JHVH. Me awena lasura Zura Niʼamoniʼö ba li Heberaiʼo tesöndra döi Lowalangi arakhagö 7.000 kali. Faböʼö-böʼö wanötöi töi Yehowa si faudu ba li niʼogunaʼö niha.

▸ Faza 1, ngenoli 15

Lowalangi Zamaʼanö ösi Zura Niʼamoniʼö, iʼogunaʼö niha ba wanura yaʼia. Simane kafalo wohalöwö iʼandrö khö sekretarisnia ba wanura bua gera-erania. Simanö göi Lowalangi iʼogunaʼö gehehania ba wanuturu lala ba zanura Sura Niʼamoniʼö enaʼö lasura mbua gera-erania. Oya lala niʼogunaʼö geheha ba wangombakha bua gera-era Lowalangi, iʼodela gangilata mazui fangifi, awena lasura.

▸ Faza 2, ngenoli 5

Dane-dane wamahaʼö ba Zura Niʼamoniʼö zanolo yaʼita ba wangai angetula si sökhi. Duma-dumania, so goi-goi sangumaʼö, ”ifakiko mböwö si sökhi huhuo si lö sökhi”, daʼa zi tobali famahaʼö khöda wa tola tobali ita niha si sökhi mazui niha si lö sökhi, teʼodaligö haʼökhö fariawö ita. (I Korindro 15:33) So göi goi-goi sangumaʼö ”hadia  nitaru niha sa, daʼö göi nibasinia dania”, daʼö zi tobali famahaʼö khöda wa hasambalö tatema zulö ba nifaluada.​—Galatia 6:7.

▸ Faza 2, ngenoli 12

Turia moroi khö Lowalangi. Ifatunö khöda gohitö dödö Lowalangi, amuata si sökhi, ba samatunö oroisa ba fanguhukunia. So duria samatunö hadia zalua ba zi so föna. Oya ngawalö wamaʼeleʼö ba Zura Niʼamoniʼö si no alua.

▸ Faza 2, ngenoli 13

Oya wamaʼeleʼö ba Zura Niʼamoniʼö sanandrösa khö Mesia salua ba waʼauri Yesu. Faigi kotak ” Famaʼeleʼö sanandrösa khö Mesia”.

▸ Faza 2, ngenoli 17, nisura ba gahe zura.

Ifazökhi gulidanö faradaiso Yehowa si tobali nahia niha sangomasiʼö yaʼia. Lö si tebulö gohitö dödönia. Ba zi lö aratö, ihori fefu waʼalösökhi Lowalangi ba ibeʼe waʼauri si lö aetu khö nono mbanuania.

▸ Faza 3, ngenoli 1

Satana yaʼia daʼö malaʼika si oföna molawa Lowalangi. Lafotöi ia Satana, eluahania ”Solawa”, börö me ilawa Yehowa. Ba lafotöi göi ia Afökha, eluahania ”Samöbögö si Lö Duhu”. Labeʼe töinia daʼö börö me itandrawaisi Lowalangi ba ilimo niha gulidanö.

▸ Faza 3, ngenoli 4

Ifazökhi Yehowa ndra malaʼika ara fatua lö nifazökhinia gulidanö. Lafazökhi ira enaʼö toröi ba zorugo. So ngaotu zuta waʼato ndra malaʼika. (Danieli 7:10) So döira ba faböʼö-böʼö gamuatara, ba ira malaʼika si lö faröi si so fangide-ngideʼö lö latema zumange nibeʼe niha khöra. Faböʼö-böʼö ngawawara, ba faböʼö-böʼö halöwöra. So zohalöwö föna dadaoma Yehowa, so zohalöwö ba wamaʼema oroisania, so zohalöwö ba wanolo ba sanuturu lala ba nono mbanuania si so ba gulidanö, so zamalua fanguhuku Lowalangi, ba so göi zanuriaigö turia somuso dödö. (Zinunö 34:8; Famaʼeleʼö 14:6; 22:8, 9) Ba zi so föna, fao ira khö Yesu ba wasuwöta ba Hamagedo.​—Famaʼeleʼö 16:14, 16; 19:14, 15.

▸ Faza 3, ngenoli 5; Faza 10, ngenoli 1

Gofu hadia nirasoida, niʼera-erada mazui nifaluada si lö faudu ba zomasi Yehowa lafotöi daʼö horö. Börö horö wa tola tekiko wahuwusada khö Lowalangi, andrö ibeʼe khöda goroisa ba goi-goi si tola manolo yaʼita enaʼö böi tafalua horö niʼodödögö. Fefu niwöwöi Yehowa ba mböröta oi moʼahonoa, hizaʼi me molawa Gadamo ba Khawa khö Yehowa, aekhu ira ba horö ba lö moʼahonoa ira saʼe. Andrö atua ira ba mate, ba börö horö ondröita moroi khö Gadamo wa atua ita iadaʼa ba mate.

▸ Faza 3, ngenoli 7; Faza 5, ngenoli 3

Fasuwöta Lowalangi ba wangohori ulidanö tana khö Zatana ba ngawalö waʼalösökhi.

▸ Faza 3, ngenoli 13; Faza 8, ngenoli 18

Banua Lowalangi yaʼia daʼö famatörö nifasindro Yehowa ba zorugo. Yesu Keriso nituyu tobali Razo. Ba zi so föna iʼogunaʼö Mbanuania Yehowa ba wangohori fefu si lö sökhi. Mamatörö dania Mbanua Lowalangi ba gulidanö.

▸ Faza 3, ngenoli 14

Yesu zi oföna ifazökhi Lowalangi moroi ba danö böʼö. Ifatenge ia Yehowa ba gulidanö, mate salahi niha. Me no aefa labunu Yesu, isusugi ia Yehowa. Iadaʼa mamatörö ia ba zorugo tobali Razo ba Mbanua Lowalangi.

▸ Faza 4, ngenoli 2

No ifaʼeleʼö Sura Niʼamoniʼö hawaʼara tohare Mesia. Tohare ia ba gangohorita zi 69 migu, nibörötaigö me döfi 455 SM ofeta ba ndröfi 29 M.

Hana wa taʼila wa ba daʼö ofeta ia ba ndröfi si 29 M? Si 69 migu tebörögö me döfi 455 SM, me ofeta Nehemia ba Yeruzalema ba ibörögö wamazökhi banua andrö. (Danieli 9:25; Nehemia 2:1, 5-8) Simane na lawaʼö ”salusi”, si so ba wangera-ngerada 12 ngawua, simanö göi na lafotöi ”migu”, tatu si so ba wangera-ngerada 7 ngaluo. Migu si so ba wamaʼeleʼö andrö tenga eluahania migu si fitu ngaluo, tobali migu si fitu fakhe. Simane sasese laʼogunaʼö ba Zura Niʼamoniʼö ”sara ngaluo ba döfi labeʼe”. (IV Moze 14:34; Hezekieli 4:6) Eluahania ero samigu fitu fakhe waʼarania, si 69 migu eluahania 483 fakhe (69 x 7). Na taʼerai zi 483 fakhe iʼotarai me döfi 455 SM, aekhu ia ba ndröfi 29 M. Tefaudu me tebayagö idanö Yesu ba tobali Mesia!​—Luka 3:1, 2, 21, 22.

 So wamaʼeleʼö nasa sanandrösa ba migu böʼö, yaʼia daʼö so gonönöta ndröfi fitu fakhe. Bakha ba zi fitu fakhe andre ba daʼö labunu Mesia, me döfi 33 M. Ba ndröfi 36 M, tebörögö wanuriaigö turia somuso dödö sanandrösa ba Mbanua Lowalangi ba ngawalö soi tenga ha ba niha Yehuda.​—Danieli 9:24-27.

▸ Faza 4, ngenoli 7

No ifahaʼö Sura Niʼamoniʼö wa Yehowa Lowalangi andrö Samazökhi, ba yaʼia zamazökhi Yesu fatua lö iwöwöi danö böʼö. (Kolose 1:15, 16) Yesu andrö tenga Lowalangi Fondrege Zabölö. Lö irai tumbu ba dödönia enaʼö fagölö ia khö Lowalangi. Simane me iwaʼö, ”No sebua moroi khögu Nama.” (Yohane 14:28; I Korindro 15:28) Oya agama samahaʼö Lowalangi Sambua Tölu, yaʼia daʼö Ama, Ono, ba eheha niʼamoniʼö. Ngawua wehede ”Lowalangi Sambua Tölu” lö si tesura ba Zura Niʼamoniʼö. Famahaʼö faya daʼö.

Eheha niʼamoniʼö no faʼabölö Lowalangi si lö oroma niʼogunaʼönia ba wamalua somasi ia. Lö moboto ia. Duma-dumania, niha Keriso si föföna, ”fahöna khöra geheha niʼamoniʼö”, ba imane Yehowa, ”Ulau ba niha fefu wöfö gehehagu.”​—Halöwö Zinenge 2:1-4, 17.

▸ Faza 4, ngenoli 12; Faza 15, ngenoli 17

Niha Keriso sindruhu lö laʼogunaʼö röfa ba wamosumange Lowalangi. Hadia mbörö?

1. No ara laʼogunaʼö röfa ba agama faya. Meföna laʼogunaʼö ia ba wamosumange talu mbanua hegöi ba wamalua upacara seks kekafiran. 300 fakhe me no aefa mate Yesu, lö laʼogunaʼö röfa niha Keriso ba wamosumange Lowalangi. Hizaʼi, Kaisar Romawi Konstantin ifazökhi röfa tobali tandra niha Keriso. Laʼogunaʼö daʼö enaʼö abölö tehöngö niha Keriso. Hizaʼi, lö moʼamakhaita röfa andrö khö Yesu Keriso. Imane New Catholic Encyclopedia, ”No so röfa fatua lö si so niha Keriso hegöi ba zi tenga niha Keriso.”

2.    Tenga ba röfa simane si faduhu dödö niha mate Yesu. Sindruhunia ngawua wehede ”röfa” ba li ndrawa Heleni yaʼia daʼö ”eu sadölö”, mazui ”si sara töla geu”. Imane The Companion Bible, ”Ngawua wehede andrö ba li ndrawa Heleni tenga daʼö geluahania dua rozi geu nifariwa.” Mate Yesu ba zi sara töla geu.

3. Lö omasi Yehowa na taʼogunaʼö nadu mazui hadia ia ba wamosumange yaʼia.​—II Moze 20:4, 5; I Korindro 10:14.

▸ Faza 5, ngenoli 12

Ibeʼe goroisa Yesu khö ndra nifahaʼönia ba Wanörö Tödö faʼamatenia. Lafalua daʼö ero röfi ba zi 14 Nisa, si fagölö ba ginötö me lafalua gowasa Fasa iraono Gizaraʼeli. Roti ba agu, no amaedola mboto ba do Yesu, lafaʼema khö zangondrasi Fanörö Tödö andrö. Niha si fao khö Yesu ba wamatörö ba zorugo, laʼa roti ba labadu agu. Niha sanötöna faʼauri si lö aetu ba gulidanö, laʼondrasi Wanörö Tödö andrö, hizaʼi lö laʼa roti ba lö labadu agu.

▸ Faza 5, ngenoli 21

Ngawua wehede ”noso” manandrösa ia ba (1) zi samösa niha, (2) ba gurifö, mazui (3) faʼauri niha ba urifö. Duma-dumania:

• Samösa niha. Me iwöwöi Gadamo Lowalangi, imane ba I Moze 2:7, ”Tobali sonoso niha andrö.”

• Urifö. ”Me Anönö Danö Idanö, imane Sura Niʼamoniʼö, ”He fofo ba he urifö niha ba he utu ndruʼu, fefu hadia ia zanana-nana ba gulidanö, ba dozi niha. Fefu zi so noso ba nikhu, si so ba danö yawa, ba mate.”​—I Moze 7:21, 22.

• Faʼauri niha ba urifö. Imane Yehowa khö Moze, ”Noa sa ahori mate zangalui nosou fefu.”​—II Moze 4:19, NW.

   Baero daʼö, na so nifalua niha soroi ba ’nosonia maʼasambua’, eluahania aoha gölönia wamalua, ihorigö waʼabölönia.​—Mataiʼo 22:37; V Moze 6:5.

▸ Faza 6, ngenoli 5; Faza 15, ngenoli 17

Ngawua wehede ”geheha” ba li Heberaiʼo hegöi ba li ndrawa Heleni faböʼö-böʼö geluahania ba Terjemahan Dunia Baru li Inggris. Tola daʼö geluahania si tebai iʼila niha, simane angi, noso niha mazui urifö. Tola göi daʼö geluahania boto eheha mazui eheha niʼamoniʼö, fangabölö moroi khö Lowalangi. Lö ifahaʼö ita Sura Niʼamoniʼö wa auri noso niha si no mate.​—Zinunö 104:29; Mataiʼo 12:43, NW; Luka 11:13.

▸ Faza 6, ngenoli 5; Faza 15, ngenoli 17

Gehena yaʼia daʼö töi mbawa danö sahatö ba Yeruzalema, nahia wanunu sasao. Tenga eluahania ba ginötö Yesu so gurifö mazui niha nitunu auri ba daʼö. Gehena andre ha amaedola nahia niha si no mate si lö fanötöna. Me iwaʼö Yesu wa so nitiboʼö ba Gehena, eluahania faʼatekiko si lö aetu.​—Mataiʼo 5:22; 10:28, NW.

▸ Faza 7, ngenoli 20

Daʼö wangandrö nibeʼe Yesu me ifahaʼö ndra nifahaʼönia ba wangandrö. Lafotöi ia fangandrö Zoʼaya. Duma-dumania, ifahaʼö ita Yesu enaʼö taʼangandröi:

• ”Yateʼamoniʼö döiu”

  Taʼandrö enaʼö teʼamoniʼö döi Yehowa moroi ba ngawalö zi lö sökhi. Enaʼö si so ba zorugo ba ba gulidanö lafosumange ba laʼamoniʼö döi Lowalangi.

•  ”Yatobali Banuau fefu niha”

  Taʼandrö enaʼö ihori gulidanö tana khö Zatana famatörö Lowalangi, enaʼö mamatörö ia ba gulidanö, ba ibaliʼö faradaiso gulidanö.

• ”Yaʼitörö zomasi ndraʼugö . . . ba gulidanö”

  Taʼandrö enaʼö alua gohitö dödö Lowalangi ba gulidanö, lasöndra waʼauri si lö aetu ba Waradaiso niha soʼahonoa simane ohitö dödö Yehowa ba mböröta.

▸ Faza 8, ngenoli 2

Ibeʼe höli Yehowa ba wangefaʼö niha gulidanö moroi ba horö ba ba waʼamate. Höli no amaedola ba wowöli mangawuli faʼauri soʼahonoa si no itayaigö Adamo, ba ba wangaʼazökhi mangawuli amakhaita niha khö Yehowa. Ifatenge Yesu Lowalangi ba gulidanö enaʼö mate ba wangöhöli niha. Me no mate Yesu, awena so dötönafö ba niha gulidanö ba wanöndra faʼauri si lö aetu ba ba wogamö faʼamoʼahonoa.

▸ Faza 8, ngenoli 21; Faza 9, ngenoli 13

Nifaʼeleʼö Danieli nitutunö ba faza 4 ba mbuku andre, zamahaʼö yaʼita wa no mosindro Mbanua Lowalangi me döfi 1914.

Famaʼeleʼö: Ibeʼe wangifi khö Razo Nebukanesa Yehowa sanandrösa ba geu sebua niʼobö. Ba wangifi andrö no murate faoma siʼöli mbörö geu niʼobö andrö enaʼö lö moliwiö irugi zi ”mewitu fakhe” si no muhonogöi khönia. Na no ahori zi mewitu fakhe, awena tola moliwiö geu andrö.​—Danieli 3:31; 4:7-13.

 Hadia geluaha wamaʼeleʼö andrö: Eu amaedola wamatörö Lowalangi. Ba zi haʼuga fakhe, ifataro razo ba Yeruzalema Yehowa ba wamatörö iraono Gizaraʼeli. (I Ngaʼötö 29:23) Fefu razo nifataro Lowalangi andre lalawa ia, andrö lö aʼozu wamatöröra. Adudu Yeruzalema me döfi 607 SM. Ba daʼö ibörögö si ”mewitu fakhe” andrö. (II Razo 25:1, 8-10; Hezekieli 21:25-27) Aefa daʼö imane Yesu, ”Ba nihundra-hundra niha baero dania Yeruzalema, irege no moʼahonoa götö niha baero andrö”, eluaha niwaʼönia andrö manandrösa ba zi ”mewitu fakhe”. (Luka 21:24) Lö sahori zi ”mewitu fakhe” andrö me so Yesu ba gulidanö. No ifabuʼu Yehowa wa ifataro Razonia dania ba gafuriata zi ”mewitu fakhe” andrö. Yesu zi tobali Razo ba wamatörö andre, solohe howu-howu sebua ba nono mbanua Lowalangi ba gulidanö sagötö faʼara.​—Luka 1:30-33.

Faʼara zi ”mewitu fakhe”: Faʼara zi ”mewitu fakhe” yaʼia daʼö 2.520 fakhe. Na taʼerai zi 2.520 fakhe iʼotarai ndröfi 607 SM, aekhu ia ba ndröfi 1914. Ba daʼö ibörögö Yehowa ifataro Yesu Keriso tobali Razo ba Mbanua Lowalangi ba zorugo.

Hana wa tesöndra zi 2.520 fakhe? Ifatunö ba Zura Niʼamoniʼö wa si tölu amatonga fakhe faʼarania 1.260 ngaluo. (Famaʼeleʼö 12:6, 14) Si ”mewitu fakhe” yaʼia daʼö dua kali tölu fakhe amatonga, mazui 2.520 ngaluo. Si 2.520 ngaluo fagölö ira zi 2.520 fakhe, börö me so ba zura, ”sara ngaluo, ba döfi labeʼe.”​—IV Moze 14:34; Hezekieli 4:6.

▸ Faza 8, ngenoli 23

Fehede ”salawa malaʼika” eluahania ”satua malaʼika”. Ba Zura Niʼamoniʼö ha samösa nifotöi salawa malaʼika, töinia Mikhaeli.​—Danieli 12:1; Yuda 9.

Mikhaeli andrö Salawa malaʼika si lö faröi khö Lowalangi. Imane ba Wamaʼeleʼö 12:7, ”Mikhaeli andrö ba malaʼikania, ba fasuwö ba naga andrö . . . awö malaʼikania.” Imane sura Wamaʼeleʼö, Yesu andrö dania zi tobali Salawa malaʼika Lowalangi, ba Mikhaeli andrö töi böʼö khö Yesu.​—Famaʼeleʼö 19:14-16.

▸ Faza 9, ngenoli 4

Eluahania inötö waʼalua ngawalö zi lö sökhi ba gulidanö fatua lö ihori gulidanö tana khö Zatana Banua Lowalangi. Fagölö ia na lawaʼö ”faʼatua danö” mazui ’feʼaso Nono niha’, inötö sasese ifatunö Sura Niʼamoniʼö sanandrösa ba zalua andrö. (Mataiʼo 24:3, 27, 37) Tebörögö ’ginötö safuria’ andrö me mamatörö Mbanua Lowalangi ba zorugo ba ndröfi 1914, ba afuriatania dania ba Hamagedo na ifakiko gulidanö tana khö Zatana.​—II Timoteo 3:1; II Fetero 3:3.

▸ Faza 9, ngenoli 5

Me isusugi niha si no mate Lowalangi daʼö nifotöi femaoso zi mate. So dasiwa niha si no tesusugi nisura ba Zura Niʼamoniʼö. Nisusugi Gelia, Elisa, Yesu, Fetero, ba Faulo. Wa tola lafalua dandra sahöli-höli dödö andrö börö waʼabölö moroi khö Lowalangi. No ifabuʼu Yehowa wa isusugi dania ’niha satulö ba si lö atulö’ ba wanöndra faʼauri ba gulidanö. (Halöwö Zinenge 24:15) So göi  nisusugi si möi ba zorugo nifatunö ba Zura Niʼamoniʼö. Yaʼira andre si no ibayoini Lowalangi si fao awö Yesu.​—Yohane 5:28, 29; 11:25; Filifi 3:11; Famaʼeleʼö 20:5, 6.

▸ Faza 9, ngenoli 13

Fakelemu sambua lala wahuhuosa ba mbekhu, tola fahuhuo samösa ira, ba so göi zangodela duku ma samaʼeleʼö. Lafalua zimane daʼö börö me faduhu dödöra wa auri noso niha si no mate ba tobali bekhu si so faʼabölö. Bekhu andre göi ladönisi dödö niha ba wolawa Lowalangi. Oya gamuata soʼamakhaita ba mbekhu, simane famaigi döfi, mamaʼeleʼö, mameʼe fokasi, fakelemusa, nifaduhusi tödö niha meföna. Oya mbuku, majalah, horoskop, film, gambara, sinunö soʼamakhaita ba mbekhu, hulö na lö fasala wamaigida. Oya nifalua na lakoʼo zi mate, simane na labeʼe wangasi, latörö tödö waʼamate, fameʼe gö ba zi no mate, ritus kejandaan, mazui owasa soʼamakhaita ba niha si no mate, fefu daʼö göi moʼamakhaita ba mbekhu. So göi niha sangogunaʼö dalu-dalu ba ginötö laʼalui lala wangogunaʼö faʼabölö moroi ba mbekhu.​—Galatia 5:20; Famaʼeleʼö 21:8.

▸ Faza 10, ngenoli 10; Faza 16, ngenoli 4

Yehowa no Lowalangi Fondrege Zabölö, ba yaʼia zomböi banua siawa awö danö. (Famaʼeleʼö 15:3) Andrö wa yaʼia Zangokhögö fefu hadia ia ba yaʼia zalawa ba nifazökhinia. (Zinunö 24:1; Yesaya 40:21-23; Famaʼeleʼö 4:11) Yaʼia zangaʼasogö goi-goi ba nifazökhinia. Yehowa zi tola motatugöi haniha zi tobali samatörö. Taʼoʼawögö waʼasalawa Lowalangi na taʼomasiʼö ba taʼoʼö linia.​—I Ngaʼötö 29:11.

▸ Faza 11, ngenoli 10

Fondru-ndrugö ono ba dalu no amuata niʼodödögö ba wamunu ono si lö tumbu nasa. Tenga börö wa no alabu mazui börö wökhönia. Iʼotarai me awena so ia ba dalu ninania, lafotöi ia saʼe samösa niha.

▸ Faza 13, ngenoli 5

Daʼa nifalua ndra doto ba wameʼe do si no muhenaigö mazui do niha böʼö ba mboto zi samösa niha. Itaria ahori laʼogunaʼö fefu ndro andrö mazui fazambua moroi ba zi öfa ngawalö komponen utama darah. Si öfa komponen utama darah yaʼia daʼö, plasma, sel darah merah, sel darah putih, ba keping darah.

▸ Faza 13, ngenoli 13

Ba Zura Niʼamoniʼö, ngawua wehede ”degu-degu” tenga eluahania lahuku. Na lategu ita, labeʼe khöda wanuturu lala, famahaʼö, ba mene-mene. Lö irai amuʼi Yehowa ba niha nitegunia. (Gamaedola 4:1, 2, NW) Yehowa duma-duma si sökhi ba zatua. Ibeʼe degu-degu si sökhi irege omasi niha latema. (Gamaedola 12:1) Iʼomasiʼö nono mbanuania Yehowa ba ifahaʼö ira. Ibeʼe wanuturu lala na itaria fasala niʼera-erara ba itolo ira enaʼö laʼokhögö wangera-ngera ba amuata somasi Lowalangi. Satua, labeʼe degu-degu ba ndraonora enaʼö aboto ba dödöra hana wa moguna so khöra woloʼö. Moguna göi mufahaʼö ira ba wangomasiʼö Yehowa, fangomasiʼö Taromalinia, Sura Niʼamoniʼö, ba enaʼö aboto ba dödöra goi-goinia.

▸ Faza 14, ngenoli 13

Tebai taʼila mbekhu börö me boto eheha ira si so faʼabölö. Yaʼira andre malaʼika si lö sökhi. Börö me lö laʼoʼö li Lowalangi, andrö wa tobali ira malaʼika si lö sökhi si faʼudu khö Lowalangi. (I Moze 6:2; Yuda 6) Fao ira khö Zatana ba wolawa Yehowa.​—V Moze 32:17; Luka 8:30; Halöwö Zinenge 16:16; Yakobo 2:19.

▸ Faza 16, ngenoli 4